Sarong Desisyon Apabor sa Diretsong Pumili

DAING iba kundi an pinakabantog na Personahe sa bilog na uniberso an nagsusuportar sa may kabatidan na pagpili. Sia an satong Kaglalang. Igwa kan daing sagkod na kaaraman manongod sa mga pangangaipo nin tawo, sia buka an palad na nagtatao nin instruksion, patanid, asin paggiya manongod sa madonong na dalan na dapat lakawan. Sa ibong kaiyan, iginagalang nia an libreng kabotan na itinao nia sa saiyang intelihenteng mga linalang. An saiyang propetang si Moises ipinabanaag an punto de vista nin Dios: “Ibinugtak ko an buhay asin kagadanan sa atubangan mo, an bendisyon asin an maldisyon; asin kaipuhan na pilion mo an buhay tanganing makapagpadagos kang mabuhay, ika asin an saimong aki.”​—Deuteronomio 30:19.

Apektado kan prinsipyong ini an langtad nin medisina. An ideya nin may kabatidan na pagpili, o may kabatidan na pagtogot, luway-luway na inaako sa Hapon asin sa iba pang kadagaan na duman iyan bakong gayong pamilyar kaidto. Si Dr. Michitaro Nakamura itinao an paglaladawan na ini sa may kabatidan na pagtogot: “Iyan an ideya na an doktor ipinaliliwanag sa pasyente sa madaling masabotan na pananaram an helang, an paglaom na maomayan, an paagi nin pagbolong, asin posibleng laen na mga epekto, na iginagalang an diretso kan pasyente na iyong magdesisyon sa paagi nin pagbolong.”​—Japan Medical Journal.

Dakol nang taon na an mga doktor sa Hapon nag-atubang nin manlaenlaen na dahelan na kontrahon an paaging ini nin pagtratar sa mga pasyente, asin an mga korte may tendensiang umoyon sa kostumbre sa medisina. Sa siring, kan an desisyon apabor sa may kabatidan na pagpili opisyal na ipinahayag ni Poon na Huwes Takeo Inaba kan Korte Superyor kan Tokyo kan Pebrero 9, 1998, iyan nagin sarong pangyayari na tanda nin pagkaliwat. Ano an desisyon na iyan, asin ano an isyu na nagpangyari na an kaso makaabot sa mga korte?

Kaidtong Hulyo 1992, an 63 anyos na si Misae Takeda, na saro sa Mga Saksi ni Jehova, nagduman sa Ospital kan Institusyon nin Siensia Medikal, Unibersidad nin Tokyo. Nadiskobre na sia igwa nin nakagagadan na tumor sa katoy asin kaipuhan na operaran. Gustong marhay na kuyogon an pagboot kan Biblia tumang sa salang paggamit nin dugo, lininaw nia sa saiyang mga doktor an saiyang kamawotan na akoon sana an pagbolong na daing dugo. (Genesis 9:​3, 4; Gibo 15:29) Inako kan mga doktor an sarong kasuratan sa pagkaabsuelto sa paninimbagan, na nag-aabsuelto sa sainda asin sa ospital sa ano man na paninimbagan na bunga kan saiyang desisyon. Sinierto ninda sa saiya na sinda masunod.

Minsan siring, pakatapos kan operasyon, asin mantang si Misae nasa impluwensia pa nin pampatorog, sia inineksionan nin dugo​—na sarongat nanggad sa saiyang ipinahayag nin malinaw na mga kahagadan. An mga paghihingoang itago an dai autorisadong pag-ineksion nin dugo nabuyagyag kan an sarong empleyado sa ospital minalataw na ibinulgar an impormasyon sa sarong reporter. Siring sa masasabotan nindo, an sinserong Kristianang ini napanluya nin biyo kan maaraman nia an dai autorisadong pag-ineksion nin dugo. Nagtiwala sia sa mga doktor, na naniniwala na ootobon ninda an saindang sinabi asin igagalang an saiyang relihiosong mga kombiksion. Huli sa labi-labing kapurisawan sa emosyon dahel sa grabeng paglapas na ini sa relasyon nin doktor saka pasyente asin sa paglaom na makaestablisar nin sarong ehemplo tanganing an iba dai na umagi sa kaagid na pagmaltrato nin mga doktor, dinara nia sa korte an bagay na iyan.

