Para sa Gabos na Bagay Igwa nin Itinalaan na Panahon”
“Para sa gabos na bagay igwa nin itinalaan na panahon, panahon para sa lambang gibo sa sirong kan kalangitan.”—ECLESIASTES 3:1.
1. Ano an problema nin bakong sangkap na mga tawo, asin ano an ibinunga kaini sa nagkapirang kamugtakan?
AN MGA tawo parateng nagsasabi, “Kutana ginibo ko na tolos iyan.” O tibaad pakarealisar sa nangyari, “Kutana naghalat ako.” Ipinaheheling kan siring na mga reaksion an problema kan bakong sangkap na mga tawo sa pagdeterminar kan tamang panahon na dapat gibohon an nagkapirang bagay. An limitasyon na ini nagin dahelan na may nagkasuruhay na mga relasyon. Iyan nagbunga nin pagkadesganar asin pagkadiskontento. Asin an pinakamaraot sa gabos, pinaluya kaiyan an pagtubod nin nagkapirang tawo ki Jehova asin sa saiyang organisasyon.
2, 3. (a) Taano an pag-ako sa pagdeterminar ni Jehova kan itinalaan na panahon ta iyo an madonong na gibohon? (b) Ano an maninigong magin timbang na pagmansay niato mapadapit sa kaotoban kan hula sa Biblia?
2 Huling igwa kan kadonongan asin pakarorop na mayo sa mga tawo, kaya ni Jehova na aramon antes pa, kun bobooton nia, an kaaabtan nin lambang gibo. Puede niang aramon an “mangyayari sa huri poon pa sa kapinonan.” (Isaias 46:10) Huli kaini, dai sia masasala sa pagpili kan pinakamarahay na panahon sa paggibo kan ano man na gusto nia. Kun siring, imbes na magtiwala sa satong sadiring may depektong sentido nin pagdeterminar kan panahon, madonong kita kun akoon ta an pagdeterminar ni Jehova kan itinalaan na mga panahon!
3 Halimbawa, an maygurang na mga Kristiano may kaimbodan na naghahalat sa itinalaan na panahon ni Jehova na maotob an nagkapirang hula sa Biblia. Sinda danay na sibot sa paglilingkod sa saiya, na sa gabos na panahon pinagdadanay na malinaw sa isip an prinsipyo sa Lamentacion 3:26: “Marahay na an saro maghalat, na dai naggigirong, para sa pagliligtas ni Jehova.” (Ikomparar an Habacuc 3:16.) Kadungan kaiyan, kombensido sinda na an ipinaising paghokom ni Jehova, “dawa pa iyan maatraso, . . . daing salto na maootob. Dai iyan mahuhuri.”—Habacuc 2:3.
4. Paano maninigo na makatabang sa sato an Amos 3:7 asin Mateo 24:45 na mapasensiang maghalat ki Jehova?
4 Sa ibong na kampi, kun dai niato lubos na nasasabotan an nagkapirang teksto sa Biblia o paliwanag na itinatao sa mga publikasyon kan Watch Tower, igwa daw kita nin rason na malangkag? An paghalat sa itinalaan na panahon ni Jehova na linawon an mga bagay-bagay iyo an madonong na gibohon. “Huli ta an Soberanong Kagurangnan na Jehova dai magibo nin ano man sagkod na dai pa nia ikinapahahayag an saiyang hilom sa saiyang mga lingkod na propeta.” (Amos 3:7) Kanigoan kamakangangalas na panuga! Alagad dapat niatong marealisar na ihinahayag ni Jehova an saiyang mga hilom sa panahon na iniisip nia na marahay. Para sa katuyohan na iyan an Dios nag-autorisar nin sarong “fiel asin madonong na oripon” na matao sa saiyang banwaan kan “saindang [espirituwal na] kakanon sa igong panahon.” (Mateo 24:45) Kun siring, mayo kita nin rason na mahadit nin labi-labi, o maribok pa ngani, kun may mga bagay na dai lubos an pagkapaliwanag. Imbes, kita makakokompiar na kun kita mapasensiang mahalat ki Jehova, itatao nia, paagi sa fiel na oripon, an kinakaipuhan “sa igong panahon.”
