Watchtower ONLINE NA LIBRARYA
Watchtower
ONLINE NA LIBRARYA
Bicol
  • BIBLIYA
  • PUBLIKASYON
  • PAGTIRIPON
  • w16 Marso p. 26-28
  • Arugon an Pagigin Mapagsakripisyo kan mga Propeta

Mayong video na available para digdi.

Sori, may error sa pag-load kan video.

  • Arugon an Pagigin Mapagsakripisyo kan mga Propeta
  • An Torrengbantayan Nagpapahayag kan Kahadian ni Jehova (Pag-aadalan)—2016
  • Mga Subtema
  • Kaagid na Materyal
  • MAIGOT SINDANG NAGHINGUWA
  • NAPAGLABANAN NINDA AN PANGLULUYA NIN BUOT
  • NAPANGGANAHAN NINDA AN NEGATIBONG MGA PAGMATI
  • Tinatabangan Kita kan Hula ni Oseas na Maglakaw sa Kaibanan nin Dios
    An Torrengbantayan Nagpapahayag kan Kahadean ni Jehova—2005
  • Gibuhon na Arugan an mga Propeta—Si Oseas
    An Satong Ministeryo sa Kahadean—2013
  • Tampok na mga Kabtang sa Libro nin Oseas
    An Torrengbantayan Nagpapahayag kan Kahadean ni Jehova—2007
  • Maglakaw sa Kaibanan nin Dios, Asin Mag-ani nin Marahay
    An Torrengbantayan Nagpapahayag kan Kahadean ni Jehova—2005
Iba Pa
An Torrengbantayan Nagpapahayag kan Kahadian ni Jehova (Pag-aadalan)—2016
w16 Marso p. 26-28
Si Ezequiel na nakahigda sa saiyang walang tagiliran paatubang sa ladrilyo na nakaukit sa ibabaw an siyudad nin Jerusalem

Gikan sa buot na iinakto ni Ezequiel an piguratibong pagsalikop sa Jerusalem

Arugon an Pagigin Mapagsakripisyo kan mga Propeta

MAY pagkakaagid ka daw sa mga propeta nin Diyos kaidto? Sa “Glossary of Bible Terms” kan 2013 edisyon kan New World Translation, arog kaini an itinaong kahulugan para sa sarong propeta: “Sarong tawong ginagamit nin Diyos para ipaaram an Saiyang mga katuyuhan. An mga propeta an nagin tagapagtaram nin Diyos, na ipinapaabot bako sana an mga prediksiyon kundi pati man an mga katukduan, pagbuot, asin paghukom ni Jehova.” Dawa dai ka nagpapaabot nin mga prediksiyon, saro kang tagapagtaram nin Diyos huling ibinabalangibog mo an mga nasa Tataramon niya.—Mat. 24:14.

Dakulang pribilehiyo nanggad para sa sato na isabi sa iba an mapadapit sa satong Diyos, si Jehova, asin itukdo sa sainda an saiyang mga katuyuhan para sa katawuhan! Nakikikabtang kita sa gibuhon na ini kaiba an “anghel na naglalayog sa kaitaasan.” (Kap. 14:6, BPVa) Pero, tibaad mapaatubang kita sa mga pagbalo na puwedeng makapalingaw sa sato kun gurano kadakula an pribilehiyo na makikabtang sa gibuhon na ini. Ano an nagkapira sa mga pagbalong iyan? Tibaad napapagal na kita, pinangluluyahan nin buot, o nakakamati nin negatibo. Namatian man iyan kan maimbod na mga propeta kaidto, pero dai sinda suminuko. Tinabangan sinda ni Jehova tanganing mautob ninda an saindang mga asignasyon. Hilingon niyato an nagkapirang halimbawa asin aramon kun paano ta sinda maaarog.

MAIGOT SINDANG NAGHINGUWA

Tibaad may mga panahon na pagal na kita sa satong aroaldaw na mga aktibidad asin namamatian niyato na dai ta na kayang makikabtang sa paghuhulit. Totoo, kaipuhan man niyatong magpahingalo arog kan ginibo ni Jesus asin kan saiyang mga apostol. (Mar. 6:31) Pero, isipa si Ezequiel kan siya nasa Babilonya asin an misyon niya para sa mga Israelita na dinarang bihag hali sa Jerusalem. Sinabi kaidto nin Diyos ki Ezequiel na kumua nin ladrilyo asin iukit sa ibabaw kaiyan an siyudad nin Jerusalem. Dangan, piguratibong sasalikupan ni Ezequiel an inukit na siyudad paagi sa paghigda sa saiyang walang tagiliran sa laog nin 390 aldaw dangan sa saiyang tuong tagiliran sa laog nin 40 aldaw. Sinabi ni Jehova ki Ezequiel: ‘Gagapuson taka tanganing dai ka magparaturutagilid sagkod na dai pa natatapos an [saimong pagsalikop].’ (Eze. 4:1-8, BPV) Siguradong nakua kaiyan an atensiyon kan mga Israelitang bihag. Sa laog nin labing sarong taon, gigibuhon ni Ezequiel an mapagal na asignasyon na ini. Paano ini magigibo kan propeta?

