An Paglataw Asin Pagkasudya nin “mga Eksperto”
NGONYAN na lakop na an paggamit nin Internet sa komputer, labing 26 milyones na reperensia manongod sa sadol para sa pagpadakula sa aki an madaling makua. Kun kamo magamit nin sarong minuto sana sa paghanap asin pagbasa kan kada saro kaiyan, an aki nindo dakula na asin naghale na sa harong nindo bago pa ngani nindo matapos iyan.
Bago kan mga panahon kan mga espesyalista sa mga aki, mga sikologo para sa aki, asin Internet, saen minahagad nin sadol an mga magurang? Sa pangkagabsan, sinda nag-aasa sa saindang pamilyang ekstendido. An mga ina, ama, inaon, asin amaon andam saka kayang magtao nin giya, pinansial na tabang, asin pag-ataman sa aki. Alagad sa dakol na nasyon, huli sa lagdoan na pagbalyo nin mga tawo hale sa probinsia pasiring sa siudad, haros biyong naputol an siring na dayupot na bogkos kan pamilya. Parateng gayo ngonyan, solong inaatubang kan mga ina asin ama an mga kadepisilan nin pagpadakula sa aki.
Daing duda na ini sarong dahelan kun taano ta marikason an pagdakol kan modernong industriya nin pag-ataman sa aki. An saro pang dahelan iyo an lakop na pagtitiwala sa siensia. Sa huring kabtang kan dekada nin 1800, an mga Amerikano nagigin nang kombensido na puedeng mapakarhay kan siensia an lambang aspekto nin buhay nin tawo. Taano ta dai kaiyan mapakarhay an dapit sa pagpadakula sa aki? Kaya kan 1899 kan an Nasyonal na Kongreso nin mga Ina sa Amerika nag-agrangay sa publiko manongod sa “kadaihan nin maginibo nin mga magurang,” dakol na “sientipikong eksperto” an tolos na nagralataw. Nanuga sinda na tatabangan na magin mapanggana an nasasakitan na mga ina asin ama.
Pagpadakula sa Aki Paagi sa Libro
Pero, ano an naginibo kan mga ekspertong ini? An mga magurang daw ngonyan dai nang gayo nahahadit asin mas nasasangkapan na sa pagpadakula sa saindang mga aki kisa kan nakaagi? Dai, segun sa sarong surbey kasuarin pa sana sa Britania. Ihinayag kaiyan na mga 35 porsiento kan mga magurang na may saradit na aki an naghahanap pa man giraray nin sadol na saindang matitiwalaan. An iba nakakamate na an solamenteng pagpipilian ninda iyo na sunodon an saindang natural na mga tendensia.
Sa saiyang librong Raising America: Experts, Parents, and a Century of Advice About Children, pinag-aadalan ni Ann Hulbert an establisadong rekord nin propesyonal na literatura manongod sa pagpadakula sa aki. Idinoon ni Hulbert, na sarong ina mismo na may duwang aki, na pira sana sa mga konklusyon kan mga eksperto an nakabasar sa probadong siensia. Imbes, an saindang sadol minalataw na orog na naimpluwensiahan kan saindang sadiring eksperyensia sa buhay kisa kan ano man na mga impormasyon na basado sa katunayan. Sa paggirumdom sa nakaagi, minalataw na an kadaklan sa saindang mga isinurat ibinasar sa uso, nagkakasarongatan, asin kun beses palaen nanggad.
Kaya ano an kamugtakan kan mga magurang ngonyan? An totoo, dakol an nariribaraw huling napapaatubang sinda sa dakol na sadol, opinyon, asin kontrobersia kisa kasuarin man kaidto. Minsan siring, bakong gabos na magurang nakakamate na sinda mayong paggiya. An mga magurang sa bilog na kinaban nakikinabang sa suanoy na gikanan nin kadonongan na sagkod ngonyan burabod pa man giraray nin masasarigan na sadol, arog kan ipapaheling sa masunod na artikulo.