Hula ni Isaias—Liwanag Para sa Bilog na Katawohan II

Kapitulo Trese: “Magkurahaw Kamo sa Kagayagayahan na Durungan”!

Isaias 52:1-12

1. Taano ta sarong gikanan nin kagayagayahan an makahulang mga tataramon sa Isaias kapitulo 52, asin ano an duwang kaotoban kaini?

KATALINGKASAN! May maorog pa daw dian na magayagayang tinatanaw para sa sarong bihag na banwaan? Huling an katalingkasan asin pagbabalik sa dati mayor na tema sa libro nin Isaias, bakong makangangalas na apuera sa Awit, an librong ini sa Biblia may mas dakol na kapahayagan nin kagayagayahan kisa iba pang libro kaiyan. An Isaias kapitulo 52 espesyalmenteng nagtatao nin dahelan na maggayagaya an banwaan nin Dios. An makahulang mga tataramon kaiyan naotob sa Jerusalem kan 537 B.C.E. Asin igwa iyan nin mas dakulang kaotoban may labot sa “Jerusalem na nasa itaas,” an langitnon na organisasyon ni Jehova na kompuesto nin espiritung mga linalang, na kun beses ilinaladawan bilang ina asin agom na babae.​—Galacia 4:26; Kapahayagan 12:1.

“Sulotan an Saimong Kakosogan, O Sion!”

2. Noarin mamata an Sion, asin paano ini mangyayari?

² Si Jehova, paagi ki Isaias, nangangapodan sa Saiyang namomotan na siudad, an Sion: “Pagmata, pagmata, sulotan an saimong kakosogan, O Sion! Sulotan an saimong magagayon na gubing, O Jerusalem, an banal na siudad! Huli ta dai na noarin man madigdi sa saimo an dai tinuri asin marigsok. Pamagpag kan kabokabo, buhat, tukaw, O Jerusalem. Hubada an mga gapos sa saimong liog, O bihag na aking babae nin Sion.” (Isaias 52:​1, 2) Huli ta pinaanggot si Jehova kan mga nag-iistar dian, an Jerusalem gaba sa laog nin 70 taon. (2 Hade 24:4; 2 Cronica 36:15-21; Jeremias 25:8-11; Daniel 9:2) Panahon na ngonyan na magmata sia sa halawig na pagkadaing ginigibo asin magsulog nin magayon na gubing nin katalingkasan. Pinahiro ni Jehova an puso ni Ciro na butasan an “bihag na aking babae nin Sion” tangani na an mga dating nag-iistar sa Jerusalem asin an saindang mga aki makahale sa Babilonya, makapuli sa Jerusalem, asin ikabalik an tunay na pagsamba. Dai dapat manompongan sa Jerusalem an mga bakong turi asin maati.​—Esdras 1:1-4.

3. Taano ta maaapod na “aking babae nin Sion” an kongregasyon nin linahidan na mga Kristiano, asin sa anong sentido sinda pinatalingkas?

³ An mga tataramon na ini ni Isaias naotob man sa Kristianong kongregasyon. Ikalaladawan an kongregasyon kan linahidan na mga Kristiano bilang “aking babae nin Sion” sa presenteng aldaw, huling an “Jerusalem na nasa itaas” an saindang ina.a Huling pinatalingkas na sa paganong katokdoan asin apostatang mga doktrina, an mga linahidan dapat na papagdanayon an malinig na kamugtakan sa atubangan ni Jehova, bakong paagi sa pagigin turi sa laman, kundi paagi sa pagigin turi sa saindang puso. (Jeremias 31:33; Roma 2:25-29) Kaiba digdi an pagdadanay na malinig sa espirituwal, mental, asin moral sa atubangan ni Jehova.​—1 Corinto 7:19; Efeso 2:3.

4. Minsan ngani dai noarin man sinuway si Jehova kan “Jerusalem na nasa itaas,” anong mga eksperyensia kan saiyang mga representante sa daga an nakakaagid kan naeksperyensiahan kan suanoy na mga nag-iistar sa Jerusalem?

