‘Nagpasalamat si Pablo sa Diyos Asin Kuminusog an Saiyang Buot’

Kan mabaretaan kan kongregasyon sa Roma na maabot si Pablo, sarong grupo nin mga tugang an nagbaklay nin mga 64 kilometros tanganing sabaton siya. Ano an nagin epekto ki Pablo kan saindang mapagsakripisyong pagkamuot? “Kan mahiling sinda ni Pablo, nagpasalamat siya sa Diyos asin kuminusog an saiyang buot.” (Gi 28:15) Midbid si Pablo sa pagpapakusog sa mga kongregasyon na binibisita niya, pero sa pagkakataon na ini na siya nakapreso, siya an nag-ako nin pampakusog.—2Co 13:10.

Ngunyan, an mga paraataman nin sirkito nagdadalaw sa lambang kongregasyon tanganing pakusugon an mga tugang. Arog kan gabos na lingkod nin Diyos, kun minsan napapagal man sinda, nahahadit, asin pinangluluyahan nin buot. Kaya sa sunod na magdalaw sa saindong kongregasyon an paraataman nin sirkito kaiba an saiyang agom, ano an puwede nindong gibuhon tanganing ‘mapakusog nindo sinda paagi kan saindong pagtubod asin mapakusog man ninda kamo paagi kan saindang pagtubod’?—Ro 1:11, 12.

• 

  Suportaran an mga pagtiripon bago maglingkod sa langtad. Napapakusog an paraataman nin sirkito pag an mga parahayag nagsasakripisyo tanganing lubos na makinabang sa espesyal na semana nin aktibidad. (1Te 1:2, 3; 2:20) Puwede kang mag auxiliary payunir durante kan bulan kan pagdalaw niya. Puwede mo daw siyang alukon o an saiyang agom na ibanan ka sa ministeryo o iiba an saro sa sainda sa tinutukduan mo sa Bibliya? Nauugma sindang makaibanan an iba-ibang parahayag, kaiba na an mga baguhan o idtong mga dai pa gayong mahusay sa ministeryo.

• 

  Magin mapag-istimar. Puwede mo daw sindang padaguson sa harong nindo o pakakanon? Paagi kaiyan, maipapahiling mo na namumutan mo an paraataman nin sirkito asin an saiyang agom. Dai sinda naghahanap nin ano man na magarbo.—Lu 10:38-42.

• 

  Dangugon asin iaplikar an saiyang paggiya asin konseho. Mamumuton na tinatabangan kita kan paraataman nin sirkito na mahiling kun paano pa niyato mapapauswag an satong paglilingkod ki Jehova. Kun minsan, tibaad kaipuhan niyang magtao nin magabat na konseho. (1Co 5:1-5) Mauugma siya kun masinunod kita asin mapagpasakop.—Heb 13:17.

• 

  Magpasalamat. Sabihon sa paraataman nin sirkito asin sa saiyang agom kun paano ka nakinabang sa saindang mga paghihinguwa. Puwede mong sabihon iyan nin personal o paagi sa sarong surat o kard.—Col 3:15.