Pagparinigonan nin Boot Para sa Gabos
1. Anong espesyal na mga oportunidad an itinatao kan mga pagsongko kan nagbibiaheng mga paraataman?
1 Nagsurat si apostol Pablo sa kongregasyon sa Roma: “Ako nagmamawot na maheling kamo, tanganing makatao ako sa saindo nin espirituwal na balaog tanganing kamo maparigon; o, mas marahay pa, tanganing magkaigwa nin pagparinigonan nin boot dian sa saindo, an lambang saro huli sa pagtubod nin iba, an saindo sagkod an sako man.” (Roma 1:11, 12) An pagsongko kan nagbibiaheng mga paraataman sa presenteng panahon nagtatao nin kaagid na mga oportunidad para sa pagparinigonan nin boot.
2. Taano ta inaanunsiar antes pa an pagsongko kan paraataman sa sirkito?
2 An Kongregasyon: Sa pangkagabsan an pagsongko kan paraataman sa sirkito inaanunsiar sa kongregasyon mga tolong bulan antes pa. Nagtatao ini sa sato nin panahon na areglaron an satong iskedyul tanganing lubos kitang makinabang. (Efe. 5:15, 16) Kun kamo may sekular na trabaho, tibaad makakahagad kamo nin bakasyon tanganing suportaran an paglilingkod sa langtad durante kan semanang iyan. Inaareglar nin nagkapira na mag-auxiliary payunir durante kan bulan nin pagsongko. Kun nagpaplano kamong humale, makakagibo daw kamo nin mga pagliliwat tanganing magin presente sa semanang iyan?
3. Ano an puede niatong gibohon personalmente durante kan pagsongko tanganing maparigon an satong boot?
3 An sarong pangenot na katuyohan nin pagsongko kan paraataman sa sirkito iyo na magtao nin personal na pagparigon sa boot asin pagsasanay sa ministeryo sa langtad. Puede daw kamong makiolay na maglingkod kaiba nia o kan saiyang agom kun sia may agom? Ikinakaogma kan paraataman sa sirkito na maglingkod kaiba nin manlaenlaen na parahayag, pati na an mga tibaad mayo pang gayong eksperyensia o gustong magin mas eksperto sa ministeryo. An gabos puedeng makanood sa saiyang presentasyon asin mag-aplikar nin ano man na suhestion na tibaad may kabootan niang itao. (1 Cor. 4:16, 17) An pag-imbitar sa saiya na kumakan kaiba nindo magbubukas nin dugang pang oportunidad para sa nakakaparigon na pakikiiba. (Heb. 13:2) Huling an saiyang mga pahayag ibinabagay sa mga pangangaipo kan kongregasyon, maingat na maghinanyog.
4. Paano niato mapaparigon an boot kan satong paraataman sa sirkito?
4 An Paraataman sa Sirkito: Si apostol Pablo kapareho man kan mga tugang sa kongregasyon na pinaglingkodan nia huli ta nakaeksperyensia man sia nin mga angat asin kahaditan, saka nangaipo man sia nin pagparigon sa boot asin nagpasalamat para dian. (2 Cor. 11:26-28) Kan maaraman kan kongregasyon sa Roma na sa katapustapusi maduman si Pablo, na kan panahon na iyan saro nang preso, nagbiahe an nagkapira pasiring sa Sadan nin Apio tanganing sabaton sia—sa distansia na 74 kilometros! “Kan maheling sinda, si Pablo nagpasalamat sa Dios asin nagkosog an boot.” (Gibo 28:15) Mapaparigon man nindo an boot kan saindong paraataman sa sirkito. Ipaheling sa saiya an “dobleng onra” paagi sa entusiastiko nindong pagsuportar sa saiyang pagsongko. (1 Tim. 5:17) Ipahayag asin ipaheling an sinserong pag-apresyar nindo sa saiyang mga paghihingoa para sa saindo. Maggagayagaya sindang mag-agom mantang naoobserbaran ninda an saindong pagtubod, pagkamoot, asin pakatagal.—2 Tes. 1:3, 4.
5. Taano ta kaipuhan niato gabos an pagparigon sa boot ngonyan?
5 Sa ‘delikadong mga panahon na ini na masakit pakibagayan,’ siisay sa sato an dai nangangaipo nin pagparigon sa boot? (2 Tim. 3:1) Magdesisyon na ngonyan na lubos na makikabtang sa espesyal na semana nin aktibidad kaiba kan paraataman sa sirkito. Gabos kita—pareho an nagbibiaheng mga paraataman asin mga parahayag—puedeng makikabtang sa magayagayang pagparinigonan nin boot. Sa paaging ini ‘padagos man niatong rarangahon asin papakosogon an lambang saro.’—1 Tes. 5:11.