⁴ Totoo, dai noarin man nakisuway ki Jehova an “Jerusalem na nasa itaas.” Minsan siring, durante kan enot na guerra mundial, an saiyang mga representante sa daga​—an linahidan na mga Kristiano​—dai tinutuyong linapas an ley ni Jehova huli ta dai ninda nasabotan nin tama an tunay na Kristianong neutralidad. Nawaran kan pag-oyon nin Dios, sinda napasa espirituwal na pagkabihag sa “Dakulang Babilonya,” an pambilog na kinaban na imperyo nin falsong relihion. (Kapahayagan 17:5) An saindang kaoripnan nakaabot sa kulminasyon kan Hunyo 1918 kan ibilanggo an walong tawohan kan Watch Tower Society huli sa falsong mga sahot, kaiba an pagkasapakat. Kan panahon na idto haros napondo an organisadong paghuhulit kan maogmang bareta. Minsan siring, kan 1919 pinaluwas an makosogon na pangapodan na magin puka sa espirituwal. Pinonan kan linahidan na mga Kristiano na orog na biyong isiblag an saindang sadiri sa moral asin espirituwal na pagkamaati kan Dakulang Babilonya. Sinda nagbangon hale sa kabokabo nin pagkabihag, asin an “Jerusalem na nasa itaas” nagkaigwa kan kagayonan nin sarong “banal na siudad” na daing lugar an pagkamaati sa espirituwal.

5. Taano ta lubos an deretso ni Jehova na balukaton an saiyang banwaan na dai nagtatao nin ano man na bayad sa mga nambihag sa sainda?

⁵ Pareho kaidtong 537 B.C.E. asin kan 1919 C.E., lubos an deretso ni Jehova na patalingkason an saiyang banwaan. Ipinaliliwanag ni Isaias: “Iyo ini an isinabi ni Jehova: ‘Kamo ipinabakal na daing halaga, asin mayo man nin pirak na kamo babalukaton.’ ” (Isaias 52:3) An suanoy na Babilonya ni an Dakulang Babilonya dai nagbayad nin ano man kan oriponon ninda an katipan na banwaan nin Dios. Huling mayong ginibong transaksion na imbuelto an kuarta, si Jehova pa man giraray an legal na Kagsadiri kan saiyang banwaan. Maninigo daw siang magsaboot na sia may utang sa kiisay man? Siempre dai. Sa duwang kamugtakan na iyan, tama sanang balukaton ni Jehova an mga nagsasamba sa saiya na dai nagtatao nin ano man na bayad sa mga nambihag sa sainda.​—Isaias 45:13.

6. Anong mga leksion sa kasaysayan an dai hinimate kan mga kaiwal ni Jehova?

⁶ Dai nakanood nin leksion sa kasaysayan an mga kaiwal ni Jehova. Mababasa niato: “Ini an sinabi kan Soberanong Kagurangnan na Jehova: ‘Sa Egipto naghilig an banwaan ko kan enot tangani na mag-erok duman bilang mga dayo; asin inapi man sinda kan Asiria na mayong dahelan.’ ” (Isaias 52:4) Inoripon kan Faraon nin Egipto an mga Israelita, na inimbitaran na mag-istar sa saiyang daga bilang mga bisita. Alagad linamos ni Jehova si Faraon asin an saiyang hukbo sa Dagat na Pula. (Exodo 1:11-14; 14:​27, 28) Kan humaon ni Hadeng Senaquerib nin Asiria an Jerusalem, ginadan kan anghel ni Jehova an 185,000 na soldados kan hade. (Isaias 37:33-37) Kaagid kaiyan, dai madudulagan kan suanoy na Babilonya ni kan Dakulang Babilonya an mga resulta kan pan-aapi sa banwaan nin Dios.

“An Sakuyang Banwaan Makakamidbid sa Sakuyang Ngaran”

