Limang Dekada nin Bilog na Panahon na Paglilingkod Harani sa Arctic Circle

NAKAISTAR an pamilya mi sa sarong uma sa Northern Ostrobothnia, Finland, asin sampulo kaming magturugang. Aki pa kami durante kan Giyera Mundial II. Dawa ginatos na kilometro an rayo mi sa lugar nin labanan, nakatadom sa isip mi an makaturutristeng mga nangyari sa giyera. Kan binomba an kaharaning mga siyudad, an Oulu asin Kalajoki, may nahiling kaming mapulang liwanag sa langit kan bangging idto. Sinabihan kami kan mga magurang mi na magtago tulos pag may mahiling kaming nagraralayog na eroplanong panggiyera. Kaya kan sinambit kan pinakamatua ming tugang na lalaki na si Tauno an dapit sa paraisong daga na dai na nin inhustisya, napahiro an samong puso.

Nanudan ni Tauno an mga katotoohan sa Bibliya kan 14 anyos siya paagi sa literatura kan Mga Estudyante sa Bibliya. Kan puminutok an Giyera Mundial II, nagsayuma siyang magserbisyo sa militar huli sa saiyang konsensiya na sinanay sa Bibliya, kaya prineso siya. Maringis an pagtrato sa saiya duman. Napakusog sana kaiyan an pagmawot niyang paglingkudan si Jehova, kaya pakaluwas niya sa preso nagin mas maigot pa siya sa ministeryo. An marahay na halimbawa kan tugang mi nakapahiro sa samo na umatender sa mga pagtiripon kan mga Saksi sa kataid na baryo. Nag-atender man kami sa mga kumbensiyon dawa ngani kinaipuhan ming maghinguwang marhay na makatipon nin igong kuwarta para sa pagbiyahe. Nagtatahi kami nin bado para sa mga kataid mi, nagtatanom nin sibulyas, asin namumudo nin berry. Huling dakul an gibuhon sa uma, sa parati dai kami makaatender nin sarabay sa mga kumbensiyon, kaya nagsusurusalida kami.

Huli sa mga katotoohan na nanudan mi dapit ki Jehova asin sa saiyang mga katuyuhan, ruminarom an pagkamuot mi sa saiya, asin nagdesisyon kami na idusay an samong buhay sa saiya. Kan 1947, sinimbolisaran mi an samong pagdusay paagi sa bawtismo sa tubig—si Annikki sa edad na 15 asin si Aili sa edad na 17. An tugang ming babayi na si Saimi nabawtismuhan man kan taon na idto. Tinukduan mi man sa Bibliya an tugang ming si Linnea, na may agom na kaidto. Siya asin an saiyang pamilya nagin mga Saksi ni Jehova man. Pakapabawtismo, nagin pasuhan mi na maglingkod bilang vacation pioneer (o, auxiliary payunir) sa pana-panahon.

PAGLILINGKOD NIN BILOG NA PANAHON

Kan 1955, nagbalyo kami sa Kemi, sarong siyudad na nasa mas norte pa. Dawa pareho kaming nagtatrabaho nin bilog na panahon, gusto mi pa man giraray magpayunir, pero nahahadit kami na tibaad dai mi masuportaran an samong sadiri. Inisip mi na dapat may matipon nguna kami. Nakaulay mi kan panahon na iyan an payunir na sister na sinambit sa inutan. Natabangan niya kami na masabutan na an paglilingkod ki Jehova nin bilog na panahon dai sana nakadepende sa materyal na mga bagay na yaon sa samo o sa suporta kan pamilya mi. An pinakaimportante iyo na nagsasarig kita sa satong Ama sa langit.

Kan panahon na iyan, igo na an natipon mi para suportaran an samong sadiri sa laog nin duwang bulan. Kaya kan Mayo 1957, dawa pignenerbiyos, nag-aplay kaming magpayunir nin duwang bulan sa Pello, sarong banwaan sa Lapland, sa itaas kan Arctic Circle. Pakalihis nin duwang bulan, dai nainaan an natipon mi, kaya nag-aplay kaming magpayunir nin duwa pang bulan. Pakalihis nin duwang bulan, dai pa man giraray iyan nainaan. Ngunyan sigurado na kami na aatamanon kami ni Jehova. Pakatapos nin 50 taon na pagpapayunir, yaon pa man giraray an natipon mi! Pag ginigirumdom iyan, an pagmati mi garo kami kinakaputan ni Jehova sa kamot asin sinasabihan: “Dai ka matakot. Ako mismo an matabang sa saimo.”—Isa. 41:13, NW.

