Ikinagagayagaya nin Sarong Isla an Makasaysayan na Pagsongko
An Cuba, sarong magayon na isla sa Caribe, kasuarin pa sana nakaeksperyensia nin sarong kapanahonan nin espirituwal na karepreskohan na dai pa nangyari kaidto. An katapusan kan 1998 nagdara nin haloy nang hinahalat na bendisyon para sa Mga Saksi ni Jehova na nag-eerok sa nasyon na ini sa Solnopan na India. Sa kaenot-enote sa labing 30 taon, an mga miembro kan Namamahalang Grupo kan Mga Saksi ni Jehova nagsongko, asin sinda inibanan nin 15 pang delegado. An mga bisita siudadano nin Australia, Austria, Belhika, Gran Britania, Italia, Nueva Zelandia, asin Puerto Rico.
INI sarong makasaysayan na pangyayari para sa 82,258 parahayag kan Kahadean duman asin sa 87,890 na nakiiba sa sainda sa pagselebrar kan Pamanggihan kan Kagurangnan kan tigsoli kan 1998.
Poon Disyembre 1 sagkod 7, 1998, sinda Lloyd Barry, John Barr, asin Gerrit Lösch nagsongko sa Erokan na Bethel sa Havana asin nag-atender sa nagkapira kan “Sa Dios na Dalan nin Buhay” na Pandistritong mga Kombension na ginibo sa Cuba. Naogma sinda na makaolay an nagbibiaheng kamagurangan asin mas makamidbid an mga opisyal na naglilingkod sa publiko sa Cuba.
“Ini sarong teokratikong tampok na kabtang sa bilog na buhay para sa sako asin sa sakong agom,” an sabi ni John Barr. “An satong namomotan na mga tugang na lalaki asin babae sa Cuba panong marhay nin kaigotan para sa katotoohan! Natadom sa boot ko na an satong pambilog na kinaban na kasararoan nin magturugang talagang mahal na marhay!” “An importanteng semanang ini nakatabang sa sako na mas masabotan an situwasyon kan satong mga tugang duman,” an sinabi pa ni Lloyd Barry.
Durante kan nakaaging limang taon, an Mga Saksi ni Jehova tinawan nin orog na katalingkasan sa pagsamba sa Cuba, asin an mga komento kan mga autoridad sa Cuba minagiya sa saro na maniwala na mawot ninda na an dalagan nin mga bagay na ini magpadagos.
Kan Setyembre 1994, naestablisar an pag-imprenta sa Erokan na Bethel sa Havana. Sa giraray, an Mga Saksi ni Jehova puede nang magtiripon nin hayag asin magpatotoo sa harong-harong. Kan huri, kan 1998, tinogotan kan mga autoridad an pagsongko na ini nin internasyonal na delegasyon nin 18 Saksi ni Jehova, kabale an tolong miembro kan Namamahalang Grupo.
Maogmang Pag-iribaiba Giraray
Kan an delegasyon umabot sa aeropuerto nin José Martí sa Havana, sinda mapag-istimar na inako nin sarong grupo nin mga opisyal na naglilingkod sa publiko asin sarong grupo hale sa Erokan na Bethel, na kabilang sa sainda an sarong tugang na lalaki na nagigirumdoman an huring pagsongko sa Cuba nin sarong miembro kan Namamahalang Grupo—si Milton Henschel—kan 1961. An tugang na lalaking ini kaidto 12 anyos; saro na siang nagbibiaheng paraataman ngonyan.
Kan an mga delegado umabot sa Erokan na Bethel, sinda tinaratara paagi sa mga bukey nin mga gladiolus, rosas, hasmin, asin yelo saka pulang daisy, na itinanom nin sarong tugang na lalaki espesyalmente para sa okasyon na ini. Nagtutururo an luha mantang maogmang inaako kan pamilyang Bethel an mga delegado. Kan huri, sinda magkairibang nagkarakan nin luto sa Cuba na inihaw na karneng orig, maluto asin habas, salad, yucca na may mojo (sawsawan na gibo sa bawang asin lana sa olibo), asin preskong prutas. Pakakakan an lambang miembro kan Namamahalang Grupo nagtao nin nakaparirigon sa boot na pahayag manongod sa kayamanan na paglilingkod sa Bethel. Partikularmenteng nakapupukaw sa boot an mga komento ni Tugang na Lösch, kan sia magtaram sa Kastila sa mga tugang. An pamilyang Bethel kompuesto nin 48 regular na boluntaryong trabahador asin 18 temporaryong katabang.
Minsan ngani sa Italia iniimprenta an mga libro asin Biblia para sa mga tugang sa Cuba, an mga edisyon na daing kolor kan magasin na An Torrengbantayan asin Awake! ginigibo sa nasyon mismo, sa duwang makinang mimeograpo. Halawig na mga oras asin paorootrong manwal na trabaho sa piot na mga kuarto an kaipuhan sa paggibo kan gabos na magasin na kaipuhan. Pinahahalagahan kan mga boluntaryo an saindang kayamanan na paglilingkod ki Jehova sa espesyal na marhay na paagi.—2 Corinto 4:7.