7. Ano an nagin epekto kan pagkabihag kan banwaan ni Jehova sa saiyang ngaran?

⁷ An pagigin bihag kan banwaan ni Jehova may epekto sa saiyang ngaran, siring kan ipinaheheling kan hula: “ ‘Ngonyan, ano an interes ko digdi?’ an sabi ni Jehova. ‘Huli ta an sakong banwaan kinua na daing karibay. An mismong mga namamahala sa sainda padagos na nagkukurahaw,’ an sabi ni Jehova, ‘asin daing ontok, sa bilog na aldaw, an sakuyang ngaran pinaglalanghadan. Sa dahelan na iyan an sakuyang banwaan makakamidbid sa sakuyang ngaran, sa dahelan nganing iyan sa aldaw na iyan, huli ta ako an Saro na nagtataram. Uya! Ako nanggad.’ ” (Isaias 52:​5, 6) Ano an interes ni Jehova sa situwasyon na ini? Anong labot nia kun inooripon an Israel sa Babilonya? Si Jehova dapat na humiro huli ta dinarang bihag kan Babilonya an saiyang banwaan asin nagkurahaw laban sa sainda sa kapangganahan. An siring na pananagsag suminagkod sa dai paggalang kan Babilonya sa ngaran ni Jehova. (Ezequiel 36:​20, 21) Dai kaini nasabotan na an gabang kamugtakan kan Jerusalem dahel sa pagkaanggot ni Jehova sa saiyang banwaan. Imbes, ibinilang kan Babilonya an pagkabihag kan mga Judio na ebidensia na maluya an saindang Dios. Si Jehova inolog-olog pa ngani kan kaibang namamahala sa Babilonya na si Belsasar paagi sa paggamit kan mga lalagan na hale sa Saiyang templo sa sarong kapiestahan sa onra kan mga dios nin Babilonya.​—Daniel 5:1-4.

8. Paano trinatar an ngaran ni Jehova poon kan magadan an mga apostol?

⁸ Paano minaaplikar sa “Jerusalem na nasa itaas” an gabos na ini? Poon kan maestablisar an apostasiya sa tahaw kan naghihingakong mga Kristiano, masasabing “an ngaran nin Dios pinaglalanghadan dahel sa [sainda] sa tahaw kan mga nasyon.” (Roma 2:24; Gibo 20:​29, 30) An totoo, huli sa superstisyon an mga Judio sa kahurihurihi nagpoon na likayan an paggamit kan ngaran nin Dios. Dai nahaloy pagkagadan kan mga apostol, uminarog an apostatang mga Kristiano asin nagpondo sa paggamit kan personal na ngaran nin Dios. An apostasiya nagresulta sa pagkaestablisar kan Kakristianohan, sarong mayor na kabtang kan Dakulang Babilonya. (2 Tesalonica 2:​3, 7; Kapahayagan 17:5) An daing pakundangan na inmoralidad asin daing supog na pagkakasala sa dugo kan Kakristianohan nagdara nin katuyawan sa ngaran ni Jehova.​—2 Pedro 2:​1, 2.

9, 10. Anong mas hararom na pakasabot sa mga pamantayan ni Jehova asin sa saiyang ngaran an nakamtan kan katipan na banwaan nin Dios sa presenteng mga panahon?

⁹ Kan patalingkason kan Mas Dakulang Ciro, si Jesu-Cristo, an katipan na banwaan nin Dios sa pagkabihag sa Dakulang Babilonya kan 1919, orog nindang nasabotan an mga kahagadan ni Jehova. Lininig na ninda an saindang sadiri sa dakol na katokdoan kan Kakristianohan na hale sa paganismo bago kan mga Kristiano, arog baga kan Trinidad, inmortalidad kan kalag, asin daing sagkod na pasakit sa nagkakalayong impierno. Sa panahon na ini pinonan ninda na haleon sa saindang sadiri an gabos na gira kan Babilonikong impluwensia. Nasabotan man ninda an importansia kan pagpapadanay nin estriktong neutralidad mapadapit sa partidistang mga aktibidad kan kinaban na ini. Mawot pa ngani ninda na dalisayon an saindang sadiri sa ano man na kasalan sa dugo na tibaad nagibo nin nagkapira.

¹⁰ Mas ruminarom man an pakasabot kan mga lingkod nin Dios sa presenteng aldaw sa kahalagahan kan ngaran ni Jehova. Kan 1931 ginamit ninda an ngaran na Mga Saksi ni Jehova, sa siring hayagan nindang iinaanunsiar na sinusuportaran ninda si Jehova asin an saiyang ngaran. Dugang pa, paagi sa pagpublikar kan New World Translation poon kan 1950, ikinabalik kan Mga Saksi ni Jehova an ngaran nin Dios sa tamang lugar kaiyan sa Biblia. Iyo, minimidbid ninda an ngaran ni Jehova asin ipinamimidbid iyan sagkod sa kaporoporohi kan daga.

