An Ritual na Pagkarigos kan mga Judio—Dian daw Naggikan an Bautismo?

SI Juan na Bautisador naghulit nin “bautismo bilang simbolo nin pagsolsol.” Pinagbotan man ni Jesus an saiyang mga parasunod na gumibo nin mga disipulo asin bautismohan sinda.—Marcos 1:4; Mateo 28:19.

Ipinaparisa kan Biblia na an Kristianong bautismo nagkakaipo nin biyong pagladop sa tubig. “An kaagid na mga seremonya,” an sabi kan librong Jesus and His World, “maoobserbaran sa dakol na relihion, kan nakaagi asin sa presente, sa dakol na laen-laen na nasyon asin kultura.” An libro positibong nagsasabi na “an mga ginikanan nin Kristianong bautismo . . . manonompongan sa Judaismo.” Gurano katotoo an paghihingakong ini?

Panritual na mga Karigosan kan mga Judio

An mga arkeologo na nagkokotkot harani sa Patongtongan kan Templo sa Jerusalem nakadiskobre nin haros 100 na banyong panritual, o karigosan (bathing pool), na kaidto pang enot na siglo B.C.E asin enot na siglo C.E. An sarong inskripsion sa sinagoga na kaidto pang ikaduwa o ikatolong siglo C.E. nagsasabi manongod sa siring na mga banyo na ipinapagamit sa “mga bisita na nangangaipo kaiyan.” An ibang mga karigosan nanompongan sa distrito nin Jerusalem na dating inistaran kan mayayaman asin mga pamilya nin mga saserdote; haros lambang harong igwa nin sadiri kaiyan na pribadong banyong panritual.

An mga banyo mga tangkeng rektanggulo na linabra gikan sa darakulang gapo o kinotkot sa daga asin pinalibotan nin ladrilyo o gapo. An mga iyan pinalitadahan tanganing dai malabot. An kadaklan kaini may lakbang na mga 1.8 metros asin laba na 2.7 metros. An tubig-oran dinadara kan mga pasulogan pasiring sa mga tangke. An tubig kisuerra 1.2 metros an rarom tanganing biyo an pagladop paagi sa pagduko. An mga hagyan pababa sa tubig kun beses igwa sa tahaw nin sarong hababang partision. Pinaghohona na an sarong lado kan mga hagyan ginamit sa paglaog pasiring sa nakakadalisay na banyo, kun an nagkakarigos maati, asin an ibong na lado bilang luwasan, tanganing malikayan an ano man na pagkaolakit.

Ginamit an mga banyo may koneksion sa Judiong ritual sa kadalisayan. Ano an nagin kalabot digdi?

An Ley Asin Tradisyon sa Pagkarigos

Idinoon kan Ley ni Moises an pangangaipo para sa banwaan nin Dios na magin malinig, sa espirituwal sagkod sa pisikal. An mga Israelita nagigin maati sa laen-laen na paagi na huli kaiyan kaipuhan nindang dalisayon an saindang sadiri paagi sa pagkarigos kan saindang hawak asin paglaba kan saindang gubing.—Levitico 11:28; 14:1-9; 15:1-31; Deuteronomio 23:10, 11.

Si Jehova Dios biyong dalisay asin banal. Kaya nagin kahagadan sa mga saserdote asin Levita, na may padusang kagadanan kun dai ninda gigibohon iyan, na maghugas kan saindang mga kamot asin bitis bago dumolok sa saiyang altar.—Exodo 30:17-21.

Naniniwala an mga nag-espesyalisar na kan enot na siglo C.E., itinao sa mga bakong Levita kan Judiong establisimiento nin relihion an mga kahagadan para sa paglinig kan mga saserdote. Isinagibo kan mga Eseno sagkod Fariseo an dayaday na ritual na mga paghugas. An sarong reperensia nagsasabi mapadapit kan panahon ni Jesus: “Kahagadan para sa sarong Judio an ritual na kadalisayan bago lumaog sa Patongtongan kan Templo, bago mag-atang, bago mag-ako kan pakinabang sa dolot nin saserdote asin para sa iba pang kaagid na mga katuyohan.” An mga teksto sa Talmud nagsasabi na linalaoman na an mga nagkakarigos biyong maladop.

