Kun Paano an Nagbibiaheng mga Paraataman Naglilingkod Bilang Fiel na mga Mayordomo

“Kaoyon sa sokol nin balaog na naako kan lambang saro, gamiton iyan sa paglingkod sa lambang saro bilang marahay na mga mayordomo kan dai na kutana maninigong kabootan nin Dios na ipinahahayag sa manlaenlaen na paagi.”​—1 PEDRO 4:10.

1, 2. (a) Paano nindo tatawan nin kahulogan an terminong “mayordomo”? (b) Sairisay an kairiba sa mga mayordomo na ginagamit nin Dios?

GINAGAMIT ni Jehova an gabos na fiel na Kristiano bilang mayordomo. An mayordomo parate na sarong surugoon na namamahala sa kairiba sa harong. Tibaad pamahalaan man nia an mga negosyo kan saiyang kagurangnan. (Lucas 16:​1-3; Galacia 4:​1, 2) Inapod ni Jesus an saiyang grupo nin maimbod na mga linahidan digdi sa daga na “an fiel na mayordomo.” Sa mayordomong ini ipinaniwala nia an “gabos niang rogaring,” kaiba an mga aktibidad sa paghuhulit kan Kahadean.​—Lucas 12:​42-44; Mateo 24:​14, 45.

² Sinabi ni apostol Pedro na an gabos na Kristiano mayordomo kan dai na kutana maninigong kabootan nin Dios na ipinahahayag sa manlaenlaen na paagi. An lambang Kristiano may lugar na dian magigibo nia an fiel na pagkamayordomo. (1 Pedro 4:10) An nombradong Kristianong kamagurangan mga mayordomo, asin kabilang sa sainda an nagbibiaheng mga paraataman. (Tito 1:7) Paano maninigong mansayon an nagbibiaheng mga paraataman na ini? Ano an maninigong magin mga kualidad asin katuyohan ninda? Asin paano ninda magigibo an pinakadakulang karahayan?

Pinasasalamatan an Saindang Paglilingkod

3. Taano ta maaapod na “marahay na mga mayordomo” an nagbibiaheng mga paraataman?

³ Sa pagsurat sa sarong nagbibiaheng paraataman asin sa saiyang agom, an sarong Kristianong mag-agom nagsabi: “Boot niamong ipahayag an samong pasasalamat para sa gabos na panahon asin pagkamoot na itinao nindo sa samo. Bilang sarong pamilya, nakinabang kami nin dakula sa gabos nindong pagparigon sa boot asin sadol. Aram niamo na kami kaipuhan na padagos na tumalubo sa espirituwal, alagad sa tabang ni Jehova asin sa pagkaigwa nin mga tugang na lalaki asin babae na arog nindo, an mga kadepisilan sa bagong proyektong ini napagigian.” An mga kapahayagan na arog kaini parate ta an nagbibiaheng mga paraataman nagpapaheling nin personal na interes sa mga kapagtubod, kun paanong an marahay na mayordomo inaasikasong marhay an mga pangangaipo kan kairiba sa harong. An iba matibay na mga espiker. An dakol nakalalabi sa iba an abilidad sa paghuhulit, mantang an iba midbid sa saindang init asin pakikidamay. Paagi sa pagkultibar asin paggamit kan siring na mga balaog sa paglilingkod sa iba, an nagbibiaheng mga paraataman tama sanang apodon na “marahay na mga mayordomo.”

4. Anong hapot an pag-oolayan ngonyan?

⁴ “An hinahanap sa mga mayordomo iyo na an tawo makuang fiel,” an isinurat ni apostol Pablo. (1 Corinto 4:2) An paglilingkod sa mga kapwa Kristiano sa ibang kongregasyon serosemana sarong nasosolo asin magayagayang pribilehio. Minsan siring, iyan saro man na magabat na paninimbagan. Kun siring, paano daw fiel asin mapangganang maootob nin nagbibiaheng mga paraataman an pagkamayordomo ninda?

Mapangganang Pag-otob sa Pagkamayordomo Ninda

5, 6. Taano an mapagngayongayong pagsarig ki Jehova ta mahalagang marhay sa buhay nin sarong nagbibiaheng paraataman?

