Estorya nin Buhay

Kun Taano ta Ikinakaogma Kong Marhay an Paggibo nin mga Disipulo

Isinaysay ni Pamela Moseley

Nasa kasagsagan an guerra sa Inglaterra kan 1941 kan iiba ako kan sakong ina sa Leicester sa sarong kombension kan Mga Saksi ni Jehova. Nadangog mi an espesyal na pahayag ni Joseph Rutherford manongod sa mga aki. Kan si Nanay asin ako mabautismohan sa kombension na iyan, nariparo ko na ogmahon na marhay an mga nagtabang sa samo na umoswag sa espirituwal. Dai ko pa narerealisar kaidto kun gurano kadakulang kagayagayahan an ibinubunga nin paggibo nin mga disipulo ni Jesu-Cristo.

AN SAMONG pag-oswag pasiring sa pagigin mga disipulo nagpoon kan sinundan na taon. Nagigirumdoman ko pa an makatatakot na aldaw na idto nin Setyembre 1939 kan pumutok an Guerra Mundial II. Naheling kong nagtuturo an mga luha sa pisngi kan sakong ina mantang paorootro niang ihinahapot, “Taano an kinaban ta dai makanompong nin katoninongan?” An sakong mga magurang nagserbi sa militar durante kan Guerra Mundial I asin nakaeksperyensia kan makatatakot na marhay na mga pangyayari na konektado dian. Ihinapot ni Nanay an saiyang hapot sa ministrong Anglicano sa Bristol. Sinabi sana kaini: “Pirme nang may guerra kaidto pa asin pirmeng magkakaigwa kaiyan.”

Minsan siring, dai nahaloy pakatapos kaiyan, sarong may edad nang babae an nagsongko sa samong harong. Sia saro sa Mga Saksi ni Jehova. Hinapot sia kan sakong ina kan iyo man sanang hapot: “Taano an kinaban ta dai makanompong nin katoninongan?” Ipinaliwanag kan Saksi na an mga guerra kabtang kan tanda na kita nabubuhay na sa pagtatapos kan madahas na sistemang ini nin mga bagay. (Mateo 24:3-14) Dai nahaloy inaadalan na kami sa Biblia kan saiyang aking babae. Kabilang sindang duwa sa maogmang mga nagmasid sa samong bautismo. Taano daw ta nakakapaogmang marhay sa mga tawo an paggibo nin mga disipulo? Kan huri, naaraman ko kun taano. Togoti nindo akong isaysay an nagkapira sa nanodan ko sa labing 65 taon nin paggibo nin mga disipulo.

Pakadiskobre kan Kagayagayahan nin Pagtotokdo

Nagpoon akong makikabtang sa paghuhulit kan Kahadean sa Bristol kan ako 11 anyos. An sarong tugang na lalaki nagtao sa sako nin sarong ponograpo asin kard sa pagpatotoo asin nagsabi: “Ngonyan, dumanan mo an gabos na harong sa kamping iyan kan tinampo.” Kaya nagpoon akong maghulit nin solo. Siempre, ninenerbios akong marhay. Pinapatanog ko an nakarekord na pahayag sa Biblia dangan ipinapaheling ko sa kagharong an kard sa pagpatotoo, na nag-iimbitar sa mga tawo na kumua nin literatura sa Biblia.

Poon kan mga taon nin 1950, tinawan nin orog na pagdodoon an direktang pagbasa sa Biblia durante kan samong pagharongharong. Kan primero, huli sa sakong pagkamasusupgon masakit para sa sako na makipag-olay sa mga dai kamidbid asin magpaliwanag kan mga teksto sa Biblia. Alagad pag-abot nin panahon nagkaigwa ako nin kompiansa. Nangyari iyan kan magpoon nang magustohan ko an ministeryo. Minamansay kami kan nagkapirang tawo na mga paratinda sana nin libro, alagad kan binasa asin ipinaliwanag mi sa sainda an mga teksto sa Biblia, rinekonoser ninda kami bilang mga paratokdo kan Tataramon nin Dios. Nagustohan kong marhay an paggibo kaini kaya nagmawot ako na dugangan an sakong pakikikabtang. Kaya kan Setyembre 1955, naglaog ako sa bilog na panahon na ministeryo bilang payunir.

