Suportaran an Pagbisita kan Paraataman sa Sirkito
1 Poon kan Oktubre 15, 1946, padagos, an mga kongregasyon inorganisar sa mga sirkito na pinaglilingkodan nin nagbibiyaheng mga paraataman. Sa haros 43 na taon na ngonyan, kapwa an mga indibiduwal asin mga kongregasyon nakinabang sa teokratikong probisyon na ini. (Isa. 1:26) An satuyang padagos na pagsuportar sa areglong ini magdadara sa sato nin orog na dakol na mga bendisyon.—Efe. 4:7, 8, 11.
PAG-AANDAM PARA SA PAGBISITA
2 Sa pagkaanunsiar sa pagbisita kan paraataman sa sirkito, makapopoon na kitang mag-andam para kaini. Satuya nang ikaaareglo an satong normal na iskedyul tanganing orog na masuportaran an semana nin espesyal na gibohon. An ibang parahayag minagamit nin orog na panahon sa paglilingkod sa langtad paagi sa pag-auxiliary payunir. An iba minapalta nin saro o duwang aldaw sa saindang sekular na trabaho tanganing makikabtang sa ministeryo. Dakol na parahayag an minagibo nin espesyal na areglo tanganing makiiba sa paraataman sa sirkito sa gibohon.
3 An mga report nagpapaheling na puwedeng magkaigwa nin mas marahay na suporta sa pagdalaw liwat sa hapon asin sa gibohon na pag-adal sa Biblia. Puwede daw kamong mag-iskedyul nin pagdalaw liwat o nin pag-adal sa Biblia sa hapon durante kan semanang iyan? An paraataman sa sirkito maoogma na ibanan kamo, asin kun gusto nindo, maoogma siang magkondukta kan saindong pag-aadal.
PERSONAL NA TABANG
4 An paraataman sa sirkito interesado na tabangan idtong nagmamawot nin orog pang mga pribilehiyo sa paglilingkod. (1 Tim. 3:1) Igwa daw kamong mga hapot manongod sa saindong mga gibohon asin responsibilidad? Mawot daw nindong paoswagon an saindong abilidad asin personal na organisasyon? Mawot daw nindo na maglingkod kun saen mas orog an pangangaipo sa saindong sirkito? Ano man an saindong espirituwal na pasohan, an paraataman sa sirkito maoogmang makipag-olay sa saindo kaiyan.
5 Kun an saindong paraataman sa sirkito may agom, an saiyang agom man sarong payunir asin magtatao nin bilog na suporta sa mga areglo nin paglilingkod sa langtad. Sia andam na makiiba sa mga tugang na babae asin umiba sa sainda sa mga pagdalaw liwat asin mga pag-adal sa Biblia. Angay man sa saiya an kaparehong komendasyon na itinao ni Pablo manongod ki Febe.—Roma 16:1, 2.
6 Dai nanggad paglingawan an pribilehiyo niato na magpaheling nin pagigin mapagpadagos sa mga nagbibiyaheng paraataman. Kadakol an mga tugang na dai nalilingawan an mga nakaagi asin an pampakosog na saindang naako huli kan pagbukas sa saindang mga harong o pagpapakakan sa nagbibiyaheng mga ministrong ini asin sa maogmang espirituwal na pakikiiba sa sainda.—3 Juan 5-8.
7 Logod na kita gabos magin determinado na suportaran nin lubos an masunod na pagbisita kan satuyang paraataman sa sirkito.