Sarong Miting na Nagtatampok nin Pagkasararo Asin Nakakaogmang mga Plano

AN TAONAN na miting kan Watch Tower Bible and Tract Society of Pennsylvania pirmeng nakakaogma. Totoo nanggad iyan kan ika-127 taonan na miting, na ginibo kan Sabado, Oktubre 1, 2011! An imbitadong mga bisita na hale sa manlaenlaen na parte kan kinaban nagtiripon sa Assembly Hall of Jehovah’s Witnesses sa Jersey City, New Jersey, E.U.A.

Maogmang inako ni Gerrit Lösch kan Namamahalang Grupo an dakol na magayagayang nag-atender. Sinabihan nia an mga delegadong naggikan sa mga 85 nasyon na sinda igwa nin daing kaagid na internasyonal na pagkasararo. An pagkasararong iyan marahay na patotoo asin nagpapamuraway ki Jehova. Sa katunayan, pagkasararo an paorootrong tema kan miting na ini.

MARAHAY NA BARETA HALE SA MEJICO

Sa enot na kabtang kan programa, may itinaong halimbawa dapit sa pagkasararo kan banwaan ni Jehova. Ininterbio ni Baltasar Perla an tolong kapwa nia miembro kan pamilyang Bethel sa Mejico manongod sa anom na sangang opisina sa Amerika Sentral na isinaro sa sangang opisina sa Mejico. Huli sa pagsararong ini, mas dakol nang kultura asin nasyon an ginikanan kan pamilyang Bethel sa Mejico. An pag-abot kan mga kapagtubod gikan sa ibang mga nasyon nagresulta sa pagparinigonan nin boot. An Dios garo man sana nagkua nin dakulaon na pamara asin pinara an mga linderos kan mga nasyon.

An sarong kadepisilan na naglataw huli sa pagsararong iyan iyo an kun paano tatabangan an mga parahayag na makamate na dai sinda napapasuway sa organisasyon ni Jehova, dawa ngani an mga sangang opisina dai na nagpupunsionar sa saindang nasyon. Tanganing magibo iyan, an kada kongregasyon may protektadong koneksion nin e-mail tanganing maski an mga nasa napapasuway na lugar direktang makakakomunikar sa sangang opisina.

PINAKABAGONG IMPORMASYON HALE SA HAPON

Ipinaliwanag ni James Linton kan sangang opisina sa Hapon kun paano an satong mga tugang naapektaran kan linog asin mga tsunami na tuminama sa nasyon na iyan kan Marso 2011. Dakol na Saksi an nawaran nin mga mahal sa buhay saka mga pagsadiri. Labing 3,100 na harong asin ginatos na lunadan an ipinagamit kan mga Saksi na nasa luwas kan apektadong lugar. An mga boluntaryo sa mga Regional Building Committee daing pondo sa pagtrabaho tanganing hirahayon an mga harong kan mga tugang. Labing 1,700 an nagboluntaryo tanganing maglingkod saen man may pangangaipo. Sarong grupo nin mga boluntaryo hale sa Estados Unidos an nagtabang sa paghirahay kan mga Kingdom Hall, asin 575 boluntaryo an nagtrabaho sa proyektong ini.

Dakulang atension an itinao sa espirituwal asin emosyonal na ikakarahay kan mga apektado. Labing 400 na elder an naglingkod kun saen kaipuhan an pagpapastor. An pagmakolog kan Namamahalang Grupo risang-risa kan may duwang paraataman nin sona hale sa pambilog na kinaban na opisina na nagbiahe pasiring sa lugar nin kalamidad tanganing magparigon sa boot. An mga kapahayagan nin pagmakolog nin mga Saksi sa bilog na kinaban nakarangang marhay.