An Pagkadesidido Nagbubunga nin mga Balos

An saro sa enot na mga leksion na nanodan ko iyo na puedeng magbunga nin mga balos an maboot na pagkadesidido. Sa sarong pangyayari, nakapasakamot ako nin sarong kopya kan magasin na Torrengbantayan sa sarong babae, si Violet Morice. Kan bumalik ako tanganing dalawon sia, biyo niang binukasan an pinto, ikinumkom an saiyang mga takyag, asin atentong naghinanyog mantang ipinapaliwanag ko sa saiya an Kasuratan. Sa kada pagsongko ko, garo interesado talaga sia. Minsan siring, kan alokan ko sia nin regular na pag-adal sa Biblia, sia nagsabi: “Dai na. Pagnagkaedad na an mga aki, saka ko iyan sisiyasaton.” Nadesganar nanggad ako! An Biblia nagtataram manongod sa “panahon nin paghanap asin panahon nin pag-ako sa pagkawara.” (Eclesiastes 3:6) Nagdesisyon ako na dai sumuko.

Pakalihis nin sarong bulan, nagbalik ako tanganing ipakipag-olay ki Violet an nagkapira pang teksto. Dai nahaloy, serosemana na siang nag-aadal sa Biblia sa may pinto. Sa katapustapusi sinabi nia: “Bako daw na mas marahay pa logod na dumagos ka sa laog?” Si Violet nagin marahayon nanggad na kapagtubod asin personal na katood! Iyo, si Violet nabautismohan bilang saro sa Mga Saksi ni Jehova.

Sarong aldaw nabigla si Violet kan maaraman nia na ipinabakal kan saiyang agom na mayo sia nin pakaisi an saindang harong asin inabandonar sia. Marahay sana ta sa tabang kan sarong katood na Saksi, nakakua sia nin ibang harong kan hapon man sanang idto. Huli sa pagtanaw nin utang na boot ki Jehova, nagdesisyon sia na gamiton an saiyang bilog na buhay sa pagpapayunir. Kan maheling ko na an espiritu ni Jehova pinano sia nin kaigotan para sa tunay na pagsamba, narealisar ko kun taano an paggibo nin mga disipulo ta nagreresulta sa siring na kaogmahan. Iyo, ini an magigin karera ko sa bilog na buhay!

Kan 1957, kami ni Mary Robinson iinasignar na magpayunir sa lugar nin industriya sa Rutherglen sa Glasgow, Scotland. Naghulit kami mantang madampog, madoros, asin maniebe, alagad bawi man iyan. Sarong aldaw nakamidbid ko si Jessie. Naogma ako sa pakipag-adal sa Biblia sa saiya. An saiyang agom, si Wally, sarong Komunista, asin linikayan nia ako kan primero. Kan sia mag-adal sa Biblia asin marealisar na an Kahadean nin Dios sana an matao nin pinakamarahay na mga kamugtakan sa mga tawo, napalukso an puso nia. Pag-abot nin panahon, pareho sinda nagin paragibo nin mga disipulo.

An Enot na mga Reaksion Puedeng Makadaya

Sa huri, nakaresibi kami nin bagong asignasyon sa Paisley, Scotland. Sarong aldaw mantang ako naghuhulit duman, sarong babae an nagsera nin pinto sa mismong atubangan ko. Alagad dai nahaloy hinanap nia ako tanganing maghagad nin dispensasyon. Kan bumalik ako kan sunod na semana, sinabi nia: “An pagmate ko garo ko sinerahan an pinto sa mismong atubangan nin Dios. Kaipuhan ko nanggad na lumuwas asin hanapon ka.” An ngaran nia Pearl. Sinabi nia sako na desganado siang marhay kaidto sa mga katood asin paryente kaya namibi sia sa Dios na magkaigwa nin sarong tunay na katood. “Dangan nag-abot ka sa pinto,” an sabi nia. “Ngonyan narealisar ko na siertong ika an tunay na katood na iyan.”

