Talaga daw na Inaapresyar Nindo an mga Bendisyon ni Jehova?
SI Kenichi, sarong medyo may edad nang lalaki, nagduman sa sarong parmasia tanganing kumua nin bolong para sa dikit na sipon. Kan inomon nia an bolong, may namatean siang maraot sa lawas na nagresulta sa magatol na libaka asin nagtutubig na mga liptok sa bilog niang hawak. Bakong makangangalas, si Kenichi nagpoon na magduda kun baga tinawan nin igong atension kan parmasista an saiyang mga pangangaipo.
An tibaad isipon nin nagkapira manongod sa Dios kapareho kan pagheling ni Kenichi sa parmasista. Nagdududa sinda na an makakamhan sa gabos na Dios, si Jehova, talagang interesado sa sato bilang mga indibiduwal. Minsan ngani minimidbid ninda na an Dios marahay, dai sinda kombensido na sia may personal na pagmalasakit sa sato. Nangorognang totoo ini kun bakong marahay an nagigin kamugtakan ninda o kun an saindang pagsusog sa mga prinsipyo sa Biblia sinusundan nin masakit na mga problema. Huli sa kakulangan nin pakamansay, an pagheling ninda sa saindang mga problema kapareho kan magatol na libaka asin liptok na dai linalaoman ni Kenichi na maluwas, na garo baga maski paano iyan sala nin Dios.—Talinhaga 19:3.
Si Jehova dai puedeng ikomparar sa bakong sangkap na mga tawo. Limitado an kaaraman asin kakayahan nin mga tawo. Dai ninda lubos na namamansayan an tunay na mga pangangaipo nin iba, arog kan parmasista ni Kenichi. Sa kabaliktaran, mayong dai naheheling si Jehova. Parate kitang tinatabangan ni Jehova na dai niato namamansayan asin naaapresyar iyan huli ta may tendensia kitang magkonsentrar sa kun ano an mayo sa sato asin dai intindihon an dakol na bendisyon na yaon sa sato. Imbes na magin marikas na basolon si Jehova huli sa ano man na mga problemang inaatubang niato, maninigo na hingoahon ta na mamansayan an mga bendisyon na nakakamtan ta hale ki Jehova.
Sono sa Webster’s Ninth New Collegiate Dictionary, an “bendisyon” puedeng tawan nin kahulogan na “sarong bagay na nakakokontribwir sa kaogmahan o ikararahay.” Nasasabotan daw nindo na ini nangorognang totoo sa mga bendisyon hale ki Jehova?
Daing Kaagid Bilang Paratao
Kun an sarong agom na babae magsabi na an saiyang agom sarong marahay na paratao, sa pankagabsan boot niang sabihon na inaasikaso kaini nin igo an mga pangangaipo kan pamilya, na nagtatao nin supisyenteng kakanon, istaran, asin gubing para sa kaogmahan asin ikararahay kan pamilya. Gurano karahay si Jehova bilang satong Paratao? Helingang marhay an satong planetang Daga, an erokan nin tawo. Iyan 150,000,000 kilometros an rayo sa saldang, an tamang-tama sanang distansia para sa tama sanang temperatura na pinagigin posible an buhay digdi sa daga. An 23.5-grado na pagkakibang kan satong globo sangkap an pagkadisenyo, na nagreresulta sa pabarobagong mga panahon na nagkokontribwir sa abundang mga ani. Bilang resulta, an daga nagpapakakan sa labing limang bilyon katawo. Tunay nanggad na si Jehova sarong marahayon na Paratao!
Dugang pa, sinisierto sa sato kan Biblia na si Jehova interesadong marhay sa sato bilang mga indibiduwal asin sa satong ikararahay. Isip-isipa na sana, midbid ni Jehova sa ngaran an kada saro sa binilyon na bitoon, asin ni sarong dignos dai nahoholog sa daga na dai nia aram. (Isaias 40:26; Mateo 10:29-31) Gurano pa daw an saiyang pagmakolog sa mga tawo na namomoot sa saiya asin binakal paagi sa mahal na marhay na dugo kan saiyang namomotan na Aki, si Jesu-Cristo! (Gibo 20:28) Marahay nanggad an pagkapahayag kan madonong na tawo: “An bendisyon ni Jehova—iyan an nakapayayaman, asin dai nia iyan dinadagdagan nin kakologan.”—Talinhaga 10:22.
