Maogmang Bareta Manongod sa Paraiso sa Tahiti
TAHITI! An ngaran garo baga may pan-akit na napapalaen sa pambihirang paagi. Ginibo iyan na bantog kan mga pintor asin parasurat na siring ki Paul Gauguin, Robert Louis Stevenson, asin Herman Melville, na an paglaladawan sa tropikal na kagayonan asin katrangkilohan kan Islas sa Timog na Dagat nakabihag sa interes nin dakol.
An Tahiti iyo an pinakadakula sa labi sa 120 isla sa Polinesia nin Pransia, na manonompongan sa Timog Pasipiko. Minsan ngani an islang ini sa Timog na Dagat haros kaparehong kahulogan nin paraiso sa isip nin kadaklan na tawo, an mga taga-Tahiti kaipuhan pa man giraray na makadangog manongod sa saro pang paraiso na maabot sa dai na mahahaloy. (Lucas 23:43) An Mga Saksi ni Jehova, na minaabot na sa 1,918 sa Tahiti ngonyan, sibot sa pagbareta sa 220,000 katawo mapadapit sa maogmang bareta na an Kahadean nin Dios sa dai na mahahaloy maintrodusir nin tunay na paraisong mga kamugtakan bako sanang sa Tahiti kundi pati sa bilog na daga.—Mateo 24:14; Kapahayagan 21:3, 4.
Sa dakol na taon an paghuhulit sa Tahiti dinirehiran kan sangang opisina kan Watch Tower Society sa Fiji, mga 3,500 kilometros an rayo. An halawig na distansiang ini nagpadepisil kan mga bagay-bagay, asin an pag-oswag maluya. Sa siring, kan Abril 1, 1975, inestablisar an sangang opisina sa Tahiti, asin nagsenyalar iyan nin panahon nin dakulang pagbabago sa aktibidad nin tunay na mga Kristiano sa teritoryong ini. Ano an sunod-sunod na pangyayari na suminagkod sa pagbabagong ini, asin paano nagpoon an paghuhulit sa Tahiti?
Sadit na Kapinonan
An maogmang bareta kan Kahadean enot na nadangog sa Tahiti kan mga taon nin 1930, asin dakol sa mga tagaisla, na igwa nin awad-awad na paggalang sa Biblia, naghimate na may dakulang interes. Minsan siring, bilang resulta nin pagprohibir kan gobyerno asin iba pang mga restriksion, mayo pa giraray nin mga Saksi sa isla sagkod sa huring kabtang kan dekada 1950. Kan panahon na idto, si Agnès Schenck, na propiong taga-Tahiti na nag-iistar sa Estados Unidos, nagdesisyon na magbuelta sa Tahiti kaibanan an saiyang agom asin aki. Ipinaliliwanag nia kun paano iyan nangyari gabos.
“Sa pandistritong kombension kan 1957 sa Los Angeles, si Tugang na Knorr [na presidente kaidto kan Watch Tower Society] nagpaliwanag na dakula an pangangaipo sa mga parahayag kan Kahadean sa Tahiti. Sarong taon na akong bautisado kaidto, asin nagkagsing ako, ‘Kaya magduman kita sa Tahiti!’ An duwang pamilya, an mga Neill asin mga Carano, na mararahay na amigo niamo, nadangog ako. Sinabihan ninda kami na gusto nindang mag-iba sa samo, alagad ta bakong gayong dakol an kuarta mi. An sakong agom halawig nang panahon na naghehelang, asin an sakong aki hoben pang marhay. Kaya nagin masakit sa samo an paghale. An mga amigo niamo sa kataed na mga kongregasyon nabaretaan an samong kamawotan, asin pinadarahan ninda kami nin pondo asin mga gamit sa harong. Dangan kan Mayo 1958 naglayag kami paduman sa Tahiti na dara, kabilang nin iba pang gamit, an 36 na bed sheet!