Krinitikar ni Jesus an mga Fariseo huli sa pag-insistir ninda kan ritual na paglinig. Malinaw na nagsagibo sinda nin “laen-laen na bautismo,” kaiba na an para sa “mga kopa asin pitsel patin lalagan na tanso.” Sinabi ni Jesus na linapas kan mga Fariseo an mga togon nin Dios tanganing ipaotob an saindang sadiring mga tradisyon. (Hebreo 9:10; Marcos 7:1-9; Levitico 11:32, 33; Lucas 11:38-42) Mayong kabtang kan Ley ni Moises an naghagad nin biyong pagladop kan hawak.

An Kristianong bautismo daw naggikan sa ritual na pagkarigos na ginibo kan mga Judio? Dai!

Ritual na Pagkarigos Asin Kristianong Bautismo

Nagsagibo an mga Judio nin mga seremonya sa paglinig sa saindang sadiri. Pero, an bautismo na isinagibo ni Juan bakong an klase nin ritual na pagkarigos na pamilyar sa mga Judio. Ipinaparisa kan bagay na si Juan namidbid bilang Bautisador na laen an pagladop na saiyang ginibo. An Judiong mga lider nin relihion nagsugo pa ngani nin delegasyon sa saiya tanganing maghapot: “Taano ta nagbabautismo ka?”—Juan 1:25.

An paglinig na kahagadan kan Ley ni Moises kaipuhan na orootrohon kada magin maati an parasamba. Ini bakong totoo sa ginibong bautismo ni Juan ni kan ginibo sa huri kan mga Kristiano. An bautismo ni Juan nagpaparisa nin pagsolsol asin pagsikwal sa dating pamumuhay. An Kristianong bautismo nagsimbolisar kan katunayan na an sarong tawo nagdusay kan saiyang sadiri sa Dios. Ginibo iyan kan Kristiano nin sarong beses, bakong paorootro.

An ritual na pagkarigos na ginibo sa mga harong kan Judiong mga saserdote asin sa pampublikong mga banyo na harani sa Patongtongan kan Templo nagpapaheling sana nin hababaw na pagkakaagid sa Kristianong bautismo. An kanya-kanyang kahulogan kan mga pagladop na ini biyong magkalaen. An The Anchor Bible Dictionary nagsasabi: “Nagkakaoroyon an kadaklan na intelektuwal na dai sinalidahan o inadaptar ni Juan [na Bautisador] an ano man na partikular na bautismo sa saiyang palibot,” an boot sabihon, na gikan sa Judaismo. Totoo man iyan sa bautismo na isinasagibo kan Kristianong kongregasyon.

An Kristianong bautismo nagrerepresentar sa “paghagad sa Dios nin marahay na konsensia.” (1 Pedro 3:21) Iyan nagsisimbolisar na an indibiduwal biyo nang nagdusay kan saiyang sadiri ki Jehova tanganing paglingkodan Sia bilang disipulo kan Saiyang Aki. An biyong pagladop sa tubig sarong angay na simbolo nin siring na pagdusay. An pag-irarom nin tawo sa tubig nagrerepresentar sa saiyang pagkagadan sa saiyang dating pamumuhay. An paghawas sa tubig nagsisimbolisar sa saiyang pagkabuhay tanganing gibohon an kabotan nin Dios.

Tinatawan ni Jehova Dios nin marahay na konsensia an mga nagsasagibo kan siring na pagdusay asin nagpapabautismo. Sa siring, an pinasabngan na si apostol Pedro makakasabi sa saiyang mga kapagtubod: “[An bautismo] nagliligtas na man saindo ngonyan.” Iyan an sarong bagay na dai noarin man magigibo nin ano man na ritual na pagkarigos kan mga Judio.