LEGAL NA MGA KAPANGGANAHAN

An mga nag-atender atentibong marhay mantang tinotokar ni Stephen Hardy kan sangang opisina sa Britania an dai pa sana nahahaloy na legal na mga kapangganahan. Halimbawa, inoobligar kan gobyerno nin Pransia na magbayad nin $82 milyones (U.S.) na buhis an ginagamit tang asosasyon sa Pransia. An isyu naresolberan kan an European Court of Human Rights (ECHR) nagdesisyon apabor sa sato, na nagsasabi na binalga kan gobyerno nin Pransia an Artikulo 9 kan European Convention, na nagpoprotektar sa katalingkasan sa relihion. An mga terminong ginamit sa desisyon nagpapahiling na an kasong ini bakong manongod sa kuarta, huling iyan nagsasabi: “An dai pagmidbid sa relihiosong asosasyon, pagpapondo sa mga aktibidad kaiyan, paggamit nin mapangraot na pananaram manongod sa sarong relihion, gabos halimbawa nin pakikiaram sa deretso na pinoprotektaran kan Artikulo 9 kan Convention.”

An ECHR nagdesisyon man apabor sa sato sa sarong kaso na kalabot an Armenia. Poon 1965 an interpretasyon kan ECHR iyo na an mga indibiduwal dai pinoprotektaran kan European Convention sa obligatoryong pagserbisyo sa militar. An Grand Chamber—an pinakahalangkaw na autoridad kan European Court—nagdesisyon na “kun an pagkontra sa pagserbisyo sa militar motibado nin seryosong dahelan na dai puedeng ikompromiso,” iyan dapat na protektaran kan European Convention. An desisyon na ini nag-oobligar sa Armenia asin sa mga nasyon na siring kan Azerbaijan asin Turkey na midbidon an deretsong iyan.

MGA PROYEKTO SA PAGTOGDOK

Sunod na nagtaram si Guy Pierce kan Namamahalang Grupo asin sinabi nia na an gabos na presente interesadong marhay sa satong mga proyekto sa pagtogdok sa Estado nin Nueva York. Iinintrodusir nia an sarong video na ipinapahiling an mga ginigibo sa Wallkill, sa Patterson, asin sa bago pa sanang nakuang lugar sa Warwick asin Tuxedo, Nueva York. Magkakaigwa nin labi sa 300 pang kuarto huli sa bagong edipisyong istaran sa Wallkill na mahahaman sa taon 2014.

May mga plano na togdokan asin pagayonon an 100 na ektaryang propiedad sa Warwick. “Minsan ngani dai pa niato sierto kun ano an kabotan ni Jehova sa Warwick,” an sabi ni Brother Pierce, “totogdokan asin papagayonon niato an lugar sa katuyohan na ibalyo dian an pambilog na kinaban na opisina kan Mga Saksi ni Jehova.” May mga plano man na gamiton an 20 ektaryang daga na an lokasyon 10 kilometros sa norte kan Warwick tanganing duman nguna ibugtak an mga makina asin materyales sa pagtogdok. “Kun may permit na sa pagtogdok, naglalaom kami na mahahaman an bilog na proyekto sa laog nin apat na taon,” an sabi ni Brother Pierce. “Dangan an satong propiedad sa Brooklyn puede nang ipabakal.”

“Nagbago daw an isip kan Namamahalang Grupo manongod sa kaharanihan kan dakulang kahorasaan?” an hapot ni Brother Pierce. “Dai nanggad,” an simbag nia. “Kun olangon kan dakulang kahorasaan an samong mga plano, marahayon iyan, marahayon nanggad!”

MAG-INGAT SA NAGNGANGAROB NA LEON

Sunod na tinokar ni Stephen Lett, saro pang miembro kan Namamahalang Grupo, an 1 Pedro 5:8: “Papagdanayon nindo an toltol na pag-iisip, magin mapagbantay. An saindong kaiwal, an Diablo, naglilibot na siring sa nagngangarob na leon, na naghahanap nin masisiba.” (NW) Sinambit ni Brother Lett na huli sa nagkapirang karakteristiko nin mga leon, an ilustrasyon ni Pedro angay na deskripsion sa Diablo.

