Saindang ‘Binakal an Katotoohan’!

“Bakalon mismo an katotoohan asin dai iyan ipabakal.” (Talinhaga 23:​23) Siring an maigot na sadol kan tawong madonong na si Salomon. Mantang puedeng sabihon ini manongod sa katotoohan sa pankagabsan, ini espesyalmenteng tama kun manongod sa katotoohan na yaon sa Tataramon nin Dios, an Biblia. An siring na katotoohan puedeng gumiya pasiring sa buhay na daing sagkod! (Juan 17:​3, 17) Pero, obserbaran na an pagkaigwa kan siring na katotoohan dai nangyayari na mayo nin paghihingoang kaipuhan. An saro dapat na andam na “bakalon” iyan, an boot sabihon, magsakripisyo o igwang babayaan na bagay tanganing kamtan iyan. (Ikomparar an Mateo 13:​45, 46.) Sa pankagabsan, an mga tawo habong gibohon ini. Alagad sa dakol na kadagaan, nagdadakol an kabilangan nin mapusong mga indibiduwal na nagbabakal nin katotoohan kan Biblia​—parate sa dakulang personal na pagsasakripisyo.

Halimbawa an Mga Saksi ni Jehova sa nasyon sa Solnopan na Aprika na Ghana. Kan Hunyo nin 1989, igwa na nin labing 34,000 na indibiduwal sa nasyon na iyan na uminako kan katotoohan sa Biblia asin aktibong nagpapahayag na kaiyan sa iba. Dangan legal na ipinangalad an pampublikong paghuhulit. Minsan siring, an may mga sadiosan na puso padagos na ‘binabakal an katotoohan’​—sa ibong nin legal na mga olang. An pangangalad kan gibohon natapos kan Oktubre 31, 1991, asin sa kabangaan kan 1995, mga tolo may kabangang taon sana pakalihis na haleon an mga restriksion na ini, an kabilangan kan aktibong mga Saksi ni Jehova sa Ghana luminangkaw sagkod sa 46,104! Asin ngonyan na taon an kabilangan labi nang 52,800.

Ano an nakaakit sa mga tawo sa katotoohan kan Tataramon nin Dios? Anong mga pagsasakripisyo an kinaipuhan na gibohon nin nagkapira tanganing ‘mabakal an katotoohan’? Bilang simbag, helingon niato an mga eksperyensia nin tolong Kristianong taga-Ghana.

Naakit sa mga Katokdoan kan Biblia

Enot niatong estudyaran an sarong babae na labi pa sanang 20 anyos. An saiyang ama sarong pastor, alagad ta pinili niang bayaan an relihion kan saiyang ama. An rason? An saiyang pagkamoot sa katotoohan.

Sarong beses sia nagpaliwanag: “An mga Saksi parate na nagduduman sa samong harong kun ginigibo ninda an saindang pagharongharong. Pakalihis nin pirang pakikipag-olay sa sainda, naaraman ko na an itinotokdo ninda marigon na napapasikad sa Biblia. Ihinapot ko an mga topiko na arog kan Trinidad, kalayo sa impierno, inmortalidad kan kalag, asin espesyalmente an pagpaomay paagi sa pagtubod. Marigon akong nagtutubod na an mga doktrinang ini hale sa Biblia. Alagad tinabangan ako kan mga Saksi na masabotan na iyan bakong totoo.”​—Para sa pagparisa kan punto de vista kan Biblia sa siring na mga topiko, helingon tabi an Marcos 13:​32; Roma 6:​23; Gibo 10:​40; asin 1 Corinto 13:​8-​10.

An hoben na babae nagpadagos: “Pero, makosog an pagtumang kan sakuyang pamilya, nangorogna an sakuyang ama. Naghohona sia na ako nadadaya. Minsan siring, aram ko na an sakuyang nanonodan sa Mga Saksi ni Jehova iyo an katotoohan. Pinagmaigotan ko na maaraman kan sakong ama an mga bagay na ini na hale sa Biblia, alagad habo niang magdangog. An totoo, uminorog pa an pagtumang.

