Maninigo daw Kamong Magin Miembro nin Sarong Iglesia?
‘DAI kaipuhan na ako magin miembro nin sarong iglesia o regular na magsimba tanganing maniwala sa Dios!’ Iyan an saboot nin dakol manongod sa pagigin miembro nin sarong iglesia o nin arin man na relihiosong organisasyon. Sa katunayan, may mga nagsasabi na namamatean ninda na mas harani sinda sa Dios kun nasa luwas sinda na ikinakaogma an naturalesa kisa kun nag-aatender sa sarong serbisyo relihioso sa simbahan. Ngonyan, lakop an opinyon na an pagigin miembro nin sarong relihiosong grupo o denominasyon dai na kaipuhan sa paniniwala sa Dios.
Minsan siring, an iba may laen na sinserong saboot. Sinasabi ninda na kaipuhan, mahalagang marhay ngani, an pagigin miembro nin iglesia asin pag-atender dian tanganing oyonan nin Dios an saro. Kaya an hapot na kun baga kaipuhan talaga an pagigin miembro nin relihion bako sanang sarong bagay na pinagkakainteresan sa estadistika o akademiko. Sa paano man, mantang kalabot an satong relasyon sa Dios, bako daw na makatanosan na aramon an pagmansay nin Dios sa mga bagay na iyan? Kun siring, ano an manonodan niato sa saiyang Tataramon, an Biblia, dapit sa temang ini?
Kun Paano Trinatar nin Dios an mga Tawo kan Nakaagi
Haros 4,400 na taon na an nakaagi, sarong kapahapahamak na baha an suminanop sa bilog na daga. An siring na pangyayari dai basta-basta malilingawan, asin an mga tawo sa bilog na kinaban may mga estorya manongod dian sa saindang enot na kasaysayan. Maski nagkakalaenlaen sa mga detalye, an mga estoryang ini dakol nin pagkakapareho, kaiba an detalye na pira sanang katawo asin nagkapirang hayop an nakaligtas.
An mga nakaligtas daw sa Baha mga indibiduwal sana na nagkanorongod sanang mapalad na nakaligtas sa pagkalaglag? Ipinapaheling kan pagkasaysay sa Biblia na bakong arog kaini an nangyari. Makahulogan nanggad na dai pinaisi nin Dios an lambang indibiduwal manongod sa maabot na Baha. Imbes, sinabihan nia si Noe, na iyo man an nagpatanid sa saiyang mga katemporanyo manongod sa nagdadangadang na Delubyo.—Genesis 6:13-16; 2 Pedro 2:5.
An pagkaligtas nakadepende sa pagigin kabtang kan urugos na grupong ini asin sa pagigin andam na akoon an instruksion nin Dios na itinao ki Noe. Dawa an mga hayop sa dahong nakaligtas sa Baha huli sa pag-iba sa grupong ini. Tinawan nin klarong mga instruksion si Noe na gumibo nin tamang mga areglo tanganing maingatan na buhay an mga hayop.—Genesis 6:17–7:8.
Pakalihis nin dakol na siglo, an mga gikan ni Noe paagi sa saiyang aki na si Sem napasairarom sa kaoripnan sa Egipto. Pero, katuyohan nin Dios na patalingkason sinda asin darahon sinda sa daga na ipinanuga nia sa apoon nindang si Abraham. Sa giraray, ini dai ihinayag sa lambang indibiduwal kundi enot na ihinayag sa mga pinili na magin mga namomoon sa sainda—ki Moises asin sa tugang niang si Aaron. (Exodo 3:7-10; 4:27-31) Pakatapos na an dating mga oripon kaldahon bilang sarong grupo hale sa Egipto, itinao sa sainda an Ley nin Dios sa Bukid nin Sinai asin inorganisar sinda bilang nasyon nin Israel.—Exodo 19:1-6.
Nagin posible an pagkakalda kan indibiduwal na mga Israelita huli sana ta asosyado sinda sa sarong grupo na inestablisar nin Dios asin nagsunod sa instruksion kan ninombrahan na mga namomoon kan grupong ini. May ginibo pa nganing mga probisyon tanganing an indibiduwal na mga Egipcio makaasosyar sa grupong ini na malinaw na inooyonan nin Dios. Kan maghale an mga Israelita sa Egipto, an mga indibiduwal na ini uminiba sa sainda, sa siring ilinilinya an sadiri ninda sa mga magkakamit kan bendisyon nin Dios.—Exodo 12:37, 38.
Dangan, kan enot na siglo, pinonan ni Jesus an saiyang paghuhulit, na tinitipon an mga tawo bilang saiyang mga disipulo. Trinatar nia sinda bilang sarong grupo, minsan ngani tinatawan nia man nin mamomoton na atension an mga indibiduwal oyon sa mga pangangaipo ninda. Sinabi ni Jesus sa 11 fiel na apostol: “Kamo an mga nakidamay sa sako sa mga pagbalo sa sako; asin ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean.” (Lucas 22:28, 29) Kan huri, an banal na espiritu nin Dios naghilig sa mga disipulo kan sinda magkairibanan bilang sarong grupo.—Gibo 2:1-4.
Malinaw nanggad na ipinapaheling kan mga halimbawang ini na kan nakaagi an banwaan nin Dios pirmeng tinatratar nia bilang sarong organisadong grupo. Sa katunayan, an pira sanang indibiduwal na tinawan nin Dios nin personal na pagtratar—si Noe, Moises, Jesus, asin iba pa—ginamit Nia tanganing makikomunikar sa sarong dayupot na magkairibahan na grupo. Daing rason na maniwala na iba na an pagtratar nin Dios sa saiyang mga lingkod ngonyan. Siempre, nagpapalataw ini nin saro pang hapot: Igo na daw an pagigin miembro nin maski anong relihiosong grupo? Totokaron niato an mahalagang marhay na hapot na ini sa masunod na artikulo.
[Ritrato sa pahina 4]
Haloy nang tinatratar nin Dios an saiyang banwaan bilang sarong organisadong grupo