Mantang an mga leon mas makosog asin mas marikas kisa sa mga tawo, dai kita dapat magprobar na labanan o dulagan si Satanas sa sadiri ta sanang kosog. Kaipuhan ta an tabang ni Jehova. (Isa. 40:31) An leon patagong naghahanap nin masisiba, kaya dapat tang likayan an espirituwal na kadikloman na dian si Satanas naghahanap nin mabibiktima. Kun paanong ginagadan nin leon an daing kalabanlaban na usa o torog na ogbon na sebra, si Satanas daing herak asin gustong-gustong gadanon kita. Asin kun basog na an leon, an mga biktima parateng dai na namimidbid, kun paanong “an huring kamugtakan” kan espirituwal na mga biktima ni Satanas ‘nagigin orog karaot kisa kan enot.’ (2 Ped. 2:20) Kaya kaipuhan tang manindogan tumang ki Satanas asin marigon na mangapot sa mga prinsipyo sa Biblia na nanodan niato.—1 Ped. 5:9.

APRESYARON AN SAINDONG LUGAR SA HARONG NI JEHOVA

“Kita gabos igwa nin lugar sa harong ni Jehova,” an sabi kan sunod na ispiker, si Samuel Herd kan Namamahalang Grupo. An gabos na Kristiano igwa nin lugar sa “harong” nin Dios—an saiyang espirituwal na templo—an areglo na sambahon sia basado sa atang na pantubos ni Jesus. Iyan sarong lugar na dapat pakamahalon bilang mahalagang marhay na pribilehio. Arog ni David, gusto tang ‘magdanay sa harong ni Jehova sa gabos na aldaw nin satong buhay.’—Sal. 27:4.

Sinambit ni Brother Herd an Salmo 92:12-14 asin naghapot, “Paano kita tinatabangan ni Jehova na mamurak?” Sia nagsimbag: “Sa espirituwal na paraiso, kita pinagdadanay nin Dios na maimbong, pinoprotektaran nia, asin tinatawan nia nin nakakarepreskong tubig nin katotoohan. Pasalamatan niato sia huli kaiyan.” Dangan sinadol ni Brother Herd an mga nagdadangog: “Magin kontento kita na magdanay sa harong ni Jehova—bako sanang sa halipot na panahon kundi sagkod lamang.”

IGINAGALANG KAN MGA KRISTIANO AN TATARAMON NIN DIOS

Sa sunod na pahayag, ipinaliwanag ni David Splane, miembro man kan Namamahalang Grupo, na poon pa kaidto iginagalang na kan tunay na mga Kristiano an Tataramon nin Dios. Kan enot na siglo, sinda nagsarig dian tanganing resolberan an isyu dapit sa pagturi. (Gui. 15:16, 17) Alagad an nagkapirang naghihingakong Kristiano kan ikaduwang siglo, na natokdoan nin Griegong pilosopiya, nagpoon na enoton an saindang intelektuwal na satispaksion kisa sa Kasuratan. Paghaloyhaloy, an mga opinyon kan inaapod na mga Ama kan Simbahan asin mga emperador kan Roma isinalida nin iba sa mga katokdoan sa Biblia kaya nagresulta ini sa dakol na falsong doktrina.

Sinabi ni Brother Splane na sa sarong ilustrasyon, ipinarisa ni Jesus na padagos na magkakaigwa nin tunay na linahidan na mga Kristiano sa daga tanganing surogon an katotoohan. (Mat. 13:24-30) Dai niato masasabi nin sierto kun sairisay sinda. Minsan siring, sa nag-aging mga siglo, dakol an hayag na nagkontra sa bakong sono sa Kasuratan na mga paniniwala asin kaugalean. An nagkapira kaini iyo si Arsobispo Agobard kan Lyons kan ika-9 siglo, Peter kan Bruys, Henry kan Lausanne, asin Valdès (o Waldo) kan ika-12 siglo, John Wycliffe kan ika-14 siglo, William Tyndale kan ika-16 na siglo, saka Henry Grew asin George Storrs kan ika-19 siglo. Padagos na sinusuportaran kan Mga Saksi ni Jehova ngonyan an sono sa Kasuratan na mga pamantayan asin minimidbid ninda an Biblia bilang pundasyon kan katotoohan. Iyan an dahelan kun taano ta pinili kan Namamahalang Grupo bilang satong teksto kan taon para sa 2012 an Juan 17:17: “An saimong tataramon iyo an katotoohan.”

