Si Moises—Tawong May Kapakumbabaan

ANO AN KAPAKUMBABAAN?

Kabaliktaran iyan nin pagigin arogante o orgulyoso. An mapakumbaba dai nag-iisip na mas hababa an iba kisa sa saiya. Ginigirumdom niyang bako siyang perpekto asin aram niya an saiyang mga limitasyon.

PAANO SI MOISES NAGPAHILING NIN KAPAKUMBABAAN?

Dai siya nagin orgulyoso kan tinawan siya nin awtoridad. Sa parati, pag natatawan nin dikit na awtoridad an saro, naririsa tulos kun mapakumbaba siya o bako. Arog kan sinabi kan ika-19 siglong awtor na si Robert G. Ingersoll: “An kadaklan natitios an kasakitan. Pero kun gusto mong maaraman an totoong pagkatawo nin saro, tawan mo siya nin kapangyarihan.” Sa bagay na iyan, si Moises nagin marahayon na halimbawa nin kapakumbabaan. Paano?

Nag-ako si Moises nin dakulang awtoridad, ta sinugo siya ni Jehova na panginutan an Israel. Pero, dai siya nagin orgulyoso dahil sa kapangyarihan na iyan. Halimbawa, pag-ulayan ta kun paano niya rinesolberan na may kababaan nin buot an masakit na isyu manungod sa deretso sa mana. (Bilang 27:1-11) Magabat na isyu iyan, huling an desisyon iyo an magigin legal na basehan kan masurunod na henerasyon.

Ano an magigin reaksiyon ni Moises? Sasabihon daw niya na bilang lider kan Israel, kuwalipikado siyang magdesisyon sa bagay na iyan? Masarig daw siya sa saiyang kakayahan, dakul na taon nang eksperyensiya, o hararom na pakasabot sa kaisipan ni Jehova?

Tibaad iyan an gigibuhon nin orgulyosong tawo. Pero bakong arog kaiyan si Moises. Sinasabi kan Bibliya: “Dinara ni Moises an saindang kaso sa atubangan ni Jehova.” (Bilang 27:5, NW) Isip-isipa na sana! Dawa pakalihis nin mga 40 taon na panginginot sa Israel, si Moises nagsarig, bako sa sadiri niya, kundi ki Jehova. Mahihiling ta na talagang mapakumbaba si Moises.

Si Moises bakong maimon. Dai siya nag-isip na siya sana an dapat na may awtoridad. Nag-ugma siya kan tinugutan ni Jehova an ibang Israelita na magin mga propeta kaiba niya. (Bilang 11:24-29) Kan isuherir kan panugangan niyang lalaki na idelegar sa iba an nagkapirang trabaho, mapakumbabang ginibo iyan ni Moises. (Exodo 18:13-24) Asin kan madali nang magadan si Moises, dawa ngani makusog pa man, nakiulay siya ki Jehova na magnombra nin kasalida niya. Kan pilion ni Jehova si Josue, bilog na pusong sinuportaran ni Moises an mas hoben na lalaking ini, na sinasadol an banwaan na sunudon an panginginot ni Josue pasiring sa Dagang Panuga. (Bilang 27:15-18; Deuteronomio 31:3-6; 34:7) Siguradong pinahalagahan ni Moises an pribilehiyong manginot sa mga Israelita sa pagsamba. Pero mas ininot niya an ikakarahay kan iba kisa sa awtoridad niya.

ANO AN MGA LEKSIYON PARA SA SATO?

Habo nanggad niyatong magin orgulyoso huli sa kapangyarihan, awtoridad, o kakayahan. Tandaan: Tanganing magin kapakipakinabang kita ki Jehova, dapat na mas urog an satong kapakumbabaan kisa sa satong kakayahan. (1 Samuel 15:17) Kun kita tunay na mapakumbaba, pagmamaigutan tang iaplikar an madunong na sadol kan Bibliya: “Manarig ka ki Jehova sa bilog mong puso, asin dai ka manarig sa saimong pagkatatao.”—Talinhaga 3:5, 6.

Tinutukduan man kita kan halimbawa ni Moises na dai pagtawan nin labi-labing importansiya an satong posisyon o awtoridad.

Nakikinabang daw kita sa pag-arog sa halimbawa nin kapakumbabaan ni Moises? Iyo nanggad! Kun kinukultibar ta an tunay na kapakumbabaan, mas nagigin pasil an buhay kan ibang tawo sa palibot niyato asin nagigin kawili-wili kita sa sainda. Pero an mas mahalaga, nagigin kawili-wili man kita sa Diyos na Jehova, na mismong nagpapahiling kan marahayon na kuwalidad na ini. (Salmo 18:35) ‘Tinutumang nin Diyos an mga maabhaw, asin tinatawan nin biyaya an mga mapakumbaba.’ (1 Pedro 5:5) Mapuwersang dahilan nanggad iyan na arugon an kapakumbabaan ni Moises!