Nagbibiaheng mga Paraataman—Balaog na mga Lalaki
“Kan sia magsakat sa kaitaasan nagdara sia nin mga bihag; nagtao sia nin balaog na mga lalaki.”—EFESO 4:8.
1. Anong bagong gibohon an iinanunsiar sa magasin na ini kan 1894?
KAIDTONG labi nang sarong siglo an nakaagi, may iinanunsiar an Watch Tower na sarong bagay na bago. Iyan inapod na “Another Branch of the Work.” Ano an kalabot sa bagong aktibidad na ini? Idto an inagurasyon sa modernong aldaw kan gibohon nin nagbibiaheng mga paraataman. An luwas na Setyembre 1, 1894 kan magasin na ini nagpaliwanag na poon kaidto an kualipikadong mga tugang na lalaki masongko sa mga grupo nin Mga Estudyante sa Biblia ‘sa katuyohan na parigonon sinda sa katotoohan.’
2. Ano an mga katongdan nin mga paraataman sa sirkito asin distrito?
2 Kan enot na siglo C.E., an Kristianong mga kongregasyon sinongko nin mga paraataman na arog ni Pablo asin Bernabe. An fiel na mga lalaking ini may katuyohan na “parigonon” an mga kongregasyon. (2 Corinto 10:8) Ngonyan, binendisyonan kita nin rinibong lalaki na naggigibo kaini sa sistematikong paagi. An Namamahalang Grupo kan Mga Saksi ni Jehova nagnombra sa sainda bilang mga paraataman sa sirkito asin distrito. An paraataman sa sirkito naglilingkod sa mga 20 kongregasyon sa laog nin sarong semana an kada saro mga duwang beses sarong taon, na sinisiyasat an mga rekord, nagtatao nin mga pahayag, asin nakikakabtang sa ministeryo sa langtad kaiba kan lokal na mga parahayag kan Kahadean. An paraataman sa distrito tsirman sa kada taonan na pansirkitong asamblea sa nagkapirang sirkito, nakikakabtang sa ministeryo sa langtad kaiba kan mga kongregasyon na sinosongko ninda kan paraataman sa sirkito, asin nagtatao nin pagparigon sa boot sa mga pahayag na basado sa Biblia.
An Saindang Espiritung Mapagsakripisyo sa Sadiri
3. Taano an nagbibiaheng mga paraataman ta kaipuhan na magkaigwa nin espiritung mapagsakripisyo sa sadiri?
3 An nagbibiaheng mga paraataman perming nagbibiahe. Ini mismo nagkakaipo nin espiritung mapagsakripisyo sa sadiri. An pagbiahe hale sa sarong kongregasyon pasiring sa ibong parate na puedeng magin depisil, alagad ginigibo iyan kan mga lalaking ini asin kan saindang agom na may magayagayang aktitud. An sarong paraataman sa sirkito nagsabi: “An agom ko mapagsuportar na marhay asin dai nagrereklamo . . . Sia maninigong omawon nanggad huli sa saiyang espiritung mapagsakripisyo sa sadiri.” May mga paraataman sa sirkito na nagbibiahe nin labing 1,000 kilometro sa pag-oltanan nin mga kongregasyon. Dakol an may sadiring sasakyan, alagad an iba nagbibiahe paagi sa pampublikong mga sasakyan, bisikleta, kabayo, o nagbabaklay. An sarong paraataman sa sirkito sa Aprika kaipuhan pa nganing maglamutaw sa sarong salog na baba an agom nia tangani na makaabot sa sarong kongregasyon. Sa saiyang mga biahe bilang misyonero, kinaipuhan na atubangon ni apostol Pablo an init asin lipot, gutom asin paha, mga bangging daing torog, laen-laen na peligro, asin madahas na paglamag. Igwa man sia nin “paghadit para sa gabos na kongregasyon”—eksperyensiang inaagihan nin gabos na nagbibiaheng paraataman ngonyan.—2 Corinto 11:23-29.
4. Ano an puedeng magin epekto nin mga problema sa salud sa buhay nin nagbibiaheng mga paraataman asin kan saindang agom?