“Kan mag-abot kami sa Tahiti, biyo na akong dai tatao duman huli ta 20 anyos na akong mayo sa islang iyan. Nagpoon kaming maghulit, alagad kaipuhan kaming mag-ingat ta an samong Kristianong gibohon nasa irarom nin pagprohibir. Kaipuhan na itago niamo an mga magasin, asin Biblia sana an ginagamit niamo. Kan enot nagpatotoo sana kami sa mga tawo na igwa na nin suskripsion sa mga magasin na An Torrengbantayan asin Awake!
“Si Clyde Neill asin David Carano, kaibanan an saindang mga pamilya, nakiiba sa samo pakalihis kan internasyonal na kombension sa Siudad nin Nueva York kan 1958. Naghulit kaming iribanan asin inimbitaran niamo an mga tawo na maghinanyog sa mga pahayag na itinatao sa harong kan mga tugang. Luway-luway na naorganisar an mga bagay-bagay, asin pinonan niamo an sarong grupo sa pag-adal sa Biblia na may 15 katawo. Pakalihis nin tolong bulan an mga Neill asin an mga Carano kinaipuhan nang maghale huli ta an saindang mga visa bilang turista paso na. Kaya an mga tugang na lalaki nagdesisyon na bago kan saindang paghale, babautismohan ninda an gabos na interesado na kualipikado. Nagkapribilehio ako na magin interprete kan enot na pahayag sa bautismo. Sa okasyon na ini walong propiong tagaisla an nagsimbolisar kan saindang pagdusay ki Jehova paagi sa bautismo. Dangan an mga Neill asin an mga Carano nagbuelta na sa Estados Unidos.
“An paghuhulit nagpadagos. Inorganisar niamo an samong sadiri sa saradit na grupo asin dinalaw an mga tawo sa mga banggi. Parate na an pakikipag-olay sa mga interesado minasagkod sa matanga. Kun beses dawa an mga ministrong Protestante nakikiayon sa mga pag-orolay. Kan 1959 naorganisar an enot na kongregasyon. Dangan, sa dakulang kaogmahan niamo, kan 1960 opisyal nang minidbid kan gobyerno an asosasyon kan Mga Saksi ni Jehova. An enot na mga taon na idto pano nin kagayagayahan asin pinakamaogmang mga panahon sa espirituwal. Binendisyonan nanggad ni Jehova an samong desisyon na magbalyo sa kun saen mas dakula an pangangaipo.” Si Tugang na Schenck ngonyan 87 anyos na, asin padagos pa siang fiel na naglilingkod ki Jehova sa saiyang kongregasyon.
An Gibohon Nag-abante
Kan 1969 an duwang Saksi hale sa Pransia, si Jacques asin Paulette Inaudi, idinestino sa Tahiti bilang mga espesyal payunir. Ginigirumdom ni Jacques: “Kan kami mag-abot sa Tahiti, igwa sana nin 124 parahayag, sarong kongregasyon sa Papeete, asin duwang espesyal payunir sa Vairao, na nasa peninsula.” An peninsula kasugpon kan Tahiti paagi sa sarong istmus. An “Katoninongan sa Daga” na Internasyonal na Asamblea madali nang gibohon. “Idto an enot kong eksperyensia sa pag-organisar nin sarong kombension,” an pagpapadagos ni Jacques. “Kaipuhan na iplano niamo an sarong sesyon sa Ingles para sa mga bisita, organisaron an sarong orkestra para sa mga awit sa Kahadean, asin praktison an duwang drama. An gabos na gibohon na ini nahaman na 126 sana an parahayag. Nasisierto ko na si Jehova an naggibo kan dakulang kabtang kaiyan.” An nag-atender na 488 nagin labi-labing kaogmahan para sa mga tagaisla. Para sa kadaklan sa sainda, idto an enot na pangyayari na makamidbid an kapwa mga Saksi hale sa ibang kadagaan.
