Nagkakasararo sa Pinakamarahay na Dalan nin Buhay

Nagkakasararo sa Pinakamarahay na Dalan nin Buhay

Kun magpapadagos na dumakol an populasyon sa kinaban, dai mahaloy magigin anom na bilyon an tawo digdi sa daga. Minsan ngani an gabos naghale sa sasarong apoon, garo baga dai inaadmitir kan kadaklan na sinda miembro nin sarong panglobong pamilya asin maninimbag sa sarong madonong asin mamomoton na Kaglalang. An dai pagkasararo asin iriwal sa pag-oltanan nin mga nasyon, rasa, asin kultura nagtatao nin nakapupurisaw na patotoo sa mamondong kamugtakan na ini nin mga baga-bagay.

HULI sa presenteng mga kamugtakan sa kinaban, an panglobong pagkasararo tibaad garo baga pasohan na dai maaabot. An The Columbia History of the World nagsasabi: “Manongod sa pinakaimportanteng hapot sa kun paano mamumuhay na sararo, an modernong kinaban daing ikatao maski sarong bagong ideya, ni saro mayo.”

Minsan siring, an pagpangyari nin pagkasararo sa tahaw kan gabos na nag-eerok sa daga dai nagkakaipo nin bagong ideya. An dalan pasiring sa pagkasararo sinasabi sa Banal na Kasuratan. Iyan nakasentro sa pagsamba sa Saro na naglalang kan daga asin gabos na buhay dian. An tunay na pagkasararo sa isip, katuyohan, asin pamumuhay yaon na sa tahaw kan banwaan nin Dios. Labi nang lima may kabangang milyon sa 233 na kadagaan, sinda nagkakasararo sa saindang kombiksion na an dalan nin Dios sa buhay iyo an pinakamarahay na dalan. Arog kan salmista, sinda namimibi: “Tokdoi ako, O Jehova, dapit sa saimong dalan. Ako maglalakaw sa saimong katotoohan. Gibohang saro an sakong puso na matakot sa saimong ngaran.”—Salmo 86:11.

An pagsasararong ini nin mga tawo sa dalisay na pagsamba kaidto pa ihinula ni propeta Isaias. Sia nagsurat: “Mangyayari sa huring kabtang kan mga aldaw na an bukid kan harong ni Jehova magigin marigon sa ibabaw kan alitoktok kan kabukidan, asin iyan ilalangkaw nanggad sa ibabaw kan mga bolod; asin an gabos na nasyon maturukad pasiring dian. Asin dakol na banwaan an maduruman nanggad asin masarabi: ‘Madia kamo, banwaan, asin tumukad kita sa bukid ni Jehova, sa harong kan Dios ni Jacob; asin totokdoan nia kita dapit sa saiyang mga dalan, asin kita maglalakaw sa saiyang mga dana.’”—Isaias 2:2, 3.

Daing kapareho an pagkasararo kan Mga Saksi ni Jehova. Sa labing 87,000 na kongregasyon sa bilog na kinaban, sasaro an saindang espirituwal na pagkakan sa saindang mga pagtiripon serosemana. (Mateo 24:45-47) Minsan siring, poon sa kabangaan nin 1998 sagkod sa kapinonan nin 1999, ipinaheling kan mga Saksi an saindang pagkasararo sa saro pang paagi—paagi sa pagtiripon sa saindang tolong aldaw na “Sa Dios na Dalan nin Buhay” na mga Kombension sa bilog na kinaban. Sa 13 nasyon, kabale sa mga katiriponan na ini an darakulang delegasyon hale sa laen-laen na kadagaan asin inapod na internasyonal na mga kombension. An iba inapod na pandistritong mga kombension. Alagad an gabos na kombension na ini nag-atubang nin sasarong programa nin marahay na espirituwal na mga bagay.

Kawiliwili nanggad na maheling an maogma, husay an gubing na mga delegado na nagraralaog sa mga auditoryum asin istadyum tanganing tokdoan ni Jehova! Tipiko an kapahayagan nin sarong delegado sa internasyonal na kombension na ginibo sa Michigan, E.U.A. Sia nagsabi: “Dakulang kagayagayahan nanggad na maheling an satong mga tugang hale sa bilog na kinaban—sa Republikang Czech, Barbados, Nigeria, Hungaria, Inglaterra, Olandia, Etiopia, Kenya, asin dakol pang ibang nasyon—na nagkukurugosan! Magayon na maheling an mga tugang na nag-iiribanan na sararo, na nagruruluha sa kagayagayahan dahil sa saindang pagkamoot sa lambang saro asin sa saindang dakulang Dios, si Jehova.” Sisiyasaton kan sunod na artikulo an programa sa kombension na inatenderan nin minilyon sa bilog na daga.

[Pasasalamat para sa pinagkuanan kan retrato sa pahina 3]