4 Arog kan kaiba ni Pablo na si Timoteo, an nagbibiaheng mga paraataman asin an saindang agom kun beses may mga problema sa salud. (1 Timoteo 5:23) Ini nagtatao sa sainda nin dagdag na tension. An agom nin sarong paraataman sa sirkito nagpapaliwanag: “Masakit an perming pagigin kaiba nin mga tugang kun maraot an pagmate ko. Huli sa pagpoon nin pagpondo nin pagtiempo, ini nangorognang nagin depisil para sa sako. An pag-empake sana kan gabos niamong gamit kada semana asin pagbalyo sa ibang lugar dakula nang angat. Parate na ako kaipuhan na pumondo asin mamibi ki Jehova na tawan ako kan kosog na magpadagos.”
5. Sa ibong nin laen-laen na pagbalo, anong espiritu an ipinaheheling nin nagbibiaheng mga paraataman asin kan saindang agom?
5 Sa ibong nin mga problema sa salud asin iba pang mga pagbalo, an nagbibiaheng mga paraataman asin an saindang agom nakanonompong nin kagayagayahan sa saindang paglilingkod asin nagpapaheling nin pagkamoot na mapagsakripisyo sa sadiri. An iba isinapeligro an saindang buhay tanganing makatao nin espirituwal na tabang sa mga panahon nin paglamag o guerra. Kun nagsosongko sa mga kongregasyon, nagpapaheling sinda nin espiritu na kaagid kan ki Pablo, na nagsabi sa mga Kristianong taga-Tesalonica: “Kami nagin maboot sa tahaw nindo, arog kan pagmamahal nin nagpapasusong ina sa saiyang mga aki. Kaya, huli sa pagkaigwa nin mamomoton na kapadangatan sa saindo, kami naogmang gayo na itao sa saindo, bako sanang an maogmang bareta nin Dios, kundi siring man an samong kalag, huli ta kamo nagin mahal sa samo.”—1 Tesalonica 2:7, 8.
6, 7. Anong positibong impluwensia an ikatatao nin mahigos na nagbibiaheng mga paraataman?
6 Arog nin ibang kamagurangan sa Kristianong kongregasyon, an nagbibiaheng mga paraataman “nagmamaigot sa pagtaram asin pagtokdo.” An gabos na siring na kamagurangan maninigong “ibilang na angay sa dobleng onra.” (1 Timoteo 5:17) Puedeng magin kapakipakinabang an saindang halimbawa kun, pakatapos na ‘horophoropon an resulta kan saindang gawe, inaarog niato an saindang pagtubod.’—Hebreo 13:7.
7 Ano an nagin epekto sa iba nin nagkapirang nagbibiaheng paraataman? “Abaa karahay na impluwensia si Tugang na P—— sa sakong buhay!” an isinurat nin sarong Saksi ni Jehova. “Sia kaidto nagbibiaheng paraataman sa Mejico poon kan taon 1960 padagos. Bilang aki, hinahalat ko an saiyang mga pagsongko na may pagkagalaga asin kagayagayahan. Kan ako dies anyos, sinabihan nia ako, ‘Magigin ka man paraataman sa sirkito.’ Durante kan depisil na mga taon nin pagtitin-edyer, parate ko siang hinanap ta permi siang may ikinatataong mga tataramon nin kadonongan. Nabuhay sia para sa pagpastor kan aripompon! Ngonyan na ako paraataman na sa sirkito, permi kong pinagmamaigotan na magtao nin panahon sa mga hoben asin parigonon an boot ninda na magkaigwa nin teokratikong mga pasohan arog kan ginibo nia para sa sako. Minsan sa huring mga taon kan saiyang buhay, sa ibong nin mga problema sa pagluya kan puso, si Tugang na P—— perming naghingoa na tumao nin tataramon na nakaparirigon sa boot. Saro na sanang aldaw bago sia magadan kan Pebrero 1995, inibanan nia ako sa sarong espesyal na aldaw nin asamblea asin pinarigon an boot nin sarong tugang na arkitekto na magkaigwa nin marahay na mga pasohan. An tugang tolos na nagtao nin aplikasyon na maglingkod sa Bethel.”
