Lalaglagon daw nin Dios an Kinaban?
SONO ki Papa Juan Paulo II, an mga tawo may kompiansang makatatanaw sa ngapit. Sa bilog na kasaysayan, sabi nia, “an mga tawo padagos na naggigibo nin mga kasalan, na tibaad mas dakula pa ngani kisa sa ilinadawan bago an baha.” Dawa siring, an papa nagpaliwanag, “sa mga tataramon kan tipan nin Dios ki Noe nasasabotan ta na ngonyan mayo na nin kasalan na puedeng magtulod sa Dios na laglagon an kinaban na sia mismo an naglalang.”
Totoo daw na nungkang lalaglagon nin Dios an kinaban? Sinasabi kan Biblia na pagkatapos kan Delubyo, an Dios nagsabi ki Noe: “Dai na mangyayari na an gabos na laman magadan paagi sa katubigan nin baha, asin dai na mangyayari an sarong baha sa paglaglag sa daga.” (Genesis 9:11) Sinasabi kan papa na paagi sa mga tataramon na ini, an Dios “inobligar an saiyang sadiri na ingatan na dai malaglag [an daga].”
Linilinaw kan Biblia na dai totogotan kan Kaglalang na malaglag an satong planeta. “An daga magdadanay sagkod sa panahon na daing katapusan,” an sabi kan Biblia. (Eclesiastes 1:4) Alagad igwa pang manonodan sa Delubyo—sarong bagay na dai kinomentohan kan papa.
Sinabi ni Jesus na an mga kamugtakan digdi sa daga sa panahon kan saiyang presensia sa ngapit magigin ‘siring kan mga aldaw ni Noe,’ na an mga tawo ‘dai nagmangno sagkod na dumatong an baha asin iinanod sinda gabos.’ (Mateo 24:37-39) Kaagid kaiyan, si apostol Pedro nagsurat na kun paanong “an kinaban kan panahon na idto nalaglag kan iyan malantopan nin tubig,” an “aldaw nin paghokom asin kalaglagan kan maraot na mga tawo” nakahuma man sa kinaban sa presente.—2 Pedro 3:5-7.
Nalingawan daw ni Jesus asin ni Pedro an manongod sa tipan nin Dios ki Noe? Dai nanggad! Siring nanggad kan sinabi nia sa tipan ki Noe, an Dios dai magamit nin katubigan nin baha tanganing taposon an maraot na palakaw na ini nin mga bagay. Imbes, gagamiton nia an kapangyarihan kan “Hade nin mga hade asin Kagurangnan nin mga kagurangnan,” si Jesu-Cristo. (Kapahayagan [Apocalipsis] 19:11-21) Kun siring, sono sa Biblia an daga dai lalaglagon, alagad an “kinaban” nin maraot na katawohan sierto nanggad na matatapos. (Talinhaga 2:21, 22; Kapahayagan 11:18) Pakatapos kaiyan, “an mga matanos mismo magmamana kan daga, asin sinda mag-eerok dian sagkod lamang.”—Salmo 37:29.