⁵ An mapagngayongayong pagsarig ki Jehova mahalagang marhay tangani na an nagbibiaheng mga paraataman magin mapangganang mga mayordomo. Huli sa saindang iskedyul asin dakol na paninimbagan, kun beses puede sindang makamate na nagagabatan. (Ikomparar an 2 Corinto 5:4.) Kaya kaipuhan na sinda gumawe na kaoyon sa awit kan salmistang si David: “Tawan ki Jehova mismo an pagabat sa saimo, asin sia matabang sa saimo. Noarin man dai nia totogotan na matanyog an matanos.” (Salmo 55:22) Nakararanga man an mga tataramon ni David: “Pag-omawon si Jehova, na sa aroaldaw dinadara an pasan para sa sato.”​—Salmo 68:19.

⁶ Saen kinua ni Pablo an kosog na asikasohon an saiyang espirituwal na mga paninimbagan? “Igwa ako kan kosog para sa gabos na bagay huli sa saiya na nagtatao nin kapangyarihan sa sako,” an isinurat nia. (Filipos 4:13) Iyo, si Jehova Dios an Burabod kan kosog ni Pablo. Kaagid kaiyan, si Pedro nagsadol: “Kun may naglilingkod, sia maglingkod na nagsasarig sa kosog na itinatao nin Dios; tanganing sa gabos na bagay an Dios mapamuraway paagi ki Jesu-Cristo.” (1 Pedro 4:11) An sarong tugang na nagbibiaheng paraataman sa dakol na taon idinoon an pangangaipo na manarig sa Dios, na sinasabi: “Perming maglaom ki Jehova sa pag-asikaso sa mga problema, asin patabang sa saiyang organisasyon.”

7. Paano may kabtang an pagigin timbang sa gibohon nin sarong nagbibiaheng paraataman?

⁷ Kaipuhan nin sarong mapangganang nagbibiaheng paraataman an pagigin timbang. Kapareho nin ibang Kristiano, naghihingoa sia na “makasierto sa orog na mahalagang mga bagay.” (Filipos 1:10)a Kun an lokal na kamagurangan may mga hapot manongod sa sarong bagay, madonong na sinda magkonsulta sa nagsosongkong paraataman sa sirkito. (Talinhaga 11:​14; 15:22) Posible na an saiyang timbang na mga komento asin Makakasuratan na hatol makatatabang na marhay mantang an bagay padagos na inaasikaso kan kamagurangan pagkahale nia sa kongregasyon. Sa nakaaagid na punto, sinabihan ni Pablo si Timoteo: “An mga bagay na nadangog mo sa sako na suportado nin dakol na saksi, an mga bagay na ini itao mo sa fiel na mga tawo na magigin man biyong kualipikado na magtokdo sa iba.”​—2 Timoteo 2:2.

8. Taano ta kaipuhan an pag-adal sa Biblia, pagsiyasat, asin paghorophorop?

⁸ An Makakasuratan na pag-adal, pagsiyasat, asin paghorophorop mga kaipuhan sa pagtao nin madonong na hatol. (Talinhaga 15:28) An sarong paraataman sa distrito nagsabi: “Kun nakikimiting sa kamagurangan, dai kita maninigong matakot na admitiron na dai niato aram an simbag sa sarong partikular na hapot.” An paghihingoa na aramon an “kaisipan ni Cristo” manongod sa sarong bagay pinapangyayari an pagtao nin hatol na basado sa Biblia na makatatabang sa iba na sunodon an kabotan nin Dios. (1 Corinto 2:16) Kun beses an sarong nagbibiaheng paraataman kaipuhan na sumurat sa Watch Tower Society para sa paggiya. Ano man an mangyari, an pagtubod ki Jehova asin pagkamoot sa katotoohan mas mahalagang marhay kisa sa impresyon sa sato nin iba o sa tibay sa pagpahayag. Imbes na paduman “sa sobrang pananaram o kadonongan,” pinonan ni Pablo an saiyang ministeryo sa Corinto “sa kaluyahan asin sa pagkatakot patin may dakulang pagtakig.” Sia daw dai nagin epektibo huli kaini? Al kontraryo, iyan nakatabang sa mga taga-Corinto na tumubod, “bakong sa kadonongan nin mga tawo, kundi sa kapangyarihan nin Dios.”​—1 Corinto 2:​1-5.

