Nagbibiyaheng mga Paraataman—Mga Katabang sa Gibohon sa Katotoohan
Sa Kristianong kongregasyon kan enot na siglo, may nagbibiyaheng mga paraataman na nagsongko sa mga kongregasyon tanganing pakosogon sinda. Idinusay ninda an saindang sadiri, na dai naghahanap nin personal na pakinabang, tanganing matabangan ninda an mga nasa kongregasyon na magpadagos na lumakaw nin maninigo sa Dios.—Gibo 11:23, 24; 14:21, 22; 15:32; 20:2, 31-35; Filipos 2:20-22, 29; 1 Tesalonica 2:5-12.
Ngonyan an mga kongregasyon nin mga Saksi ni Jehova nakikinabang man sa mga nagbibiyaheng paraataman. An mga lalaking ini dakol nang taon an eksperyensia sa paghuhulit kan mga Saksi ni Jehova asin bilang mga paraataman. Ginibo ninda an saindang sadiri na libre sa sekular na trabaho asin mga responsibilidad sa pamilya tanganing ikadusay ninda an saindang sadiri sa panbilog na panahon na ministeryo. Para sa mga may agom, parate na an mga agom na babae nakikikabtang man sa ministeryo nin bilog na panahon kaiba kan saindang agom.
An paraataman sa sirkito iinaasignar na mangataman sa sarong sirkito na may mga 18 sagkod sa 25 kongregasyon. Sinosongko nia an lambang kongregasyon sa sirkito nin mga duwang beses kada taon asin pakalihis nin duwa o tolong taon iinaasignar sa ibang sirkito. Sa paaging ini an mga kongregasyon makikinabang sa laen-laen na kabatidan asin kakayahan nin laen-laen na paraataman sa sirkito.
Sinisiyasat kan paraataman sa sirkito an espirituwal na kamugtakan kan kongregasyon asin an aktibidad kaiyan. Nagtatao sia nin pirang pahayag sa kongregasyon asin nakikipag-olay man sa kamagurangan asin ministeryal na mga lingkod kun paano ninda mapaooswag an saindang paglilingkod sa kongregasyon.
Sa laog kan semana sia asin an saiyang agom, kun sia may agom, iniibanan an lokal na mga Saksi, na tinatabangan sindang umoswag sa saindang ministeryo sa harong-harong. Sindang mag-agom minasongko man sa mga bagong interesado tanganing mapakosog sinda sa pagtubod. Puwede kamong humagad na songkoon.
An paraataman sa distrito igwa man nin kaparehong espirituwal na mga kuwalipikasyon asin kabatidan. Sia nagbibiyahe sa mga sirkito, na naglilingkod kada semana may koneksion sa pansirkitong mga asamblea. Sia asin an saiyang agom minaiba man sa ministeryo sa langtad kaiba kan mga Saksi sa saro sa mga kongregasyon kan sirkito na saiyang sinosongko. Sia an nagdidirehir sa pag-andam kan programa sa pansirkitong asamblea asin nagtatao nin pirang pahayag sa panahon kan asamblea, kaiba an pahayag-publiko.
Kun natapos na nin nagbibiyaheng mga paraataman an saindang pagsongko sa sarong kongregasyon o sirkito, minadagos sinda sa pagsongko sa saro pa, na sinusunod an parehong iskedyul, sagkod na an gabos na kongregasyon o sirkito nasongko na sa laog nin mga anom na bulan; dangan mapoon na naman sinda.
Sa dakol na nasyon an nagbibiyaheng mga paraataman nagbibiyahe paagi sa kotse o panpublikong transportasyon. Sa ibang nasyon tibaad gumamit sinda nin bisikleta o maglakaw sana. Binabayadan kan Sosyedad an gastos sa pagbiyahe kan nagbibiyaheng paraataman asin tinatawan man sia asin an saiyang agom nin kadikit na abono para sa saindang personal na mga pangangaipo. Parate na an nagbibiyaheng paraataman asin an saiyang agom tinatawan nin dadagusan asin pagkakan kan mga miembro kan lambang kongregasyon.
An paglilingkod na ini nangangaipo nin espiritu nin pagsasakripisyo sa sadiri. An nagbibiyaheng mga paraataman asin an saindang agom determinado na maglingkod sa mga kongregasyon na dai nagbubugtak nin magastos na pagabat sa sainda.—1 Tesalonica 2:9.
• Ano an katuyohan kan nagbibiyaheng mga paraataman sa Kristianong kongregasyon kan enot na siglo?
• Paano an nagbibiyaheng mga paraataman ngonyan nagin kuwalipikado asin puwede para sa ministeryong ini?
• Isaysay an paglilingkod kan mga paraataman sa sirkito asin distrito asin kun paano sinda nabubuhay.
[Ritrato sa pahina 20]
An paraataman sa distrito nagpapahayag sa sarong pansirkitong asamblea
[Mga ritrato sa pahina 21]
An mga paraataman sa sirkito nagtatao nin instruksion sa paghuhulit sa harong-harong, nakikipag-olay sa kamagurangan kan kongregasyon, minasongko sa pakikipag-adal sa Biblia sa bagong mga interesado, nagpapahayag sa mga kongregasyon