Nasasabutan ni Ezequiel kun taano ta isinugo siya bilang propeta. Kan isinusugo nin Diyos si Ezequiel, sinabi niya sa saiya: “Magdangog man [an mga Israelita] o dai, maaaraman ninda na igwa nin sarong propeta sa tahaw ninda.” (Eze. 2:5, BPV) Dai niya liningawan an katuyuhan kan pagsugo sa saiya. Kaya gikan sa buot niyang iinakto an piguratibong pagsalikop sa Jerusalem. Asin napatunayan na saro talaga siyang propeta. Sarong bareta an nakaabot sa saiya asin sa mga kapwa niya bihag: ‘Buminagsak na an Jerusalem!’ Iyo, naaraman kan mga Israelita na igwa nin sarong propeta sa tahaw ninda.—Eze. 33:21, 33, BPV.

Sa ngunyan, pinapatanidan ta an mga tawo mapadapit sa nagdadangadang na kalaglagan kan enterong sistema nin mga bagay ni Satanas. Dawa kun tibaad pagal na kita, padagos pa man giraray kitang naghuhulit kan Tataramon nin Diyos, nagdadalaw liwat, asin nagkokondukta nin mga pag-adal sa Bibliya. Mantang nauutob an mga hula dapit sa pagtatapos kan sistemang ini, sarong kaugmahan nanggad para sa sato na mapabilang sa mga “ginagamit nin Diyos para ipaaram an Saiyang mga katuyuhan.”

NAPAGLABANAN NINDA AN PANGLULUYA NIN BUOT

Maigot kitang nakakapaghinguwa sa tabang kan banal na espiritu ni Jehova; pero kun beses, tibaad pinangluluyahan kita nin buot huli sa nagigin reaksiyon kan mga tawo sa dara niyatong mensahe. Makakatabang sa sato kun gigirumdumon ta an halimbawa ni propeta Jeremias. Tinuya-tuya siya kaidto, ininsulto, asin kinantiyawan kan ipinapaabot niya an mensahe nin Diyos sa mga Israelita. May panahon ngani na nasabi ni Jeremias: “Dai ko na siya sasambiton, asin dai na ako mataram pa sa ngaran niya.” Tawo man si Jeremias na may pakamati siring sa sato. Pero, padagos niyang ipinaabot an mensahe nin Diyos. Taano? Sinabi pa kan propeta: “Pero sa sakong puso iyan nagin siring sa naglalaad na kalayo na nalalaom sa sakong mga tulang, asin napagal ako sa kapupugol kaiyan; dai ko na iyan natagalan.”—Jer. 20:7-9, NW.

Kaagid kaiyan, kun pinangluluyahan man kita nin buot huli sa reaksiyon kan mga tawo sa dara niyatong mensahe, malalabanan ta iyan paagi sa paghurop-hurop sa mensahe na ihinuhulit niyato. Puwede iyan na magin ‘siring sa naglalaad na kalayo na nalalaom sa satong mga tulang.’ Kun magigin kaugalian niyatong basahon an Bibliya aroaldaw, mapagdadanay tang naglalaad sa satong puso an kalayong iyan.

NAPANGGANAHAN NINDA AN NEGATIBONG MGA PAGMATI

May mga Kristiyano na natawan nin asignasyon an nahahadit huling dai ninda aram kun paano ninda isasagibo iyan o kun taano ta itinao iyan sa sainda. Tibaad arog kaiyan an namatian ni propeta Oseas. Ipinagbuot ni Jehova sa saiya: ‘Lakaw, umagom ka nin sarong babaying parapasambay, asin [magkaigwa ka nin] mga aki sa pakipagsambay.’ (Os. 1:2) Isip-isipa na sana an mamamatian mo kun sabihon sa saimo nin Diyos na mag-agom nin sarong parapasambay o hostes! Pero, inako ni Oseas an asignasyon. Kinua niyang magin agom si Gomer, asin nangaki ini nin lalaki. Kan huri, nangaki giraray ini nin sarong babayi asin saro pang lalaki. Minalataw na an duwang huring aki resulta kan pakikisambay kaini. Sinabi ni Jehova ki Oseas na an saiyang magigin agom ‘lalapagon an mga namumuot’ digdi. Mangnuhon—‘mga namumuot.’ Dangan, pupurbaran kaining bumalik ki Oseas. Ngunyan, kun ika an propeta, kukuanon mo pa daw giraray an saimong agom? Iyan mismo an ipinagibo ni Jehova ki Oseas! Binakal pa ngani ini kan propeta sa dakulang kantidad tanganing makabalik sa saiya.—Os. 2:7, BPV; 3:1-5.