Apresyado Sinda
8. Sairisay an “balaog na mga lalaki” na ilinaladawan sa Efeso kapitulo 4, asin paano sinda nagtatao nin pakinabang sa kongregasyon?
8 An nagbibiaheng mga paraataman asin iba pang kamagurangan na tinawan nin mga asignasyon nin paglilingkod huli sa dai na kutana maninigong kabootan nin Dios inaapod na “balaog na mga lalaki.” Bilang representante ni Jehova asin Payo kan kongregasyon, itinao ni Jesus an espirituwal na mga lalaking ini tangani na an lambang saro sa sato maparigon asin makaabot sa pagkamaygurang. (Efeso 4:8-15) An ano man na balaog maninigong apresyaron. Ini nangorognang totoo manongod sa sarong balaog na nagpapakosog sa sato na padagos na maglingkod ki Jehova. Kun siring, paano niato ikapaheheling an satong pag-apresyar sa gibohon nin nagbibiaheng mga paraataman? Sa anong mga paagi niato ikapaheheling na ‘padagos niatong namomotan an siring na mga lalaki’?—Filipos 2:29.
9. Sa anong mga paagi na ikapaheheling niato an pag-apresyar sa nagbibiaheng mga paraataman?
9 Pakaanunsiaran kan pagsongko kan paraataman sa sirkito, puede na kitang pumoon sa pagplano na lubos na makikabtang sa mga aktibidad kan kongregasyon sa semanang iyan. Tibaad puede kitang magtagama nin ekstrang panahon na suportaran an mga areglo sa paglilingkod sa langtad durante kan pagsongko. Tibaad puede kitang maglingkod bilang auxiliary payunir sa bulan na iyan. Tunay na bobooton niatong gibohon an mga suhestion kan paraataman sa sirkito tangani na mapaoswag an satong ministeryo. An siring na mapaghimateng espiritu matao sa sato nin pakinabang asin mapakosog sa boot nia na nagin kapakipakinabang an saiyang pagsongko. Iyo, an nagbibiaheng mga paraataman minasongko sa kongregasyon sa pagparigon sa sato, alagad sinda man kaipuhan na parigonon sa espirituwal. May mga panahon na si Pablo nangaipo nin pagparigon sa boot, asin parate niang ipinakikiolay sa mga kapwa Kristiano na ipamibi sia. (Gibo 28:15; Roma 15:30-32; 2 Corinto 1:11; Colosas 4:2, 3; 1 Tesalonica 5:25) An nagbibiaheng mga paraataman sa presenteng aldaw nagkakaipo man kan satong mga pamibi asin pagparigon sa boot.
10. Paano kita makatatabang na magin sarong kagayagayahan an gibohon nin sarong nagbibiaheng paraataman?
10 Nasabi na daw niato sa paraataman sa sirkito asin sa saiyang agom kun gurano niato inaapresyar an saindang mga pagsongko? Pinasasalamatan daw niato sia para sa nakatatabang na hatol na itinatao nia sa sato? Ipinaaaram daw niato sa saiya kun an mga suhestion nia sa paglilingkod sa langtad nagpapaorog sa satong kagayagayahan sa ministeryo? Kun iyo, ini makatatabang na magin sarong kagayagayahan an saiyang gibohon. (Hebreo 13:17) An sarong paraataman sa sirkito sa España partikularmenteng nagkomento manongod sa kun gurano ninda pinahahalagahan mag-agom an mga kard nin pasasalamat na naresibi ninda pakasongko sa mga kongregasyon. “Sinasaray mi an mga kard na ini asin binabasa iyan kun kami pinanluluyahan nin boot,” sabi nia. “An mga iyan burabod nin tunay na pagparigon sa boot.”
11. Taano ta maninigo niatong ipaaram sa agom kan mga paraataman sa sirkito asin distrito na sinda namomotan asin apresyado?
