Puedeng Bagohon nin Pagtubod an Saindong Buhay

“SIERTO nanggad na puedeng magkaigwa nin marahay na mga prinsipyo sa buhay dawa mayo nin Dios.” Ini an deklarasyon nin sarong agnostiko. Sinabi nia na pinadakula nia an saiyang mga aki na may halangkaw na moral na mga prinsipyo sa buhay, asin pinadakula man ninda an saindang mga aki na may kaparehong halangkaw na mga pamantayan​—na gabos mayo nin pagtubod sa Dios.

Boot sabihon daw kaini na dai na kaipuhan an pagtubod sa Dios? Minalataw na iyan an inisip kan tawong ini. Asin totoo na an gabos na dai nagtutubod sa Dios bakong pirmeng maraot. Si apostol Pablo nagsambit manongod sa “mga tawo nin mga nasyon” na dai nakamimidbid sa Dios alagad “minagibo sa saindang naturalesa nin mga bagay kan ley.” (Roma 2:14) An gabos​—kabale an mga agnostiko​—namundag na igwa nin konsensia. Dakol an naghihingoang sunodon an mga dikta kan saindang konsensia dawa dai sinda nagtutubod sa Dios na nagtao sa sainda kan natural na pagmate na iyan nin tama asin sala.

Minsan siring, an marigon na pagtubod sa Dios​—pagtubod na basado sa Biblia​—orog nanggad na makosog na puersa para sa ikararahay kisa kan mayo nin tabang na paggiya kan konsensia. An pagtubod na basado sa Tataramon nin Dios, an Biblia, iyo an nag-iimpormar sa konsensia, nagpapagin alisto kaiyan sa pagmansay kan kalaenan nin tama sa sala. (Hebreo 5:14) Apuera dian, pinaririgon kan pagtubod an mga tawo na papagdanayon an halangkaw na mga pamantayan sa atubangan nin grabeng pangigipit. Halimbawa, durante kan ika-20 siglo, dakol na nasyon an napasairarom kan kapangyarihan nin maraot na politikal na mga rehimen, na pinirit an minalataw na disenteng mga tawo na magkomiter nin grabeng mga kabikoan. Minsan siring, an mga igwa nin tunay na pagtubod sa Dios habong ikompromiso an saindang mga prinsipyo, dawa nameligro an saindang buhay. Dugang pa, puedeng bagohon kan pagtubod na basado sa Biblia an mga tawo. Puedeng balukaton kaiyan an buhay na garo baga dai nang direksion asin tabangan an mga tawo na malikayan an seryosong mga sala. Estudyare an pirang halimbawa.

Puedeng Bagohon nin Pagtubod an Buhay Pampamilya

“Paagi sa saindong pagtubod nagibo nindo an imposible.” Iyan an sabi nin sarong Ingles na huwes kan itao nia an saiyang desisyon manongod sa katanosan ni John asin Tania sa pag-ataman sa saindang mga aki. Kan si John asin Tania makaabot sa atension kan mga autoridad, sinda bakong kasal asin labi-labi karaot an saindang buhay pampamilya. Si John, na nagdodroga asin naghuhuego, nagkomiter nin krimen tanganing may magasto sa saiyang mga bisyo. Pinabayaan nia an saiyang mga aki asin an ina kan mga ini. Kaya, anong “milagro” an nangyari?

Sarong aldaw, nadangog ni John an saiyang aki pang sobrino na nagtataram manongod sa Paraiso. Napukaw an interes, hinapot nia an mga magurang kan aki. An mga magurang Saksi ni Jehova, asin tinabangan ninda si John na makanood manongod dian paagi sa Biblia. Sa padikitdikit, si John asin Tania nakapatalubo nin pagtubod na basado sa Biblia na nakapabago kan saindang buhay. Linegalisar ninda an saindang pagsasaro paagi sa kasal asin hinale an saindang mga bisyo. An mga autoridad na nagsiyasat kan saindang pamilya may nadiskobre na garo baga imposible kutana sa halipot na panahon bago kaidto​—sarong maogmang pamilya sa sarong malinig na harong, sarong makawiwiling lugar na padadakulaan kan mga aki. Tama an huwes sa pagkredito kan “milagrong” ini sa bago pa sanang manompongan na pagtubod ni John asin Tania.

