Bako daw na Dapat Igo Na an “Pagigin Marahay”?

MAGIGIN kanigoan kapuwerte kan kinaban kun an lambang sarong nabubuhay tunay na marahay! Ano man an sekso o edad, mayo nin siisay man na kaipuhan matakot na mabugbog, malugos, o abusohon. Mawawara na an mga karsel, asin dai na magkakaigwa nin mga pulis, dai nang militar. Iyo, iyan magigin kanigoan kapuwerteng kinaban!

Totoo, sa irarom kan presenteng mga kamugtakan, an maglaom nin siring na kinaban garo baga bakong realistiko. Pero, an mga tawo na naghihingoa na mamuhay nin marahay na buhay angay na omawon. An saindang mga paghihingoa tibaad garo baga kakadikit kan bunga sa paggibo nin mas marahay na kinaban, alagad minsan paano dai sinda nakakapagrabe kaiyan.

Alagad an “pagigin marahay” daw igo na? Tibaad maoyonan iyan kan satong mga kaamigo asin mga kataraed, alagad igo daw iyan tanganing makapaoyon sa satong Kaglalang? An mga tawong nagmamawot na makamit an pag-oyon nin Dios gustong makaaram.

Ano an Boot Sabihon kan “Pagigin Marahay”?

An “Marahay siang aki” parateng daing ibang kahulogan kundi na sia bakong maraot, boot sabihon, bakong midbid sa paggibo nin maraot. Alagad kun gamiton sa relihiyosong sentido, an pagigin marahay maimbuwelto nin orog pa. Taano?

Dai maninigaran, dakol na mga ateista, agnostiko, asin bakong relihiyosong mga tawo an marahay sa moral. Bako sindang midbid sa paggibo nin maraot. Alagad an sainda daw na pagigin marahay sa sentidong ini igo na tanganing makapaoyon sa Kaglalang, na an mismong pag-eksister saindang isinisikwal, pinagdududahan, o pinipili na dai pag-intindihon? Siyempre dai.

Kaya, an tamang kaaraman sa ibinibilang nin Dios na marahay kaipuhan, ta tibaad kita, “huli sa dai pakaaram kan katanosan nin Dios” naghihingoa “na patindogon [an satong] sadiri.” (Roma 10:1-3) Ini magigin sala, huli ta an mga pamantayan nin tawo sa katanosan—an ibinibilang niato na marahay—kulang na gayo sa banal na pamantayan.

Durante kan saiyang ministeryo sa daga, ipinaheling kan Aki nin Dios na si Jesu-Cristo kun ano an pamantayan nin Dios sa karahayan. An sarong hoben na mayaman naghapot sa saiya: “Anong karahayan an dapat kong gibohon tanganing magkamit ako nin buhay na daing katapusan?” Dakula an ipinahahayag kan tala sa saindang orolay. Mababasa niato: “‘Padagos na otoba an mga togon.’ Sia nagsabi sa saiya:‘Mga arin?’ Si Jesus nagsabi: ‘Tara, Dai ka maggadan, Dai ka magsambay, Dai ka maghabon, Dai ka magsaksing putik, Galangan mo an saimong ama asin an saimong ina, asin, Kamotan mo an saimong kataed siring sa saimo man sana.’ An hoben na lalaki nagsabi sa saiya: ‘Ini gabos inotob ko; ano pa an nagkukulang sako?’ Si Jesus nagsabi saiya: ‘Kun boot mong magin sangkap, lakaw pabakalan an saimong mga rogaring asin itao mo sa mga dukha asin magkakaigwa ka nin kayamanan sa langit, asin madia sumunod ka sa sako.’ Kan madangog kan hoben na lalaki an tataramon na ini, naghale siang namomondo, huli ta sia igwa nin dakol na rogaring.”—Mateo 19:16-22.

Lalo na huli sa pagpasipara ngonyan sa moral asin sosyal na paggawe, dai daw nindo ibibilang an tawong ini na marahay? Sia nungka naggadan, nungka nagsambay, nungka naghabon, nungka nagsaksi nin putik, nungka nagkulang sa paggalang sa saiyang magurang o pagkamoot sa saiyang kataed siring sa saiya man sana.

