Maninigo daw na Pahiwason Nindo an Saindong Punto de Vista?
SARONG biyong mapanlaglag na linog an nangyari sa Siudad nin Kobe sa solnopan na Hapon, asin an mapagsakripisyong mga boluntaryo marikas na nagsokoro sa naapektaran na mga residente. Minsan siring, nadiskobre nin sarong nagsosongkong grupo nin mga doktor na an saindang kahagadan para sa medikal na mga suplay kinontra nin sarong taga Opisina sa Salud kan siudad. Gusto kan opisyal na idto, na direktor man sa sarong dakulang ospital sa munisipyo, na an mga biktima magduman sa mga ospital sa Kobe imbes na an mga doktor magtao nin mahal na mga ineksion asin suero sa mga sentro sa pag-ayuda. Sa kahurihurihi, itinao an kahagadan kan mga doktor, alagad dakol an nagkritika sa enot na matagas na aktitud kan opisyal asin garo baga kadaihan nin pakikidamay.
Tibaad nakaeksperyensia na kamo nin kaparehong kadaihan nin pagpahunod nin sarong nasa autoridad. Tibaad ngani kamo mismo nagkasala na kaiyan. Puede daw kamong makinabang sa pagpatalubo nin mas mahiwas na punto de vista?
Helingon an Bilog na Ladawan
Komun para sa mga indibiduwal na helingon an mga bagay-bagay gikan sa saro sanang anggulo, o punto de vista, na sa siring linilimitaran an saindang pakamansay asin pakasabot sa mga bagay-bagay. Sa parate dahelan ini sa mga bagay na arog kan edukasyon, eksperyensia sa buhay, asin pinaghalean. Maaabot an mas madonong na mga desisyon kun an saro naghihingoang helingon an bilog na ladawan. Halimbawa, kun kamo minabalyo sa sarong masibot na krosing na mayo nin ilaw sa trapiko, madonong daw na humeling sana nin diretso sa enotan? Bako nanggad! Kaagid kaiyan, an pagpahiwas kan saindong kaisipan tanganing maheling an bilog na ladawan puedeng makatabang na marhay sa mga pagdedesisyon asin paghiro sa responsableng paagi. Iyan puede nganing makapagligtas nin buhay.
Posibleng marhay na kita gabos puedeng gumibo nin pag-oswag sa bagay na ini. Kaya hapota an saindong sadiri, ‘Ano an nagkapirang kabtang kun saen puede akong makinabang paagi sa pagpahiwas kan sakong kaisipan?’
An Saindong Pagheling sa Iba
Ano an saindong naheheling kun kamo nagheheling sa iba? Igwa daw kamo kan tendensia na mansayon an saindang sinasabi o ginigibo bilang arin man sa tama o sala, na garo baga mayo nang ibang puedeng ikonklusyon? An pagmansay daw nindo sa komento nin iba magsalang pag-omaw o insulto? An saro daw magsalang biyong tama o biyong sala? An pagkaigwa nin siring na punto de vista magigin siring sa sarong retratista na iniignoro an darakulang manlaenlaen na makinang na sinag asin kolor sa sarong tanawon sa panahon nin tigrakdag, na garo baga an naheheling sana itom asin puti. O kamo daw may tendensia na magturohok sa negatibong mga aspekto kan personalidad nin saro, na arog nanggad nin sarong biahero na tinotogotan na an saiyang pagkaogma sa magayon na tanawon raoton nin dikit na ati na nawalat nin sarong wagang nagpapasyar?—Ikomparar an Eclesiastes 7:16.
Dakol an manonodan paagi sa pag-estudyar sa pagmansay ni Jehova sa sala nin tawo. Minsan ngani aram nia an dakol na kaluyahan asin depekto nin tawo, pinili nia na bakong iyan an pagparahelingon o pagparaisipon. An mapagpasalamat na salmista nagsabi: “Kun mga sala an saimong binabantayan . . . O Jehova, siisay an makatitindog?” (Salmo 130:3) Andam si Jehova na irayo an mga sala sa nagsosolsol na mga parakasala, iyo may marahay na boot na pinapara iyan, tanganing dai iyan magin digta sa satong relasyon sa saiya. (Salmo 51:1; 103:12) Nasabi ni Jehova dapit ki Hadeng David, na minsan nagkomiter nin magabat na mga kasalan ki Bat-seba, na sia sarong tawo na “nagsunod sa sako sa bilog niang puso paagi sa paggibo sana kan tama sa sakong mga mata.” (1 Hade 14:8) Taano ta nasabi ini nin Dios dapit ki David? Huli ta sia nagtorohok sa mas marahay na mga kualidad kan nagsolsol na si David. Kinonsiderar nia an gabos na pertinenteng bagay asin pinili nia na padagos na kaherakan an saiyang lingkod.