Iba Pang Mahalagang Marhay na mga Kualidad

9. Taano an pakikidamay ta kaipuhan nin nagbibiaheng kamagurangan?

⁹ An pakikidamay nakatatabang sa nagbibiaheng mga paraataman na makamit an marahay na mga resulta. Sinadol ni Pedro an gabos na Kristiano na ‘magpaheling nin pakikipagkapwa,’ o magin “madinamayon.” (1 Pedro 3:​8, nota sa ibaba) An sarong paraataman sa sirkito nakamamate kan pangangaipo na ‘magin interesado sa gabos sa kongregasyon asin magin tunay na maasikaso.’ May kaagid na espiritu, si Pablo nagsurat: “Makigayagaya sa mga tawong naggagayagaya; makitangis sa mga tawong nagtatangis.” (Roma 12:15) An siring na aktitud nagpapahiro sa nagbibiaheng mga paraataman na gumibo nin odok na paghihingoa na saboton an mga problema asin kamugtakan nin mga kapagtubod. Dangan makatatao sinda nin nakaparirigon na hatol na Makakasuratan na magbubunga nin tunay na karahayan kun iyan iaaplikar. An sarong paraataman sa sirkito na nakalalabi sa iba an abilidad sa pagpaheling nin pakikidamay nakaresibi kan surat na ini hale sa sarong kongregasyon na harani sa Turin, Italia: “Kun gusto mong magin interesante, magin interesado; kun gusto mong magin nakaoogma, magkaigwa nin mga kualidad na nakaoogma; kun gusto mong kamotan, magin madaling kamotan; kun gusto mong tabangan, magin andam na tumabang. Ini an nanodan mi sa saindo!”

10. Ano an isinabi nin mga paraataman sa sirkito asin distrito manongod sa pagigin mapakumbaba, asin anong halimbawa an itinao ni Jesus mapadapit digdi?

¹⁰ An pagigin mapakumbaba asin madaling dolokon nakatatabang sa nagbibiaheng mga paraataman na makagibo nin dakulang karahayan. An sarong paraataman sa sirkito nagkomento: “Pinakamahalaga na papagdanayon an mapakumbabang aktitud.” Pinatatanidan nia an bagong nagbibiaheng mga paraataman: “Dai nindo itogot na kamo maimpluwensiahan nin sobra kan mas may kayang mga tugang huli sa tibaad gibohon kan mga ini para sa saindo, ni makiamigo sana kamo sa mga siring, kundi perming magmaigot na trataron an iba na daing pagpaorog.” (2 Cronica 19:​6, 7) Asin an tunay na mapakumbabang nagbibiaheng paraataman dai magkakaigwa nin sobrang pagheling sa saiyang importansia bilang representante kan Sosyedad. An sarong paraataman sa distrito tamang-tama an komento: “Magin mapakumbaba asin andam na maghinanyog sa mga tugang. Perming magin madaling dolokon.” Bilang an kadarudakulaing tawo na nabuhay kasuarin man, puede kutana na an mga tawo dai mapamugtak kun kaiba ni Jesu-Cristo, alagad ta sia mapakumbabang marhay asin madaling dolokon kaya minsan mga aki pamugtak an boot sa atubangan nia. (Mateo 18:​5; Marcos 10:​13-16) Boot nin nagbibiaheng mga paraataman na an mga aki, tin-edyer, gurang​—an totoo an siisay man asin an gabos sa kongregasyon—​dai mag-alangan na dumolok sa sainda.

11. Kun kaipuhan, ano an puedeng magin epekto nin paghagad nin dispensasyon?

¹¹ Siempre, “kita gabos nasisingkog nin dakol na beses,” asin mayo nin nagbibiaheng paraataman na dai nasasala. (Santiago 3:2) Kun sinda nasasala, an odok na paghagad nin dispensasyon nagtatao sa ibang kamagurangan nin halimbawa sa kapakumbabaan. Sono sa Talinhaga 22:​4, “an bunga nin kapakumbabaan asin [may pagsambang] pagkatakot ki Jehova kayamanan asin kamurawayan patin buhay.” Asin bako daw na an gabos na lingkod nin Dios kaipuhan na ‘magin mapakumbaba sa paglakaw sa kaibahan kan saindang Dios’? (Miqueas 6:​8, Edisyon kan 1960) Kan hapoton kun ano an ikasasadol nia sa sarong bagong nagbibiaheng paraataman, an sarong paraataman sa sirkito nagkomento: “Magkaigwa nin dakulang paggalang asin pagpahalaga sa gabos na tugang, asin ibilang sinda na mas marahay kisa saimo. Dakol kang manonodan sa mga tugang. Magdanay na mapakumbaba. Magin natural. Dai magsaginsagin.”​—Filipos 2:3.

