Kapangganahan​—Paano Nindo Sinosokol Iyan?

IBINILANG kan nagkapira na an pinakamapangganang negosyante nin aksiones sa Wall Street kasuarin man, si Jesse Livermore midbid huli sa madonong na mga pagdedesisyon sa negosyo. Bilang resulta, nakatipon sia nin dakulang kayamanan. An mga sulot nia pinakamamahalon na mga amerikanang pasadya, nakaistar sia sa mansion na 29 an kuarto, asin an lunadan nia itom na Rolls-Royce na may sadiring drayber.

Si Davida determinado man na magin mapanggana. Bilang bise presidente asin pangkagabsan na manedyer nin sarong dakulang kompanya nin graphics, posibleng marhay na sia magin presidente nin sarong dibisyon kan kompanya. Naaakit sia kan kayamanan asin prestihio. Minsan siring, guminibo si David nin personal na desisyon na nagbunga kan saiyang pagdemitir. “Aram ko na nungka na akong magkakaigwa giraray nin karera bilang sarong manedyer na halangkaw an sueldo,” an sabi ni David. Sa paghona daw nindo sala an nagin desisyon ni David?

Dakol an naniniwala na an kalabot sa kapangganahan pagkamit nin kayamanan, popularidad, o pagkaprominente. Minsan siring, an mga may materyal na prosperidad tibaad nakakamate pa man giraray na daing halaga asin daing katuyohan an saindang buhay. Malinaw na iyan an nagin kamugtakan ni Mr. Livermore. Sa ibong kan saiyang kayamanan, pano nin kolog nin boot, trahedya, asin pagkamondo an buhay nia. Nagkaigwa sia nin depresyon, dai nagin mapanggana an saiyang mga pag-agom, asin harayo an boot sa saiya kan saiyang mga aki. Sa katapustapusi, pagkatapos na mawaran kan dakol sa kayamanan nia, sarong aldaw nagduman si Mr. Livermore sa bar kan sarong maluhong hotel asin ipinahayag an saiyang kamondoan sa mga kapierdihan nia. Nag-order sia nin inomon, ilinuwas nia an saiyang kuaderno na anit an tutob, asin nagsurat sia nin pamamaaram sa saiyang agom. Pakaubos kan inomon nia, nagduman sia sa marumarom an ilaw na kuartong walatan nin mga diaket asin iba pang gamit asin makaturotristeng binadil an sadiri.

Mantang totoo na komplikado an mga dahelan nin paghugot, an eksperyensiang ini nagpapatunay sa katotoohan kan tataramon kan Biblia: “Idtong mga determinadong yumaman . . . sinaksak an bilog nindang sadiri nin dakol na kakologan.”—1 Timoteo 6:9, 10.

Posible daw na an mga sinosokol an kapangganahan paagi sa kayamanan, posisyon, o pagkaprominente may depekto an ginagamit na pansokol? Ibinibilang daw nindong mapanggana an saindong sadiri? Taano? Anong pansokol an ginagamit nindo sa pagdeterminar na ini? Ano an nakakaimpluwensia sa pagmansay nindo manongod sa kapangganahan? Inaanalisar kan masunod na artikulo an epektibong sadol na nagin dahelan kaya nagin mapanggana an minilyon. Helingon niato kun paano man kamo puedeng magin mapanggana.

[Nota sa Ibaba]