An “Nagdadara kan Maogmang Bareta”

11. Taano an kagsing na “An saimong Dios nagin hade na!” ta angay mapadapit sa mga pangyayari kan 537 B.C.E.?

¹¹ Ibinabalik ngonyan an satong atension sa Sion kan ini nasa gaba pang kamugtakan. Nagdadangadang an sarong mensahero na may darang maogmang bareta: “Abaang gayon sa ibabaw kan kabukidan kan mga bitis kan nagdadara nin maogmang bareta, kan nagbabalangibog nin katoninongan, kan nagdadara nin maogmang bareta dapit sa orog karahay, kan nagbabalangibog nin kaligtasan, kan nagsasabi sa Sion: ‘An saimong Dios nagin hade na!’ ” (Isaias 52:7) Kan 537 B.C.E., paano masasabing an Dios nin Sion nagin Hade na? Bako daw na si Jehova hade na kaidto pa? Tunay nanggad, sia an “Hade sa panahon na daing sagkod”! (Kapahayagan 15:3) Alagad an kagsing na “An saimong Dios nagin hade na!” angay sana huling an pagbagsak kan Babilonya asin an sa hadeng proklamasyon na itogdok liwat an templo sa Jerusalem asin ibalik an dalisay na pagsamba duman nagseserbing bagong kapahayagan kan pagkahade ni Jehova.​—Salmo 97:1.

12. Siisay an nangenot sa ‘pagdara kan maogmang bareta,’ asin paano?

¹² Kan kaaldawan ni Isaias, mayong indibiduwal o grupo nin mga indibiduwal na namidbid bilang “nagdadara kan maogmang bareta.” Pero ngonyan, midbid na kun siisay an paradara kan maogmang bareta. Si Jesu-Cristo an pinakanangongorog na mensahero nin katoninongan ni Jehova. Kan uya pa digdi sa daga, ihinulit nia an maogmang bareta na magkakaigwa nin pagpatalingkas sa gabos na epekto nin kasalan na minana ki Adan, kaiba an helang asin kagadanan. (Mateo 9:35) Ipinaheling ni Jesus an halimbawa nin kaigotan sa pagpahayag kan maogmang bareta na ini dapit sa orog karahay, na inaaprobetsaran an gabos na oportunidad na tokdoan an mga tawo manongod sa Kahadean nin Dios. (Mateo 5:​1, 2; Marcos 6:34; Lucas 19:1-10; Juan 4:5-26) Asin sinunod kan saiyang mga disipulo an saiyang halimbawa.

13. (a) Paano pinahiwas ni apostol Pablo an kahulogan kan pananaram na “Abaang gayon sa ibabaw kan kabukidan kan mga bitis kan nagdadara nin maogmang bareta”? (b) Taano ta masasabing ‘magayon’ an mga bitis kan mga mensahero?

¹³ Sa saiyang surat sa mga taga Roma, kinotar ni apostol Pablo an Isaias 52:7 tanganing itampok an importansia kan paghuhulit kan maogmang bareta. Nag-atubang sia nin sunod-sunod na hapot na nakapupukaw nin isip, kaiba an ‘Paano makadadangog an mga tawo kun mayong parahulit?’ Dangan sinabi nia: “Siring sa nasusurat: ‘Abaang gayon kan mga bitis kan mga nagpapahayag kan maogmang bareta nin marahay na mga bagay!’ ” (Roma 10:​14, 15) Sa siring pinahiwas ni Pablo an aplikasyon kan Isaias 52:​7, na ginagamit an plural na “kan mga” imbes na kan singular na “kan,” na minalataw sa orihinal na teksto kan Isaias. Inaarog si Jesu-Cristo, gabos na Kristiano mga mensahero kan maogmang bareta nin katoninongan. Paano nagin ‘magayon’ an saindang mga bitis? Si Isaias nagtataram na garo baga an parabareta padangadang sa Jerusalem hale sa haraning kabukidan nin Juda. Sa harayo, imposibleng maheling an mga bitis kan mensahero. Imbes, an atension digdi nasa mensahero, ta an mga bitis nagrerepresentar sa mensahero mismo. Kun paanong si Jesus asin an saiyang mga disipulo magayon na paghelingon para sa mga mahoyo kan enot na siglo, an mga Saksi sa presenteng panahon nakaoogma man na paghelingon para sa mga mapakumbaba na naghihimate sa panligtas-buhay na mensahe nin maogmang bareta.