5. Ano an pakinabang sa pagkonsiderar kan Eclesiastes 3:1-8?
5 An madonong na si Hadeng Salomon nagsambit nin 28 laen-laen na bagay, na may kanya-kanyang “itinalaan na panahon.” (Eclesiastes 3:1-8) An pakasabot sa kahulogan asin mga implikasyon kan sinabi ni Salomon matabang sa sato na madeterminaran an tamang panahon asin salang panahon para sa nagkapirang gigibohon, segun sa pagmansay nin Dios. (Hebreo 5:14) Pangyayarihon man kita kaiyan na ikaoyon dian an satong buhay.
“Panahon nin Pagtangis Asin Panahon nin Pagngisi”
6, 7. (a) Ano an dahelan ta ‘nagtatangis’ an nahahadit na mga tawo ngonyan? (b) Paano hinihingoa kan kinaban na halean nin epekto an pagigin seryoso kan situwasyon na namumugtakan kaiyan?
6 Minsan ngani may “panahon nin pagtangis asin panahon nin pagngisi,” siisay daw an habo kan ikaduwa kisa kan enot? (Eclesiastes 3:4) Makamomondo, kita nabubuhay sa sarong kinaban na sa pangenot nagtatao sa sato nin mga dahelan na magtangis. Mga baretang nagtatao nin makuring kamondoan an lataw sa media. Napapaiktad kita sa makuring takot kun nababaretaan niato an dapit sa mga hoben na nambabadil nin mga kapwa estudyante sa eskuelahan, mga magurang na minamaltrato an saindang mga aki, mga terorista na ginagadan o binabaldado an inosenteng mga biktima, asin an natural daang mga kalamidad na nandedestroso sa buhay nin tawo asin rogaring. An nagugutom, harararom an mata na mga aki asin pinaharale na mga dulag maigot na naghihingoa na makua an satong atension sa telebisyon. An dati bakong pamilyar na mga termino na arog kan paglinig etniko, AIDS, ralaban paagi sa mikrobio, asin El Niño ngonyan ikinahahadit kan satong isip asin puso—na may kanya-kanyang epekto.
7 Daing duda manongod dian, an kinaban sa ngonyan pano nin trahedya asin kamondoan. Minsan siring, tanganing garo baga pasaditon an pagigin seryoso kan situwasyon, an industriya nin pag-aling-aling regular na may hababaw, rapsak, sa parate inmoral asin madahas na mga iinaalok, na dinisenyo tanganing ilagalag kita sa pag-ignoro kan kasakitan na inaagihan kan iba. Alagad an daing pakilabot na espiritu nin bastos na surubahan asin daing kuentang ngirisihan na pinangyayari kan siring na pag-aling-aling dai dapat na ipareho sa tunay na kagayagayahan. An kagayagayahan na sarong bunga kan espiritu nin Dios sarong bagay na dai nanggad ikatatao kan kinaban ni Satanas.—Galacia 5:22, 23; Efeso 5:3, 4.
8. Maninigo daw na tawan nin prioridad kan mga Kristiano ngonyan an pagtangis o an pagngisi? Ipaliwanag.
8 Huling rinerekonoser an makamomondong marhay na kamugtakan kan kinaban, masasabotan niato na bako nanggad ngonyan an panahon na tawan nin dakulang prioridad an pagngisi. Bako ngonyan an panahon na mabuhay sana para sa dibersion asin pag-aling-aling o na togotan na ipaorog an ‘paglilibang’ kisa pag-aabot sa espirituwal na mga bagay. (Ikomparar an Eclesiastes 7:2-4.) “An mga minagamit kan kinaban” maninigo na magin “siring sa mga dai naggagamit kaiyan nin lubos,” an sabi ni apostol Pablo. Taano? Huli ta “an kamugtakan kan kinaban na ini nagbabago.” (1 Corinto 7:31) An tunay na mga Kristiano namumuhay kada aldaw na lubos na rinerekonoser an pagigin seryoso kan mga panahon na nabubuhayan niato.—Filipos 4:8.
