Dating mga Madre na Nagin Tunay na mga Sister sa Espirituwal

Felisa: Nagdakula ako sa sarong debotong marhay na pamilya. Sa katunayan, 13 sa mga paryente mi an padi o miyembro kan orden nin Katoliko. Idineklarar pa nganing banal ni Pope John Paul II an sarong pinsan kan sakong ina, na nagin padi asin paratukdo sa sarong Katolikong eskuwelahan. Simple sana an buhay kan pamilya mi. Panday an sakong ama, asin nagtatrabaho sa uma an sakong ina. Ako an pinakamatua sa samong walong magturugang.

Kan 12 anyos ako, nagpuon an Giyera Sibil sa España. Pagkatapos kan giyera, napreso an sakong ama. Ikinaanggot kan diktador na gobyerno an saiyang paniniwala na dapat tawan nin dakul na katalingkasan an mga tawo. Nasakitan an sakong ina na buhayon an pamilya mi, kaya irinekomendar kan sarong amiga niya na ipadara an tulo kong mas hoben na tugang na babayi—si Araceli, Lauri, asin Ramoni—sa sarong kumbento sa Bilbao, España. Minsan paano dai sinda magugutom duman.

Araceli: Kan panahon na idto, 14, 12, asin 10 anyos pa sana an mga edad mi, asin masakit na marhay para sa samo na mapasuway sa pamilya. Paralinig an nagin trabaho mi sa kumbento sa Bilbao. Pakalihis nin duwang taon, ibinalyo kami kan mga madre sa sarong mas dakulang kumbento sa Zaragoza na nag-aasikaso sa mga may edad na. Paralinig kami kan kusina, mapagalon na trabaho iyan para sa mga tin-edyer na arog mi.

Felisa: Kan ibalyo sa Zaragoza an mga tugang ko, nagdesisyon an sakong ina asin an tiyuon kong padi sa lugar mi, na dapat man akong magtrabaho sa kumbentong idto. Inisip ninda na mairarayo ako kaiyan sa sarong lalaki sa lugar mi na may gusto sa sako. Huling relihiyosong marhay ako, nagustuhan ko an ideya na mag-istar nguna sa sarong kumbento. Dati na akong nag-aatender sa Misa aroaldaw, asin naisip ko pa ngani na magin sarong misyonera arog kan saro kong pinsan na prayle sa Aprika.

Mayong ginibo an mga madre para suportaran an pangarap kong sa ibang nasyon maglingkod sa Diyos, asin huli sa buhay sa kumbento, pagmati ko garo ako nakapreso. Kaya pakalihis nin sarong taon, nagdesisyon akong magpuli para magtabang sa tiyuon kong padi sa lugar mi. Apuwera sa paggibo sa mga trabaho sa harong, iniibanan ko siyang magrosaryo burubanggi. Gusto ko man na pinapakarhay an mga burak sa simbahan asin binabaduan an mga imahen kan birhen asin kan “mga santo.”

Araceli: Nagbago an buhay mi sa kumbento. Pagkatapos kan inot kong pagpanata, nagdesisyon an mga madre na pagsuruwayon kaming magturugang. Si Ramoni nawalat sa Zaragoza, si Lauri nagpasiring sa Valencia, asin ako ipinadara sa Madrid, na diyan ko ginibo an huri kong pagpanata. An kumbento sa Madrid may kuwartong paarkilahan para sa mga estudyante, may edad na, asin iba pang bisita, kaya dakulon an trabaho mi. Nagtrabaho ako sa infirmary kan kumbento.

An totoo, naglaom ako na mas maugma an buhay nin sarong madre. An paghuna ko dakul kaming gigibuhon na pagbasa sa Bibliya asin dakul akong manunudan. Pero mayo lamang nin nakikipag-ulay dapit sa Diyos o ki Jesus, asin dai mi ginagamit an Bibliya. An nanudan ko sana dikit na Latin, buhay nin “mga santo,” asin pagsamba ki Maria. Apuwera sa mga iyan, gabos magagabat nang trabaho.

Nagpuon na akong mahadit asin ma-stress, kaya nakipag-ulay ako sa madre superyora. Sinabi ko sa saiya na bakong tama na nagpapagal ako para magkakuwarta an ibang tawo mantang an sakong pamilya nangangaipo kan tabang ko. Linaom niya ako sa sarong selda sa paghuna na mababago kaiyan an isip ko asin dai na ako mahali sa kumbento.

