Taano ta Magpapakasal Pa?
An pagsasaro na dai nagpakasal biyo nang inako sa dakol na lugar, alagad iyan daw nagbubunga nin orog na kaogmahan ki sa pagpakasal? An kabaretaan kan “Magmata!” sa Sweden nagpapaliwanag kan bagay na ini sa minasunod na tolong artikulo.
SI Jan asin Anna nagkamidbidan sa sarong club. Nagkagustohan tolos sinda. Si Anna bago pa sanang humale sa harong kan saiyang mga magurang tanganing mag-istar nin solo. Si Jan may kaibang saro pang soltero sa harong. Sarong banggi, dai pa nahahaloy poon kan magkamidbidan sinda, si Jan nag-iba ki Anna sa saiyang apartment. Duman na sia nagtorog. Kan sumunod na aldaw dinara ni Jan an saiyang gitara asin sipilyo asin duman giraray nagtorog. Diit-diit idinakit nia an gabos niang kasangkapan sa apartment ni Anna, asin nagpoon na sindang magsaro. Si Jan asin Anna dai nakamate na kaipuhan sindang magpakasal.
Kapareho ni Jan asin Anna, an minilyon na laen-laen an edad nagsasaro na dai nagpapakasal. Sinda nangangatanosan: Taano ta mapakasal pa? Puwede kaming magsaro nin mas marahay na mayo nin kapidaso nin papel na nagseserbing legal na bogkos—an lisensia sa kasal.
An totoo, sa dakol na lugar an pagsasaro na dai nagpakasal biyo nang inako na normal. Halimbawa, sa Sweden an bilang nin mga kasal buminaba nin haros 40 porsiento sa nakaaging duwang dekada. Kaidtong beinte anyos na an nakaagi, mga saro sa kada walong aki sa nasyon na iyan an ipinangangaki nin inang dai kasal. Ngonyan an kabilangan sa pag-oltanan nin saro sa kada tolo asin saro sa kada duwa. An komento kan parasiyasat na si J. Trost sa Uppsala University, Sweden: “Sono sa aram mi ini an pinakahalangkaw na kabilangan nin mga aki sa luwas na nabaretaan sa sarong industriyalisadong sosyedad.”
Sa Denmark, an pagsasaro na dai kasal nagrerepresentar sa ordinaryong pamilya para sa hoben pang mga edukado sa kolehiyo, sono sa International Herald Tribune. An mga dai kasal na ini nagrerepresentar sa labi sa saro sa kada tolong nangangaki duman. “Haros mayo kami nin kamidbid na kinasal,” sabi nin sarong 31 anyos na Danes. “An gabos naglaog sa inaapod niamong daing papeles na kasal.”
An daing papeles na mga kasal na iyan nagdadakol man sa ibang nasyon. Halimbawa, sono sa bago pa sanang mga kabilangan na ilinuwas kan United States Census Bureau, mga duwang milyon na dai kasal sa Estados Unidos an nagsasaro, labing tolong doble sa kabilangan kan 1970.
Taano ta parateng ginugusto nin sarong lalaki asin babae na magsaro na dai nagpapakasal? An dai daw nin papeles na kasal arog karahay o mas marahay pa sa legal na kasal?