Paglaom sa Tahaw nin Pagkadesesperar—Asamblea sa Sarong Kampo nin mga Dulag
AN KAMPO nin mga dulag sa Kakuma yaon sa amihanan na kabtang kan Kenya, harani sa linderos nin Sudan. Labing 86,000 katawo an nakaistar dian. Mara an lugar na iyan, na may temperatura na minaabot sa 50°C kun aldaw. Lakop an kadahasan sa pag-oltanan kan mga komunidad na napiritan na humale sa saindang sadiring lugar. Para sa dakol, an kampo sarong lugar nin pagkadesesperar. Minsan siring, an iba igwa nin paglaom.
Kabilang sa mga dulag an nagkapirang Saksi ni Jehova, na maigot na nagpapahayag kan maogmang bareta kan Kahadean. Kabtang sinda nin sarong sadit na kongregasyon sa Lodwar, 120 kilometros patimog. An masunod na kongregasyon walong oras na pagmaneho an rayo.
Mantang an mga dulag dai puedeng magbiahe sa luwas kan kampo, dakol an dai nakakaatender sa mga asamblea asin kombension na ginigibo kan Mga Saksi ni Jehova. Huli kaini, ginibo an areglo na magkaigwa nin sarong aldaw nin espesyal na asamblea sa laog kan kampo.
Pagbiahe Paamihanan
Tanganing sumuportar sa asamblea, 15 Saksi sa banwaan nin Eldoret, na 480 kilometros sa timog kan kampo, an nagboluntaryong gibohon an masakit na pagbiahe pasiring sa marang rehion sa amihanan, kaiba an sarong inaadalan sa Biblia na nag-alok na ipagamit an saiyang sadit na auto asin an tsuper kaini. An odok sa pusong pagmawot ninda iyo an parigonon an boot kan saindang mga tugang asin pakosogon sinda.
An pagbiahe nagpoon sa malipot na amay na aga sa mabukid na lugar sa solnopan na Kenya. An maantal na tinampo patukad sa mga oma asin kadlagan bago lumugsad sa mainit na desierto nin mga palongpong. An mga aripompon nin mga kanding asin kamelyo nagsasabsab sa dai nakakasustentong daga. An mga miembro nin tribo nag-aaragi na nakasulot nin tradisyonal na gubing, na an dakol may darang mga pamukpok, busog, asin pana. Pagkatapos magbiahe nin 11 oras, an mga Saksi nakaabot sa Lodwar, sarong mainit asin maalpog na komunidad nin haros 20,000 katawo. Pagkatapos na maogmang sabaton kan mga Saksi na maistimar sa sainda, an mga nagbiahe nagpahingalo tangani na magin andam sinda para sa pano nin aktibidad na katapusan kan semana.
Kan sumunod na aga, an mga bisita nagduman sa mga pasyaran sa lugar na iyan. Dapat na mapasyaran an Danaw nin Turkana, na pinakadakula sa Kenya. Napapalibotan nin kilo-kilometrong desierto nin mga palongpong, yaon dian an pinakadakol na buaya sa bilog na kinaban. An tubig na may alkaline nakakatabang sa pagsuportar sa pirang tawo na nakaistar sa gilid kan baybayon kaiyan. Kan banggi naogma an mga bisita sa pag-atender sa Teokratikong Paadalan sa Pagmiministro asin Pagtiripon sa Paglilingkod kaiba kan lokal na kongregasyon. Igwa sindang magayon na Kingdom Hall, na itinogdok kan 2003 paagi sa programa sa pagtogdok kan mga Saksi para sa mga nasyon na may limitadong kuarta.