Apisar kan Pagtangis, Tunay na Maogma!
9. Ano an makamomondong situwasyon kaidtong mga aldaw bago an Delubyo, asin ano an kahulogan kaini para sa sato ngonyan?
9 An mga tawo na nabuhay kaidtong panahon kan lakop sa globong Delubyo mayo nin seryosong pagmansay sa buhay. Nagpadagos sana sinda sa saindang aroaldaw na rutina asin dai nagtangis huli kan “karatan nin tawo [na] labi-labi na sa daga,” na mayo lamang nin labot mantang “an daga napano nin kadahasan.” (Genesis 6:5, 11) Nagtaram si Jesus manongod sa makamomondong kamugtakan na iyan, asin ihinula nia an kaparehong aktitud nin mga tawo sa satong kaaldawan. Sia nagpatanid: “Kun paano sinda kan mga aldaw na idto bago kan baha, nagkakarakan asin nag-iirinom, an mga lalaki nag-aaragom asin an mga babae nagpapaaragom, sagkod kan aldaw na si Noe naglaog sa dahong; asin dai sinda nagmangno sagkod na dumatong an baha asin iinanod sinda gabos, magigin siring man kaiyan an presensia kan Aki nin tawo.”—Mateo 24:38, 39.
10. Paano ipinaheling kan mga Israelita na nabubuhay kaidtong kaaldawan ni Haggeo na sinda mayo nin apresasyon sa itinalaan na panahon ni Jehova?
10 Mga 1,850 taon pakalihis kan Baha, kan kaaldawan ni Haggeo, dakol na Israelita an nagpaheling nin kaagid na kadaihan nin seryosong interes sa espirituwal na mga bagay. Huling sibot-sibot sa pag-aabot sa personal na intereses, dai ninda namansayan na idto na an panahon na tawan ninda nin prioridad an intereses ni Jehova. Satong mababasa: “Kun manongod sa banwaan na ini, sinda nagsarabi: ‘Dai pa nag-abot an panahon, an panahon kan harong ni Jehova, tangani na iyan itogdok.’ Asin an tataramon ni Jehova padagos na nagdatong paagi ki Haggeo na propeta, na nagsasabi: ‘Panahon daw ini na kamo mismo mag-istar sa saindong mga harong na may mga panel, mantang an harong na ini raot? Asin ngonyan ini an sabi ni Jehova nin mga hukbo, “Isentro nindo an saindong puso sa saindong mga dalan. ”’”—Haggeo 1:1-5.
11. Ano an puedeng angay na ihapot niato sa satong sadiri?
11 Bilang mga Saksi ni Jehova ngonyan, na may mga paninimbagan asin pribilehio sa atubangan ni Jehova na kaagid kan sa mga Israelita kan panahon ni Haggeo, marahay na isentro man niato an satong puso sa satong mga dalan, na ginigibo iyan na may lubos na pagkaseryoso. Kita daw ‘nagtatangis’ huli kan mga kamugtakan sa kinaban asin sa katuyaan na itinatao kaini sa ngaran nin Dios? Nakokolgan daw an satong boot kun dinedeharan nin mga tawo an pag-eksister nin Dios o hayag na iniignoro an saiyang matanos na mga prinsipyo? An reaksion daw niato kapareho kan mga tinandaan na naheling ni Ezequiel sa sarong bisyon kaidtong 2,500 na taon na an nakaagi? Manongod sa sainda satong mababasa: “Si Jehova nagpadagos na magsabi sa [lalaki na may tintero nin sekretaryo]: ‘Umagi ka sa tahaw kan siudad, sa tahaw nin Jerusalem, asin bugtakan mo nin tanda an angog kan mga tawo na nag-aaragagha asin nag-aaragrangay huli sa gabos na makauuyam nin makuring bagay na ginigibo sa tahaw kaiyan.’”—Ezequiel 9:4.