Dai nahaloy pagkatapos, si Jacques Inaudi inasignaran bilang an nagbibiaheng paraataman. Mantang nagsosongko sia sa manlaenlaen na isla, naheling nia na dakol an interesado alagad ta kakadikit kan mga parahayag kan Kahadean na makultibar kaiyan. “Iyan an dahelan na sakuyang inenkaminar an dakol na pamilya na magbalyo sa mga islang ini tanganing maglingkod kun saen mas dakula an pangangaipo,” an paliwanag ni Jacques. “Kaya sa padikitdikit, an maogmang bareta nakalakop sa kapurohan na iyan.” Si Tugang na Inaudi naglingkod bilang nagbibiaheng paraataman magpoon kan 1969 sagkod kan 1974, asin ngonyan saro siang magurang sa saro kan mga kongregasyon sa Tahiti.
Kabilang sa mga naghimate sa pagparigon sa boot ni Tugang na Inaudi iyo si Auguste Temanaha, na saro sa walong nabautismohan kan 1958. Isinasaysay nia kun ano an nangyari. “Kan 1972 an paraataman sa sirkito, si Jacques Inaudi, pinarigon an samong boot na konsideraron an pagbalyo tanganing maglingkod sa Huahine, saro sa Islas Sotavento sa grupo kan Islas Sosyedad. Nagduwaduwa ako ta an nagigibo ko pa sana pagbasa kan Biblia sa kongregasyon asin sa paghona ko dai pa ako kualipikadong pagkatiwalaan nin siring na paninimbagan. Minsan siring, si Tugang na Inaudi padagos na sinasabihan ako, ‘Dai ka mahadit, kaya mo iyan!’ Paghaloyhaloy nagdesisyon kami. Sa siring, kan 1973 ipinabakal niamo an gabos asin kaibanan an tolo ming aki na saradit pa nagbalyo kami sa Huahine.
“Pag-abot niamo, naheling ko na kaipuhan kong ponan an gabos na bagay—an Pag-adal sa Torrengbantayan, an Teokratikong Paadalan sa Pagmiministro, asin iba pa. Bako idtong pasil, alagad namatean niamo an proteksion asin tabang ni Jehova. Sa nagkapirang pangyayari tinabangan nia kami na makanompong nin maiistaran. Dangan, kan an sarong grupo nin mga paratumang magprobar na pahaleon an mga Saksi sa isla, an sarong politiko duman nagtindog tanganing idepensa kami. Totoong-totoo, binantayan kami ni Jehova sa bilog na panahon na idto.” Ngonyan, duwa na an kongregasyon sa Huahine—sarong Pranses na kongregasyon na may 23 na parahayag asin sarong Tahisiano na may 55 parahayag.
Kan 1969, si Hélène Mapu idinestino bilang espesyal payunir tanganing maghulit sa peninsula. “Kadakol kan interesado sa peninsula, asin sa halipot na panahon, nakapoon ako nin dakol na pag-adal sa Biblia,” an sabi ni Hélène. Dai nahaloy sarong sadit na kongregasyon an naorganisar sa Vairao, alagad igwa nin pangangaipo sa kamagurangan. Pag-abot nin panahon, si Colson Deane, na kaidto nag-iistar sa Papara na 35 kilometros an rayo, nakatabang. “Kinaipuhan kaming magin organisadong marhay tanganing makapaglingkod sa Vairao,” an pagsaysay ni Tugang na Deane. “Nagtatrabaho ako kaidto sa Faaa, na 70 kilometros an rayo sa Vairao sa ibong kan isla. Pagkatapos nin trabaho, kaipuhan na maghidale ako sa pagpuli, kuanon an sakong pamilya, dangan magdiretso sa Vairao. Paghaloyhaloy kinaipuhan niamong bumalyo sa Faaa huli sa sakong trabaho. Makakaya pa daw niamong tabangan an Kongregasyon nin Vairao? Gusto talaga niamong matabangan an mga tugang duman, kaya nagdesisyon kami na magpadagos. Sa mga bangging may pagtiripon bihira kaming makapuli bago magmatanga huli ta kinakaipuhan an nagkapira ming biahe sa paghatod sa harong kan mga mayo nin sakayan. Ginibo niamo ini sa laog nin limang taon. Dakulang kagayagayahan niamo ngonyan na maheling an apat na kongregasyon sa parteng ini kan isla, asin igwa kami nin mahal na marhay na mga memorya kan kaaldawan na idto.”