12. Taano ta makahulogan na marhay an kaigotan sa Kristianong ministeryo?

¹² An kaigotan sa Kristianong ministeryo nagtatao nin autoridad sa mga sinasabi nin sarong nagbibiaheng paraataman. An totoo, kun sinda mag-agom nagtatao nin maigot na mga halimbawa sa pag-ebanghelyo, an kamagurangan, an saindang agom, asin an iba pa sa kongregasyon naparirigon an boot na magpaheling nin kaigotan sa saindang ministeryo. “Magin maigot sa paglilingkod,” an sadol nin sarong paraataman sa sirkito. Idinugang pa nia: “Narisa ko na, sa pankagabsan, mientras na mas maigot an sarong kongregasyon sa ministeryo, mas kadikit an problemang naeeksperyensiahan ninda.” An saro pang paraataman sa sirkito nagkomento: “Nagtutubod ako na kun an kamagurangan maglilingkod sa langtad kaiba kan mga tugang na lalaki asin babae saka tatabangan sinda na maogma sa ministeryo, ini magbubunga nin katoninongan sa isip asin kan pinakadakulang satispaksion sa paglilingkod ki Jehova.” Si apostol Pablo ‘nagkaigwa nin kapusoan na magtaram kan maogmang bareta nin Dios sa mga taga-Tesalonica na may dakulang pakikilaban.’ Bakong makangangalas na ikinaoogma nindang girumdomon an saiyang pagsongko asin paghuhulit saka hinihimuyawot na maheling sia giraray!​—1 Tesalonica 2:​1, 2; 3:6.

13. Ano an kinokonsiderar nin nagbibiaheng paraataman kun iniibanan sa paglilingkod sa langtad an mga kapwa Kristiano?

¹³ Kun iniibanan sa ministeryo sa langtad an mga kapwa Kristiano, kinokonsiderar nin sarong nagbibiaheng paraataman an saindang mga kamugtakan asin limitasyon. Minsan ngani tibaad makatatabang an saiyang mga suhestion, aram nia na an iba tibaad ninenerbios kun naghuhulit kaiba nin sarong eksperyensiadong magurang sa kongregasyon. Kun siring, sa nagkapirang kaso, an pagparigon sa boot tibaad mas kapakipakinabang kisa sa hatol. Kun iniibanan nia sa pag-adal sa Biblia an mga parahayag o payunir, tibaad mas gusto ninda na sia an mangenot dian. Ini posible na magpaheling sa sainda nin nagkapirang paagi na mapaoswag an saindang mga paagi sa pagtotokdo.

14. Taano ta masasabi na an maigot na nagbibiaheng mga paraataman inaanimar an iba sa kaigotan?

¹⁴ An maigot na nagbibiaheng mga paraataman inaanimar an iba sa kaigotan. An sarong paraataman sa sirkito sa Uganda sarong oras na nagbaklay sa mahibog na kadlagan tangani na maibanan an sarong tugang sa sarong pag-adal sa Biblia na daing gayo nag-ooswag. Kan sinda nagbabaklay uminoran nin makosogon kaya nag-abot sindang basa-basa. Kan maaraman kan pamilya nin anom na an bisita ninda nagbibiaheng paraataman, huminanga sindang marhay. Aram ninda na an mga ministro kan saindang iglesia nungka na mapaheling nin siring na interes sa aripompon. Kan sumunod na Domingo, nag-atender sinda sa kaenot-enote nindang pagtiripon asin nagpahayag nin pagmawot na magin mga Saksi ni Jehova.

