May Buhay na mga Mutya sa Namibia!
AN Namibia haros 1,500 kilometros an laba sa may timog-solnopan na baybayon nin Aprika. An enterong baybayon kan nasyon kompuesto nin mga buklod na baybay, kabobolodan nin darakulang gapo, asin mahiwason na kaplanodohan na magraba. Kairiba kan mga gapo sa mga baybayon na magapogapo sa Namibia an mga mutya sa gabos na maiisip mong kolor. May mga brilyante pa nganing makukua duman kun minsan. Alagad an nasyon igwa nin labi pa kamahal na marhay na bagay kisa mga tampok na ini. An Namibia igwa nin buhay na mga mutya—an mga tawo na hale sa dakol na nasyonal na grupo kaiyan.
An kaenot-enoteng mga nag-erok sa Namibia nagtaram nin sarong grupo nin magkakaagid na lenguahe na saro sana an pinaghalean na inaapod na Koisan. An saindang pagtaram midbid sa mataklang mga tanog kaiyan. Kabilang sa mga nagtataram nin Koisan ngonyan an maitom an kublit na mga Damara, an harababang tawo na maputi an kublit na inaapod na Nama, asin an bantog na mga paraayam na Bushman. An dakol na tribong maitom nagduman man sa Namibia kan nakaagi pa sanang mga siglo. An mga ini kinaklasipikar sa tolong pangenot na nasyonal na grupo: an Ovambo (an pinakadakulang grupong etniko sa Namibia), an Herero, asin an Kavango. An mga Europeo nagpoon na mamirmehan sa Namibia durante kan ika-19 siglo. Mas dakol pang dayo an nag-arabot kan madiskobre na may mga brilyante sa baybay kan desierto.
An mga nag-eerok sa Namibia mahal na marhay huli ta sinda kabtang kan kinaban nin katawohan na para sa sainda itinao nin Dios an saiyang Aki, sa siring binubukasan an dalan pasiring sa buhay na daing katapusan. (Juan 3:16) Ginatos na taga Namibia na hale sa dakol na tribo an naghimate na sa mensahe nin kaligtasan. An mga ini puedeng iagid sa buhay na mga mutya huli ta sinda kabilang sa “kawiliwiling mga bagay kan gabos na nasyon” na tinitipon ngonyan sa harong nin pagsamba ki Jehova.—Haggeo 2:7.
Pinonan an Espirituwal na Pagmina
Kaidtong 1928 na pinonan na minahon an espirituwal na mga mutya sa Namibia. Durante kan taon na idto an sangang opisina kan Watch Tower Society sa Aprika del Sur nagpadara paagi sa koreo nin 50,000 na babasahon sa Biblia sa mga tawo na wararak sa bilog na nasyon. Kan sumunod na taon an sarong linahidan na Kristiana hale sa Aprika del Sur na an ngaran Lenie Theron kinultibar an interes na ipinaheling. Sa laog nin apat na bulan solo niang binagtas an mahiwason na nasyon, na nakapasakamot nin labing 6,000 na pantabang sa pag-adal sa Biblia sa Aprikano, Ingles, asin Aleman. An gabos na nagibong ini tunay nanggad na bakong basang sana.
Halimbawa, estudyaran nindo si Bernhard Baade, sarong minerong Aleman. Kan 1929 sinusuplayan sia nin sogok nin sarong rantsero na pinapatos an kada sogok sa sarong pahina nin publikasyon kan Watch Tower. Galagang binasa ni Bernhard an lambang pahina, na iniisip-isip kun siisay an nagsurat kan libro. Sa katapustapusi nakaabot sia sa huring pahina, na nagtao kan adres kan Watch Tower Society sa Alemania. Si Bernhard nagsurat para sa dugang pang babasahon asin nagin an enot na taga Namibia na nanindogan para sa katotoohan.
Nag-arabot an Bilog na Panahon na mga Trabahador
Kan 1950, nag-abot sa Namibia an apat na misyonero na sinanay sa Paadalan sa Biblia kan Watchtower sa Gilead. Uminabot sa walo an misyonero kan 1953. Kabilang sa sainda si Dick asin Coralie Waldron, mag-agom na taga Australia na sagkod ngonyan naglilingkod nin fiel digdi. Dakol na iba pang bilog na panahon na mga parabalangibog kan Kahadean hale sa Aprika del Sur asin ibang nasyon an nakikabtang man sa pagmina kan espirituwal na mga mutya sa Namibia. An iba pang mga misyonero, siring man an mga naggradwar sa Paadalan sa Ministeryal na Pagsasanay, isinugo sa Namibia.
