Sarong “Kawiliwiling Marhay na Kanding na Bukidnon”

AN KAWILIWILING marhay dai gagamiton na adhetibo kan kadaklan sa sato sa paglaladawan sa kanding. Tibaad isipon ta na an mga kanding kapakipakinabang na hayop na nagkakakan nin haros dawa ano asin nagtatao sato nin masiram na karne asin masustansiang gatas—alagad ta dai nanggad niato iyan aapodon na kawiliwiling marhay.

Minsan siring, ilinaladawan kan Biblia an sarong agom na babae bilang “sarong madaling kamotan na usang babae asin kawiliwiling marhay na kanding na bukidnon.” (Talinhaga 5:18, 19) Si Salomon, sarong kagsurat kan libro nin Talinhaga, alisto sa pagmasid sa layas na mga hayop sa Israel, kaya daing duda na sia may balidong rason sa paggamit kan metaporang ini. (1 Hade 4:30-33) Tibaad, kapareho kan saiyang amang si David, napagmasdan nia an mga kanding na bukidnon na parateng yaon sa palibot nin En-gedi, harani sa baybayon kan Gadan na Dagat.

An sadit na mga aripompon nin mga kanding na bukidnon na nag-iistar sa kaharaning Desierto nin Judea regular na minapasiring sa bukal nin En-gedi. Mantang iyan sana an masasarigan na makukuanan nin tubig sa alang na lugar na ini, an En-gedi an nagin paboritong lugar na raraan kan mga kanding na bukidnon sa laog nin dakol nang siglo. Sa katunayan an ngaran na En-gedi posibleng nangangahulogan nin “burabod kan ogbon na kanding,” sarong patotoo sa regular na presensia kan ogbon na mga kanding sa lugar na ini. Si Hadeng David nakakua nin pailihan digdi kan pinaglalamag ni Hadeng Saul, minsan ngani kinaipuhan niang mag-erok na siring sa sarong dulag “sa mayong ano man na nagtutubong mga gapo kan mga kanding na bukidnon.”—1 Samuel 24:1, 2.

Puede pa kamong makaheling sa En-gedi nin sarong layas na babaeng kanding, o kanding na bukidnon, na magayon an hiro na minababa sa magapong ampas mantang sinusundan nia an sarong lalaking kanding na minapasiring sa tubig. Kun siring puede na nindong masabotan an pagkomparar kan layas na babaeng kanding sa sarong maimbod na agom na babae. An saiyang kalmadong naturalesa asin eleganteng hiro tanda man nin marahayon na mga kualidad na sa babae. An tataramon na “kawiliwiling marhay” minalataw na nanonongod sa gayon nin hiro asin eleganteng itsura kan kanding na bukidnon.a

An layas na babaeng kanding kaipuhan na magin makosog siring man magayon an hiro. Siring sa sinabi ni Jehova ki Job, an kanding na bukidnon nangangaki sa mga kantil, sa magapo, masakit maabot na mga lugar kun saen an kakanon kakadikit asin labi-labi kahalangkaw o kahababa an temperatura. (Job 39:1) Sa ibong kan mga problemang ini, inaataman nia an saiyang mga ogbon asin tinotokdoan sindang sumakat asin lumukso nin maliksi sa mga kagagapoan na siring kan ginigibo nia. An layas na kanding pusoan man na pinoprotehiran an saiyang ogbon laban sa mga naniniba. An sarong paramasid nakaheling nin kanding na bukidnon na linalabanan an sarong agila sa laog nin kabangang oras, mantang an ogbon naglulukob sa irarom nia para sa proteksion.

An Kristianang mga agom asin ina sa parate kaipuhan na padakulaon an saindang mga aki sa bakong paborableng mga kamugtakan. Arog kan kanding na bukidnon, sinda nagpapaheling nin dedikasyon asin kadaihan nin kaimotan sa pag-asikaso kan itinao nin Dios na responsibilidad na ini. Asin pusoan nindang pinagmamaigotan na protehiran an saindang mga aki tumang sa espirituwal na mga peligro. Kaya, imbes na menuson an mga babae paagi sa metaporang ini, sa katunayan dinadara ni Salomon an atension sa gayon nin hiro asin kagayonan nin sarong babae—espirituwal na mga kualidad na risang marhay dawa sa pinakadepisil na mga kamugtakan.

[Nota sa Ibaba]

[Mga Ritrato sa pahina 30, 31]

An Kristianang agom asin ina nagpapaheling nin magayon na espirituwal na mga kualidad kun inootob an itinao nin Dios na mga responsibilidad nia