11 An agom kan nagbibiaheng paraataman tunay na nakikinabang sa mga tataramon nin komendasyon. Dakulang mga pagsasakripisyo an ginibo nia tanganing matabangan an saiyang agom sa langtad na ini nin paglilingkod. An fiel na mga tugang na babaeng ini linilingawan nguna an natural na kamawotan na magkaigwa nin sadiring harong asin, sa dakol na kaso, pati an pagkaigwa nin mga aki. An aking babae ni Jefte saro sa mga lingkod ni Jehova na boluntad na tinalikdan an saiyang oportunidad na magkaigwa nin agom asin pamilya huli sa promesang ginibo kan saiyang ama. (Hokom 11:30-39) Ano an nagin pagmansay sa saiyang sakripisyo? An Hokom 11:40 nagsasabi: “Taon-taon an mga aking babae nin Israel minaduman sa pagtao nin komendasyon sa aking babae ni Jefte na Galaadita, apat na aldaw sa laog kan taon.” Marahayon nanggad kun ginigibo niato an paghihingoa na sabihan an agom kan mga paraataman sa sirkito asin distrito na sinda namomotan asin apresyado!
“Dai Nindo Paglingawan an Pagkamapag-istimar”
12, 13. (a) Ano an basehan sa Kasuratan kan pagigin mapag-istimar sa nagbibiaheng mga paraataman asin sa saindang agom? (b) Iilustrar kun paano an siring na pagkamapag-istimar puedeng magin kapakipakinabang sa man-ibong-ibong na lado.
12 An pagpaheling nin pagkamapag-istimar saro pang paagi na ipaheling an pagkamoot asin pag-apresyar sa mga nasa Kristianong gibohon na nagbibiahe. (Hebreo 13:2) Si apostol Juan nagtao nin komendasyon ki Gayo sa pag-istimar sa mga minasongko sa kongregasyon bilang nagbibiaheng mga misyonero. Si Juan nagsurat: “Namomotan, naggigibo ka nin fiel na gibo sa ano man na saimong ginigibo para sa mga tugang, asin mga estranghero pati, na nagpatotoo sa saimong pagkamoot sa atubangan kan kongregasyon. An mga ini tabi na pahaleon mo sa paagi na maninigo sa Dios. Huli ta dahelan sa saiyang ngaran na sinda nagbaklay, na dai nagkua nin ano man sa mga tawo kan mga nasyon. Kun siring, kita may paninimbagan na mapag-istimar na akoon an siring na mga tawo, tangani na kita magin mga katabang sa katotoohan.” (3 Juan 5-8) Ngonyan, mapaooswag niato an paghuhulit kan Kahadean paagi sa pagpaheling nin kaparehong pagkamapag-istimar sa nagbibiaheng mga paraataman asin sa saindang agom. Siempre, sisiertohon nin lokal na kamagurangan na igo an dadagosan, alagad an sarong paraataman sa distrito nagsabi: “An satong kadayupotan sa mga tugang dai puedeng ibasar sa kun siisay an may magigibo para sa sato. Habo ngani niatong magtao kan impresyon na iyan. Kaipuhan na kita andam na akoon an pag-istimar kan siisay man sa satong mga tugang, mayaman o dukha.”
13 An pagkamapag-istimar puedeng magin kapakipakinabang sa man-ibong-ibong na lado. “Sa samong pamilya, kaugalean ming imbitaran an nagbibiaheng mga paraataman na mag-istar sa samo,” an paggirumdom ni Jorge, sarong dating paraataman sa sirkito na naglilingkod na ngonyan sa Bethel. “Sa pagmate ko an mga pagsongkong ini nakatabang sa sako nin labi sa narealisar ko kaidto. Durante kan sakong pagtin-edyer, nagkaigwa ako nin espirituwal na mga problema. Ikinahahadit ini kan sakong ina alagad dai nia aram kun paano sia matabang asin kun siring pinakiolayan nia an paraataman sa sirkito na kaolayon ako. Kan primero linikayan ko an pakipag-olay sa saiya, ta natatakot akong tatsaran. Alagad ta sa huri nadara ako kan saiyang pagigin makikatood. Inimbitaran nia ako sa pagkakan sarong Lunes, asin binuksan ko an sakong puso huli ta nakaseseguro ako na nasasabotan ako. Maingat siang naghinanyog. Talagang epektibo an praktikal na mga suhestion nia, asin nagpoon akong umoswag sa espirituwal.”
