Ginibo Ninda an Kabotan ni Jehova

Pinili ni Maria “an Marahay na Kabtang”

KAIDTONG kaaldawan ni Jesus, an Judiong mga babae linilimitaran nin rabinikong mga tradisyon. Huli kaini, sinda dinesganar na mag-adal kan Ley. Tunay nanggad, an sarong kinotar na opinyon sa Misna nagsabi: “Kun an siisay man na lalaki nagtatao nin kaaraman dapit sa Ley sa saiyang aking babae iyan garo man sana tinokdoan nia sia nin kalibogan.”—Sotah 3:4.

Bilang resulta, an dakol na babae sa Judea kan enot na siglo daing gayo nin inadalan. “Mayo nin ebidensia na tinogotan kasuarin man an Judiong mga babae na magin mga disipulo nin sarong dakulang paratokdo bago an ministeryo ni Jesus, asin tunay nanggad na dai tinogotan na magbiahe kaiba nin siring na paratokdo, o magtokdo sa siisay man apuera sa mga aki,” an komento kan The Anchor Bible Dictionary. Orog pang minemenus an mga babae, an nagkapirang namomoon sa relihion naggibo nin ley na nagsasabi na an lalaki dai maninigong makipag-olay sa babae sa publiko!

Dai inintindi ni Jesus an siring na maraot na mga aktitud. Tinokdoan nia an mga babae saka an mga lalaki, asin kabilang kapwa an lalaki asin babae sa saiyang mga parasunod. (Lucas 8:1-3) Sarong beses, si Jesus inimbitaran na magin bisita ni Marta asin Maria. (Lucas 10:38) An duwang babae na ini tugang ni Lazaro, asin sindang tolo mga disipulo asin maimbod na mga katood ni Jesus. (Juan 11:5) An pamilyang ini tibaad nagin prominente, kun iisipon an kadakol na nag-arabot tanganing rangahon si Marta asin si Maria kan magadan si Lazaro. Ano man an kamugtakan, an nangyari sa saindang harong kan si Jesus nagin bisita duman nagtao nin mahalagang leksion bako sanang para sa sainda kundi sa sato man.

Nakakanood sa Pamitisan ni Jesus

Daing duda, gustong-gusto ni Marta asin Maria na tawan si Jesus nin luhosong bangkete, asin kayangkaya gayod ninda ining gastosan. (Ikomparar an Juan 12:1-3.) Minsan siring, kan dumatong an saindang bisita, si Maria ‘tuminukaw sa pamitisan kan Kagurangnan asin padagos na naghinanyog sa saiyang tataramon.’ (Lucas 10:39) Daing tradisyon nin tawo an makaoolang ki Jesus sa pagtokdo sa sarong sinserong babae na galagang marhay na makanood! Puede niatong imahinaron si Maria na nagtutukaw sa atubangan ni Jesus, na ibinubugtak an saiyang sadiri sa kamugtakan nin sarong estudyante na lubos nanggad an atension sa paghinanyog sa pagtotokdo kan saiyang Maestro.—Ikomparar an Deuteronomio 33:3; Gibo 22:3.

Bakong pareho ni Maria, si Marta “nariribaraw sa pag-asikaso sa dakol na katongdan.” Sa pag-andam nin magarbong pagkakan, sia sibot na marhay sa saiyang eksihidong mga trabaho. Dai nahaloy, naaburido si Marta na sia sana an solong naggigibo kan gabos na gibohon mantang an saiyang tugang na babae nagtutukaw sa pamitisan ni Jesus! Kaya pinondo ni Marta an sinasabi ni Jesus ki Maria, na tibaad biglaan, na sinasabi: “Kagurangnan, dai daw nin ano man sa saimo na an sakong tugang na babae binayaan akong solo na asikasohon an mga bagay? Kun siring, sabihi sia na tabangan ako.”—Lucas 10:40.

An kahagadan mismo ni Marta bakong maraot. Total, an pag-andam nin pagkakan para sa sarong grupo magabat na trabaho, asin an paninimbagan maninigong bako sanang sa sarong tawo. Minsan siring, naheling ni Jesus sa saiyang tataramon an oportunidad na itokdo an sarong mahalagang leksion. “Marta, Marta,” sabi nia, “ika nahahadit asin nariribok manongod sa dakol na bagay. Minsan siring, nagkapira sanang bagay an kaipuhan, o saro sana. Para sa saiya, pinili ni Maria an marahay na kabtang, asin iyan dai hahaleon sa saiya.”—Lucas 10:41, 42.

Si Jesus dai nagsasabi na si Marta daing interes sa espirituwal na mga bagay. Al kontraryo, aram nia na sia babae na may hararom na diosnon na debosyon.a Daing duda na sa primero pa sana iyan an nagin dahelan na imbitaran nia si Jesus sa saiyang harong. Minsan siring, sa saiyang mahoyong pagsagwe, itinokdo nia na si Marta, huli sa saiyang pagparahadit sa pagkakan, nalilipasan an bihirang oportunidad na akoon an personal na pagtotokdo kan Aki nin Dios.

Totoo, an kultura kan kaaldawan na idto tibaad nagsusuportar sa punto de vista na an halaga nin babae pinakamarahay na napatutunayan paagi sa saiyang pagkatatao sa mga trabaho sa harong. Alagad an mga tataramon ni Jesus nagpaheling na an mga babae, kapareho nin mga lalaki, puedeng tumukaw sa pamitisan kan Aki nin Dios asin mag-ako nin mga kasabihan nin buhay! (Juan 4:7-15; Gibo 5:14) Huli kaini, nangorog karahay kutana na si Marta naghanda nin pira sanang putahe—o dawa saro sana—kun iyan matao kutana sa saiya nin oportunidad na magtukaw sa pamitisan kan Kagurangnan asin makanood sa saiya.—Ikomparar an Mateo 6:25.

An Leksion Para sa Sato

Ngonyan, kabilang kapwa an mga lalaki asin babae sa mga naghihimate sa pangagda ni Jesus na “kumua kan tubig nin buhay na daing bayad.” (Kapahayagan 22:17) Pinahiro nin pagkamoot, an nagkapira—arog nanggad ki Marta—ginigibo an saindang pinakamakakaya na itao an mga pangangaipo kan mga kapagtubod. Sinda kapakipakinabang asin maagap sa paghiro, asin si Jehova nanunuga na babalosan an saindang mga pagpapagal huli sa pagkamoot. (Hebreo 6:10; 13:16) An iba tibaad mas kaparehong marhay ni Maria. Sinda kalmado asin mapaghorophorop sa espirituwal na mga bagay. An saindang pagkagalagang horophoropon an Tataramon nin Dios nagtatabang sa sainda na magdanay na marigon na nakagamot sa pagtubod.—Efeso 3:17-19.

An duwang klaseng ini nin indibiduwal pinaninigoan an mahalagang pangangaipo sa Kristianong kongregasyon. Minsan siring, sa katapustapusi, an gabos maninigong ‘pilion an marahay na kabtang’ paagi sa pagtao nin pangenot na pagdodoon sa espirituwal na mga bagay. Paagi sa pagsierto sa orog na mahalagang mga bagay, kakamtan ta an pabor asin bendisyon ni Jehova.—Filipos 1:9-11.

[Nota sa Ibaba]