Rinibong kilometro hale sa Inglaterra, an sarong hoben pang agom na babae sa Haraning Sirangan magigin na kutanang kabtang nin sarong mamondong marhay na estadistika. Sia nagpaplano kaidto na umayon sa minilyon taon-taon na an pag-agom natatapos sa diborsio. Igwa sia nin aki, alagad an saiyang agom na lalaki matuang marhay sa saiya. Sa rason na ini, sinasadol sia kan saiyang mga paryente na makidiborsio, asin talagang pinonan na niang gumibo nin mga areglo na gibohon iyan. Minsan siring, nakikipag-adal sia sa Biblia sa saro sa Mga Saksi ni Jehova. Kan maaraman kan Saksi an situwasyon, ipinaliwanag nia an sinasabi kan Biblia manongod sa pag-agom​—halimbawa, na an pag-agom regalo hale sa Dios asin bakong sarong bagay na basta na sana iaapon. (Mateo 19:​4-6, 9) Sa isip-isip kan babae, ‘Pambihira na an babaeng ini, na ibang tawo, naghihingoang isalbar an samong pamilya mantang idtong mga harani sa sako gustong laglagon iyan.’ Tinabangan sia kan saiyang bago pa sanang makuang pagtubod na mapreserbar an saiyang pag-agom.

An sarong mamondong estadistika na nakaaapektar sa buhay pampamilya may koneksion sa aborsion. Kinalkulo nin sarong report kan Naciones Unidas na kada taon kisuerra 45 milyones na dai pa namumundag na omboy an tuyong pinapakua. An kada siring na pangyayari sarong trahedya. An kaaraman sa Biblia nakatabang sa sarong babae sa Pilipinas na malikayan an pagigin kabtang kan estadistikang iyan.

An babae nanompongan kan mga Saksi ni Jehova, nag-ako nin brosyur para sa pag-adal sa Biblia na may titulong Ano an Kahagadan sa Sato nin Dios?,a asin nagpoon na mag-adal sa Biblia. Pakalihis nin pirang bulan, ipinaliwanag nia kun taano. An babae bados kaidto kan enot na magsongko sa saiya an mga Saksi, alagad nagdesisyon sinda kan saiyang agom na lalaki na ipakua an omboy. Minsan siring, an retrato kan dai pa namumundag na omboy sa pahina 24 kan brosyur nakatudok sa puso kan babae. An kaibang paliwanag na basado sa Biblia na an buhay sagrado huli ta ‘yaon sa Dios an gikanan nin buhay’ nakakombensir sa saiya na buhayon an saiyang aki. (Salmo 36:9) Ngonyan sia an ina nin sarong magayon, marahay an salud na omboy.

Tinabangan kan Pagtubod an mga Minemenus

Sa Etiopia, duwang lalaki na bakong magayon an bulos an nag-atender sa sarong pagtiripon para sa pagsamba na ginigibo kan Mga Saksi ni Jehova. Pagkatapos kan pagtiripon, an sarong Saksi nagpamidbid sa sainda sa makikatood na paagi. An mga lalaki naghagad nin limos. An Saksi tinawan sinda, bakong nin kuarta, kundi nin sarong bagay na orog karahay. Inenkaminar nia sinda na magpatalubo nin pagtubod sa Dios, na “may orog nanggad na halaga kisa bulawan.” (1 Pedro 1:7) An saro sa sainda naghimate asin nagpoon na mag-adal sa Biblia. Binago kaini an saiyang buhay. Mantang nagtatalubo an saiyang pagtubod, tinalikdan nia an pagsigarilyo, makosog na pag-inom, inmoralidad, asin an paggamit nin khat (pampabagsik na nakaaadikto). Nakanood sia na sustentohan an saiyang sadiri imbes na makilimos asin ngonyan malinig, kapakipakinabang na an pamumuhay.

Sa Italia an sarong 47 anyos na lalaki sinentensiahan nin sampulong taon na pagkabilanggo asin idinetener sa sarong hudisyal na ospital sa sikiyatriya. An saro sa Mga Saksi ni Jehova na autorisadong lumaog sa mga institusyon nin presohan tanganing tumao nin espirituwal na tabang inadalan sia sa Biblia. An lalaki marikas na nag-oswag. Dakulang marhay an pagbago kan saiyang buhay dahel sa pagtubod kaya an ibang mga preso sa saiya ngonyan nagrarani tanganing humagad nin hatol kun paano aatubangon an saindang mga problema. Huli sa saiyang pagtubod na basado sa Biblia nakamit nia an paggalang, pagrekonoser, asin tiwala kan mga autoridad sa presohan.

Sa nakaagi pa sanang mga taon ibinareta nin mga peryodiko an manongod sa mga guerra sibil sa Aprika. An partikularmenteng makatatakot na marhay iyo an manongod sa aki pang mga lalaki na sinasanay bilang soldados. An mga aking ini pinadodroga, pinagriringisan, asin pinipirit na gumawe nin bakong makatawo tumang sa saindang mga paryente tanganing siertohon na sinda solamenteng maimbod sa paksion na ipinakikipaglaban ninda. Igo daw an puersa kan pagtubod na basado sa Biblia na bagohon an buhay kan siring na mga aki? Sa kisuerra duwang kaso, iyo.