Daing kasalasala na ipinabanaag ni Cristo Jesus an mahiwas na pagmansay na ini sa mga sala nin iba. (Juan 5:19) Kan mapaatubang sa mga pagkukulang kan saiyang mga apostol, si Jesus maheherakon asin mapagsabot. Saiyang rinekonoser mapadapit sa bakong sangkap na mga tawo na dawa kun ‘an espiritu nagmamawot na gayo, an laman maluya.’ (Mateo 26:41) Nasa isip ini, mapakikibagayan ni Jesus an mga kaluyahan asin sala kan saiyang mga disipulo sa mapasensia asin mapagsabot na paagi. Dai sia nagkonsentrar sa saindang mga depekto kundi, imbes, nagtorohok sia sa saindang marahay na mga kualidad.
Sarong beses pakatapos na itanos an mga apostol huli ta nagdiriskutiran sinda manongod sa kun siisay an garo baga pinakadakula, idinugang ni Jesus: “Minsan siring, kamo an mga nakidamay sa sako sa mga pagbalo sa sako; asin ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean, tanganing kamo kumakan asin uminom sa lamesa ko sa sakong kahadean, asin tumukaw sa mga trono tanganing maghokom sa doseng tribo nin Israel.” (Lucas 22:24-30) Iyo, apisar kan dakol na depekto kan mga apostol, ginirumdom ni Jesus an saindang pagigin fiel asin an pagkamoot ninda sa saiya. (Talinhaga 17:17) May kompiansa si Jesus sa saindang makakaya asin gigibohon, kaya nakipagtipan sia sa sainda para sa sarong Kahadean. Iyo, ‘namotan ni Jesus an saiyang mga disipulo sagkod sa katapusan.’—Juan 13:1.
Kaya kun palaen an personalidad nin saro asin an saiyang mga sala nakaiiritar sa saindo, magin arog ki Jehova asin Jesus. Pahiwason an saindong kaisipan, asin hingoahon na konsideraron an gabos na bagay. Paagi sa tamang pagmansay sa mga bagay, magigin mas pasil para sa saindo na kamotan asin apresyaron an saindong mga tugang.
Sa Pagtao sa Materyal
An pribilehiong pagtao saro sa mga kagayagayahan na ipinaaabot sa mga Kristiano. Alagad kaipuhan daw na limitaran ta an satong pagtao sa saro sanang aktibidad, halimbawa, an pakikikabtang sa ministeryo sa langtad? (Mateo 24:14; 28:19, 20) O puede daw na pahiwason an saindong kaisipan tangani na makabale an pisikal na mga pangangaipo asin ikararahay nin iba? Siempre, nasasabotan kan gabos na Kristiano na an pagtao sa espirituwal iyo an pinakamahalaga. (Juan 6:26, 27; Gibo 1:8) Iyo, siring kahalaga nin pagtao sa espirituwal, an pagtao sa materyal tunay nanggad na dai dapat paglingawan.—Santiago 2:15, 16.
Mantang hinohorophorop niato an apretadong mga pangangaipo kan satong mga tugang sa espirituwal na nasa sato mismong kongregasyon asin sa bilog na kinaban, mas lubos niatong maheheling kun ano an satong magigibo tanganing tabangan sinda. Kun an mga nasa kamugtakan na gumibo kaiyan bukas an palad na nagtatao sa iba, nagkakaigwa nin pagpantaypantay. Sa paaging ini naaasikaso an mga pangangaipo kan gabos niatong tugang. Siring kaini an pagkapahayag kaiyan nin sarong Kristianong magurang sa kongregasyon: “Kun may lumataw na pangangaipo sa sarong parte kan kinaban, an mga tugang sa ibang parte kan kinaban matabang sa sainda. Kun mayo sinda sa kamugtakan na tumabang, kun siring an mga tugang sa ibang lugar an magibo kaiyan. Sa siring naaasikaso an mga pangangaipo kan satong mga tugang sa bilog na kinaban. Tunay nanggad na makangangalas an pambilog na kinaban na kasararoan nin magturugang.”—2 Corinto 8:13-15; 1 Pedro 2:17.
