Liniwat nin Intelektuwal an Petsa kan Manuskrito kan Biblia
Segun ki Carsten Peter Thiede, sarong Aleman na eksperto sa papirologo, igwa nin makosog na ebidensia na an tolong kapidasong papiro kan Ebanghelyo ni Mateo (na midbid bilang Papiro sa Magdalen) isinurat kaidtong enot na siglo.
Pakatapos na ikomparar an mga kapidaso (na igwa kan mga kabtang kan Mateo kapitulo 26) sa sarong suanoy na surat na pankomersio na nanompongan sa Egipto, si Thiede nagsabi na an dokumentong Egipcio nakakaagid sa “Papiro sa Magdalen na garo magkambal—sa pankagabsan na itsura asin sa korte patin pagkaporma kan indibiduwal na mga letra.” Si Thiede asin an kaiba niang autor na si Matthew D’Ancona nagkonklusyon sa saindang libro na Eyewitness to Jesus—Amazing New Manuscript Evidence About the Origin of the Gospels na an mga pagkakaagid kan duwang dokumento nagpapaheling na an mga iyan isinurat na haros magkadungan. Kasuarin? An dokumentong pankomersio may petsang “‘Kan ika-12 taon ni Nero na Kagurangnan, Epeip 30’—na, segun sa satong kalendaryo, Hulyo 24, 66 [C.E.].”
“An pagpetsang ini, kun tama, labi-labi kaimportante,” an sabi ni Propesor Philip W. Comfort, sa sarong artikulo na ipinublikar sa Tyndale Bulletin, “huli ta ibinubugtak kaiyan an sarong manuskrito kan Ebanghelyo ni Mateo sa laog kan iyo man sanang siglo na iyan isinurat.” Gigibohon man kaiyan an Papiro sa Magdalen na an pinakadaan na mga kapidaso kan Ebanghelyo na yaon pa.
[Retrato sa pahina 29]
An Papiro sa Magdalen, ipinaheheling sa aktuwal na sokol
[Pasasalamat para sa pinagkuanan]
May permiso kan President and Fellows of Magdalen College, Oxford