Bakong pasil na magin katood ni Pearl. Nag-iistar sia sa alitoktok nin sarong tukaron na bulod, asin kaipuhan kong lakawon iyan patukad. Kan magduman ako sa saiyang harong tanganing hapiton sia para sa enot niang pag-atender sa pagtiripon, dikit pa akong matumba huli sa doros asin oran. Iinapon ko an sakong payong kan iyan magisi. Anom na bulan sana pakatapos na ako serahan nin pinto sa mismong atubangan ko, sinimbolisaran ni Pearl an saiyang pagdusay sa Dios paagi sa bautismo sa tubig.

Dai nahaloy pakatapos kaiyan, an saiyang agom nagdesisyon na mag-adal sa Biblia, asin sa laog nin halipot na panahon, nag-iba sia sako sa ministeryo sa harong-harong. Siring sa dati, nag-ooran kaidto. “Dai ka mahadit,” an sabi nia. “Nagtitindog ako nin dakol na oras tanganing magdalan nin football sa arog kaining panahon, kaya siertong makakatindog ako sa oran para ki Jehova.” Kaidto pa hinahangaan ko na an pagigin determinado kan mga Eskoses.

Kanigoan kanakakakontento na makabalik ako pakalihis nin dakol na dekada asin maheling an kadaklan kan mga inadalan ko sa Biblia na nagdadanay sa pagtubod sagkod ngonyan! Iyan an kagayagayahan sa paggibo nin mga disipulo. (1 Tesalonica 2:17-20) Kan 1966, pakalihis nin labing walong taon sa pagpapayunir sa Scotland, inimbitaran ako sa Paadalan sa Biblia kan Watchtower sa Gilead tanganing sanayon bilang misyonera.

Sa Langtad sa Ibang Nasyon

Iinasignar ako sa Bolivia, sa sarong tropikal na banwaan nin Santa Cruz, na igwa nin kongregasyon na mga 50 an miembro. An banwaan nagpagirumdom sako kan Wild West na ilinaladawan sa mga pelikula sa Hollywood. Sa paggirumdom sa sakong nakaagi, iniisip ko na nagin ordinaryo sana nanggad akong misyonera. Dai ako noarin man sinalakay nin mga buaya, pinalibotan nin madahas na mga pagsururog, nalagalag sa desierto, o nag-agi nin pagkalunod nin barko sa tahaw nin kadagatan. Pero, para sa sako, an paggibo nin mga disipulo orog na nakakapukaw sa boot.

An saro sa enot na mga babaeng inadalan ko sa Biblia sa Santa Cruz iyo si Antonia. Nasakitan akong magtokdo sa lenguaheng Kastila. Sarong beses, an sadit na aking lalaki ni Antonia nagsabi: “Nanay, ano tinutuyo po niang masala tanganing pangisihon kita?” Sa katapustapusi, si Antonia nagin sarong disipulo, asin siring man si Yolanda, an saiyang aking babae. Si Yolanda may amigo, sarong estudyante sa abogasiya na an gaha Dito, na nagpoon man na mag-adal sa Biblia asin mag-atender sa samong mga pagtiripon. Paagi sa pagtabang saiya, nakanood ako nin sarong bagay manongod sa pagtotokdo nin katotoohan sa Biblia: Kun beses kaipuhan kan mga tawo na maboot na itulod.

Kan si Dito magpoon na pumalta sa saiyang pag-adal, sinabi ko: “Dito, dai ka inoobligar ni Jehova na suportaran an saiyang Kahadean. Kaipuhan mong pumili.” Kan magsimbag sia na gusto niang maglingkod sa Dios, sinabi ko: “May retrato ka digdi nin sarong namomoon na rebolusyonaryo. Makonklusyon daw an sarong bisita na nakakaheling kaiyan na pinili mo nang suportaran an Kahadean nin Dios?” Iyan an maboot na tulod na kaipuhan nia.

