HAPOT HALI SA MGA PARABASA

Sinabi ni Jesus sa mga Saduceo na an mga bubuhayon liwat ‘dai mag-aaragom, ni magpapaaragom.’ (Luc. 20:34-36) An sinabi daw ni Jesus nanunungod sa pagkabuhay liwat digdi sa daga?

Mahalaga an hapot na iyan, lalo na sa mga nagadanan nin namumutan na agom. Tibaad minamawot ninda na sa bagong kinaban sinda pa man giraray kan agom nindang bubuhayon liwat an magkaibanan bilang mag-agom. Sinabi nin sarong lalaking balo: “Dai mi gusto kan agom ko na matapos an pag-aguman mi. Mawot mi kaidto na magdanay na magkaibanan sa pagsamba bilang mag-agom sagkod lamang. Dai nagbago an pagmati kong ini.” May marahay daw na dahilan na maglaom na puwede pang mag-agom an mga binuhay liwat? An simpleng simbag, dai ta masasabi.

Sa laog nin dakul na taon, sinasabi sa satong mga publikasyon na an mga tataramon ni Jesus dapit sa pagkabuhay liwat asin pag-agom posibleng marhay na nanunungod sa pagkabuhay liwat digdi sa daga saka sinasabi man na an mga binuhay liwat sa bagong kinaban posibleng marhay na dai na maagom.a (Mat. 22:29, 30; Mar. 12:24, 25; Luc. 20:34-36) Minsan siring, posible daw na an mga tataramon ni Jesus nanunungod sa pagkabuhay liwat sa langit? Dai kita puwedeng magin dogmatiko sa bagay na ini, pero siyasaton ta an sinabi ni Jesus.

Pag-isipan an eksena. (Basahon an Lucas 20:27-33.) Pinurbaran kan mga Saduceo, mga dai naniniwala sa pagkabuhay liwat, na siluon si Jesus paagi sa paghapot sa saiya manungod sa pagkabuhay liwat asin pag-agom kan bayaw.b Si Jesus nagsimbag: ‘An mga aki kan kinaban na ini nag-aaragom, asin nagpapaaragom. Alagad idtong mga ibinilang na angay na magkamit kan kinaban na idto, asin kan pagkabuhay liwat sa mga gadan, dai nag-aaragom, ni nagpapaaragom. Huli ta dai na sinda magagadan, ta siring na sinda sa mga anghel asin mga aki nin Diyos, huli ta mga aki nin pagkabuhay liwat.’—Luc. 20:34-36.

Taano ta sinasabi sa satong mga publikasyon na posibleng nanunungod sa pagkabuhay liwat digdi sa daga an sinabi ni Jesus? An kongklusyon na iyan basado sa duwang panginot na dahilan. Inot, posibleng an nasa isip kan mga Saduceo iyo an pagkabuhay liwat digdi sa daga kaya posibleng sinimbag sinda ni Jesus uyon sa iniisip ninda. Ikaduwa, tinapos ni Jesus an simbag niya paagi sa pagsambit ki Abraham, Isaac, asin Jacob—maimbod na mga patriyarka na bubuhayon liwat sa daga.—Luc. 20:37, 38.

Pero, garo posible man na pagkabuhay liwat sa langit an nasa isip ni Jesus. Taano ta masasabi niyato iyan? Pag-ulayan ta an duwang importanteng marhay na frase.

‘Idtong mga ibinilang na angay na magkamit kan pagkabuhay liwat sa mga gadan.’ An maimbod na mga linahidan ‘ibinilang na angay sa Kahadian nin Diyos.’ (2 Tes. 1:5, 11) Ipinahayag sindang matanos para sa buhay basado sa atang na pantubos; kaya, dai sinda magagadan bilang kinondenar na mga parakasala. (Roma 5:1, 18; 8:1) Inaapod sinda na “maugma asin banal” saka ibinibilang sindang angay na buhayon liwat sa langit. (Kap. 20:5, 6, NW) Sa ibong na lado, kaiba sa mga bubuhayon liwat sa daga an mga ‘bakong matanos.’ (Gui. 24:15) Masasabi daw na ‘ibinilang sindang angay’ sa pagkabuhay liwat?