14. Paano si Jehova nagin Hade na sa presenteng mga panahon, asin poon kasuarin ini iinanunsiar sa katawohan?

¹⁴ Sa presenteng mga panahon, kasuarin nagpoon na madangog an kurahaw na “An saimong Dios nagin hade na!”? Poon kan 1919. Kan taon na idto sa sarong kombension sa Cedar Point, Ohio, pinahiro ni J. F. Rutherford, an presidente kaidto kan Watch Tower Society, an mga nagdadangog sa saiya paagi sa pahayag na may titulong “Diskurso sa Katabang na mga Trabahador.” Ineenkaminar kan pahayag, na basado sa Isaias 52:7 asin Kapahayagan 15:​2, an gabos na presente na maghulit. Sa siring, an ‘magayon na mga bitis’ nagpoon na maheling sa “kabukidan.” An linahidan na mga Kristiano nguna dangan kan huri an kairiba ninda na “ibang karnero” maigot na ihinulit an maogmang bareta na si Jehova nagin Hade na. (Juan 10:16) Paano nagin Hade si Jehova? Ipinahayag nia giraray an saiyang pagkahade kan 1914 kan patukawon nia bilang Hade an saiyang Aki, si Jesu-Cristo, sa bagong establisaron na langitnon na Kahadean. Asin ipinahayag pa giraray ni Jehova an saiyang pagkahade kan 1919 kan patalingkason nia an “Israel nin Dios” sa Dakulang Babilonya.​—Galacia 6:16; Salmo 47:8; Kapahayagan 11:​15, 17; 19:6.

“An Saimong mga Bantay Kinosogan an Saindang Tingog”

15. Siisay an “mga bantay” na kinosogan an saindang tingog kan 537 B.C.E.?

¹⁵ Sinimbag daw an kurahaw na “An saimong Dios nagin hade na!”? Iyo. Isinurat ni Isaias: “Hinanyoga! An saimong mga bantay kinosogan an saindang tingog. Durungan sindang nagkukururahaw sa kagayagayahan; huli ta mata sa mata na maheheling ninda kun ibalik na ni Jehova an Sion.” (Isaias 52:8) Mayong literal na mga bantay an nakapuesto sa Jerusalem kaidtong 537 B.C.E. na maako sa enot na nagpuruling desterrado. An siudad binayaan na gaba sa laog nin 70 taon. (Jeremias 25:​11, 12) Kaya an “mga bantay” na kinosogan an saindang tingog seguradong iyo an mga Israelitang enot na nakadangog kan bareta mapadapit sa pagbabalik sa dati kan Sion asin nagkaigwa nin paninimbagan na ipaabot an bareta sa iba pang mga aki nin Sion. Kan maheling na itinao ni Jehova an Babilonya sa kamot ni Ciro kan 539 B.C.E., daing duda an mga bantay na pinatatalingkas na ni Jehova an saiyang banwaan. Kaiba kan mga naghimate sa saindang pangapodan, an mga bantay padagos na nagkukurahaw sa kagayagayahan, nin durungan, na ipinadadangog sa iba an maogmang bareta.

16. Siisay an naheheling kan mga bantay nin “mata sa mata,” asin sa anong sentido?

¹⁶ An listong mga bantay nagkaigwa nin dayupot, personal na relasyon ki Jehova, na naheheling sia nin “mata sa mata,” o atubangan, sabi ngani. (Bilang 14:14) An saindang dayupot na relasyon ki Jehova asin sa lambang saro nagtatampok sa saindang pagkasararo asin sa magayagayang kualidad kan saindang mensahe.​—1 Corinto 1:10.

17, 18. (a) Paano kinosogan kan grupong bantay sa presenteng aldaw an tingog kaini? (b) Sa anong sentido durungan na nangapodan an grupong bantay?

