Bareta kan mga Parabalangibog kan Kahadean
An Latvia Naghihimate sa Maogmang Bareta
MALINAW na ipinaheheling kan Biblia na kabotan nin Dios na “an gabos na klase nin tawo makaligtas asin makaabot sa tamang kaaraman sa katotoohan.” (1 Timoteo 2:4) An mga tawong dai nagkaoportunidad sa laog nin dakol na taon na madangog an maogmang bareta nakadadangog na kaiyan ngonyan! Sa Latvia, arog sa ibang parte kan kinaban, an mga tawo na laen-laen an edad asin kamugtakan naghihimate sa mensahe, siring kan ipinaheheling kan minasunod na mga eksperyensia.
• Sa Rezekne, sarong banwaan sa sirangan na Latvia, may sarong ina asin daragitang aki kaini na naghapot nin direksion sa sarong babae sa may tinampo. Pakataoha sa sainda kan impormasyon, an babae, na saro palan sa Mga Saksi ni Jehova, inimbitaran sinda sa mga pagtiripon kan mga Saksi.
Palibhasa pareho relihiosa an mag-ina, nagdesisyon sindang magduman sa pagtiripon. Mantang paduman, nagkasundo sinda na kun may maheling sindang bakong tama duman, sinda tolos-tolos na mahale. Minsan siring, interesanteng marhay an pagtiripon kaya dai na lamang ninda naisipan na humale. Inako ninda an alok na mag-adal sa Biblia asin nagpoon na mag-atender nin regular sa mga pagtiripon. Sa laog sana nin tolong bulan, nagpahayag sinda nin pagmawot na umiba sa paghuhulit asin nag-aantisipar na mabautismohan.
• Sa sarong siudad sa solnopan na Latvia, natagboan nin sarong Saksi an 85 anyos na si Anna, na nagpaheling nin tunay na interes asin nag-ako nin pag-adal sa Biblia. Kontrang marhay an saiyang aking babae asin ibang miembro kan pamilya. Alagad dai iyan tinogotan ni Anna ni an saiyang halangkaw nang edad asin maluyang salud na makaolang sa saiya na ipadagos an saiyang pag-adal sa Biblia.
Sarong aldaw, sinabihan ni Anna an saiyang aking babae na sia mapabautismo na. “Kun mabautismohan kamo, ilalaog ko kamo sa klinika sa pag-ataman sa mga gurang asin may helang,” an simbag kan aking babae ni Anna. Minsan siring, an patakot na ini dai nakapadesganar ki Anna. Huli sa saiyang kamugtakan sa pisikal, sia binautismohan sa saiyang harong.
Ano an reaksion kan aking babae ni Anna sa bagay na ini? Nagkaigwa nin pagbago sa puso, asin sia nagluto nin espesyal na pagkakan para sa saiyang ina pakatapos kan bautismo. Dangan hinapot nia an saiyang ina, “Ngonyan na bautisado na kamo, ano an pagmate nindo?” An simbag ni Anna? “Garo bagong mundag!”
• Kan Disyembre 1998, natagboan nin duwang Saksi an sarong retiradong opisyal sa armi kan dating Unyon Sobyet. Palibhasa nagtutubod sia sa sarong Kaglalang, nag-ako sia nin pag-adal sa Biblia, asin kan huri uminayon an saiyang agom. Sinda marikas na nag-oswag asin dai nahaloy nagin dai pa bautisadong parahayag. Kan sumunod na tig-init, an dating opisyal nabautismohan. An dakulang pagkamoot sa espirituwal na mga bagay kan mag-agom na ini nagparigon sa boot kan gabos sa kongregasyon. Dugang pa, nagtrabaho sinda mismo sa pagparemodel nin sarong lokal na istaran na magin sarong magayon na Kingdom Hall.