Pakalihis nin duwang semana, puminutok an sarong rebolusyon, asin nagkaigwa nin baradilan sa lado kan mga estudyante sa unibersidad asin kan mga pulis. “Lumuwas na kita digdi!” an kurahaw ni Dito sa saiyang katood. “Dai! Ini an satuyang dakulang aldaw na satong hinahalat,” an simbag kan saiyang kaiba, na nagkua nin sarong riple asin nagdalagan pasiring sa bubongan kan unibersidad. Sia saro sa walong katood ni Dito na nagadan kan aldaw na idto. Maiimahinar daw nindo kun gurano ako kaogmang maheling an tawong ini, si Dito, na tibaad nagadan kutana kun dai sia nagdesisyon na magin tunay na Kristiano?

Pakaheling na Naghihiro an Espiritu ni Jehova

Sarong aldaw kan linampasan ko an sarong pinto, sa paghonang nasongko mi na an harong na iyan, inapod ako kan babae na yaon sa harong. Ignacia an ngaran nia. May kaaraman na sia manongod sa Mga Saksi ni Jehova, alagad nakapugol sa pag-oswag nia sa espirituwal an grabeng pagkontra kan saiyang agom—sarong maskuladong pulis na an ngaran Adalberto. Nariribaraw sia sa dakol na pundamental na katokdoan kan Biblia, kaya pinonan ko siang adalan sa Biblia. Dawa ngani determinado si Adalberto na papondohon an mga pag-adal na ini sa Biblia, nahimo kong makipag-olay sa saiya manongod sa ibang bagay sa harohalawig na panahon. Idto an enot na tangga sa pagigin magkatood mi.

Imahinara an sakong kagayagayahan kan maheling ko si Ignacia na magin mapagmalasakit na miembro kan kongregasyon, na inaasikaso an espirituwal asin pisikal na kapakanan kan dakol na nangangaipo nin pagranga. Pag-abot nin panahon, an saiyang agom asin an tolo sa saindang mga aki nagin mga Saksi. Sa katunayan, kan sa katapustapusi masabotan ni Adalberto an kahulogan kan maogmang bareta, nagbalik sia sa presinto asin nagpatotoo sia na may kanigoan na entusiasmo kaya nakapasuskribe sia nin 200 na An Torrengbantayan asin Awake! sa mga pulis.

Pinapatalubo Iyan ni Jehova

Pakapaglingkod ko sa Santa Cruz sa laog nin anom na taon, iinasignar ako sa mayor na siudad nin Bolivia, an La Paz, na dian nagdanay ako kan suminunod na 25 taon. Kan enot na mga taon nin 1970, an sangang erokan kan Mga Saksi ni Jehova sa La Paz may total na 12 sanang miembro. Mantang naghihiwas an paghuhulit, na nagkakaipo nin mas dakulang mga pasilidad, itinogdok an sarong bagong sangang opisina sa marikas na nagdadakulang siudad nin Santa Cruz. An sangang opisina ibinalyo duman kan 1998, asin naimbitaran akong magin miembro kan sangang opisina, na kompuesto na ngonyan nin labing 50 miembro.

An solong kongregasyon sa Santa Cruz kaidtong 1966 nagin labing 50 kongregasyon. An 640 Saksi kaidto sa bilog na Bolivia nagin haros 18,000 na ngonyan!

Nakakaogma na nagin mabunga an sakong asignasyon sa Bolivia. Minsan siring, pirmeng napaparigon an sakong boot huli sa kaimbodan kan mga kapwa Kristiano sa gabos na lugar. Naggagayagaya kami gabos sa pakaheling kan bendisyon ni Jehova sa paghuhulit kan Kahadean. Daing duwa-duwa na dakulang kaogmahan na magkaigwa nin kabtang sa paggibo nin mga disipulo.—Mateo 28:19, 20.

[Ritrato sa pahina 13]

Pagpapayunir sa Scotland

[Mga Ritrato sa pahina 15]

Paglilingkod sa sangang opisina sa Bolivia; (retrato sa laog) sa gradwasyon kan ika-42 na klase kan Gilead