¹⁷ Sa presenteng aldaw na kaotoban, kinokosogan kan grupong bantay, “an fiel asin may diskresion na oripon,” an tingog kaini bako sanang sa mga nasa laog na kan naheheling na organisasyon nin Dios kundi siring man sa mga nasa luwas. (Mateo 24:45-47) Nagluwas an sarong pangapodan tanganing tiponon an mga natatada kan linahidan kan 1919, asin kan 1922 orog pang kinosogan an pangapodan sa kombension sa Cedar Point, Ohio, na may pakiolay na “ipaisi, ipaisi, ipaisi, an Hade asin an saiyang kahadean.” Poon kan 1935, itinao an atension sa pagtipon kan sarong dakulang kadaklan nin mga arog-karnero. (Kapahayagan 7:​9, 10) Sa nakaagi pa sanang mga taon orog na kuminosog an paisi manongod sa pagkahade ni Jehova. Paano? Kan taon 2000, mga anom na milyon an nakikikabtang sa pagpahayag kan pagkahade ni Jehova sa labing 230 kadagaan asin teritoryo. Dugang pa, An Torrengbantayan, an pangenot na instrumento kan grupong bantay, nagpapaabot kan magayagayang mensahe sa labing 130 lenguahe.

¹⁸ An pakikikabtang sa nakapagpapasararong gibohon na iyan nangangaipo nin kapakumbabaan asin pagkamoot sa tugang. Tanganing magin epektibo an pangapodan, dapat na ihulit kan gabos na kalabot an sasarong mensahe, na nagtatampok kan ngaran ni Jehova, kan saiyang probisyon na pantubos, kan saiyang kadonongan, kan saiyang pagkamoot, asin kan saiyang Kahadean. Mantang an mga Kristiano sa bilog na kinaban nagtatarabangan, napapakosog an saindang personal na relasyon ki Jehova tanganing durungan na ipaabot an nakaoogmang notisya.

19. (a) Paano nagin maogma an “mga gabang lugar sa Jerusalem”? (b) Sa anong sentido “ilinuwas ni Jehova an saiyang banal na takyag”?

¹⁹ Huling nagkukurahaw sa kagayagayahan an banwaan nin Dios, pati an lugar na pinag-eerokan ninda maogmang paghelingon. An hula nagpapadagos: “Mag-ogma kamo, magkururahaw kamo sa kagayagayahan na durungan, kamong mga gabang lugar sa Jerusalem, ta rinanga ni Jehova an saiyang banwaan; binalukat nia an Jerusalem. Ilinuwas ni Jehova an saiyang banal na takyag sa atubangan kan mga mata kan gabos na nasyon; asin an gabos na pagdolonan kan daga kaipuhan na makaheling sa pagliligtas kan satong Dios.” (Isaias 52:​9, 10) Kan dumatong an mga nagbaralik hale sa Babilonya, an mapungaw paghelingon na mga lugar sa gabang Jerusalem nagin masinggaya an itsura huling puede na ngonyan na ikabalik an dalisay na pagsamba ki Jehova. (Isaias 35:​1, 2) Malinaw nanggad, may labot si Jehova sa bagay na ini. ‘Ilinuwas nia an saiyang banal na takyag,’ na garo baga tinitikon nia an saiyang manggas tanganing andamon an saiyang sadiri sa gigibohon na pagliligtas kan saiyang banwaan.​—Esdras 1:​2, 3.

20. Ano an nagin resulta asin magigin resulta pa kan pagluwas ni Jehova kan saiyang banal na takyag sa presenteng mga panahon?

²⁰ Sa “huring mga aldaw” na ini, ilinuwas ni Jehova an saiyang banal na takyag tanganing buhayon an linahidan na natatada, an “duwang saksi” sa librong Kapahayagan. (2 Timoteo 3:1; Kapahayagan 11:​3, 7-13) Poon kan 1919, dinara an mga ini sa sarong espirituwal na paraiso, an espirituwal na kamugtakan ninda ngonyan kaiba kan minilyon nindang kairiba, an ibang karnero. Pag-abot nin panahon, iluluwas ni Jehova an saiyang banal na takyag tanganing iligtas an saiyang banwaan sa “Har-Magedon.” (Kapahayagan 16:​14, 16) Dangan, “an gabos na pagdolonan kan daga kaipuhan na makaheling sa pagliligtas kan satong Dios.”

Sarong Apuradong Kahagadan

21. (a) Ano an hinahagad sa mga “nagdadara kan mga kasangkapan ni Jehova”? (b) Taano ta mayong dahelan na matakot an mga Judio na pahale sa Babilonya?