Alagad ipinaheling ni Jesus na an pagigin marahay kan tawong ini kulang pa. Igwa pa giraray nin kulang, bagay na nakaolang sa pagigin sangkap, o kompleto, kan saiyang pagigin marahay. Ano? An mapagsakripisyong pagkamoot sa Dios na magpapahiro saiya na magin parasunod ni Cristo. An mapagsakripisyong pagkamoot na magpapangyari man saiya na makikabtang nin aktibo sa paghuhulit kan Kahadean nin Dios, an trabaho na itinotokdo ni Jesus sa saiyang mga parasunod na gibohon. Mantang sinasabi kan kasuratan na an tawong ini “igwa nin dakol na rogaring,” posible nanggad na nauubos kaiyan an saiyang panahon. Paagi sa pagsunod kan praktikal na sadol ni Jesus na haleon nia saiya an materyal na mga rogaring, na iwinawaras iyan sa mga dukha, ibubugtak nia an materyal na mga interes sa kamugtakan na mas menus an importansia sa espirituwal na mga bagay. Ini matogot saiya na danay na “hanapon nguna an kahadean” na mas dikit an mga kaolangan.—Mateo 6:33.

Kaya an pagigin marahay sa pagheling nin Dios nangangahulogan nin mas pa sa basta sana pagpondo sa paggibo nin maraot. Nangangahulogan iyan nin aktibong paggibo nin marahay paagi sa pagigin parasunod ni Cristo. Kalabot kaini an “pagpatotoo sa katotoohan” dapit sa Dios asin sa saiyang mga katuyohan, na ‘ipinapahayag an saiyang ngaran’ sa iba, siring man maigot na ipinagdedepensa sia sa atubang nin falsong mga sahot asin putik, siring sa ginibo ni Jesus. (Juan 17:4, 6; 18:37) Nangangahulogan man iyan nin “paghiras nin mga bagay sa iba.”—Hebreo 13:15, 16.

Kun Paano Magigin Mas Marahay sa Basta Sana Marahay

Mantang an pagigin marahay bako pang igo, ano an gigibohon niato tanganing magin mas marahay? An Lucas 10:38-42 nagtatao sato nin giya. Dian mababasa niato: “An sarong babae na nginangaranan Marta nagpasakat sa saiya [ki Jesus] bilang bisita sa harong. An babaeng ini igwa nin tugang na nginangaranan Maria, na nagtukaw sa pamitisan kan Kagurangnan asin naghihinanyog kan saiyang tataramon. Alagad ta si Marta nagsisibot sa pag-asikaso sa dakol na gibohon. Kaya, sia nagdolok sa saiya asin nagsabi: ‘Kagurangnan, dai ka nakikilabot na pinababayaan ako kan tugang ko na ako na sana an maggibo? Sabihi ngani sia na tabangan ako.’ Sa pagsimbag an Kagurangnan nagsabi saiya: ‘Marta, Marta, nasisibot ka asin nahahadit ka manongod sa dakol na bagay. Minsan siring, nagkapira sanang bagay an kaipuhan, o saro sana. Para sa saiya, pinili ni Maria an marahay na kabtang, asin iyan dai hahaleon sa saiya.’”

Ano an ipinaheheling kan orolay na ini? Minsan ngani maoomaw an paglingkod ki Jesus sa pisikal na paagi, an paghinanyog sa saiyang mga katokdoan, sa siring pagpaheling nin tamang apresasyon para sa espirituwal na mga bagay, orog pa. An ginibo ni Marta marahay. Alagad ta sa partikular na panahon na idto bakong igo. Kaya, an ginibo ni Maria mas marahay.

Ining pagbugtak nin halaga sa espirituwal na mga bagay, al kontraryo sa pisikal o materyal na mga bagay, idinoon man ni Jesus sa saiyang Sermon sa Bukid. Sia nagsabi: “Maogma idtong mga nakakamate kan saindang espirituwal na pangangaipo, huli ta an kahadean kan kalangitan sadiri ninda.”—Mateo 5:3.

Igwa daw kamong midbid na tawong marahay na, sa ibong kan pagigin siring, bakong partikular na “nakakamate kan saindang espirituwal na pangangaipo”? Tibaad. Sa katunayan, tibaad marealisar nindo na kamo mismo saro sa sainda. Kun iyo, madonong na maghingoa na manodan an pamantayan nin Dios para sa karahayan paagi sa pagbirik kan saindong atension sa espirituwal na mga bagay.

Sa paggibo kaini magkakaigwa kamo nin paglaom na mabuhay na maheling an bagong palakaw nin mga bagay nin Dios na madali nang patindogon sa bilog na daga. Duman, dai na nin siisay man na masasapeligro na mabugbog, o matakot na malugos o abusohon. Mayo na nin mga karsel. Ni magkakaigwa pa nin pulis o militar—huli ta an mga ini nakakua na nin mas mapapakinabangan na trabaho.