An Aldaw nin Espesyal na Asamblea
An Domingo itinagama para sa aldaw nin espesyal na asamblea. An Kongregasyon nin Lodwar asin an bisitang mga tugang tinawan nin permiso na makalaog sa kampo pag-alas 8:00 nin aga, kaya an mga Saksi galagang makapoon nin amay. An tinampo pakurukurbada sa alang na daga pasiring sa linderos nin Sudan. May garanggasangon na kabukidan na labaw sa tinampo. Naabot na an baryo nin Kakuma. Nag-ooran asin an daga na tinampo pasiring sa kampo binaha sa nagkapirang lugar. An kadaklan na harong gibo sa ladrilyong laboy na may atop na sim o trapal. An mga grupo nin mga taga Etiopia, Somalia, Sudan, asin iba pa may kanya-kanyang iniistaran na lugar. An mga nagbiahe entusiastikong tinaratara kan mga dulag.
An asamblea ginibo sa sarong training center. An mga drowing sa lanob ilinaladawan an nakakakubhan na sakit kan buhay bilang dulag, alagad an espiritu sa tiriponan kan aldaw na iyan mahehelingan nin paglaom. An kada pahayag itinatao sa Ingles asin Swahili. An nagkapirang ispiker na matibay magtaram sa duwang lenguaheng iyan iyo na ngani mismo an nag-interpretar kan pahayag ninda. Sarong dulag na tugang na lalaki hale sa Sudan an nagtao kan enot na pahayag na, “Pagsiyasat sa Satong Piguratibong Puso.” An ibang kabtang itinao kan nagdadalaw na kamagurangan.
Sarong espesyal na tampok na kabtang kan kada asamblea an bautismo. Sa pagtatapos kan diskurso sa bautismo, an gabos nakaheling sa sasarong kandidato kan sia tumindog. Si Gilbert nagdulag kaiba kan saiyang ama hale sa tinuboan nindang nasyon durante kan paglaglag sa sarong rasa kan 1994. Kan primero, nag-aasa sinda na makanompong nin ligtas na lugar sa Burundi, alagad dai nahaloy naaraman ninda na nasa peligro pa man giraray sinda. Nagdulag si Gilbert pa-Zaire, dangan sa Tanzania—na kun beses nagtatago sa kadlagan—asin sa katapustapusi sa Kenya. Dakol an napaluha kan akoon sia kan ispiker bilang sarong tugang sa kongregasyon. Nagtitindog sa atubangan kan sadit na katiriponan nin 95 katawo, sinimbag ni Gilbert sa malinaw asin may kompiansang “Ndiyo!”—na “Iyo!” sa Swahili—an duwang hapot sa saiya kan ispiker. Sia asin an iba pang tugang mano-manong nagkalot nin sadit na pagbabautismohan asin hinapinan iyan kan trapal na dating atop kan sadiri niang istaran sa kampo. Pinapatunayan na gustong-gusto niang magpabautismo, kan aga man sanang idto nagsakdo sia gamit an sarong timba asin solo niang pinano nin tubig an pagbabautismohan!
An saro sa tampok na kabtang kan panhapon na sesyon iyo an pagsaysay nin mga eksperyensia manongod sa napapalaen na situwasyon kan dulag na mga Saksi. An sarong tugang na lalaki nagpaliwanag kun paano nia dinolok an sarong lalaki na nagpapahingalo sa sirong nin sarong kahoy.
“Sa heling nindo, ligtas daw sa gabos na panahon na tumukaw sa sirong nin sarong kahoy?”
“Iyo,” an simbag kan lalaki. Dangan idinugang nia, “Alagad bako, bako kun banggi.”
Binasa kan tugang sa saiya an Miqueas 4:3, 4: “Sinda totoong magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda.” “Aram nindo,” an paliwanag nia, “sa bagong kinaban nin Dios, magigin ligtas na iyan sa gabos na panahon.” Inako kan lalaki an sarong pantabang sa pag-adal sa Biblia.
Sarong tugang na babae na nagbiahe pasiring sa Kakuma an nagadanan kasuarin pa sana nin tolong dayupot na miembro nin pamilya. Sa pagkomento manongod sa mga tugang sa kampo, sia nagsabi: “Masakit na marhay an kamugtakan sa lugar na ini; pero, napagdanay nindang makosog an saindang pagtubod. Nakaistar sinda sa sarong mamondong lugar, alagad maogma sindang naglilingkod ki Jehova. Sinda may matoninong na relasyon sa Dios. Naparigon an boot ko na papagdanayon an matoninong na relasyon ki Jehova asin paglingkodan sia. Mayo nanggad akong dapat na ireklamo!”
