An Sarong Mayaman na Namamahala Naggibo nin Bakong Madonong na Pagpili
AN MAYAMAN na hoben na namamahala tanos, makinuyog sa ley, asin relihioso. Minadolok ki Jesus, sia luminuhod asin naghapot: “Marahay na Paratokdo, ano an dapat kong gibohon tanganing magmana nin buhay na daing katapusan?”
Bilang simbag, ipinarisa ni Jesus na tanganing magkamit nin buhay kaipuhan kan tawong iyan na otobon an mga togon nin Dios. Kan hagadon sa saiya na magin espesipiko, si Jesus nagsabi: “Dai ka maggadan, Dai ka magsambay, Dai ka maghabon, Dai ka magsaksi nin putik, Tawan mo nin onra an saimong ama asin an saimong ina, asin, Kamotan mo an saimong kapwa nin siring sa saimo man sana.” Ini an pundamental na mga togon na yaon sa Ley na itinao ki Moises. Dangan nagsabi an tawong iyan: “Inotob ko an gabos na ini; ano pa an kulang sa sako?”—Mateo 19:16-20.
Si Jesus “nakamate nin pagkamoot para sa saiya” asin nagsabi: “Sarong bagay an kulang sa saimo: Lakaw, ipabakal mo an mga bagay na nasa saimo asin itao mo sa mga dukha, asin magkakaigwa ka nin kayamanan sa langit, asin madia magin parasunod taka.”—Marcos 10:17-21.
Biglang napaatubang an hoben na namamahala sa sarong magabat na desisyon. Ano an gigibohon nia? Gikan sa boot daw niang bubutasan an materyal na kayamanan asin magigin parasunod ni Jesus, o papagdadanayon daw nia kun ano an igwa na sia? Pagmamaigotan daw niang kamtan an kayamanan sa daga, o hihingoahon daw niang kamtan an kayamanan sa langit? Siertong depisil na pagpili iyan para sa saiya. Malinaw na interesado sia sa espirituwal na mga bagay, huli ta inotob nia an Ley asin naghapot kun ano pa an puede niang gibohon tanganing kamtan an pabor nin Dios. Ano an nagin desisyon nia? “Naghale siang mamondo, ta dakol siang rogaring.”—Marcos 10:22.
Bakong madonong an desisyon kan hoben na namamahala. Kun sia nagin maimbod na parasunod ni Jesus, nag-ako kutana sia kan minamawot nia—an buhay na daing katapusan. Dai sato sinasabi kun ano an nangyari sa hoben na lalaking iyan. Minsan siring, aram niato na pakalihis nin mga apat na dekada, linaglag kan mga hukbo nin Roma an Jerusalem asin an kadaklan na parte kan Judea. Nawara an kayamanan sagkod buhay kan dakol na Judio.
Kabaliktaran kan hoben na namamahala, si apostol Pedro asin an iba pang disipulo naggibo nin madonong na pagpili. ‘Binayaan ninda an gabos na bagay’ asin nagsunod ki Jesus. Nakinabang nanggad sinda huli sa desisyon na iyan! Sinabihan sinda ni Jesus na maako sinda nin mas dakol pa kisa sa binayaan ninda. Dugang pa, magmamana sinda nin buhay na daing katapusan. Mayo sinda nin dahelan na pagbasolan sa huri an saindang desisyon.—Mateo 19:27-29.
Gabos kita napapaatubang sa mga desisyon sa buhay—an nagkapira saradit, an nagkapira darakula. Anong hatol an itinao ni Jesus manongod sa siring na mga desisyon? Aakoon daw nindo an hatol nia? Kun pipilion nindong gibohon iyan, tatawan kamo nin nagsosopay na balos. Tokaron na niato ngonyan kun paano kita makakasunod ki Jesus asin makikinabang sa sinabi nia.