“Dai na sinda magagadan.” Sa ibang traduksiyon, itrinadusir iyan na “dai na sinda sakop kan kagadanan” asin “dai nang kapangyarihan an kagadanan sa sainda.” An mga linahidan na magagadan na maimbod, bubuhayon liwat pasiring sa langit asin tatawan nin imortalidad—daing katapusan asin daing kalaglagan na buhay. (1 Cor. 15:53, 54) Mayo na nin ano man na kapangyarihan an kagadanan sa mga nag-ako nin pagkabuhay liwat pasiring sa langit.c

Base sa mga impormasyon na iyan, ano an maikokongklusyon ta? An mga tataramon ni Jesus dapit sa pag-agom asin pagkabuhay liwat posibleng nanunungod sa pagkabuhay liwat pasiring sa langit. Kun iyo, manunudan ta sa mga sinabi niya an nagkapirang bagay dapit sa mga bubuhayon liwat pasiring sa langit: Dai sinda mag-aaragom, dai sinda magagadan, asin may pagkakaagid sinda sa mga anghel—mga espiritung linalang na nag-iirok sa runa nin mga espiritu. Pero, an kongklusyon na iyan nagpapalataw nin nagkapirang hapot.

Inot, kun pagkabuhay liwat sa daga an posibleng nasa isip kan mga Saduceo, taano ta pagkabuhay liwat pasiring sa langit an sinasabi ni Jesus sa simbag niya? Dai pirming sinisimbag ni Jesus an mga nagkokontra sa saiya uyon sa kun ano an iniisip ninda. Halimbawa, sa mga Judio na naghahagad sa saiya nin tanda, sinabi niya: ‘Gabaon nindo an templong ini, asin sa tulong aldaw papatindugon ko iyan.’ Posibleng marhay na aram ni Jesus na an iniisip ninda iyo an templo, pero an sinasabi ni Jesus iyo an ‘templo kan saiyang hawak.’ (Juan 2:18-21) Tibaad para ki Jesus, dai niya kaipuhan simbagon an bakong sinserong mga Saduceo, na dai man nagtutubod sa pagkabuhay liwat o sa pag-eksister nin mga anghel. (Tal. 23:9; Mat. 7:6; Gui. 23:8) Imbes, tibaad gusto niyang ihayag an katotoohan manungod sa pagkabuhay liwat pasiring sa langit para sa kapakinabangan kan sinsero niyang mga disipulo, na maako nin siring na pagkabuhay liwat pag-abot nin panahon.

Ikaduwa, taano ta tinapos ni Jesus an pakikipag-ulay niya paagi sa pagsambit ki Abraham, Isaac, asin Jacob, na mga bubuhayon liwat digdi sa daga? (Basahon an Mateo 22:31, 32.) Mangnuhon na bago sinambit ni Jesus an mga patriyarkang idto, sinabi nguna niya an mga tataramon na ‘dapit sa pagkabuhay liwat nin mga gadan.’ Posibleng ipinaparisa kan fraseng ini na nagbago an pokus kan pag-uulay, hali sa pagkabuhay liwat sa langit pasiring sa pagkabuhay liwat sa daga. Aram ni Jesus na inaako kan mga Saduceo an mga isinurat ni Moises, kaya kinotar niya an mga tataramon ni Jehova ki Moises sa naglalaad na palungpong tanganing patunayan ni Jesus sa mga Saduceo na an pagkabuhay liwat sa daga kabtang kan katuyuhan nin Diyos.—Ex. 3:1-6.

Ikatulo, kun an mga tataramon ni Jesus manungod sa pagkabuhay liwat asin sa pag-agom nanunungod sa pagkabuhay liwat sa langit, nangangahulugan daw ini na makakapag-agom pa an mga bubuhayon liwat sa daga? An Tataramon nin Diyos dai nagtatao nin direktang simbag sa espesipikong hapot na iyan. Kun manungod man nanggad sa pagkabuhay liwat pasiring sa langit an sinasabi ni Jesus, kun siring, an mga tataramon niya mayo nin ano man na sinasabi kun baga an mga bubuhayon liwat digdi sa daga makakapag-agom pa sa bagong kinaban.

Miyentras tanto, malinaw na sinasabi kan Tataramon nin Diyos na tinatapos kan kagadanan an bugkos nin pag-aguman. Kaya dai dapat makonsiyensiya an mga balo kun magdesisyon sindang mag-agom giraray. Personal na desisyon iyan, asin dai siya dapat husgaran kun maghanap siya nin agom na makakaiba-iba niya.—Roma 7:2, 3; 1 Cor. 7:39.

Natural sana na dakul kitang hapot manungod sa buhay sa bagong kinaban. Imbes na magparabana-bana sa kun ano an simbag sa mga hapot na iyan, mas marahay na maghalat na sana kita. Pero ini an masisiyerto ta: Magigin maugma an makinuyog na mga tawo, huling papaniguan ni Jehova an gabos nindang pangangaipo asin kamawutan sa pinakamarahay na paaging posible.—Sal. 145:16.