Tibaad inisip ni Oseas kun ano man an pakinabang kan pag-utob niya sa asignasyon na ini. Pero, huli sa maimbod na pag-akto ni Oseas sa itinaong papel sa saiya nin Diyos sa tunay na buhay na dramang ini, tinabangan niya kita na masabutan an kulog na namatian kan Makakamhan sa Gabos kan magtraydor sa saiya an Israel. Sa katunayan, may mga sadiyosan an puso na Israelita an nagbalik sa Diyos huli kaiyan.

Dai na ipinagbubuot nin Diyos sa siisay man ngunyan na ‘umagom nin sarong babaying parapasambay.’ Pero, may manunudan daw kita sa pagigin andam ni Oseas na akuon an arog kaiyan na asignasyon? An sarong leksiyon iyo na magin andam kitang ihulit nin ‘hayag asin sa mga harong’ an maugmang bareta kan Kahadian dawa kun dipisil iyan para sa sato. (Gui. 20:20) Posibleng bakong pasil sa saimo an nagkapirang aspekto kan paghuhulit kan Kahadian. Dakul sa mga nakipag-adal sa mga Saksi ni Jehova an nagsabi na gusto nindang mag-adal nin Bibliya pero nungka sindang maiba sa paghuhulit sa harong-harong. Dakul sa sainda an kan huri, nakikikabtang na sa gibuhon na dating iniisip nindang imposible para sa sainda. May nahihiling ka daw na leksiyon diyan?

May saro pa kitang manunudan sa pag-ako ni Oseas sa dipisil na asignasyon sa saiya. Dakul kutana siyang dahilan para magsayumang makikabtang sa simbolikong dramang iyan. Siisay man an ibang tawong makakaaram sa asignasyon ni Oseas sagkod na dai pa niya naisusurat an istoryang iyan? Tibaad mapaatubang man kita sa sarong sitwasyon na diyan may oportunidad kitang isabi sa iba an manungod ki Jehova asin mayo man nin ibang nakakaaram sa oportunidad tang iyan. Nangyari iyan ki Anna, sarong estudyante sa hayskul sa Estados Unidos. Hinagad kan saiyang maestra sa bilog na klase na maggibo nin essay dapit sa mga bagay o isyu na pinaniniwalaan ninda asin pupurbaran nindang kumbinsiron an mga kaklase ninda. Puwede kutanang palampason ni Anna an oportunidad na ini na makapagpatotoo. Pero, naisip niya na an Diyos an nagtao kan oportunidad na ini. Huling aram niya an puwedeng magin reaksiyon kan mga kaklase, namibi siya ki Jehova, asin nagkaigwa siya nin kusog nin buot na aprobetsaran an oportunidad na ini. Nagsurat siya nin essay na may temang “Ebolusyon: Estudyaran an Ebidensiya.”

Sarong hoben na sister na idinedepensa an saiyang pagtubod sa atubangan kan saiyang mga kaklase

Inaarog kan satong mga hoben an mga propeta—daing takot nindang idinedepensa si Jehova bilang satong Kaglalang

Kan iprinesentar ni Anna an essay sa saiyang mga kaklase, pinauranan siya nin hapot kan saro niyang kaklaseng babayi na midbid nindang naniniwala sa ebolusyon. Mapangganang naidepensa ni Anna an saiyang pagtubod. Napahangang marhay an maestra niya asin itinao sa saiya an award para sa pinakanakakakumbinsir na essay. Puon kaidto, parati nang kaulay ni Anna mapadapit sa paglalang an kaklase niyang nagpauran sa saiya nin hapot. Bilang resulta kan pag-ako niya sa “asignasyon” na ini hali ki Jehova, si Anna nagsabi, “May kumpiyansa saka daing takot ko nang naihuhulit ngunyan an maugmang bareta.”

Dawa bako kitang mga propeta sa lubos na paagi, kun aarugon niyato an pagigin mapagsakripisyo kan mga propetang arog ni Ezequiel, Jeremias, asin Oseas, mapanggana man niyatong magigibo an mga kabutan ni Jehova para sa sato ngunyan! Sa saindong pampamilyang pagsamba o personal na pag-adal, taano ta dai nindo purbaran na basahon an istorya kan iba pang mga propeta kaidto asin hurop-hurupon kun paano nindo maaarog an saindang mga halimbawa?

a An Marahay na Bareta Biblia (Bikol Popular Version).

    Bicol Publications (1983-2025)
    Mag-log Out
    Mag-log In
    • Bicol
    • I-share
    • Settings na Gusto Mo
    • Copyright © 2025 Watch Tower Bible and Tract Society of Pennsylvania
    • Kasunduan sa Paggamit
    • Palisiya sa Privacy
    • Privacy Settings
    • JW.ORG
    • Mag-log In
    I-share