Orden kan Publiko Asin Moral

An tolong huwes kan Korte sa Distrito nin Tokyo binista an kaso asin nagdesisyon apabor sa mga doktor asin, sa siring, tumang sa diretsong may kabatidan na pagtogot. Sa saindang desisyon, na opisyal na ipinahayag kan Marso 12, 1997, sinabi ninda na imbalido an ano man na pagprobar na gumibo nin kontrata para sa pagbolong na biyong daing dugo. An saindang pangangatanosan iyo na magigin paglapas sa kojo ryozoku,a o mga pamantayan kan sosyedad, an espesyal na pakipagkontrata nin sarong doktor na dai mag-ineksion nin dugo dawa kun magin delikado an situwasyon. An saindang opinyon iyo na an pangenot na obligasyon nin sarong doktor magligtas nin buhay sa pinakamarahay na paaging kaya nia, kaya an siring na kontrata magigin imbalido sa kapinonan pa sana, ano man an relihiosong mga kombiksion kan pasyente. Sinda nagdesisyon na sa katapustapusi, an propesyonal na opinyon nin doktor maninigong ipaorog kisa sa ano man na tibaad patienot na hagadon nin pasyente.

Apuera kaini, sinabi kan mga huwes na huli sa iyo man sanang mga dahelan, minsan ngani linalaoman na ipaliwanag an pundamental na prosedimiento, mga epekto, asin peligro nin iprinoponer na operasyon, an doktor “puedeng dai sabihon kun baga sia may intension na mag-ineksion nin dugo o dai.” An saindang paghusgar: “Dai puedeng desisyonan na ilegal ni sala na an mga doktor bilang mga Demandado nasabotan an mga kahagadan kan Demandante na dai magpaineksion nin dugo dawa sa ano man na kamugtakan asin nagsagin na igagalang ninda an saiyang mga kahagadan asin sa siring nagpangyari sa saiya na akoon an operasyon na pinag-oolayan.” An pangangatanosan iyo na kun bako iyan an ginibo kan mga doktor, an pasyente tibaad nagsayuma na magpaoperar asin naghale sa ospital.

An desisyon na iyan kan korte nakabigla asin nakapanluya sa boot kan mga paradepensa kan may kabatidan na pagtogot. Sa pagpaliwanag kan desisyon sa kaso ni Takeda asin kan mga kalabot bilang resulta para sa may kabatidan na pagtogot sa Hapon, si Propesor Takao Yamada, sarong pangenot na eksperto sa ley sibil, nagsurat: “Kun an pangangatanosan sa desisyon na ini totogotan na magdanay na balido, an pagsayuma sa pag-ineksion nin dugo asin an legal na prinsipyo nin may kabatidan na pagtogot magigin garo kandila na nagpipirawpitaw sa doros.” (Peryodiko dapit sa ley na Hogaku Kyoshitsu) Kinondenar nia sa mapuersang mga tataramon an puersahan na pag-ineksion nin dugo bilang “grabeng paglapas sa tiwala, na kaagid nin nakasisindak na pagsalakay.” Si Propesor Yamada nagsabi pa na an siring na aksion na nakararaot sa tiwala maninigo na “nungka nanggad na togotan.”

Huli sa pagigin hababa kan boot ni Misae nagin masakit para sa saiya na magin sentro nin atension kan publiko. Alagad sa biyong pakaaram na sia puedeng magkaigwa nin kabtang sa pagdepensa kan ngaran asin matanos na mga pamantayan ni Jehova may labot sa kabanalan nin dugo, sia determinadong gibohon an saiyang kabtang. Sinuratan nia an saiyang abogado: “Ako kabokabo sana, mas hababa pa ngani. Ako nagngangalas kun taano an sarong daing kakayahan na tawo na arog ko ta ginagamit. Alagad kun ako mahingoang gibohon kun ano nanggad an sinasabi ni Jehova​—an saro na kayang pakurahawon an mga gapo—​sia matao sa sako nin kosog.” (Mateo 10:​18; Lucas 19:40) Kan yaon na sa puesto para sa testigo durante kan pagbistang iyan, ilinadawan nia na nagkikibigkibig an tingog an inagihan niang emosyonal na trauma na bunga kan pagtraydor. “An pagmate ko ako linapastangan, garo sarong babae na linupigan.” Huli sa saiyang deklarasyon napaluha an dakol sa korte kan aldaw na idto.

Dai Linalaoman na Pagparigon sa Boot

Huli sa desisyon kan Korte sa Distrito, an kaso tolos-tolos na iinapelar sa Korte Superyor. An pag-atubang kan mga argumento sa korte de apelasyon nagpoon kan Hulyo 1997, asin si Misae na ngonyan malungsi na alagad determinado yaon duman na nasa silyang de rueda. An kanser nagbalik, asin sia orog na nagluluya. Naparigon na marhay an boot ni Misae kan an poon na huwes, sa pambihirang aksion, ipahayag nin malinaw kun ano an magigin direksion kan korte. Lininaw nia na an korte de apelasyon dai oyon sa konklusyon kan mas hababang korte​—na an doktor may diretso na dai intindihon an mga kahagadan kan pasyente, na sagin masunod alagad determinado sa hilom na iba an gibohon. An poon na huwes nagsabi na dai susuportaran kan korte an paternalistang prinsipyo na “Shirashimu bekarazu, yorashimu beshi,”b na an boot sabihon, “Papagdanayon sindang ignorante asin anga” sa mga doktor. Si Misae nagsabi pagkatapos: “Ako ogmahon na madangog an imparsial na komento kan huwes, na kabaliktaran nanggad kan nakaaging desisyon kan Korte sa Distrito.” Sinabi pa nia: “Ini an pigpaparapamibi ko ki Jehova.”

