Paghabon na Naprakaso sa Solnopan na Aprika
Isinaysay ni Eunice Ebuh
“Plinano kan mga parahabon na armado an saindang pagsalakat sa aldaw na sa parate ginigibo mi an Pag-adal sa Libro kan Kongregasyon sa samong harong. Binubuksan ming marhay an samong trangka para sa mga tugang na lalaki asin babae patin mga interesado. Posibleng aram kan mga parahabon an samong mga ugale asin oras nin pagtiripon. Segurado kami na naghabon sinda nin kotse sa ibang lugar asin naghalat sa may trangka mi kan aldaw asin oras kan pag-adal sa libro.
“Natagbo na kan semana na luminaog sinda iyo an semana kan pagsongko kan paraataman sa sirkito. Imbes na magtiripon sa harong mi, kami nagtiripon sa Kingdom Hall. Pagkatapos kan pagtiripon, igwa nin miting an kamagurangan. Sa parate minapuli na kami kan mga aki, alagad an agom ko, na sarong magurang sa kongregasyon, nagpahalat sa samo. Sinabi nia na dai sia mahahaloy. Kaya naghalat kami.
“Sunod naaraman mi na an kotse habong umandar. Dai iyan nakayang hirahayon kan paraataman sa sirkito asin kan sakong agom. Dai man iyan nahirahay kan mekaniko na inapod mi.
“Kinaipuhan nang maglakaw papuli an mga aki. Paghaloyhaloy, nagpuli na man ako. Mga alas dies na ako nag-abot. Ako ni an mga aki dai naglaog sa natad na nakasakay sa kotse, na mangangaipong buksan an dakulang trangka.
“Paglaog ko sa kuarto ko, nakadangog ako nin putok nin badil, na makosogon. Nagngalas ako kun ano an nangyayari. Prinobaran kong mag-apod nin pulis, alagad gadan an telepono. Dali-dali akong nagbaba asin binaratan ko an batbat na pinto sa atubangan, dangan dali-dali kong binaratan an tahaw na pinto. Pinarong ko an mga ilaw. Natatakot na an mga aki ko, kaya sinabihan ko sinda na kumalma. Iriba kaming namibi para sa proteksion ni Jehova. Mientras tanto, nasa Kingdom Hall pa an agom ko na nasasakitan na mapaandar an kotse.
“Nagdungaw ako sa bintana asin naheling ko an sarong lalaki na nakahigda sa tinampo sa luwas kan trangka. Garo baga mayo na an mga parahabon, kaya isinakay ko sa kotse ko an lalaking nalugadan asin idinalagan ko sia sa ospital. Peligroso idto, alagad kaipuhan kong gumibo nin paagi. Pero makamomondo, nagadan sia kan sunod na aldaw.
“Apisar kan trahedyang idto, tibaad nagin mas grabe pa an situwasyon. An pagsongko kan paraataman sa sirkito nangahulogan na bakong sa harong mi gigibohon an pag-adal sa libro. An pagkaraot kan kotse nangahulogan na dai kami nag-iribanan na pamilya sa pagpuli. An agom ko, na seguradong inatake kutana kan mga parahabon, banggi nang marhay nagpuli. Ini asin an iba pang mga dahelan nagin para sa samong bentaha kan bangging idto.
“Si Jehova an samong kuta asin an samong pailihan. Siring iyan sa sinasabi kan teksto: ‘Sagkod na bakong si Jehova mismo an magbantay sa siudad, basang sana na an bantay nagdanay na mata.’”—Salmo 127:1.