14. Taano ta maninigo kitang magin mapag-apresyar imbes na mapagtatsar sa nagbibiaheng mga paraataman?
14 An nagbibiaheng paraataman naghihingoa na makatabang sa espirituwal pareho sa hoben asin gurang. Kun siring, maninigo nanggad na ipaheling niato an satong pag-apresyar sa saiyang mga paghihingoa. Minsan siring, ano kun sia tatatsaran niato huli sa saiyang mga kaluyahan o ikokomparar sia sa bakong marahay na paagi sa iba na nagsongko sa kongregasyon? Posible na ini makapaluyang marhay sa boot. Dai naparigon an boot ni Pablo na madangog an mga pagtatsar sa saiyang gibohon. Minalataw na may mga Kristianong taga-Corinto na minemenus an saiyang itsura asin abilidad sa pagtaram. Kinotar nia mismo an mga tatsador na iyan na nagsasabi: “An saiyang mga surat magabat asin makosog, alagad an saiyang personal na presensia maluya asin an saiyang pagtaram daing halaga.” (2 Corinto 10:10) Pero, makaoogma, an nagbibiaheng mga paraataman parateng nakadadangog nin mga tataramon nin mamomoton na pag-apresyar.
15, 16. Ano an epekto sa nagbibiaheng mga paraataman asin sa saindang agom kan pagkamoot asin kaigotan na ipinaheheling kan saindang mga kapagtubod?
15 An sarong paraataman sa sirkito sa Latin Amerika nagbabaklay nin bilog na aldaw sa malapok na mga dalan tanganing songkoon an saiyang espirituwal na mga tugang na lalaki asin babae na nag-iistar sa lugar na kontrolado nin mga gerilya. “Nakapupukaw sa boot na maheling kun paano ipinaheheling kan mga tugang an saindang pag-apresyar sa pagsongko,” an isinurat nia. “Minsan ngani dakulang paghihingoa an kaipuhan kong gibohon tanganing makaabot duman, na inaatubang an dakol na peligro asin kadepisilan, ini gabos binabalosan kan pagkamoot asin kaigotan na ipinaheheling kan mga tugang.”
16 An sarong paraataman sa sirkito sa Aprika nagsurat: “Huli sa pagkamoot na ipinaheling sa samo kan mga tugang, namotan ming marhay an teritoryo sa Tanzania! An mga tugang andam na makanood sa samo, asin naoogma sindang padagoson kami sa saindang harong.” May mamomoton asin maogmang relasyon sa pag-oltanan ni apostol Pablo saka kan Kristianong mag-agom kan enot na siglo na si Aquila asin Prisca. An totoo, si Pablo nagsabi manongod sa sainda: “Ikumusta nindo ako ki Prisca asin Aquila na mga katabang ko dian ki Cristo Jesus, na isinapeligro an saindang liog para sa sakong kalag, na sa sainda nagpapasalamat bako sanang ako kundi pati an gabos na kongregasyon kan mga nasyon.” (Roma 16:3, 4) An nagbibiaheng mga paraataman asin an saindang agom nagpapasalamat na magin katood an modernong-aldaw na mga Aquila asin Prisca na naggigibo nin espesyal na paghihingoa na ipaheling an pagkamapag-istimar asin magin kaibaiba.
Pagpakosog sa mga Kongregasyon
17. Taano ta masasabi na may kadonongan sa likod kan areglo para sa mga nagbibiaheng paraataman, asin saen ninda kinukua an pagtotokdo sa sainda?