Mga Tampok na Kabtang kan Kombension
An 18 an miembrong delegasyon nagtolong grupo tanganing makaatender sa pandistritong mga kombension na ginibo sa tolong lugar—Havana, Camagüey, asin Holguín. Sa kada saro kan tolong aldaw, may sarong dakulang grupo nin mga tugang na lalaki asin babae, kabale an dakol na kamagurangan asin payunir, na inimbitaran na umatender sa lambang lugar. An lokal na mga Saksi sinabihan na ini magigin espesyal na okasyon, alagad dai ninda aram na may maatender na mga miembro kan Namamahalang Grupo. Imahinara an saindang pagkabigla na maheling an namomotan na mga tugang na ini asin an saindang agom na maglusad sa inarkilang mga auto kan Biernes na aga!
An mga kombension ginibo sa mga pasilidad na bukas sana na itinogdok kan mga tugang na may permiso kan mga autoridad. Sa lugar kan kombension sa Havana, inukit sa saro kan mga gapo sa may palaog an sitasyon na “Salmo 133:1.” Nagpagirumdom ini sa mga tugang kan mga tataramon na manonompongan sa tekstong iyan: “Uya! Kanigoan karahay asin kanigoan kaogma na an magturugang mag-ontok na sararo!” Tunay nanggad, durante kan kombension, nagkaigwa nin marahay asin nakaoogmang Kristianong asosasyon sa lugar na iyan.
An mga bisita nagkomento manongod sa marahayon na mga pahayag asin interbio, asin sinda naghanga sa pagkapresentar kan drama, na basado sa estorya sa Biblia sa Daniel kapitulo 3, na nangyari sa suanoy na Babilonya. An sarong tugang na babae nagkomento: “Matibayon an mga nag-akto, asin marahayon an pakagibo kan sinkronisasyon kan mga boses kaya dai mo maririsa na patienot na irinekord an tanog. . . . An maraot na Babilonyo talagang maraot an itsura, asin an tolong Hebreo marigon asin determinado.”
An mga representante kan Opisina kan Relihiosong mga Aktibidad asin iba pang opisyal kan gobyerno na yaon tanganing helingon an mga kombension tinawan nin komendasyon an mga tugang dapit sa saindang pag-organisar asin marahay na gawe-gawe. Ipinahayag ni Tugang na Barry an saiyang sinserong pagpasalamat para sa marahayon na tratamiento kan mga autoridad nin Cuba sa mga delegadong nagdadalaw. Paagi sa pag-urupak na nakatindog, na sa parate nagkapirang minuto an lawig, ipinahayag kan mga tugang an saindang apresasyon sa mga pahayag asin siring man sa pagtogot kan mga autoridad na magkaigwa nin mga kombension. “Labi ini sa linaoman mi—sarong sadit na internasyonal na kombension!” an sabi nin sarong Kristianong pamilya. “Iyan marahayon, huli ta iyan nagtao nin ebidensia kan dakulang kapangyarihan ni Jehova na otobon an saiyang mga panuga.”
An mga kombension nagtao man nin oportunidad sa iba na orog pang mamidbid an mga Saksi. An saro sa mga tsuper sa auto nag-atender sa kombension kan Sabado asin pati kan Domingo. Sinabi nia na dakol na siang nadangog manongod sa Mga Saksi ni Jehova, alagad aram na nia ngonyan na sinda marahay, matoninong na mga tawo.
“Mga Bagay na Dai Niamo Noarin Man Malilingawan”
Pinahanga kan mga taga Cuba an mga delegado huli sa saindang pagigin mamomoton asin makikatood. An mga taga Cuba mahigos, may prinsipyo, asin maboot. “Bako sanang sarong beses na an mga tawo na biyong dai niamo midbid nag-alok na tabangan kami,” an sabi nin sarong delegado.
An mga delegado naghangang marhay sa pagtubod, kaogmahan, asin pagkamoot na ipinaheling kan mga kapwa Saksi sa Cuba. Sa ibong kan dakulaon na mga balakid, ginibo ninda si Jehova na saindang pailihan. (Salmo 91:2) Sinabi ni John Barr: “Kadakol kan maogmang nakasorpresa sa sako manongod digdi, an enot kong pagsongko sa Cuba—an kagayonan kan nasyon, an madaling pakiibanan na ugale nin mga tawo na namidbid ko, asin orog sa gabos, an biyong pagigin aktibo kan mga Saksi na Cubano. Sa sakong buhay dai pa ako noarin man nakadangog nin siring kaodok sa pusong pag-awit kan satong mga awit na pan-Kahadean asin siring kalawig na pag-urupakan kun an espirituwal na mga bagay nakatutudok sa saindang puso! Ini mga bagay na dai niamo noarin man malilingawan. Iyan pirme niamong pakamamahalon.”
An Salmo 97:1 nagsasabi: “Maggayagaya an dakol na isla.” Totoo nanggad, ikinagagayagaya kan Mga Saksi ni Jehova sa isla nin Cuba an saindang nadugangan na katalingkasan na sambahon an Dios asin an makasaysayan na pagsongko kan internasyonal na delegasyon na ini.
[Mga retrato sa pahina 8]
Dakol na pamilya an nag-atender sa espesyal na “Sa Dios na Dalan nin Buhay” na Pandistritong mga Kombension sa Cuba
[Retrato sa pahina 8]
An erokan na Bethel sa Havana binuksan liwat kan 1994
[Retrato sa pahina 8]
An mga miembro kan Namamahalang Grupo na pinipirmahan an regalong mga Biblia para sa mga opisyal na naglilingkod sa publiko