Kan 1958, irinekomendar kan paraataman nin sirkito na maglingkod kami bilang espesyal payunir sa Sodankyla, Lapland. Kan panahon na idto, saro sana an Saksi duman, sarong sister. Nanudan niya an katotoohan sa interesanteng paagi. May field trip kaidto an aki niya pasiring sa Helsinki, an kabisera kan Finland. Mantang an grupo ninda naglalakaw-lakaw sa siyudad, sarong may edad nang sister an nagtao nin Torrengbantayan sa aking ini, na nasa hurihan kan linya, asin sinabihan ini na itao iyan sa saiyang ina. Ginibo iyan kan aki, asin naaraman tulos kan ina na itinutukdo kaiyan an katotoohan.

Nag-arkila kami nin kuwarto sa itaas nin sarong tistisan. Duman mi ginigibo an mga pagtiripon. Kan inot, kami sanang duwa an nag-aatender kaiba an sister na idto asin an aki niyang babayi. Magkairibanan ming binabasa an mga pag-aadalan. Dai nahaloy, nagtrabaho man sa tistisan an sarong lalaki na nakipag-adal nin Bibliya sa mga Saksi. Siya asin an saiyang pamilya nag-atender man. Dai nahaloy, nabawtismuhan sindang mag-agom. An brother na ini an nanginot sa mga pagtiripon mi. Apuwera diyan, an ibang mga lalaki na nagtatrabaho sa tistisan nag-atender na man sa mga pagtiripon asin nag-ako kan katotoohan sa Bibliya. Pakalihis nin pirang taon, duminakula an grupo mi sagkod na makabilog nin kongregasyon.

MASAKIT NA MGA KAMUGTAKAN

Dipisil para sa samo an paghuhulit huling hararayo an lugar. Kun tig-init, naglalakaw kami, nagbibisikleta, asin naggagamit pa ngani nin baroto tanganing madumanan an mga tawo sa samong teritoryo. Dakula nanggad na tabang an samong mga bisikleta. Ginagamit mi man iyan sa pag-atender sa mga kumbensiyon asin pagbisita sa mga magurang mi, na ginatos na kilometro an rayo sa samo. Kun tiglipot, nagsasakay kami sa bus nin amay na aga pasiring sa sarong baryo dangan naglalakaw sa pagduman sa mga harong. Pag natapos mi an sarong baryo, minalakaw kami pasiring sa sunod. Mahibog an niyebe, asin sa parati natatambunan kaiyan an tinampo. Pigsususog mi an gira nin mga paguyod na binubutong nin kabayo. Kun minsan natatambunan nin niyebe an gira kan nainot na nag-aragi, asin sa kapinunan nin tigsoli, malumuyon saka nagtutunaw-tunaw an niyebe kaya dipisilon an paglakaw.

Huli sa grabeng lipot asin niyebe, nakanuod kaming magbado nin mahibog. Nagsusulot kami nin stocking na gibo sa lana (wool) asin duwa o tulong padis nin medyas saka bota na haros patuhod. Pero, parating napapano nin niyebe an bota mi. Pag yaon na kami sa hagyanan nin harong, pighuhuba mi an bota tanganing halion an nakalaog na niyebe. Nababasa man an laylayan kan haralaba ming dyaket pag minalakaw kami sa niyebe. Dangan, kun lalo pang nagigin malipot, an laylayan minatagas na garo sim. An sarong ina nagsabi, “Siguradong tunay an pagtubod nindo, ta nagsadiring buot kamong magluwas maski arog kaini an panahon.” Labing 11 kilometros an linakaw mi pasiring sa harong ninda.

Huling hararayo an lugar, parati kaming nakikiturog. Kun pabanggi na, naghahapot-hapot na kami kun sain puwedeng makidagos. Simple sana an mga harong, pero mabuot asin mapag-istimar an mga tawo huling apuwera sa pagpadagos sa samo, pinapakakan man ninda kami. Sa parati, an hinihigdaan mi anit nin usa o nin oso pa ngani. Kun minsan, nakakaeksperyensiya kami nin dikit na luho. Halimbawa, an sarong babayi na dakula an harong pinasakat kami sa sarong kuwarto na para sa bisita kun sain igwa nin nakahandang magayon na kama na may malinig na puting hapin. Dakul na beses na inaabot kami nin matanga sa pakikipag-ulay sa kagharong dapit sa Bibliya. Sa sarong lugar, an mag-agom na nakaistar sa harong kaiba ming nagturog sa sarong kuwarto, sinda sa sarong gilid, kami man sa ibong. Inabot kami nin matanga sagkod maagahon sa pag-uulay dapit sa Kasuratan. Nagsusurusalida sinda sa paghapot—surunod-sunod.

