Bareta kan mga Parabalangibog kan Kahadean
Mapakumbabang Pagkomporme sa Dalan ni Jehova
“HANAPA nindo si Jehova, kamo gabos na mahoyo sa daga.” An pangagdang ini, na ibinalangibog kan Hebreong propeta na si Sofonias labi nang 26 na siglo an nakaagi, sagkod ngonyan ipinaaabot sa mga tawo sa bilog na daga. (Sofonias 2:3) Ano an boot sabihon kan paghanap ki Jehova? An paggibo kaini minapoon sa paglaog sa isip nin kaaraman manongod sa iyo sanang tunay asin nabubuhay na Dios, si Jehova.—Jeremias 10:10; Juan 17:3.
Minsan siring, an mismong paglaog sa isip nin kaaraman dai nagbubunga nin inooyonan na kamugtakan sa atubangan nin Dios. Tanganing kamtan an pabor nin Dios, dapat man na iaplikar nin saro an kaaraman na ini. Paano? Paagi sa mapakumbabang pagkomporme kan saiyang kaisipan asin gawe-gawe sa mga pamantayan nin Dios, siring sa iiniilustrar kan minasunod na eksperyensia hale sa Suriname.—Efeso 4:22-24.
Si Eddy, sarong maestro na mga 35 anyos na, naghihidaw nin nakakokontentong simbag sa mga hapot na arog kan: ‘Ano an kabtang nin relihion sa sosyedad ngonyan?’ asin ‘An Biblia daw, na sarong suanoy na libro, kaoyon nin modernong siensia?’ Kan an Mga Saksi ni Jehova sumongko asin magtao nin basado sa Bibliang simbag sa mga hapot na ini, si Eddy maingat na naghinanyog. Nagkua pa ngani sia nin mga nota tanganing maberepikar an mga esplikasyon kan mga Saksi.
Dati, si Eddy nakiaasosyar sa relihion na nagtokdo sa saiya na an mga tawo iyo an pinakaresulta kan paghira nin Dios sa mga kabalang. Kaya kan iopresir sa saiya kan mga Saksi an publikasyon na Life—How Did It Get Here? By Evolution or by Creation? tolos niang inako iyan. Nagulat sia sa malinaw na esplikasyon kan libro sa pagkasaysay kan Biblia sa paglalang. Paagi sa saiyang pag-adal sa Biblia, nakombensir sia na nanompongan na nia an katotoohan!
Alagad ngonyan napapaatubang sia sa sarong pagbalo. Si Eddy nag-iistar sa harong na kabtang nin pamumuhay an paghabon asin pandadaya. Sa siring, mamimili sia: magsalang arogon an raot na pamumuhay kan saiyang mga kakuarto o haboan an siring na gawe-gawe apabor sa estilo nin pamumuhay na nagpapamuraway sa Dios. May kadonongan, pinili ni Eddy an ikaduwa. Binayaan nia an gabos na maraot na pag-iriba asin naghale sia sa harong.—1 Corinto 15:33, 34.
Marikas an nagin pag-oswag ni Eddy pakapoon niang umatender sa mga pagtiripon sa Kingdom Hall. Pinakarhay man nia an saiyang gubing saka pag-alinyar asin pinonan na ipakipag-olay sa saiyang mga katood saka paryente an saiyang nanonodan. Sa huri, nadugangan an saiyang kagayagayahan kan sia aprobaran na makikabtang sa paghuhulit kan “maogmang bareta” sa publiko. (Mateo 24:14; Gibo 20:20) Kan Disyembre 1996 nag-abot an haloy nang hinahalat na aldaw kan simbolisaran nia an saiyang pagdusay ki Jehova paagi sa bautismo sa tubig.
Kada taon, ginatos na ribo nin mga tawong sadiosan an puso an naghihimate sa pangagda na ‘hanapon si Jehova.’ Sa paggibo kaiyan, naeeksperyensiahan ninda an pagigin totoo kan Talinhaga 22:4, na nagsasabi: “An bunga nin kapakumbabaan asin pagkatakot ki Jehova kayamanan asin kamurawayan patin buhay.” Iyo, paagi sa mapakumbabang pagkomporme sa dalan ni Jehova, an mga namomoot sa katotoohan nagkakamit kan siring na mga bendisyon ngonyan, asin may kompiansang inaantisipar an daing sagkod na mga bendisyon digdi mismo sa daga.—Salmo 37:29.
[Mapa sa pahina 18]
(Para sa aktuwal na format, helingon an publikasyon)
Dagat Caribe
SURINAME
GUYANA
FRENCH GUIANA
BRAZIL
[Pasasalamat para sa pinagkuanan]
Globo: Mountain High Maps ® Copyright © 1997 Digital Wisdom, Inc.