Pagpapadakula nin mga Aking May Moral na Gawe-Gawe—Posible Pa daw Iyan?

“NABUBUHAY kita ngonyan sa sarong komplikadong marhay na sosyedad, sarong napapalaen na marhay na kultura, kun saen mayo nin dai nagliliwat na kodigo sa moralidad,” an komento ni Robert Glossop kan Institusyon nin Vanier Para sa Pamilya sa Ottawa, Canada. Na may anong resulta? An sarong bareta sa diaryong The Toronto Star nagsasabi: “An pagbados nin mga tin-edyer, kadahasan nin mga hoben asin paghugot nin mga tin-edyer gabos nagdadakol.”

An problema nakaabot na sa luwas kan Amerika del Norte. Si Bill Damon, direktor kan Center for Human Development sa Unibersidad nin Brown sa Rhode Island, E.U.A., inestudyaran an mga problemang ini sa Britania asin sa iba pang mga nasyon sa Europa, siring man sa Australia, Israel, asin Hapon. Itinokdo nia an pagruro kan mga iglesia, eskuelahan, asin iba pang mga institusyon sa pagtao nin giya sa mga hoben. An satong kultura, an paniniwala nia, “dai aram an kaipuhan kan mga aki tanganing magkaigwa nin karakter asin pagkatatao.” Sa pagsitar sa mga eksperto sa pagigin magurang na nagtotokdo na “an disiplina peligroso para sa salud asin ikararahay nin mga aki,” marigon na nagtutubod si Damon na ini “sarong resipe sa pagpapadakula nin masinuway, masumbikal na mga aki.”

Ano an kaipuhan nin mga hoben ngonyan? Sinda dayaday na nangangaipo nin mamomoton na pagsasanay na nagtatanos kan isip asin puso. An laen-laen na hoben nangangaipo nin laen-laen na klase nin disiplina. Kun minomotibar nin pagkamoot, parateng ikatatao an disiplina paagi sa pangangatanosan. Iyan an dahelan na sinasabi sa sato sa Talinhaga 8:​33 na ‘maghinanyog sa disiplina.’ Pero, an nagkapira dai “mapatanos sa tataramon sana.” Para sa sainda, tibaad kinakaipuhan an angay na padusa huli sa pakisuway, na itinatao sa angay na sokol. (Talinhaga 17:​10; 23:​13, 14; 29:19) Sa paggibo kan suhestion na ini, dai inaaprobaran kan Biblia an anggot na mga pamamakol o makuring paghampak, na puedeng makalugad asin makadanyar sa aki. (Talinhaga 16:32) Imbes, maninigong masabotan kan aki kun taano sia ta itinatanos asin mamatean nia na iyan huli ta an magurang nasa kampi nia, na nasa lado nia.​—Ikomparar an Hebreo 12:​6, 11.

An siring na praktikal asin marahay na sadol sa Biblia itinatampok sa librong An Sekreto sa Kaogmahan nin Pamilya.