NAKAKAKONTENTONG MINISTERYO

Tagiltil an daga sa Lapland pero magayon iyan na lugar, asin nagbabago an kagayunan kaiyan depende sa panahon. Pero para sa samo, mas magayon pa diyan an mga tawong nagpapahalaga ki Jehova. Kabilang sa sinserong mga tawo na nahulitan mi iyo an mga paratroso na nagpasiring sa mga trosohan sa Lapland. Kun minsan, kaming duwang sadit na babayi nakakalaog sa sarong payag na kadakul nin lalaki. Naghihinanyog an maskuladong mga lalaking ini sa mensahe kan Bibliya asin maugmang nag-aako nin literatura.

Dakul kaming nakakaugmang eksperyensiya. Sarong aldaw, inot nin limang minuto an orasan sa istasyon nin bus, kaya nabayaan kami kan bus na sasakayan mi kuta. Nagdesisyon kami na magsakay sa ibang bus na pasiring sa ibang baryo. Dai pa kami nakapaghulit duman. Sa inot na harong, sinabi sa samo nin sarong hoben na babayi, “Yaon na palan kamo. Naghahalat talaga ako.” Tinutukduan mi sa Bibliya an tugang niyang babayi, asin pinakiulayan niya ini na dumanan mi siya sa aldaw mismong idto. Pero, dai man kami nasabihan. Nakapuon kami nin pag-adal sa saiya asin sa mga paryentes niya na nakaistar sa kataid na harong. Dai nahaloy, pinagsaro mi an mga pag-adal na ini, na mga 12 katawo. Puon kaidto, dakul sa pamilyang ini an nagin mga Saksi ni Jehova.

Kan 1965, inasignar kami sa presente ming kongregasyon sa Kuusamo, sa ibaba sana kan Arctic Circle. Kan panahon na idto, pipira sana an parahayag sa kongregasyon. Kan primero, garo medyo dipisil sa bago ming teritoryo. Relihiyosong marhay an mga tawo asin habo ninda sa samo. Pero, dakul an may paggalang sa Bibliya, kaya igwa nin puntong mapagkakauyunan sa pakikipag-ulay. Kaya padikit-dikit ming hininguwa na makamidbid an mga tawo, asin pakalihis nin mga duwang taon, mas pasil nang makapuon nin pag-adal sa Bibliya.

AKTIBO PA MAN GIRARAY SA MINISTERYO

Ngunyan, mayo na kami kan kusog na maglingkod nin maghapon sa langtad nin sunod-sunod na aldaw, pero haros aroaldaw pa man giraray kaming nakikikabtang sa ministeryo. Nagin mas madali an pagpapalakop kan maugmang bareta sa mga tawo sa dakula ming teritoryo kan si Aili, sa pag-engganyar kan pamangkin ming lalaki, nag-adal magmaneho asin nagkalisensiya kan 1987 sa edad na 56. Nag-ako man kami nin dagdag na tabang kan itugdok an bagong Kingdom Hall asin nagbalyo kami sa kuwarto na kasugpon kaiyan.

Maugmahon kami huli sa nahiling ming pag-uswag. Kan nagpuon kami sa bilog na panahon na paglilingkod sa norteng parte nin Finland, may pipira sanang parahayag na magkakasuruway sa mahiwason na lugar na iyan. Ngunyan, may saro nang sirkito na kompuwesto nin nagkapirang kongregasyon. Sa mga asamblea asin kumbensiyon, parating may nagpapabisto asin naghahapot kun nagigirumduman mi siya. Sa nagkapira sa sainda, nagkondukta palan kami nin pag-adal sa Bibliya sa harong ninda kan aki pa siya. Nagbunga an banhi na itinanom dakul na taon na an nakaagi o mga dekada pa ngani!—1 Cor. 3:6.

Kan 2008, 50 taon na kami sa paglilingkod bilang espesyal payunir. Nagpapasalamat kami ki Jehova na napaparigon mi an buot kan lambang saro na magdanay sa saiyang mahalagang marhay na gibuhon. Simple sana an buhay mi, pero dai kami nuarin man nagkulang nin ano man. (Sal. 23:1) Dai man palan kami dapat nag-alangan kan inot! Nakakaugma ta sa nag-aging mga taon na ini, pinapakusog kami ni Jehova kauyon kan saiyang panuga sa Isaias 41:10 (NW): “Papakusugon taka. Talagang tatabangan taka. Talagang kakaputan taka nin marigon kan sakong tuong kamot nin katanusan.”