Garo madalion sanang natapos an aldaw nin asamblea. Sa pantapos na pahayag, idinoon kan ispiker na igwa nin mga representante hale sa walong laen-laen na nasyon. An saro sa mga dulag na Saksi nagkomento na an asambleang ini ebidensia kan pagkasararo asin pagkamoot sa tahaw kan mga Saksi ni Jehova sa sarong nababangang kinaban. Nasa sainda an tunay na Kristianong kasararoan nin magturugang.—Juan 13:35.
[Kahon/Ritrato sa pahina 25]
AN NAWAWARANG MGA AKING LALAKI KAN SUDAN
Poon sa kapinonan kan guerra sibil sa Sudan kan 1983, limang milyon katawo an nawaran kan saindang mga istaran. Kabilang sa sainda an mga 26,000 na aki, na napasuway sa saindang mga pamilya. Rinibo sa sainda an duminulag sa mga kampo nin mga dulag sa Etiopia, kun saen sinda nagdanay sa laog nin mga tolong taon. Napiritan na bumalyo giraray, naglakaw sinda sa laog nin sarong taon pabalik na nangaragi sa Sudan pasiring sa amihanan na Kenya, na pinerwisyo nin mga soldados, tulisan, helang, asin layas na mga hayop. Kabanga sana sa mga aki an nakaligtas sa masakit na pagbaklay na ini, na sa kahurihurihi iyo an nagin nukleo kan kampo sa Kakuma. Para sa mga ahensia sa pag-ayuda, sinda inapod na an nawawarang mga aking lalaki kan Sudan.
An kampo nin mga dulag sa Kakuma saro na ngonyan na multinasyonal na istaran para sa mga dulag hale sa Sudan, Somalia, Etiopia, asin iba pang nasyon. Pag-abot sa kampo, an sarong dulag tatawan nin nagkapirang kaipuhan na materyales para sa pagtogdok nin istaran asin trapal para sa atop. Duwang beses sa sarong bulan, an kada dulag tinatawan nin mga 6 na kilong harina, 1 kilong monggo, asin kadikit na lana saka asin. Iriniribay kan dakol na dulag an nagkapira sa itinatao sa sainda tanganing makakua kan iba pang pangangaipo.
An nagkapira sa nawawarang mga aking ini nakaibanan na liwat an saindang mga pamilya o nagbalyo na nin istaran sa ibang nasyon. Alagad oyon sa Opisina sa Pagbalyo kan mga Dulag, “rinibo pa an nagdadanay sa maalpog, malangaw na kampo nin mga dulag sa Kakuma, kun saen kaipuhan nindang maglapigot sa paghanap nin kakanon asin magmaigot na marhay tanganing makapag-eskuela.”
[Credit Line]
Sa karahayan nin boot kan Refugees International
[Mapa sa pahina 23]
(Para sa aktuwal na format, hilingon an publikasyon)
KENYA
Kampo sa Kakuma
Danaw nin Turkana
Lodwar
Eldoret
Nairobi
[Ritrato sa pahina 23]
Masakit an kamugtakan nin buhay sa kampo
[Ritrato sa pahina 23]
Irinarasyon an tubig sa kampo sa Kakuma
[Ritrato sa pahina 23]
Ginibo kan mga Saksi na taga Kenya an masakit na pagbiahe paamihanan tanganing parigonon an boot kan saindang mga tugang
[Ritrato sa pahina 24]
Sarong misyonero na nag-iinterpretar nin pahayag kan lokal na espesyal payunir
[Ritrato sa pahina 24]
Pagbabautismohan
[Picture Credit Line sa pahina 23]
Pagrasyon nin tubig asin Kampo nin mga Dulag sa Kakuma: Sa karahayan nin boot kan Refugees International