12. Ano an kahulogan kan Ezequiel 9:5, 6 para sa mga tawo ngonyan?
12 An kahulogan kan pagkasaysay na ini para sa sato ngonyan nagigin malinaw kun babasahon niato an mga instruksion sa anom na lalaki na may mga armas na panronot: “Umagi kamo sa tahaw kan siudad na kasunod nia asin mangadan kamo. An saindong mga mata dai magmondo, asin dai kamo maherak. An gurang na lalaki, hoben na lalaki asin daraga asin sadit na aki patin mga babae maninigo nindong gadanon—sagkod na maubos. Alagad sa siisay man na igwa nin tanda dai kamo magrani, asin maninigo kamong magpoon sa sakong santuaryo.” (Ezequiel 9:5, 6) An pagkaligtas niato sa marikas nang nagdadangadang na dakulang kahorasaan na iyan nakadepende sa pagrekonoser niato na ngonyan na an pangenot na panahon na magtangis.
13, 14. (a) Anong klaseng mga tawo an sinabi ni Jesus na maogma? (b) Ipaliwanag kun taano ta iniisip nindo na an paglaladawan na ini tamang-tama nanggad sa Mga Saksi ni Jehova.
13 Siempre, an bagay na an mga lingkod ni Jehova ‘nagtatangis’ huli sa nakapanluluya sa boot na kamugtakan kan mga gibo-gibo sa kinaban dai nakaoolang sa saindang pagigin maogma. Kabaliktaran! An totoo sinda an pinakamaogmang grupo nin mga tawo digdi sa daga. Itinao ni Jesus an basehan para sa kaogmahan kan sabihon nia: “Maogma idtong mga nakamamate kan saindang espirituwal na pangangaipo, . . . an mga namomondo, . . . an mga mahoyo, . . . an mga nagugutom asin napapaha sa katanosan, . . . an mga maheherakon, . . . an mga dalisay an puso, . . . an mga matoninong, . . . idtong mga pinaglamag huli sa katanosan.” (Mateo 5:3-10) Kadakol kan ebidensia na nagpapaheling na an paglaladawan na ini tamang-tama sa Mga Saksi ni Jehova, bilang grupo, na mas marahay kisa ano man na ibang organisasyon nin relihion.
14 Nangorogna poon kan ibalik an tunay na pagsamba kaidtong 1919 na an maogmang banwaan ni Jehova igwa nin dahelan na ‘magngisi.’ Sa espirituwal na paagi, namatean man ninda an nakarerepreskong eksperyensia kan mga nagbalik hale sa Babilonya kan ikaanom na siglo B.C.E.: “Kan ibalik ni Jehova an mga nabihag nin Sion, nagin kitang siring sa mga nangangatorogan. Kan panahon na idto an satong ngoso napano nin pagngisi, asin an satong dila nin magayagayang kurahaw. . . . Si Jehova nakaginibo nin dakulang bagay huli sa saiyang ginibo sa sato. Kita nagin magayagaya.” (Salmo 126:1-3) Pero, dawa nasa tahaw nin espirituwal na pagngisi, madonong na isinasaisip kan Mga Saksi ni Jehova an pagigin seryoso kan mga panahon. Oras na an bagong kinaban magin nang katunayan asin an mga nag-eerok sa daga “makapangapot [na] nin marigon sa tunay na buhay,” kun siring nagdatong na an panahon na an pagngisi masalida sa pagtangis sa bilog na panahon na daing sagkod.—1 Timoteo 6:19; Kapahayagan 21:3, 4.
“Panahon nin Pagkugos Asin Panahon nin Paglikay sa Pagkugos”
15. Taano an mga Kristiano ta mapamili nin mga katood?
15 Mapamili an mga Kristiano manongod sa kun siisay an kinakatood ninda. Ginigirumdom ninda an patanid ni Pablo: “Dai kamo palagalag. An maraot na pag-iriba nakararaot sa marahay na mga ugale.” (1 Corinto 15:33) Asin an madonong na si Hadeng Salomon nagsabi: “Sia na naglalakaw na kaiba nin mga madonong magigin madonong, alagad sia na nakiiiba sa mga lolong maraot an aabotan.”—Talinhaga 13:20.