An Tahiti Nagin Sangang Opisina
Kan 1974 an kabilangan nin mga parahayag kan Kahadean sa Tahiti nagin 199. Kan suminunod na taon kan si N. H. Knorr asin F. W. Franz, presidente asin bise presidente kaidto kan Watch Tower Society, magbisita sa Polinesia nin Pransia, naheling ninda na magigin orog na praktikal kun an paghuhulit sa Polinesia nin Pransia didirehiran, bakong hale sa Fiji na labing 3,500 kilometros an rayo, kundi hale sa Tahiti. Sa siring, kan Abril 1, 1975, an sangang opisina sa Tahiti nagpoon sa pagpunsionar, asin an paraataman sa sirkito, si Alain Jamet, ninombrahan bilang an paraataman sa sanga.
Kaidtong duwang taon na an nakaagi, ikinasaysay ni Tugang na Jamet an makangangalas na mga bendisyon hale ki Jehova. “Magpoon kan 1975 ginibo an dakulang paghihingoa na darahon an maogmang bareta sa gabos na isla asin kapurohan sa samong teritoryo, na an sakop siring kahiwas kan Solnopan na Europa. An mga resulta talagang nakaoogma. Pag-abot kan 1983 an kabilangan kan mga parahayag nakaabot sa 538. Kan taon na idto itinogdok an sarong edipisyo para sa sangang opisina asin Erokan na Bethel sa Paea. Ngonyan, may mga 1,900 na parahayag na warak sa 30 kongregasyon sa Islas Sosyedad, sarong kongregasyon asin sarong napapasuway na grupo sa Islas Austral, sarong kongregasyon asin duwang napapasuway na grupo sa Marquesas, asin nagkapipirang napapasuway na grupo sa Tuamotu asin Islas Gambier. Dakol na bagong Kingdom Hall an itinotogdok—tolo sa Marquesas asin pito sa Tahiti—tanganing mangataman sa padakol nang padakol na bagohan na nag-aatender sa mga pagtiripon. Sa nakaaging 20 taon, totoong binendisyonan ni Jehova an samong mga paghihingoa na kultibaron an langtad kan Tahiti.”
Kadakol Pa kan Gigibohon
An mga posibilidad nin pag-oswag sa Polinesia nin Pransia marahayon. Kan Marso 23, 1997, nasa 5,376 an nakitipon sa Mga Saksi ni Jehova sa bilog na Polinesia nin Pransia para sa Memorial kan kagadanan ni Jesu-Cristo. Tanganing mapanigoan an espirituwal na mga pangangaipo kan mga interesadong ini, an satong mga publikasyon sa Biblia makukua na sa nagkapirang lokal na lenguahe. Apuera sa Tahisiano, an mga babasahon inandam man sa Paumotu, na itinataram sa Kapurohan nin Tuamotu asin sa Amihanan asin Timog na Marquesas.
An daing saltong pag-oswag asin an mararahay na eksperyensia nakatabang sa mga parahayag kan Kahadean sa Tahiti na orog na maapresyar an pagkamoot asin pagpapasensia ni Jehova, “na an kabotan iyo na an gabos na klase nin tawo makaligtas asin makaabot sa tamang kaaraman kan katotoohan,” dawa sa hararayong isla kan Timog na Dagat. (1 Timoteo 2:4) An Mga Saksi ni Jehova sa Tahiti asin sa iba pang mga isla kan Polinesia nin Pransia bilog an pagtubod sa panuga ni Jehova: “Sa sakuya an mga isla mismo maglalaom, asin sinda maghahalat sa sakuyang takyag.”—Isaias 51:5.
[Mapa sa pahina 26]
(Para sa aktuwal na format, helingon an publikasyon)
An sangang opisina sa Tahiti nag-aataman sa mga pangangaipo kan Polinesia nin Pransia
AUSTRALIA
[Retrato sa pahina 25]
Poon sa wala patoo: Si Alain Jamet, Mary-Ann Jamet, Agnès Schenck, Paulette Inaudi, asin Jacques Inaudi
[Retrato sa pahina 27]
Sangang opisina sa Tahiti