Mga Bendisyon na Nakapayayaman sa Sato
Yaon sa sato an sarong bagay na dakula an halaga na maninigo na odok niatong pasalamatan. Ano iyan? Ipinamimidbid iyan kan Biblia kan iyan magsabi: “An ley kan saimong ngoso marahay para sa sako, orog pa kisa sa rinibong pidaso nin bulawan asin pirak.” (Salmo 119:72; Talinhaga 8:10) Baga man puedeng mahalaga an piniling bulawan, an ley ni Jehova orog pa nanggad na dapat mawoton. An tamang kaaraman sa saiyang ley kaiba an pakarorop asin pakamansay na itinatao ni Jehova sa sinserong mga naghahanap kan katotoohan mga bagay na dapat pakamahalon. Sinasangkapan kita kaiyan na protehiran an satong sadiri, atubangon an masakit na mga situwasyon, pangganahan an mga problema, asin sa siring magin kontento asin maogma.
Totoo ini minsan sa mga akion pa. Estudyare kun paano rinesolberan nin sarong aking babae an saiyang mga problema paagi sa pagsunod sa ley ni Jehova. An aking babae na si Akemi, nag-iistar harani sa Tokyo. An saiyang ama asin ina iinaplikar an mga prinsipyo sa Biblia sa pagsasanay sa saiya saka paagi sa tataramon asin halimbawa tinabangan ninda an saindang aking babae na pataluboon an pagkamoot ki Jehova asin sa kataed. Patienot na naheheling an mga problema na aatubangon nia sa eskuelahan, hiningoa ninda na andamon sia sa pinakamarahay na paaging mahihimo ninda. Minsan siring, kan mag-elementarya na si Akemi, an pagheling sa saiya kan nagkapira sa saiyang mga kaklase sia “laen” huli ta sia namimibi bago magkakan asin nagsasayuma sa mga aktibidad na bakong sono sa Kasuratan nin huli sa konsensia. Dai nahaloy kinursonada sia nin sarong grupo nin mga paradaogdaog na hinihipaan sia pagkatapos kan klase asin tinatampal sia, pinipiripit an saiyang mga takyag, asin pinag-oolog-olog sia.
An aking si Akemi dai nagbalos, ni nagtakig sia sa atubangan kan mga nanriribok sa saiya. Imbes, hiningoa niang iaplikar an saiyang nanodan. Bilang resulta kan saiyang marahay na ugale asin kapusoan, nakua nia an paggalang kan kadaklan kan saiyang mga kaeskuela. Isinumbong ninda an bagay na idto sa maestro, asin poon kan aldaw na idto, si Akemi dai na minaltrato sa eskuelahan.
Ano an nakatabang ki Akemi na mapangganang maatubang an masakit na situwasyon? An tamang kaaraman, pakarorop, asin kadonongan hale ki Jehova na itinadom sa isip nia kan saiyang mga magurang. Pamilyar siang marhay sa pakatagal ni Jesus, asin iyan nagpahiro sa saiya na arogon an saiyang halimbawa. Natabangan sia kan Biblia na mamansayan na may mga tawong sala an ginigibo huli sa kadaihan nin pakaaram, asin inenkaminar sia kaiyan na ikaongis an sala na ginibo kan mga paradaogdaog na idto baga man dai ikinaoongis an mga tawo mismo.—Lucas 23:34; Roma 12:9, 17-21.
Siempre, mayo nin magurang na gustong maheling an saindang aki na pinag-oolog-olog o minamaltrato. Pero, maiimahinar nindo kun gurano an pag-orgolyo kan mga magurang ni Akemi kan mabaretaan ninda an gabos na detalye kan nangyari. An siring na mga aki tunay nanggad na bendisyon hale ki Jehova.—Salmo 127:3; 1 Pedro 1:6, 7.
Mapasensiang Paghalat ki Jehova
Pero bago nindo akoon an mga bendisyon ni Jehova, kun beses kaipuhan nguna nindong halaton an saiyang panahon. Aram ni Jehova an saindong situwasyon asin itinatao nia an lambang pangangaipo sa panahon na pinakakapakipakinabang iyan para sa saindo. (Salmo 145:16; Eclesiastes 3:1; Santiago 1:17) Tibaad gustong-gusto nindo an prutas, alagad ano an magigin saboot nindo manongod sa sarong may andam na an itinataong prutas sa saindo dai pa puedeng kakanon? Baga man mansanas, aranghita, o iba pa, mas gusto nindo na an saindong prutas hinog, matagok, asin mahamis. Kaagid kaiyan, itinatao ni Jehova an kaipuhan nindo sa tamang panahon—bako man na amay na marhay asin bako man na huri nang marhay.
