An “Eureka Drama” Nakatabang sa Dakul na Makua an Katotoohan sa Bibliya

“EUREKA!” An buot sabihon “Nakua ko na!” Ini an ikinukurahaw pag nakakanumpong nin bulawan an sarong minero kaidtong nagdaragsaan an mga tawo sa paghanap nin bulawan sa California, U.S.A. kan ika-19 siglo. Pero, si Charles Taze Russell asin an kaiba niyang mga Estudyante sa Bibliya may nakuang mas mahalagang marhay na bagay—an katotoohan sa Bibliya. Asin gustong-gusto nindang sabihon man iyan sa iba.

Kan tig-init kan 1914, minilyon sa darakulang siyudad an nagdalan kan “Photo-Drama of Creation,” na walong oras na pelikula na prinodusir kan International Bible Students Association (I.B.S.A.). An presentasyon na ini na basado sa Bibliya may kahanga-hangang pelikula, buhay na buhay saka makulor na mga slide, magayunon na pagkasaysay, asin marahayon na klasikal na musika. Ipinahiling kaini an paglalang pati an kasaysayan nin tawo sagkod sa pagtatapos kan Sangribong Taon na Paghadi ni Jesu-Cristo.—Kap. 20:4.a

Pero paano an mga nasa saradit na banwaan asin probinsiya? Tanganing daing malipasan na mga nagugutom sa katotoohan, kan Agosto 1914, ilinuwas kan I.B.S.A. an “Eureka Drama”—sarong bersiyon kan “Photo-Drama” na mayong pelikula asin madaling bitbiton. May tulong mapagpipilian na makukua sa nagkapirang lengguwahe: An set na “Eureka X” igwa kan gabos na nakarekord na pagkasaysay asin musika. An set na “Eureka Y” igwa kan gabos na rekording na may magagayon saka makulor na mga slide. Asin an “Eureka Family Drama,” na ginibo para dalanon o hilingon sa harong, may pinili sanang pagkasaysay asin mga himno. May makukua man na baratong ponograpo asin projector sa pagpasali nin mga slide.

Huling dai na nangangaipo nin film projector o dakulang tilon, puwedeng darahon kan mga Estudyante sa Bibliya an libreng mga presentasyon na ini sa probinsiya kaya nakakaabot sa bagong mga teritoryo an mensahe kan Kahadian. An set na “Eureka X” na puro audio sana puwedeng patugtugon aldaw o banggi. An projector nin slide kan “Eureka Y” puwedeng paandaron na daing kuryente, gamit an carbide lamp. “Puwede ming ipahiling an mga ritratong ini sa haros sain man na lugar,” an sabi nin sarong report sa Watch Tower na Finnish. Asin iyo man nanggad!

Imbes na mag-arkila nin darakulang teatro, an mapamaaging mga Estudyante sa Bibliya sa parati nakakahanap nin libreng mga pasilidad arog nin mga eskuwelahan, hukuman, istasyon nin tren, asin darakulang harong pa ngani. Dakul man na presentasyon an ginibo sa luwas na an pinakatilon iyo an sarong dakulang puting tela na nakasabit sa gilid nin kamalig. Si Anthony Hambuch nagsurat: “Naggigibo an mga parauma nin garo sadit na istadyum sa tatamnan ninda, na may dakul na troso na matutukawan kan mga mahiling kan programa.” Naggamit an grupo ninda nin karetela na guyod nin kabayo, na inaapod na “Drama wagon,” tanganing lunadan kan mga kasangkapan ninda, mga bagahe, asin kagamitan sa pagkamping saka pagluto.

Kun minsan nagkapira sana an nagdadalan kan “Eureka,” pero minsan ginatos. Sa Estados Unidos, 400 an naghiling sa mga pagpasali sa eskuwelahan sa sarong banwaan na 150 sana an residente. Sa iba pang lugar, may mga naglakaw nin walong kilometro pasiring asin walong kilometro papuli tanganing mahiling an “Eureka Drama.” Sa Sweden, an pagtaraid ni Charlotte Ahlberg na nagtiripon sa sadit niyang harong “talagang napahiro” kan madangog an mga rekording na iyan. Sa sarong harayong siyudad nin minahan sa Australia, mga 1,500 an nag-abot tanganing magdalan. Nagreport an Watch Tower na sa mga hayskul asin kolehiyo, “napahanga an mga propesor asin mga estudyante sa mga ritrato asin magagayon na rekording sa ponograpo.” Popular man an “Eureka Drama” dawa sa mga lugar na may mga sinehan.

PAGKULTIBAR KAN MGA BANHI NIN KATOTOOHAN

Nagin kapaki-pakinabang an “Eureka Drama” sa “Class Extension Work,” sarong programa kun sain nagpapadara an mga klase kan mga Estudyante sa Bibliya nin mga ispiker tanganing makapuon nin bagong mga klase sa pag-adal sa Bibliya. Masakit maaraman kun gurano kadakul an nakahiling kan “Eureka Drama.” Dakul na set nin “Drama” an pauruutrong nagamit. Pero kan 1915, 14 sana sa 86 na grupong nagpapasali kan “Drama” an regular na nagrereport. Minsan ngani bakong kumpleto an report, uyon sa sumaryo kan mga report sa katapusan kan taon, labing sarong milyon an nakadalan kan “Drama.” Mga 30,000 an nag-request nin mga literatura na basado sa Bibliya.

Tibaad daing gayo nagin memorable sa kasaysayan an “Eureka Drama,” pero puon sa Australia sagkod sa Argentina, puon sa South Africa sagkod sa British Isles, India, asin Caribbean, minalataw na minilyon an nakahiling kan daing kaagid na presentasyon na ini. Nakua kan dakul sa sainda an katotoohan sa Bibliya—na mas mahalagang marhay sa bulawan—asin naikurahaw ninda an “Eureka!”