Taano ta an Korapsion Nagpapadagos?
‘An tawo nagsasakop sa tawo sa saiyang ikakaraot.’—PARAHULIT 8:9.
ANGAY na ilinaladawan kan mga tataramon na iyan an kasaysayan kan pamamahala nin tawo, na nagin dahilan nin grabeng kasakitan asin kamondoan. Sa bilog na kasaysayan, an mga tawong may marahay na intension na nagprobar na mag-establisar nin mas makatanosan na sosyedad pirmeng naoolang nin kahanaban asin korapsion. Taano man? Taano ta an korapsion nagpapadagos? Sa pangenot, huli iyan sa minasunod na tolong nakakaraot na impluwensia.
1. An impluwensia nin kasalan.
Malinaw na sinasabi kan Biblia na kita “gabos nasa irarom nin kasalan.” (Roma 3:9) Arog nin namamanang helang na dai nabobolong, an kasalan ‘nag-eerok’ sa laog niato. Sa laog nin rinibong taon, an kasalan namahala sa katawohan bilang hade. An “katogonan” kaiyan padagos na nakakaimpluwensia sa sato. Huli sa makasalan na tendensia, ineenot nin dakol an saindang pansadiring intereses o isinesentro an saindang buhay sa pagkaigwa nin materyal na mga rogaring o autoridad dawa pa mapahamak an iba.—Roma 5:21; 7:17, 20, 23, 25.
2. An impluwensia kan maraot na kinaban na iniistaran niato.
An satong kinaban midbid sa kahanaban asin kaimotan. Sa arog kaiyan na kamugtakan, nadedepisilan an nagkapira na magin napapalaen. Huli sa makasadiring ambisyon, sinda nagigin gutom sa kapangyarihan. Nagkakaigwa man sinda nin makusog na pagmawot sa mas dakol na kuarta asin rogaring—na labi pa sa talagang kaipuhan ninda. Makamomondo, andam sindang mandaya tanganing makua an gusto ninda. Imbes na labanan an nakakaraot na mga impluwensia, an siring na mga tawo ‘nagsusunod sa kadaklan sa paggibo nin maraot.’—Exodo 23:2.
3. An impluwensia ni Satanas na Diablo.
Si Satanas, na sarong rebeldeng espiritung linalang, iyo an ‘nagdadaya sa bilog na kinaban.’ (Kapahayagan 12:9) Naoogma siang manipularon an mga tawo. Tibaad tuso niang aprobetsaran an natural na pagmawot nin tawo na guminhawa an buhay asin yumaman sagkod sa puntong mandaya ini.
Nangangahulogan daw iyan na garo sana kita mga kiko-kiko (puppet) sa kamot ni Satanas—na obligadong kumuyog sa saiya kun pinapahiro nia kita? Maaaraman niato an simbag sa sunod na artikulo.