An sarong tugang na Kristiana na odok an pagmawot na makaatender sa saro kan internasyonal na mga kombension na ginibo sa Sirangan na Europa mayo talaga sa kamugtakan na magibo iyan. Minsan siring, nabaretaan nia na an mga tugang duman nangangaipong marhay nin mga Biblia, kaya nagkontribwir sia para sa siring na mga Biblia paagi sa saro na nag-atender. Sa siring naeksperyensiahan nia an kaogmahan sa pagtao, sa paghiras sa saiyang mga tugang sa ibang nasyon.—Gibo 20:35.
Tibaad paagi sa pagpahiwas kan saindong kaisipan orog pa ngani an ikakokontribwir nindo sa danay an paghiwas na pambilog na kinaban na pagtotokdo sa Biblia, na nagtatao nin kagayagayahan sa saindong sadiri asin siring man sa iba.—Deuteronomio 15:7; Talinhaga 11:24; Filipos 4:14-19.
Kun Nagtatao nin Hatol
Kun hinahagadan na magtao nin hatol o pagtatanos, an may konsiderasyon asin timbang na pangangatanosan matabang sa sato na makua an paggalang kan satong mga tugang sa espirituwal asin makatao nin talagang epektibong tabang. Pasil na marhay na magkonsentrar sa pira sanang detalye asin gumibo nin marikas, may pinapaboran na konklusyon. Ini nagtatao kan impresyon na hayakpit an satong isip, kun bakong sirrado an isip, arog kan mga namomoon sa relihion kan kaaldawan ni Jesus, na may tendensiang pagabatan an iba paagi kan saindang daing katapusan na mga reglamento. (Mateo 23:2-4) Sa ibong na kampi, kun lilikayan ta an mga pagpalabilabi asin matao kita nin marahay na hatol na marigon na basado sa mga prinsipyo sa Kasuratan, na ipinababanaag an matanos pero timbang asin maheherakon na kaisipan ni Jehova, magigin mas pasil na marhay para sa iba na akoon asin iaplikar an satong mga suhestion.
Kaidtong mga pirang taon na an nakaagi an hoben na mga tugang na lalaki hale sa nagkapirang kongregasyon nagtiripon tanganing magkarawat. An makamomondo, nagtalubo sa sainda an espiritu nin pakikompetensia, na nagresulta sa makolog na berbal na enkuentro. Paano inasikaso kan lokal na kamagurangan an problema? Rinerekonoser an pangangaipo kan mga hoben na magkaigwa nin dibersion, dai ninda irinekomendar na pumondo na sinda nin biyo. (Efeso 5:17; 1 Timoteo 4:8) Imbes, sinda nagtao nin marigon pero makatanosan na mga patanid manongod sa puedeng ibunga kan espiritu nin pakikompetensia. Nagtao man sinda nin nakatatabang na mga suhestion, siring kan pagkaigwa nin presenteng matua, responsableng mga tugang. Inapresyar kan mga hoben an pagigin madonong asin timbang kan hatol asin naghimate. Dugang pa, nag-orog an saindang paggalang asin kapadangatan sa kamagurangan.
Maghingoang Humiwas
Minsan ngani tibaad dai man nindo intension o tinutuyo na magkaigwa nin mga prehuwisyo, kaipuhan pa man giraray an determinadong paghihingoa na pahiwason an saindong kaisipan. Mantang pinag-aadalan nindo an Tataramon nin Dios, horophoropon iyan tanganing masabotan asin maapresyar an paagi nin pag-iisip ni Jehova. (Salmo 139:17) Hingoahon na saboton an mga rason kan mga pahayag sa Biblia asin an mga prinsipyong kalabot, asin magmaigot na turotimbangon an mga bagay-bagay siring kan ginigibo ni Jehova. Magigin kaoyon ini kan pamibi ni David: “Paaraman sa sako an saimong mga dalan, O Jehova; tokdoi ako kan saimong mga dana. Palakawa ako sa saimong katotoohan asin tokdoi ako.”—Salmo 25:4, 5.
Mantang orog na pinahihiwas nindo an saindong pagmansay, bebendisyonan kamo. An sarong bendisyon sa pinahiwas na punto de vista iyo an pagkamit nindo nin reputasyon na pagigin timbang asin mapagsabot. An reaksion nindo magigin mas makatanosan asin mapagsabot kun nagtatao nin tabang sa laen-laen na situwasyon. Ini makontribwir man sa makangangalas na pagkasararo asin pagkaoroyon kan Kristianong kasararoan nin magturugang.
[Mga retrato sa pahina 12]
An buka an palad na pagtao nakatatabang sa iba, nagtatao nin kagayagayahan sa nagtatao, asin nakapaoogma sa satong langitnon na Ama