17 Si Jesus nagsabi: “An kadonongan napatutunayan na matanos paagi sa mga gibo kaiyan.” (Mateo 11:19) An kadonongan sa likod kan areglo nin nagbibiaheng mga paraataman nahahayag ta nakatatabang iyan na mapakosog an mga kongregasyon kan banwaan nin Dios. Durante kan ikaduwang biahe ni Pablo bilang misyonero, sia asin si Silas mapangganang “nag-agi sa Siria asin Cilicia, na pinakokosog an mga kongregasyon.” An librong Mga Gibo nagsasabi sa sato: “Mantang sinda nagbibiahe sa mga siudad itinatao ninda sa mga yaon duman an mga kasugoan na ootobon na pinagdesisyonan kan mga apostol asin kan kamagurangan na lalaki na yaon sa Jerusalem. Kun siring tunay na an mga kongregasyon nagpadagos na maparigon sa pagtubod asin magdakol an bilang aroaldaw.” (Gibo 15:40, 41; 16:4, 5) An nagbibiaheng mga paraataman sa presenteng aldaw nag-aako nin espirituwal na pagtotokdo paagi sa Kasuratan asin sa mga publikasyon kan “fiel asin madonong na oripon,” arog kan gabos na iba pang Kristiano.—Mateo 24:45.
18. Paano pinakokosog nin nagbibiaheng mga paraataman an mga kongregasyon?
18 Iyo, an nagbibiaheng mga paraataman dapat na padagos na magkakan sa espirituwal na lamesa ni Jehova. Dapat na aram nindang marhay an mga paagi asin susundan na sinusunod kan organisasyon nin Dios. Dangan an siring na mga lalaki puedeng magin tunay na bendisyon sa iba. Paagi sa saindang marahay na halimbawa nin kaigotan sa paglilingkod sa langtad, matatabangan ninda an mga kapagtubod na umoswag sa Kristianong ministeryo. An mga pahayag na basado sa Biblia na itinatao kan nagsosongkong kamagurangan na ini nagpaparigon sa mga naghihinanyog sa espirituwal. Paagi sa pagtabang sa iba na iaplikar an hatol kan Tataramon nin Dios, maglingkod kaoyon kan banwaan ni Jehova sa bilog na daga, asin gamiton an espirituwal na mga probisyon na itinao nin Dios paagi sa ‘fiel na oripon,’ pinakokosog nin nagbibiaheng mga paraataman an mga kongregasyon na pribilehio nindang songkoon.
19. Ano pa an mga hapot na kaipuhan na pag-olayan?
19 Kan iintrodusir kan organisasyon ni Jehova an gibohon nin nagbibiaheng kamagurangan sa tahaw kan Mga Estudyante sa Biblia kaidtong mga sanggatos na taon na an nakaagi, an magasin na ini nagsabi: “Babantayan niato an mga resulta asin an dugang pang paggiya kan Kagurangnan.” Malinaw na nahayag an paggiya ni Jehova. Huli sa saiyang bendisyon asin sa irarom kan pagdirehir kan Namamahalang Grupo, an gibohon na ini pinahiwas asin pinakarhay pa sa nag-aging mga taon. Bilang resulta, an mga kongregasyon kan Mga Saksi ni Jehova sa bilog na daga naparigon sa pagtubod asin nagdadakol aroaldaw. Malinaw na binebendisyonan ni Jehova an espiritung mapagsakripisyo sa sadiri kan balaog na mga lalaking ini. Alagad paano mapangganang magigibo nin nagbibiaheng mga paraataman an saindang gibohon? Ano an mga katuyohan ninda? Paano ninda magigibo an pinakaikararahay?
Ano an Isisimbag Nindo?
◻ Ano an nagkapirang katongdan nin mga paraataman sa sirkito asin distrito?
◻ Taano an nagbibiaheng mga paraataman ta kaipuhan na magkaigwa nin espiritung mapagsakripisyo sa sadiri?
◻ Paano ikapaheheling an pag-apresyar sa gibohon nin nagbibiaheng mga paraataman asin kan saindang agom?
◻ Ano an magigibo nin nagbibiaheng mga paraataman tanganing an mga kongregasyon maparigon sa pagtubod?
[Retrato sa pahina 10]
An daing ontok na pagbiahe nagkakaipo nin espiritu nin pagsakripisyo sa sadiri
[Retrato sa pahina 13]
Nag-istimar na daw kamo sa nagbibiaheng mga paraataman asin sa saindang agom?