Bareta kan mga Parabalangibog kan Kahadean
Dai Magpogol sa Pagpahayag kan Maogmang Bareta
KAN an mga eksplorador na taga Europa enot na magduman sa Golpo nin Venezuela asin Danaw nin Maracaibo, sa baybayon kadakol nin saradit na inatopan na payag na nakatogdok sa mga poste na nasa hababaw na katubigan. An tanawon nagpapagirumdom kan Venecia, Italia, kun saen an mga tawo nagtogdok kan saindang mga harong sa gilid kan katubigan. Sa siring an mga eksplorador na Kastila an tataramon nginaranan an lugar na Venezuela, na an kahulogan “Sadit na Venecia.”
Ngonyan, an magayon na nasyon na ini lugar man nin saro pang klase nin programa nin pagtotogdok, espirituwal na pagtotogdok. Duman an Mga Saksi ni Jehova sibot na nakikikabtang sa pagsabwag nin banhi kan Kahadean sa gabos na angay na okasyon. An ibinubungang espirituwal na ani nagdadara nin dakulang kaomawan sa “Kagurangnan kan anihon,” si Jehova Dios.—Mateo 9:37, 38.
Kan an sarong nagbibiaheng paraataman magsongko sa sarong kongregasyon sa estado nin Zulia sa amihanan-solnopan nin Venezuela, iinareglo kan lokal na mga Saksi na songkoon nia kaiba an saiyang agom an sarong kaharaning sadit na isla na inaapod Toas. Mantang nagpipila sa pagsakay sa barkong nagbibiahe sa amay na aga pasiring sa isla, an agom kan nagbibiaheng paraataman, si Mery, nagsuherir sa saiyang kaiba, sarong bilog na panahon na payunir na tugang na babae, na kaolayon ninda an nagkapirang trabahador sa barko. Uminoyon an payunir na tugang na babae.
Sa pagdolok sa sarong mekaniko, ipinaheling ni Mery an librong Kaaraman na Minagiya Pasiring sa Buhay na Daing Katapusan. Ipinaheling nia sa saiya an kapitulo na “Pagtogdok nin Pamilya na Nagtatao nin Onra sa Dios,” na garo baga inapresyar nia. Dangan ipinaliwanag ni Mery na paagi sa paggamit kan publikasyon na ini, puede siang magkaigwa nin pag-adal sa Biblia sa saiya mismong harong. Inako nia an libro, asin ginibo an mga areglo na may magsongko sa saiya sa saiyang harong.
Pakalihis nin halipot na panahon, nagkaigwa nin sarong aldaw na espesyal na asamblea sa lugar na iyan. Kanigoan an pagkasorpresa ni Mery na maheling duman an mekaniko, si Senor Nava, kaiba an saiyang agom asin duwang aking daragita! Hinapot ni Mery an agom na babae kun ano an saboot nia manongod sa saindang pampamilyang pag-adal sa Biblia. Nakasosorpresang marhay an saiyang simbag.
“Nagpapasalamat ako ki Jehova na nanodan mi an katotoohan,” an sabi nia. Dangan nagpaliwanag sia. “Kan makaolay nindo an sakong agom, binayaan pa sana nia ako huli sa ibang babae. Makosog man siang mag-inom. Kun beses na sia nabuburat, sia mapan-abuso, na dai nagugustohan kan sadit na komunidad sa isla. Naggigibo man sia nin espiritismo. Minsan siring, an kaaraman sa Biblia na nakua nia sa pag-adal nakatabang sa saiya na gumibo nin dakulaon na mga pagbabago sa saiyang buhay. Pinondo na nia an gabos niang marigsok na gibo. Naghangang marhay sa mga pagbabagong ini an saiyang mga magurang na Katoliko. Naoogma sinda na sia ngonyan saro nang responsableng agom asin ama.”
Si Senor Nava nabautismohan kan 1996 asin sa presente naglilingkod bilang bilog na panahon na ministro. An saiyang agom, si Jenny, nabautismohan kan 1997. An alkalde kan banwaan naghangang marhay sa mga pagbabago kan mekanikong ini sa barko kaya sia naghagad man nin pag-adal sa Biblia. Kanigoan an kaogmahan kan mga tugang na babae na sinda dai nagpogol sa pagpahayag kan maogmang bareta mantang nagpipila sa pagsakay sa barko kan agang idto!
[Mga retrato sa pahina 7]
Maogma an ibinunga kan paghiras kan maogmang bareta sa sarong mekaniko sa barko