An saro pang dahelan na nakakokontribwir sa espirituwal na pag-oswag sa Namibia iyo an pagtradusir asin pagpublikar kan mga babasahon sa Biblia sa pangenot na lokal na mga lenguahe, arog kan Herero, Kwangali, Kwanyama, Nama-Damara, asin Ndonga. Poon kan 1990, an sarong magayon na opisina sa pagtradusir asin erokan nin bilog na panahon na mga boluntaryo nagpupunsionar sa kabisera, an Windhoek. Si Karen Deppisch, na nakaibaiba kan saiyang agom sa bilog na panahon na pag-ebanghelyo sa manlaenlaen na parte kan Namibia, nagsasabi: “An dakol nagngangalas kun inaalokan mi sinda nin babasahon sa sadiri nindang lenguahe, nangorogna kun pipira sana nanggad na libro dawa anong klase an makukua sa partikular na lenguaheng iyan.”
Pagpakintab sa mga Mutya
An nagkapirang literal na mutya sa Namibia pinakintab kan paghiro kan mga alon asin baybay sa laog nin mga milenyo. Alagad, siempre, an siring na natural na mga proseso dai nakapaluluwas nin buhay na mga mutya. Kaipuhan an paghihingoa para sa bakong sangkap na mga tawo na “haleon an daan na personalidad” asin magsolog kan bagong arog-Cristong personalidad. (Efeso 4:20-24) Halimbawa, an pagsamba sa mga apoon na gadan na tradisyon na pusog an pagkatanom sa tahaw kan dakol na tribo sa Namibia. An mga dai naggigibo nin mga akto nin pagsamba sa mga apoon sa parate linalamag kan mga kapamilya asin kataed. Kun an mga indibiduwal makanood na sa Biblia na an mga gadan ‘mayo man lamang nin pakaaram,’ sinda napapaatubang sa pagbalo. (Eclesiastes 9:5) Sa anong paagi?
An sarong Saksi na Herero nagpapaliwanag: “Dakulaon na angat an pagigin makinuyog sa katotoohan. Inako ko na makipag-adal sa Biblia sa Mga Saksi ni Jehova, alagad kinaipuhan an panahon tanganing ikaaplikar ko an mga bagay na sakong nanonodan. Enot, kinaipuhan kong baloon kun baga daing peligro sa dai ko paggibo kan tradisyonal na mga paniniwala. Halimbawa, linalampasan ko sa sakong pagmaneho an nagkapirang lugar sa Namibia na dai minapondo tanganing maglaag nin gapo sa lolobngan o iiniitaas an sakong kupya bilang pagtaratara sa mga gadan. Luway-luway, nakombensir ako na mayong mangyayari sa sako huli sa dai ko pagsamba sa mga apoon na gadan na. Kanigoan an sakong kaogmahan na binendisyonan ni Jehova an sakong mga paghihingoa na tabangan an sakong pamilya asin an ibang interesado na manodan an katotoohan!”
An Pangangaipo Para sa Espirituwal na mga Minero
Bago nag-abot an mga misyonero kan 1950, sasaro sana an parahayag kan maogmang bareta sa Namibia. Iyan daing ontok na nag-aumento sagkod sa pinakahalangkaw na kabilangan na 995. Alagad ta dakol pa an kaipuhan na gibohon. Sa katunayan, may nagkapirang rehion na haros dai pa nahulitan. Kamo daw nasa kamugtakan na maglingkod kun saen dakula an pangangaipo para sa maigot na mga parabalangibog kan Kahadean? Kun siring, tabi bumalyo kamo pasiring sa Namibia asin tabangi kami na manompongan asin pakintabon an dakol pang espirituwal na mutya.—Ikomparar an Gibo 16:9.
[Mapa/Mga retrato sa pahina 26]
(Para sa aktuwal na format, helingon an publikasyon)
APRIKA
NAMIBIA
[Mga retrato]
An Namibia nasyon nin magayon na mga mutya
[Pasasalamat para sa pinagkuanan]
Mga mapa: Mountain High Maps® Copyright © 1997 Digital Wisdom, Inc.; Mga brilyante: Sa karahayan nin boot kan Namdek Diamond Corporation
[Mga retrato sa pahina 26]
An maogmang bareta ihinuhulit sa gabos na grupong etniko sa Namibia
[Retrato sa pahina 28]
Puede daw kamong maglingkod kun saen mas dakula an pangangaipo para sa mga parabalangibog kan Kahadean?