²¹ An mga maluwas sa Babilonya tanganing bumalik sa Jerusalem kaipuhan na otobon an sarong kahagadan. Si Isaias nagsusurat: “Sumiblag kamo, sumiblag kamo, humale kamo dian, dai kamo dumotdot nin maating bagay; humale kamo sa tahaw nia, papagdanayon na malinig an saindong sadiri, kamo na nagdadara kan mga kasangkapan ni Jehova. Huli ta kamo maluwas na mayong pagkatakot, asin kamo mahale na bakong sa pagdulag. Huli ta si Jehova maeenot sa saindo, asin an Dios nin Israel iyo an saindong magigin bantay sa likod.” (Isaias 52:​11, 12) Dapat na bayaan sa Babilonya kan pahaleng mga Israelita an ano man na bagay na may digta nin falsong pagsamba sa Babilonya. Huling dara ninda an mga kasangkapan ni Jehova na hale sa templo sa Jerusalem, sinda dapat na magin malinig, bako sanang sa panluwas asin seremonyal na paagi, kundi sa pangenot sa saindang puso. (2 Hade 24:11-13; Esdras 1:7) Dugang pa, si Jehova maeenot sa sainda, kaya sinda dai kaipuhan na matakot, ni kaipuhan nindang tarantang dumalagan, na garo baga aabotan na sinda nin mga paha sa dugong naglalapag. An Dios nin Israel an saindang bantay sa likod.​—Esdras 8:21-23.

22. Paano idinoon ni Pablo an pangangaipo na magin malinig sa tahaw kan linahidan na mga Kristiano?

²² An mga tataramon ni Isaias manongod sa pagdanay na malinig may mayor na kaotoban sa mga aki kan “Jerusalem na nasa itaas.” Kan sadolon ni Pablo an mga Kristianong taga Corinto na dai makipagsakal na bakong timbang sa mga dai nagtutubod, kinotar nia an mga tataramon sa Isaias 52:11: “ ‘Kun siring humale kamo sa tanga ninda, asin sumuhay kamo,’ an sabi ni Jehova, ‘asin dai na kamo dumotdot sa maating bagay.’ ” (2 Corinto 6:14-17) Siring kan mga Israelita na papuli hale sa Babilonya, kaipuhan na biyong rayoan kan mga Kristiano an falsong pagsambang Babiloniko.

23. Sa anong mga paagi hinihingoa kan mga lingkod ni Jehova ngonyan na papagdanayon na malinig an saindang sadiri?

²³ Nangorognang totoo ini sa linahidan na mga parasunod ni Jesu-Cristo na nagdulag sa Dakulang Babilonya kan 1919. Gradwal nindang lininig an saindang sadiri sa gabos na gira nin falsong pagsamba. (Isaias 8:​19, 20; Roma 15:4) Paorog nin paorog man nindang nasabotan an importansia nin pagigin malinig sa moral. Minsan ngani dati nang sinusuportaran kan Mga Saksi ni Jehova an halangkaw na mga pamantayan sa moral, An Torrengbantayan nagpublikar nin mga artikulo kan 1952 na nagdodoon kan pangangaipo na disiplinahon an mga tawong inmoral tanganing magdanay na malinig an kongregasyon. Tinatabangan man kan siring na pagdidisiplina an nakagibo nin sala na marealisar an pangangaipo na magsolsol nin sinsero.​—1 Corinto 5:​6, 7, 9-13; 2 Corinto 7:8-10; 2 Juan 10, 11.

24. (a) Sa presenteng mga panahon, ano an “mga kasangkapan ni Jehova”? (b) Taano ta kompiado an mga Kristiano ngonyan na si Jehova padagos na maeenot sa sainda saka magigin bantay sa likod ninda?

²⁴ Determinado an linahidan na mga Kristiano kaiba an dakulang kadaklan nin ibang karnero na dai dumotdot sa ano man na bagay na maati sa espirituwal. An saindang dinalisay, malinig na kamugtakan nagkukualipikar sa sainda na magin mga paradara “kan mga kasangkapan ni Jehova”​—an mahalagang marhay na mga probisyon na itinatao nin Dios para sa sagradong paglilingkod sa ministeryo sa harong-harong asin pag-adal sa Biblia patin sa iba pang Kristianong aktibidad. Paagi sa pagpapadanay nin malinig na kamugtakan, an banwaan nin Dios ngonyan makakokompiar na si Jehova padagos na maeenot sa sainda saka magigin bantay sa likod ninda. Bilang malinig na banwaan nin Dios, may dakol na dahelan sinda na ‘magkurahaw sa kagayagayahan na durungan’!

[Nota sa Ibaba]