“Pero dai ako natakot. Aram ko na tunay na kaaraman sana an magiya pasiring sa buhay na daing sagkod sa Paraiso, asin ako determinadong mangapot dian. Kan maaraman kan lokal na mga Saksi an mga problema na sakuyang inaatubang, mamomoton ninda akong tinabangan, na pinaririgon an sakuyang boot asin itinatao an sakuyang mga pangangaipo. Idinoon kaini sa sakuya an mga tataramon ni Jesus na yaon sa Juan 13:​35: ‘Paagi kaini an gabos makaaaram na kamo an sakong mga disipulo, kun kamo nagkakaminorootmootan.’ An sakuyang marigon na pagtubod na an Mga Saksi ni Jehova an nagsasagibo kan tunay na relihion ruminarom. Paghaloyhaloy, kan mariparo kan sakuyang mga magurang na binago ko an sakuyang buhay asin iyan naparahay, nagustohan ninda an saindang naheling, asin an saindang aktitud sa sakuya nagbago​—nin marhay kaya an sakuyang ama naghagad sa mga Saksi na adalan sa Biblia an sakuyang matuang tugang na lalaki!”

Pagpatunay kan Katotoohan sa Sadiri

An ‘pagbakal kan katotoohan’ saro man na angat para sa nagkapirang hoben na pinadakula nin mga magurang na Saksi. An nagkapirang hoben may inklinasyon na ipasipara na sana an katotoohan kan Biblia. Kun dai ninda magibong isapuso an siring na mga katotoohan, an saindang pagtubod may tendensiang magin maluya, hababaw. (Ikomparar an Mateo 13:​20, 21.) Si Nathaniel, sarong lalaking taga-Ghana na labi pa sanang 30 anyos nag-estorya kun paano nia ‘binakal an katotoohan’ kan sia hoben pa.

“An sakuyang mga magurang tinokdoan ako sa Biblia magpoon kan ako omboy pa,” an paggirumdom nia sa nakaagi. “Mantang ako nagdadakula, nag-iiba ako sa sainda sa paghuhulit, alagad dai pa talaga ako nagdesisyon na magin sarong Saksi. Pag-abot nin panahon, narealisar ko na kaipuhan kong siyasaton mismo an mga bagay.

“Enot, kaipuhan na makombensir ako na an Biblia, bakong an arin man na ibang sagradong libro nin relihion, an Tataramon nin Dios. Paagi sa personal na pag-adal, nanodan ko na iyan sana an sagradong libro na igwa nin kadakol na malinaw na mga hula na naotob nin eksakto. Nanodan ko man na an Biblia igwa nin dakol na sientipikong katotoohan​—halimbawa, na an daga ‘ibinibitin sa mayo.’ (Job 26:​7) An mga tataramon na ini isinurat rinibong taon bago pa naaraman kan mga sientista an manongod sa satong sistema solar. Solamente an Dios an puedeng magpasabong sa mga tawo na isurat an siring na mga bagay!a

“Sunod, gusto kong maaraman kun arin na relihiosong organisasyon an nagtotokdo asin nagsasagibo kan mga katotoohan na itinotokdo sa Biblia. Kadaklan sa mga relihion nagtotokdo nin kalayo sa impierno, Trinidad, asin sarong inmortal na kalag na nagdadanay na buhay pagkagadan. Alagad para sa sako garo bakong tama an mga doktrinang ini. Ako nagrason: Bako daw na maraot an ama na ibinubuntog an kamot kan saiyang aki sa koron na may nagkakalakagang tubig bilang padusa? Paano, kun siring, ikabubugtak nin sarong Dios nin pagkamoot an saiyang mga aki sa sarong nagkakalayong impierno asin pabayaan sindang magdusa? Minsan siring, an Mga Saksi ni Jehova nagtotokdo kaoyon kan mga teksto sa Biblia na arog kan Roma 6:​23, na nagsasabi: ‘An ibinabayad nin kasalan kagadanan’​—bakong sarong nagkakalayong impierno. Para sa sako ini tama.

“Naobserbaran ko man na an Mga Saksi ni Jehova naghahagad na an gabos na miembro mamuhay sono sa mga pamantayan kan Biblia asin itinitiwalag ninda an gabos na daing pagsolsol na naggigibo nin kasalan. Huli kan gabos na ini, ako nagkonklusyon na yaon sa Mga Saksi ni Jehova an katotoohan, asin ako naggibo nin personal na desisyon na magin saro sa sainda. Ako nagmaigot na marhay tanganing makualipikar para sa bautismo bilang sarong Saksi.”​—1 Corinto 5:​11-​13.

Iiniilustrar na marhay kan eksperyensia ni Nathaniel na dawa an mga hoben na pinadakula nin mga Kristianong magurang dapat na ‘bumakal kan katotoohan.’ Dai sana sinda maninigo na pasibong umatender sa mga pagtiripon sa kongregasyon. Arog kan suanoy na mga taga-Berea maninigo nindang ‘maingat na siyasaton an Kasuratan aroaldaw kun baga an mga bagay na ini iyo man nanggad.’ (Gibo 17:​11) Ini nangangaipo nin panahon asin paghihingoa, alagad iyan puedeng magresulta sa masarig na pagtubod asin kombiksion.​—Ikomparar an Efeso 3:​17-​19.