15. Anong marahay na eksperyensia an inagihan nin sarong maigot na paraataman sa sirkito sa Mejico?

¹⁵ Sa estado nin Oaxaca sa Mejico, an sarong paraataman sa sirkito guminibo nin paghihingoa na dai man talaga linalaoman sa saiya. Iinareglo nia na matorog sa sarong selda sa bilanggoan sa laog nin apat na banggi tangani na masongko an grupo nin pitong preso na nagin mga parahayag kan Kahadean. Sa laog nin nagkapirang aldaw inibanan nia an mga presong ini mantang sinda naghuhulit sa selda-selda asin nagkokondukta nin mga pag-adal sa Biblia. Huli sa ipinaheling na interes, an iba sa mga pag-adal na ini nagpadagos sagkod na matanga na. “Kan matapos an pagsongko, an mga preso asin ako napano nin kagayagayahan bilang resulta kan pagparinigonan nin boot,” an isinurat kan maigot na paraataman na ini sa sirkito.

16. Taano ta kapakipakinabang na marhay kun an nagbibiaheng mga paraataman asin an saindang agom nagtatao nin pagparigon sa boot?

¹⁶ An nagbibiaheng mga paraataman nagmamaigot na magin nakaparirigon sa boot. Kan songkoon ni Pablo an mga kongregasyon sa Macedonia, saiya ‘sindang pinarigon an boot paagi sa dakol na tataramon.’ (Gibo 20:​1, 2) An mga tataramon na nagpaparigon sa boot puedeng makatabang na marhay sa pagtokdo sa hoben asin gurang pasiring sa espirituwal na mga pasohan. Sa sarong dakulang sangang opisina kan Watch Tower Society, ipinaheling nin sarong impormal na surbey na mga paraataman sa sirkito an nagparigon sa boot kan haros 20 porsiento kan mga boluntaryo na lumaog sa bilog na panahon na paglilingkod. Paagi sa saiyang marahay na halimbawa bilang bilog na panahon na parabalangibog kan Kahadean, an agom kan nagbibiaheng paraataman nagigin man dakulang gikanan nin pagparigon sa boot.

17. Ano an saboot nin sarong may edad nang paraataman sa sirkito manongod sa pribilehio nia na tumabang sa iba?

¹⁷ An mga gurang asin mga kalag na nagmomondo nin makuri partikularmenteng nagkakaipo nin pagparigon sa boot. An sarong may edad nang paraataman sa sirkito nagsurat: “An kabtang kan gibohon ko na nagpoprodusir nin dai ikaladawan na panlaog na kagayagayahan iyo an pribilehio na tumabang sa mga inaktibo asin maluya na sa aripompon nin Dios. An mga tataramon kan Roma 1:​11, 12 may espesyal na kahulogan para sa sako, ta nakakukua ako nin dakulaon na pagparigon sa boot asin kosog mantang ‘nagwawaras nin espirituwal na balaog sa mga siring tanganing sinda maparigon.’”

Mga Balos sa Saindang Magayagayang Gibohon

18. Ano an Makakasuratan na mga katuyohan kan nagbibiaheng mga paraataman?

¹⁸ Nasa puso nin nagbibiaheng mga paraataman an pinakaikararahay kan saindang mga kapagtubod. Gusto nindang pakosogon an mga kongregasyon asin parigonon sinda sa espirituwal. (Gibo 15:41) An sarong nagbibiaheng paraataman nagpapagal “tanganing magparigon sa boot, tumao nin kaginhawahan, asin paoswagon an kamawotan na otobon an ministeryo asin padagos na mamuhay sono sa katotoohan.” (3 Juan 3) An saro pa naghihingoa na parigonon sa pagtubod an mga kapagtubod. (Colosas 2:​6, 7) Girumdoma na an nagbibiaheng paraataman “tunay na katuwang,” bakong kagurangnan kan pagtubod nin iba. (Filipos 4:3; 2 Corinto 1:24) An pagsongko nia okasyon nin pagparigon sa boot asin ekstrang aktibidad, saka nin oportunidad para sa grupo nin mga magurang na repasohon an nagibong pag-oswag asin pag-olayan an mga pasohan sa ngapit. Paagi sa saiyang mga tataramon asin halimbawa, an mga parahayag sa kongregasyon, payunir, ministeryal na mga lingkod, asin kamagurangan makalalaom na maparigon asin animaron para sa maabot na gibohon. (Ikomparar an 1 Tesalonica 5:11.) Kaya, kun siring, bilog na pusong suportaran an mga pagsongko kan paraataman sa sirkito, asin lubos na aprobetsaran an paglilingkod kan paraataman sa distrito.

19, 20. Paano binalosan an nagbibiaheng mga paraataman asin an saindang agom para sa saindang fiel na paglilingkod?