16, 17. Paano minamansay kan Mga Saksi ni Jehova an pakikikatood, pagde-date, asin pag-agom, asin taano?
16 An pinipili kan mga lingkod ni Jehova bilang mga katood iyo an mga indibiduwal na kapareho ninda igwa nin pagkamoot ki Jehova asin sa saiyang katanosan. Minsan ngani inaapresyar asin ikinaoogma ninda an pakikiibaiba kan saindang mga katood, madonong na linilikayan ninda an mapagkonsinte, sobra kamapagpasunod na punto de vista dapit sa pagde-date na lakop sa nagkapirang nasyon ngonyan. Imbes na magpadara dian bilang dai nakadadanyar na paglilibang, minamansay ninda na an pagde-date sarong seryosong lakdang pasiring sa pag-agom na maninigo sanang gibohon kun an saro andam na sa pisikal, mental, asin espirituwal—patin talingkas sono sa Kasuratan—na lumaog sa permanenteng relasyon.—1 Corinto 7:36.
17 Tibaad isipon nin nagkapira na lihis na sa uso an pagkaigwa nin siring na punto de vista dapit sa pagde-date asin pag-agom. Alagad dai tinotogotan kan Mga Saksi ni Jehova an pan-aagyat nin kairiba na makaimpluwensia sa saindang pagpili nin mga katood o sa saindang mga desisyon kun dapit sa pagde-date asin pag-agom. Aram ninda na “an kadonongan napatutunayan na matanos paagi sa mga gibo kaiyan.” (Mateo 11:19) Aram pirme ni Jehova an pinakamarahay, kaya isinasaboot ninda an saiyang hatol na mag-agom ‘sana dian sa Kagurangnan.’ (1 Corinto 7:39; 2 Corinto 6:14) Linilikayan ninda na maghidali sa pag-agom huli kan salang ideya na puede an diborsio o pagbubulag kun magluya an relasyon. Tinatawan ninda nin panahon an paghanap nin angay na aagomon, sa pakaaram na oras na magsumpaan sa pag-agom, minaaplikar an ley ni Jehova: “Kaya bako na sindang duwa, kundi sarong laman. Kun siring, an pinagsaro nin Dios dai pagsuwayon nin siisay man.”—Mateo 19:6; Marcos 10:9.
18. Ano an puedeng magin pagpopoon para sa maogmang pag-agoman?
18 An pag-agom sarong bilog na buhay na kapanugaan na maninigong maingat na planohon. Rasonable sanang ihapot nin sarong lalaki sa saiyang sadiri, ‘Sia daw talaga an tama para sa sako?’ Alagad importante man na ihapot nia, ‘Ako daw talaga an tama para sa saiya? Ako daw sarong maygurang na Kristiano na kayang asikasohon an saiyang espirituwal na mga pangangaipo?’ An magkatratong pakasal pareho igwa nin obligasyon sa atubangan ni Jehova na magin makosog sa espirituwal, may kakayahan na makagibo nin marigon na pag-agoman na angay na mag-ako kan pag-oyon nin Dios. Rinibong mag-agom na Kristiano an makapapatunay na huli sa pagdodoon kaiyan sa pagtao imbes na sa pag-ako, an bilog na panahon na ministeryo sarong marahayon na pagpopoon para sa maogmang pag-agoman.
