Nagigirumdoman daw Nindo?

Naapresyar daw nindo an pagbasa kan dai pa sana nahahaloy na mga luwas kan An Torrengbantayan? Bueno, helinga kun masisimbag nindo an minasunod na mga hapot:

◻ Ano an pangenot na katuyohan nin edukasyon para sa sarong hoben na Kristiano?

An pangenot na katuyohan nin edukasyon maninigo na tanganing sangkapan an sarong hoben na magin epektibong ministro ni Jehova. Asin an pinakaimportanteng edukasyon sa katuyohan na iyan iyo an espirituwal na edukasyon.​—8/15, pahina 21.

◻ Ano an mga rason ta dapat isumbong sa kamagurangan an magabat na pagkakasala nin sarong kapwa Kristiano?

An sarong rason sa pagsumbong kan magabat na pagkakasala iyo na pinepreserbar kaiyan an kalinigan kan kongregasyon. An saro pang rason iyo na an paggibo kaiyan sarong akto nin Kristianong pagkamoot na may prinsipyo na ipinaheheling sa Dios, sa kongregasyon, asin sa nagkasala.​—8/15, pahina 28, 30.

◻ Ano an boot sabihon kan pagpapadanay na ‘harani sa isip kan presensia kan aldaw ni Jehova’? (2 Pedro 3:12)

Iyan nangangahulogan na dai idinidigson sa satong isip an “aldaw ni Jehova.” Maninigo na dai niato lingawan na harani na an aldaw kan paglaglag ni Jehova sa palakaw na ini nin mga bagay. Iyan maninigo na magin tunay na marhay para sa sato kaya naheheling ta iyan nin malinaw, na nasa enotan na niato. (Sofonias 1:​7, 14)​—9/1, pahina 19.

◻ Taano an huring mga aldaw kan maraot na palakaw na ini ta mas luminawig kisa sa linaoman nin dakol?

Kinokonsiderar ni Jehova an pinakaikararahay kan bilog na katawohan. An pinagmamakolgan nia buhay nin mga tawo. (Ezequiel 33:11) Makakokompiar kita na an katapusan madatong sa tamang-tamang panahon tanganing otobon an katuyohan kan satong madonong sa gabos, mamomoton na Kaglalang.​—9/1, pahina 22.

◻ Paano mapagdadanay kan mga nasa bilog na panahon na paglilingkod an saindang kagayagayahan sa ibong kan mga problema na tibaad mapaatubang sa sainda?

Maninigo nindang horophoropon an dakol na bendisyon na yaon sa sainda asin rekonoseron na rinibo pa an nag-aagi nin mas grabeng mga kasakitan. (1 Pedro 5:​6-9)​—9/15, pahina 24.

◻ Ano an pasohan ni William Tyndale sa pagtradusir kan Biblia?

An pasohan ni Tyndale ikapaabot sa ordinaryong tawo an Kasuratan sa pinakaeksakto asin pinakasimpleng lenguahe na mapupuede.​—9/15, pahina 27.

◻ Paano niato ikapaheheling na kita maimbod na mga parasuportar kan Tataramon nin Dios?

Ipinaheheling ta an satong kaimbodan sa Tataramon nin Dios paagi sa maigot na paghuhulit kaiyan sa iba. Bilang mga paratokdo, maninigo na gamiton niato nin maingat an Biblia, na nungkang pinipiripit o dinadagdagan an sinasabi kaiyan tanganing makasono sa satong mga ideya. (2 Timoteo 2:​15)​—10/1, pahina 20.

◻ Paano puedeng magpaluya kan satong integridad an nakahihilong espiritu kan kinaban?

Puedeng magpaluya kan satong integridad an espiritu kan kinaban paagi sa paggibo sa sato na dai nakokontento sa kun ano an yaon sa sato asin galagang enoton an satong sadiring mga pangangaipo asin intereses kisa kan sa Dios. (Ikomparar an Mateo 16:​21-​23.)​—10/1, pahina 29.

◻ Ano an boot sabihon kan maglingkod ki Jehova nin bilog na kalag?

An “kalag” nanonongod sa bilog na persona, kaiba an gabos niang pisikal asin mental na mga abilidad. An paglilingkod ki Jehova nin bilog na kalag nangangahulogan nin pagtao kan satong panahon asin kosog para sa iba, na ginagamit an gabos niatong abilidad asin an satong mga paghihingoa sa pinakalubos na paaging mahihimo sa paglilingkod sa Dios. (Marcos 12:​29, 30)​—10/15, pahina 13.

◻ Ano an liabe sa pagigin tawong may diosnon na prinsipyo?

An liabe iyo an talagang pagmidbid ki Jehova, pakaaram kan mga gusto nia, mga dai nia gusto, asin kan saiyang mga katuyohan. Kun an pundamental na mga bagay na ini manongod sa Dios nagkokontrol sa satong buhay, an mga iyan, sa katunayan, nagigin buhay na mga prinsipyo. (Jeremias 22:16; Hebreo 4:​12)​—10/15, pahina 29.

◻ Ano an timbang na kaisipan kan mga lingkod ni Jehova manongod sa pamamahala nin tawo?

Sinda neutral sa politikal na mga bagay huling sinda naglilingkod bilang mga embahador o representante kan Kahadean nin Dios. (2 Corinto 5:​20) Sa ibong na lado, sinda may pagkamakinuyog sa konsensia na nagpapasakop sa mga may autoridad.​—11/1, pahina 17.

◻ Anong leksion an manonodan ta sa iginawe ni Eliseo na propeta?

Kan imbitaran sa espesyal na paglilingkod kaiba ni Elias, tolos-tolos na binayaan ni Eliseo an saiyang oma tanganing maglingkod ki Elias, minsan ngani menus an nagkapira sa saiyang mga obligasyon. (2 Hade 3:​11) An nagkapira sa mga ministro nin Dios ngonyan nagpapaheling nin kaagid na espiritu nin pagsakripisyo sa sadiri paagi sa pagbaya kan saindang mga pagbuhay tanganing maghulit kan maogmang bareta sa hararayong teritoryo.​—11/1, pahina 30.

◻ Anong kapakipakinabang na hatol an laog kan surat ni Santiago?

Ipinaheheling kaiyan sa sato kun paano aatubangon an mga pagbalo, hinahatolan kita tumang sa paboritismo, asin sinasadol kita na gumibo nin tanos na mga gibo. Sinasadol kita ni Santiago na kontrolon an dila, labanan an kinabanon na mga impluwensia, asin paoswagon an katoninongan. An saiyang mga tataramon makatatabang man sa sato na magin mapasensia asin mapagngayongayo.​—11/15, pahina 24.

◻ Taano si Jehova ta “andam na magpatawad”? (Salmo 86:5)

Si Jehova andam na nagpapatawad huli ta dai nia linilingawan na kita mga linalang na gibo sa kabokabo, may mga sala, o kaluyahan, na bunga nin pagkabakong sangkap. (Salmo 103:​12-​14)​—12/1, pahina 10, 11.

◻ Taano ta maninigo kitang magin andam na magpatawad sa iba?

Kun habo tang magpatawad sa iba kun igwa nin basehan para sa pagkaherak, iyan puedeng magkaigwa nin bakong paborableng epekto sa sato mismong relasyon sa Dios. (Mateo 6:​14, 15)​—12/1, pahina 17.