Girumdoma an eksperyensia ni Jose. Baga man mayo siang sala, sia nabilanggo sa sarong bartolina sa Egipto. An sarong kapwa bilanggo, an kopero ni Faraon, naglaom na makaluwas asin nanuga na ipapaabot nia ki Faraon an kaso ni Jose. Alagad kan sia makaluwas biyo na niang nalingawan si Jose. Garo baga pinabayaan na si Jose. Minsan siring, pakalihis nin duwang bilog na taon, sa katapustapusi pinaluwas sia sa bilanggoan asin pag-abot nin panahon ginibo siang ikaduwang namamahala sa Egipto. Imbes na malangkag, si Jose naghalat ki Jehova. Huli kaini, binendisyonan sia sa paagi na nangahulogan kan pagkapreserbar kan buhay kapwa kan mga Israelita asin kan mga Egipcio.—Genesis 39:1–41:57.
Si Masashi sarong magurang sa sarong kongregasyon sa amihanan na Hapon. Dai sia nababartolina, alagad kinaipuhan niang maghalat ki Jehova. Taano? Poon kan ponan sa Hapon an Paadalan sa Ministeryal na Pagsasanay, an paadalan para sa pagsasanay sa kualipikadong mga ministrong Kristiano, nagin odok sa boot na pasohan nia na makaatender dian. Namibi sia nin maigot manongod sa pribilehiong iyan. An saiyang kaibaibang payunir naimbitaran, alagad sa ibong kan saiyang galagang kamawotan, si Masashi dai. Labi-labi an saiyang pagkadesganar.
Minsan siring, naggibo sia nin mga paagi na mapangganahan an saiyang mga saboot. Pinag-adalan nia an Biblia asin an mga publikasyon na ipinublikar kan Watch Tower Society, na nagkokonsentrar sa mga tema na arog kan pagigin mapakumbaba asin pagkontrol sa mga emosyon nin saro. Liniwat nia an saiyang kaisipan asin sa siring nakamate sia nin orog na satispaksion sa saiyang asignasyon. Dangan, sa panahon na dai nanggad linalaoman, nakaresibi sia nin imbitasyon na umatender sa paadalan.
Huling napatalubo an mga kualidad na arog kan pagpapasensia asin kapakumbabaan, orog na nakinabang sia sa paadalan. Kan huri, si Masashi natawan kan pribilehio na maglingkod sa saiyang mga tugang bilang nagbibiaheng paraataman. Iyo, aram ni Jehova an kaipuhan ni Masashi asin itinao nia iyan sa panahon na pinakakapakipakinabang.
Hagadon an Saiyang mga Bendisyon
Huli kaini, si Jehova bakong arog kan parmasista. Minsan ngani tibaad dai niato mamansayan an pag-ataman asin pagmakolog ni Jehova, an saiyang mga kabootan minaabot sa laen-laen na paagi—sa mga panahon asin paagi na pinakakapakipakinabang para sa sato. Kaya padagos na hagadon an saiyang mga bendisyon. Girumdomon na kadakol na kamong dahelan na magpasalamat. Binendisyonan kamo kan pundamental na mga probisyon tanganing padagos na mabuhay digdi sa daga. Tinawan kamo nin kaaraman dapit ki Jehova asin sa saiyang sangkap na mga dalan. Tinawan kamo nin pakarorop. Asin nagkaigwa kamo nin pakamansay. An gabos na ini nakakokontribwir sa ikararahay asin kaogmahan nindo.
Tanganing mas lubos pa nganing maeksperyensiahan an bendisyon ni Jehova, padagos na adalan nin regular an Biblia. Hagadon ki Jehova na logod tabangan kamong masabotan asin ikaaplikar an arog sa mutya na mga katokdoan sa saiyang ipinasabong na Tataramon. Gigibohon kamo kaiyan na tunay na mayaman, kaya dai kamo magkukulang. Iyo, iyan mangangahulogan kan saindong kaogmahan asin pagkakontento ngonyan asin buhay na mabungang marhay sa maabot na bagong kinaban.—Juan 10:10; 1 Timoteo 4:8, 9.
[Retrato sa pahina 23]
An bendisyon ni Jehova mas mahal na marhay kisa sa bulawan