19. Taano an nagkapirang Kristiano ta nagdadanay na daing agom?
19 An nagkapirang Kristiano ‘naglilikay sa pagkugos’ paagi sa pagdesisyon na magdanay na daing agom dahel kan maogmang bareta. (Eclesiastes 3:5) An iba idinidigson an pag-agom sagkod na sa pagmate ninda kualipikado na sinda sa espirituwal tanganing magustohan nin sarong angay na aagomon. Alagad girumdomon ta man an daing agom na mga Kristiano na hinihimuyawot an mga kadayupotan asin pakinabang nin pagigin may agom alagad ta dai nakanonompong nin aagomon. Makaseseguro kita na ikinagagayagaya ni Jehova an saindang pagsayuma na ikompromiso an mga prinsipyo nin Dios sa saindang pagmawot na makaagom. Marahay man na apresyaron niato an saindang kaimbodan asin tawan sinda kan angay na pagparigon sa boot na maninigo sa sainda.
20. Taano ta maski an mga mag-agom kun minsan ‘naglilikay sa pagkugos’?
20 Maninigo daw na ‘lumikay sa pagkugos’ kun minsan maski an mga may agom? Minalataw na iyo sa nagkapirang bagay, ta si Pablo nagsabi: “Ini sinasabi ko, mga tugang, nainaan na an panahon na natatada. Magpoon ngonyan an mga igwa nin agom na babae magin garo sinda mayo.” (1 Corinto 7:29) Oyon dian, an mga kagayagayahan asin bendisyon sa pag-agom dapat na kun beses magin segunda sa teokratikong mga paninimbagan. An timbang na pagmansay sa bagay na ini dai mapaluya sa relasyon nin mag-agom kundi pakokosogon iyan huli ta ikinapagigirumdom kaiyan sa mag-agom na si Jehova dapat na pirmeng iyo an pangenot na nagpapasarig sa saindang relasyon.—Eclesiastes 4:12.
21. Taano ta dai niato maninigong husgaran an mga mag-agom kun dapit sa pag-aki?
21 Saro pa, an nagkapirang mag-agom dai nag-aaki tanganing magin mas libre sa saindang paglilingkod sa Dios. Ini nangahulogan nin sakripisyo sa saindang kabtang, asin babalosan sinda ni Jehova huli kaiyan. Kulibat palan, baga man ineenkaminar kan Biblia an pagigin daing agom dahel kan maogmang bareta, mayo iyan nin direktang sinasabi dapit sa pagdadanay na daing aki huli sa kaparehong dahelan. (Mateo 19:10-12; 1 Corinto 7:38; ikomparar an Mateo 24:19 asin Lucas 23:28-30.) Sa siring, an mga mag-agom dapat na gumibo nin sadiri nindang desisyon basado sa personal na mga kamugtakan asin sa saindang saboot segun sa konsensia. Ano man an tibaad magin desisyon, an mga mag-agom na iyan dai dapat tatsaran.
22. Ano an mahalagang maaraman niato?
22 Iyo, “para sa gabos na bagay igwa nin itinalaan na panahon, panahon para sa lambang gibo sa sirong kan kalangitan.” Igwa pa ngani nin “panahon para sa ralaban asin panahon para sa katoninongan.” (Eclesiastes 3:1, 8) Ipaliliwanag kan sunod na artikulo kun taano ta mahalagang maaraman niato kun arin sa duwang iyan an ngonyan na an panahon.
Ikapaliliwanag daw Nindo?
◻ Taano ta mahalagang marhay na maaraman niato na “para sa gabos na bagay igwa nin itinalaan na panahon”?
◻ Taano ta ngonyan an pangenot na “panahon nin pagtangis”?
◻ Taano an mga Kristiano ta, minsan ngani ‘nagtatangis,’ tunay na maogma pa man giraray?
◻ Paano ipinaheheling nin nagkapirang Kristiano na minamansay ninda an presente bilang “panahon nin paglikay sa pagkugos”?
[Mga retrato sa pahina 6, 7]
Minsan ngani an mga Kristiano ‘nagtatangis’ huli sa mga kamugtakan sa kinaban . . .
. . . an totoo sinda an pinakamaogmang mga tawo sa kinaban
[Retrato sa pahina 8]
An bilog na panahon na ministeryo sarong marahayon na basehan para sa maogmang pag-agoman