Kan suminunod na bulan si Misae nagadan, na napalilibotan nin mamomoton na pamilya asin mga doktor sa iba man na ospital, na duman nasabotan asin iginalang an saiyang sinserong mga kombiksion. Minsan ngani namondong marhay sa pagkagadan nia, an saiyang aking lalaki, si Masami, asin an iba pang miembro nin pamilya determinadong asikasohon an kaso sagkod na iyan matapos, kaoyon kan saiyang mga kahagadan.

An Desisyon

Sa katapustapusi, kan Pebrero 9, 1998, an tolong huwes kan Korte Superyor opisyal na ipinahayag an saindang desisyon, na rinerebokar an desisyon kan mas hababang korte. An sadit na korte pano nin mga reporter, propesor, asin iba pa na fiel na sinubaybayan an pagbista. An pangenot na mga diaryo asin estasyon nin telebisyon nagbareta manongod sa desisyon. An nagkapirang titulo nagsasabi: “Korte: An mga Pasyente Puedeng Magsayuma sa Pagbolong”; “Korte Superyor: An Pag-ineksion nin Dugo Paglapas sa Diretso”; “Doktor na Puersahan na Nag-ineksion nin Dugo Nadaog sa Korte”; asin “An Saksi ni Jehova Binayadan sa Danyos Huli sa Pag-ineksion nin Dugo.”

An mga bareta manongod sa desisyon eksakto asin labi-labi kapaborable. An The Daily Yomiuri nagbareta: “Sinabi ni Huwes Takeo Inaba na sala para sa mga doktor na gumibo nin mga prosedimiento na sinayumahan nin sarong pasyente.” Iyan nagsabi man nin malinaw: “An mga doktor na [nag-ineksion nin dugo] hinalean sia kan oportunidad na pumili kan pagbolong na gusto nia.”

Sinabi kan Asahi Shimbun na minsan ngani sa kasong ini an korte naniniwala na mayong igong ebidensia na igwa nin kontrata na dian an duwang lado nag-oyon na dai magamit nin dugo maski sa situwasyon na an buhay namemeligro, an mga huwes dai nag-oyon sa mas hababang korte manongod sa pagigin legal kan siring na kontrata: “Kun igwa nin napagkaoyonan na pinag-olayan na marhay kan mag-ibong na ladong kalabot na dai maninigong mag-ineksion nin dugo dawa sa anong kamugtakan, an Korte na ini dai iyan ibinibilang na tumang sa orden kan publiko asin, huli kaini, imbalido.” Dugang pa, sinabi kan peryodikong ini an punto de vista kan mga huwes na “an gabos na tawo nakatalagang magadan pag-abot nin panahon, asin puedeng desisyonan kan lambang indibiduwal an paagi na masagkod sa panahon na iyan nin kagadanan.”

An totoo, an Mga Saksi ni Jehova siniyasat an bagay na ini asin kombensido na an pinipili ninda pinakamarahay na paaging mabuhay. Kabale dian an pagsayuma sa rekonosidong mga peligro nin pag-ineksion nin dugo asin imbes pag-ako sa mga prosedimiento na daing dugo na ginagamit nin dakol sa dakol na kadagaan asin na kaoyon kan ley nin Dios. (Gibo 21:25) Sinabi nin sarong midbid na marhay na propesor na Hapon sa ley nin konstitusyon: “Sa katunayan, an pagsayuma sa pinag-oolayan na pagbolong [paagi sa pag-ineksion nin dugo] bakong pagpili ‘kun paano magadan’ kundi, imbes, pagpili kun paano mabuhay.”

An desisyon kan Korte Superyor maninigong magtao nin patanid sa mga doktor na an saindang mga diretso na magdesisyon nin sadiri bakong arog kahiwas kan pinaghona nin nagkapira. Asin iyan maninigong magbunga nin pag-establisar nin mga susundan sa etika sa mas dakol pang ospital. Minsan ngani an desisyon na ini kan korte sa pankagabsan rekonosido asin nakaparirigon sa boot kan mga pasyente, na haros mayong diretsong magdesisyon sa pagbolong na gusto ninda, bakong gabos na lado maogmang inako iyan nin bilog na puso. An ospital na minamanehar kan gobyerno asin an tolong doktor iinapelar an kaso sa Korte Suprema. Kaya dapat kitang maghalat na maisihan kun baga sosorogon man kan pinakahalangkaw na korte sa Hapon an diretso nin mga pasyente, arog kan Soberano kan uniberso.

[Mga Nota sa Ibaba]