¹⁹ An nagbibiaheng mga paraataman asin an saindang agom binabalosan nin igo para sa saindang fiel na paglilingkod, asin makakapagkompiar sinda na bebendisyonan sinda ni Jehova para sa karahayan na ginigibo ninda. (Talinhaga 19:​17; Efeso 6:8) Si Georg asin Magdalena may edad nang mag-agom na dakol na taon na naglingkod sa gibohon na nagbibiahe. Sa sarong kombension sa Luxembourg, si Magdalena dinolok nin sarong tawo na napatotoohan nia labi nang 20 taon an nakaagi. An interes sa katotoohan kan Judiang ini pinukaw kan babasahon sa Biblia na iwinalat sa saiya ni Magdalena, asin pag-abot nin panahon sia nabautismohan. Dinolok si Georg nin sarong espirituwal na tugang na babae na nagigirumdoman an pagsongko nia sa harong kaini haros 40 taon na an nakaagi. An saiyang entusiastikong pag-aatubang kan maogmang bareta sa kahurihurihi naggiya sa babae asin sa agom kaini na akoon an katotoohan. Siempre, labi-labi an kagayagayahan kapwa ni Georg asin Magdalena.

²⁰ An mabungang ministeryo ni Pablo sa Efeso nagtao sa saiya nin kagayagayahan asin tibaad nakapahiro sa saiya na kotaron an mga tataramon ni Jesus: “Igwang orog na kaogmahan sa pagtao kisa sa pag-ako.” (Gibo 20:35) Mantang an gibohon na nagbibiahe kalabot an daing ontok na pagtao, an mga naggigibo kaiyan nakaeeksperyensia nin kaogmahan, nangorogna kun naaaraman ninda an marahay na mga resulta kan saindang pagpapagal. An sarong paraataman sa sirkito na nagtabang sa sarong magurang sa kongregasyon na pinanluluyahan nin boot sinabihan sa sarong surat: “Kamo nagin dakulang ‘tabang na nagpapakosog’ sa sakong espirituwal na buhay​—nin labi kisa sa aram nindo. . . . Dai nindo noarin man lubos na maaaraman kun gurano kamo kadakulang tabang sa sarong Asaf sa modernong aldaw, na an ‘mga bitis haros nagtalikod na.’”​—Colosas 4:​11; Salmo 73:2.

21. Taano ta sasabihon nindo na an 1 Corinto 15:​58 aplikado sa mga aktibidad nin nagbibiaheng mga paraataman?

²¹ An sarong may edad nang Kristiano na sa dakol na taon nasa gibohon na pansirkito nagugustohan na isip-isipon an 1 Corinto 15:​58, na dian si Pablo nagsadol: “Magin kamong marigon, dai natatanyog, na danay na dakol an gigibohon sa gibohon kan Kagurangnan, sa pakaaram na an saindong pagpapagal bakong daing kapakanan dian sa Kagurangnan.” Tunay na kadakol kan gigibohon nin nagbibiaheng mga paraataman sa gibohon kan Kagurangnan. Asin kanigoan an pasasalamat niato na sinda magayagayang marhay na naglilingkod bilang fiel na mga mayordomo kan dai na kutana maninigong kabootan ni Jehova!

[Nota sa Ibaba]

Ano an Isisimbag Nindo?

◻ Taano an nagbibiaheng mga paraataman ta ikabibilang na “marahay na mga mayordomo”?

◻ Ano an nagkapirang nakakokontribwir na bagay na nakatatabang sa mga paraataman sa sirkito asin distrito na makagibo nin dakulang karahayan?

◻ Taano an kapakumbabaan asin kaigotan ta mahalagang marhay para sa mga nasa gibohon na nagbibiahe?

◻ Ano an marahay na mga katuyohan nin nagbibiaheng mga paraataman?

[Retrato sa pahina 16]

An nagbibiaheng mga paraataman naghihingoa na parigonon an boot nin mga kapagtubod

[Mga retrato sa pahina 17]

An hoben asin gurang pareho makikinabang sa pakikiasosyar sa nagbibiaheng mga paraataman asin sa saindang agom

[Retrato sa pahina 18]

An maigot na ministeryo kan nagbibiaheng paraataman nagpapaoswag sa kaigotan nin iba