Desganado sa Falsong Relihion

An sarong lalaking taga-Ghana na an ngaran Godwin madali nang magsetenta anyos kan bayaan nia an Iglesia Presbiteriano asin an sarong Logia Masonica. “May mga bagay na nangyayari sa laog kan iglesia na dai ko gusto,” an sabi ni Godwin. “Halimbawa, kadakol kan pag-iriwal kan mga miembro, asin iyan nangyayari pa. Kun minsan kaipuhan pa an pulis tanganing ikabalik an katoninongan asin orden! Sa paghona ko ini bakong maninigo para sa mga parasunod ni Cristo. Dangan sarong problema an nagtalubo sa tahaw ko asin nin sarong kapwa Presbiteriano. Sarong pampublikong husgado an nagbista sa kaso asin sia an nahusgaran na may kasalan. Minsan siring, an ministro kan iglesia bakong makatanosan na kinampihan an tawong ini asin nagprobar na kondenaron ako sa atubangan kan bilog na kongregasyon! Prinangka ko sia asin linayasan ko an simbahan​—na nungka pang mabalik.

“Nag-agi an kadikit na panahon, asin an mga Saksi ni Jehova nagdalaw sa sakuyang harong. Kan enot, naghinanyog sana ako huli ta habo kong sayumahan an mga tawo na nakikipag-olay manongod sa Dios. Alagad nagpoon na mariparo ko na dawa pirang dekada na akong Presbiteriano, kadakol pa kan dai ko aram manongod sa Biblia. Halimbawa, nungka kong naaraman na an Biblia nag-aalok nin paglaom na mabuhay sagkod lamang sa Paraiso digdi sa daga.b Asin kan ako magpoon na umatender sa mga pagtiripon kan Mga Saksi ni Jehova, naghanga akong marhay sa ugale, asin espesyalmente sa pagbubulos asin pag-alinyar kan mga hoben na kairiba ninda. Ini mga tawo na talagang namumuhay sono sa mga prinsipyo kan Biblia!”

Pero, an ‘pagbakal kan katotoohan’ naghagad sa saiya na gumibo nin pirang masakit na marhay na pagliliwat sa buhay nia. Natatandaan pa ni Godwin: “Miembro ako kaidto nin sarong Logia Masonica. Asin minsan ngani iyan midbid bilang sosyedad nin magturugang na nagtatao nin tabang para sa mga miembro kaiyan, naobserbaran ko an mga ritual na imbuelto an paggamit nin mga bungo asin mga tolang saka an pag-arang sa mga espiritu. Tinatabangan daa kan mga espiritung ini an mga nakikikomunikar sa sainda na tumalubo sa espirituwal.

“An sakuyang pag-adal nakatabang sa sako na masabotan na ikinakauyam nin makuri ni Jehova Dios an ano man na koneksion sa espiritismo huli ta puedeng darahon kaiyan an saro sa irarom kan impluwensia ni Satanas asin kan saiyang maraot na mga puersang espiritu.c Ipapadagos ko daw an pagigin miembro kan Logia Masonica kaiba kan gabos na mistisismo kaiyan, o ipopondo ko daw asin paoogmahon ko si Jehova? Pinili ko an huri. Rinaot ko an gabos kong garamiton sa Mason, dawa an isinusulot ko sa mga miting kan Logia. Naeksperyensiahan ko an katotoohan kan panuga ni Jesus kan sia magsabi, ‘Bubutasan kamo kan katotoohan’! (Juan 8:​32) Ngonyan naoogma akong ihiras sa iba an mga bagay na sakuyang nanodan. Mayo akong pinagbabasolan na ano man.”

Rinibong may sadiosan na puso an guminibo man nin darakulang pagsasakripisyo tanganing “bakalon . . . an katotoohan.” Arog kan tolong Kristiano na pinag-olayan digdi, dai sinda nagbabasol sa mga pagbabagong ginibo ninda. An katotoohan sa Biblia nagtao sa sainda “nin marahay na pasisikadan para sa ngapit, tangani sindang makapangapot nin marigon sa tunay na buhay.” (1 Timoteo 6:​19) An “tunay na buhay” na iyan asin an gabos na kaibang bendisyon kaini puede man na mapasaindo nin daing sagkod kun ‘babakalon nindo an katotoohan.’

[Mga Nota sa Ibaba]

[Retrato sa pahina 9]

Si Nathaniel

[Retrato sa pahina 9]

Si Godwin