Sa Liberia, si Alex nagin akolito sa Iglesia Katolika. Alagad sa edad na 13, uminayon sia sa sarong nakikiguerrang paksion asin nagin midbid na aking soldados. Tanganing sia magin maisog sa ralaban, naggibo sia nin panraratak. Naheling ni Alex an dakol sa saiyang kairiba na ginadan, alagad sia nakaligtas. Kan 1997 nanuparan nia an Mga Saksi ni Jehova asin naheling nia na dai sia ninda minenus. Imbes, tinabangan ninda sia na manodan an sinasabi kan Biblia manongod sa kadahasan. Naghale si Alex sa hukbo. Mantang nagpopoon na magtalubo an saiyang pagtubod, sinunod nia an pagboot kan Biblia: “Rumayo sia sa maraot asin gumibo sia nin marahay; hanapon nia an katoninongan asin gibohon iyan.”​—1 Pedro 3:11.

Mientras tanto, an sarong dating aki na soldados na an ngaran Samson napaduman sa banwaan na ineerokan ngonyan ni Alex. Dati siang miembro nin koro alagad kan 1993 nagin soldados asin naimbuelto sa pagdroga, espiritismo, asin inmoralidad. Kan 1997 hinale sia sa serbisyo. Si Samson pasiring kaidto sa Monrovia tanganing umayon sa sarong espesyal na puersang panseguridad kan kombensiron sia nin sarong katood na makipag-adal sa Biblia sa mga Saksi ni Jehova, asin bilang resulta, nakapatalubo sia nin pagtubod na basado sa Biblia. Nagtao ini sa saiya kan kosog nin boot na bayaan an saiyang pamumuhay na may hilig na makiguerra. Si Alex asin Samson ngonyan pareho namumuhay na matoninong asin marahay an moral. Igwa daw nin ano man apuera sa pagtubod na basado sa Biblia na makakapabago sa buhay na pinagringisan na marhay?

An Tamang Klase nin Pagtubod

Pira sana ini sa kadakol na halimbawa na puedeng sambiton tanganing ipaheling an puersa nin tunay na pagtubod na basado sa Biblia. Siempre, bakong gabos na naghihingako sanang may pagtubod sa Dios minagawe sono sa halangkaw na mga pamantayan kan Biblia. Sa katunayan, may mga ateista na tibaad mas marahay an pamumuhay kisa nagkapirang naghihingakong Kristiano. Iyan huli ta an kalabot sa pagtubod na basado sa Biblia bako sanang paghingako na an saro may pagtubod sa Dios.

Inapod ni apostol Pablo an pagtubod na “an siertong paghalat sa mga bagay na linalaoman, an hayag na pagpapaheling kan mga katunayan minsan dai naheheling.” (Hebreo 11:1) Huli kaini, kabale sa pagtubod an makosog na paniniwala​—basado sa dai mapahihimutikan na ebidensia​—sa mga bagay na dai naheheling. Espesyalmenteng kabale dian an daing ano man na pagduda na an Dios nag-eeksister, na sia interesado sa sato, asin na bebendisyonan nia an mga naggigibo kan saiyang kabotan. An apostol nagsabi man: “An minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.”​—Hebreo 11:6.

An klaseng ini nin pagtubod an nakapabago sa buhay ni John, Tania, asin kan iba pa na sinambit sa artikulong ini. Minotibar sinda kaiyan na lubos na magkompiar sa Tataramon nin Dios, an Biblia, para sa giya sa pagdedesisyon. Tinabangan sinda kaiyan na gumibo nin temporaryong mga pagsasakripisyo tangani na dai lumakaw sa kombenyente, alagad sala, na dalan. Minsan ngani magkalaen an kada eksperyensia, an gabos magkapareho an kapinonan. An saro sa Mga Saksi ni Jehova inadalan sa Biblia an mga indibiduwal na ini, asin naeksperyensiahan ninda an pagigin totoo kan sinasabi kan Biblia: “An tataramon nin Dios buhay asin mapuersa.” (Hebreo 4:12) An puersa kan Tataramon nin Dios nagtabang sa balang indibiduwal na mapatalubo an makosog na pagtubod na nakapabago sa saiyang buhay na magin mas marahay.

An Mga Saksi ni Jehova aktibo sa labing 230 kadagaan asin isla. Inaagda ninda kamo na magkaigwa nin pag-adal sa Biblia. Taano? Huli ta kombensido sinda na an pagtubod na basado sa Biblia puedeng magpangyari nin dakulang mga pagrahay sa saindo man na buhay.

[Nota sa Ibaba]

[Mga ritrato sa pahina 3]

Binabago nin pagtubod na basado sa Biblia an dakol na buhay na magin mas marahay

[Picture Credit Line sa pahina 2]

Kard na igwa kan titulo kan Biblia nieświeska ni Szymon Budny, 1572