Naggigiyang mga Karatula sa Dalan nin Buhay
KUN kamo nagbibiahe sa sarong dai nindo kabisadong dalan o tinampo, mamansayon daw nindo na olang an naggigiyang mga karatula? Posibleng marhay na dai! Sierto na mamansayon nindo an mga iyan bilang pantabang tanganing dai kamo malagalag sa ruta pasiring sa saindong dudumanan.
Pero kumusta man an pagbiahe sa dalan nin buhay? Mahihimo daw nindo na magin mapanggana iyan kun mayo an naggigiyang mga karatula? Rinekonoser nin sarong suanoy na propeta nin Dios an mga limitasyon nin katawohan sa bagay na ini. Sia nagsabi: “Aram ko, O KAGURANGNAN, na an mga dalan nin tawo bakong pili nia mismo; ni nasa tawo man an pagdeterminar kan direksion nia sa buhay.”—Jeremias 10:23, The New English Bible.
Saen, kun siring, manonompongan an kinakaipuhan na giya? An mapananarigan na gikanan kan giyang iyan iyo an Kaglalang sa tawo, asin an piguratibong naggigiyang mga karatula manonompongan sa Biblia. Si Jehova, paagi sa saiyang Tataramon, nagsasabi: “An saimong mga talinga makadadangog nin tataramon sa likod mo na nagsasabi: ‘Iyo ini an dalan. Maglakaw kamo dian, banwaan,’ enkaso kamo banwaan pumatoo o enkaso kamo pumawala.”—Isaias 30:21.
Iyo, an Tataramon nin Dios nagtatao nin mapananarigan na giya sa gabos na aspekto kan satong buhay. (Isaias 48:17; 2 Timoteo 3:16, 17) Minsan siring, makamomondo na an mayoriya sa katawohan nagbibiahe sa dalan nin buhay na independiente sa paggiya nin Dios. (Mateo 7:13) Pero, an naggigiyang mga karatula ibinugtak na permanente! Kukuyogon daw nindo iyan mantang kamo naglalakaw sa dalan nin buhay?