Maugmang Bareta Para sa Gabos na Tawo

Huli sa pagkabuhay liwat ni Jesus, an mga disipulo niya nagin maigot asin marigon an pagtubod. Si apostol Pablo partikularmente, nagbaklay sa bilog na Asia Minor asin Mediteraneo, na nag-oorganisar nin mga kongregasyon saka nagpapakusog sa mga Kristiyano na manindugan nin marigon sa mga panggigipit sa moral asin sa madahas na mga pagkontra. Sa ibong kan siring na mga kadipisilan, an Kristiyanismo uminuswag asin luminakop.

Si Pablo mismo ibinilanggo. Pero, dawa nakabilanggo, naggibo siya nin mga surat nin pagparigon sa buot asin pagsadol sa Kristiyanong mga kongregasyon. Nagpatanid siya manungod sa mas dakula pa nganing peligro—an apostasya. Sa paggiya kan banal na espiritu, patiinot na nahiling ni Pablo na may malaog sa tahaw ninda na ‘mga maringis na lobo’ na mataram nin biribid o ‘maraot na mga bagay’ asin ‘maguyod sa mga disipulo’ pasiring sainda.—Guibo 20:29, 30.

Sa pagtatapos kan inot na siglo, nagpuon na an apostasyang ini. Kan panahon na idto, itinao kan binuhay liwat na si Jesus ki apostol Juan an Kapahayagan, sarong simbolikong patanaw kan mangyayari sa maabot. Siring kan isinurat ni Juan kaidto, an Diyos dai mauulang kan mga nagkokontra ni kan palsong mga paratukdo sa lubos na pag-utob kan saiyang orihinal na katuyuhan para sa daga asin sa mga tawo. ‘An gabos na nasyon asin tribo asin tataramon patin banwaan’ makakadangog kan maugmang bareta manungod sa Kahadian nin Diyos. (Kapahayagan 14:6) Ibabalik an paraiso sa daga, asin an siisay man na gustong gibuhon an kabutan nin Diyos puwedeng magin kabtang kaiyan!

Bako daw na “maugmang bareta” iyan para saimo? Kun iyo, makanuod nin urog pa dapit sa mensahe nin Diyos para sa katawuhan na manunumpungan sa Bibliya asin kun paano ka diyan makikinabang ngunyan asin sa maabot.

Mababasa mo an Bibliya online sa www.jw.org. Masisiyasat mo man sa Web site na www.jw.org/bcl an mga brosyur na An Biblia—Ano an Mensahe Kaiyan? asin Maogmang Bareta Hale sa Dios! saka an librong Ano Man Nanggad an Itinotokdo kan Biblia? kaiba an iba pang mga publikasyon na nagtutukar kun taano ta makakapagtiwala kita sa Bibliya asin kun paano ta ikakaaplikar an praktikal na konseho kaiyan sa satong pamilya asin personal na buhay. Puwede ka man maghapot sa siisay man sa mga Saksi ni Jehova para sa dugang pang impormasyon.

—Basado sa Guibo, Efeso, Filipos, Colosas, Filemon,1 Juan, Kapahayagan.