NAKAKAOGMANG MGA PAGLILIWAT SA PAGSASANAY ASIN PAGLILINGKOD

Sinumaryo sa paisi ni Anthony Morris kan Namamahalang Grupo an mga pagliliwat para sa mga misyonero asin espesyal payunir. Poon sa Setyembre 2012, may mga klase kan Bible School for Christian Couples na gigibohon sa nagkapirang piling nasyon. Binago an pokus kan Paadalan nin Gilead. Poon kan nakaaging Oktubre, an gabos na sinasanay sa Gilead iyo idtong dati nang nasa espesyal na bilog na panahon na paglilingkod—mga misyonero na dai pa nakapag-adal sa Gilead, mga espesyal payunir, nagbibiaheng paraataman, o Bethelite. An mga naggradwar gagamiton tanganing pakosogon asin parigonon an banwaan nin Dios magsalang sa mga sangang opisina, sa pansirkito o pandistritong gibohon, o sa matawong marhay na mga lugar na puede nindang madagka an mga kongregasyon sa paghuhulit.

An dagdag na mga espesyal payunir mahulit sa bagong mga teritoryo sa harayo asin napapasuway na mga lugar. Poon kan Enero 1, 2012, an nagkapirang naggradwar sa Bible School for Single Brothers asin Bible School for Christian Couples iinaasignar bilang temporaryong mga espesyal payunir asin ginagamit tanganing ponan asin pahiwason an paghuhulit sa hararayong lugar. Sinda magkakaigwa nin sarong taon na asignasyon bilang espesyal payunir sagkod sa tolong taon. An mga magigin epektibo puedeng matawan nin permanenteng asignasyon.

An taonan na miting kan 2011 magayagayang okasyon. Kita naglalaom ki Jehova na bendisyonan an bagong mga areglo tanganing paorogon an satong paghuhulit asin pakosogon an pagkasararo nin magturugang—na gabos para sa saiyang kamurawayan asin kaomawan.

[Kahon/Mga Ritrato sa mga pahina 18, 19]

OROG NIATO SINDANG MIDBIDON

Ininterbio man sa programa an lima sa siyam na balo nin dating mga miembro kan Namamahalang Grupo. Isinaysay ni Sister Marina Sydlik, Edith Suiter, Melita Jaracz, Melba Barry, asin Sydney Barber kun paano sinda nakanood kan katotoohan asin naglaog sa bilog na panahon na paglilingkod. An lambang saro nag-estorya sa mga nag-atender kan saiyang dai malilingawan na mga eksperyensia, mga nagigirumdoman nia sa saiyang agom, asin mga bendisyon na magkaibanan nindang nakamtan. Bilang nakakapahirong kongklusyon sa mga interbiong ini, inawit kan mga nag-atender an kanta numero 86, na may titulong “Maimbod na mga Babae, mga Tugang na Kristiana.”

[Mga Ritrato]

(Itaas) Daniel asin Marina Sydlik; Grant asin Edith Suiter; Theodore asin Melita Jaracz

(Ibaba) Lloyd asin Melba Barry; Carey asin Sydney Barber

[Mapa sa pahina 16]

(Para sa aktuwal na format, hilingon an publikasyon.)

Anom na sangang opisina an pinagsararo asin nasa pagdirehir na kan sangang opisina sa Mejico

MEJICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Ritrato sa pahina 17]

An planong disenyo kan pambilog na kinaban na opisina kan Mga Saksi ni Jehova sa Warwick, Nueva York