Tulong beses akong pinaluwas kan mga madre sa selda para maaraman kun baga nagbago na an isip ko. Huling determinado akong maghali, sinabi ninda sako na gumibo nin surat na nagsasabi, “Mahali ako huling mas gusto kong maglingkod ki Satanas kisa sa Diyos.” Nabigla ako sa kahagadan na iyan, pero dawa gustong-gusto kong maghali sa kumbento, nungka kong isusurat iyan. Kan huri, nakiulay akong makapagkumpisal sa sarong padi, asin sinabi ko sa saiya an mga nangyari. Inareglar niya na maibalyo ako kan diosesis sa dati kong kumbento sa Zaragoza. Pakalihis nin pirang bulan duman, tinugutan na akong maghali. Dai nahaloy, naghali na man sa kumbento si Lauri asin Ramoni.

PINAGSURUWAY KAMI NIN SARONG “IPINAGBABAWAL” NA LIBRO

Felisa: Pag-abot nin panahon, ikinasal ako asin nagbalyo sa Cantabria. Regular pa man giraray akong nag-atender sa Misa, asin sarong Domingo, sarong nakakabiglang paisi an ikinurahaw kan anggot na padi. “Hilinga nindo an librong ini!” asin itinukdo niya an librong An Katotoohan na Minagiya Pasiring sa Buhay na Daing Sagkod. Tapos, sinabi niya, “Kun may magtao saindo kan librong ini, itao nindo sako o kaya iapon nindo iyan!”

Mayo ako kan librong iyan, pero gusto kong magkaigwa tulos kaiyan. Pakalihis nin pirang aldaw, duwang babaying Saksi an nagtuktok sa pinto mi asin iinalok sako an “ipinagbabawal” na libro. Binasa ko iyan kan mismong bangging idto, asin kan magbalik sinda, nag-uyon akong makipag-adal nin Bibliya sa sainda.

Dai nahaloy, napahiro kan katotoohan an puso ko. An debosyon ko sa dati kong relihiyon nasalidahan nin hararom na pagkamuot ki Jehova asin kaigutan sa ministeryo. Nabawtismuhan ako kan 1973. Dikit sana an oportunidad na maipaabot ko an katotoohan sa sakong pamilya, pero sagkod na posible, ginigibo ko iyan. Arog kan sinabi ko sa kapinunan, grabe an pagkontra ninda sa sakong mga tinutubod, lalo na an tugang kong si Araceli.

Araceli: Huli sa maraot na mga nangyari sa sako sa kumbento, nagraot na marhay an buot ko sa relihiyon ko. Pero, padagos pa man giraray akong nag-aatender sa Misa pag Domingo, saka aroaldaw akong nagrorosaryo. Gustong-gusto ko pa man giraray na masabutan an Bibliya, asin naghagad ako nin tabang sa Diyos. Pero kan ipakipag-ulay sa sako kan tugang kong si Felisa an bago niyang pagtubod, garo siguradong-sigurado na siya diyan kaya naisip kong grabe man an pagkapanatiko niya. Kaya talagang kinontra ko siya.

Pakalihis nin pirang taon, nagbalik ako sa Madrid para magtrabaho dangan ikinasal ako. Pag-abot nin panahon, nagin mapagduda na akong marhay sa relihiyon. Narisa ko na dai man ginigibo kan mga tawong regular na nag-aatender sa Misa an mga itinutukdo sa mga Ebanghelyo. Kaya dai na ako nagsimba. Dai na ako nagtubod sa “mga santo,” pagkumpisal, o sa impiyerno. Asin hinarali ko pa ngani an mga imahen sa harong mi. Dai ko aram kun baga tama an mga ginigibo ko. Disganado ako, pero padagos akong namibi sa Diyos: “Gusto taka pong mamidbid. Tabangan po nindo ako!” Dangan, nagirumduman ko kaidto, may mga Saksi ni Jehova na pirang beses nagduman sa harong, pero nungka kong binuksan an pinto. Mayo na akong tiwala sa ano man na relihiyon.

Sa kapinunan kan dekada nin 1980, an tugang kong si Lauri na nakaistar sa Pransia asin si Ramoni na nasa España, parehong nakikipag-adal na nin Bibliya sa mga Saksi. Inisip kong nalagalag na sinda, arog kan nangyari ki Felisa. Pagkatapos, namidbid ko an kataid ming si Angelines, na nagin dayupot kong amiga. Saro man siyang Saksi ni Jehova. Pirmi niya akong dinadagka asin kan agom niya na mag-adal nin Bibliya. Narisa ninda na dawa mapagduda ako sa relihiyon, paha ako sa kaaraman sa Bibliya. Sa kahuri-hurihi, sinabi ko sa sainda: “Sige. Matugot sana akong makipag-adal sa saindo kun sadiri kong Bibliya an gagamiton ko.” An sinasabi ko idtong sakong Nácar-Colunga na traduksiyon kan Bibliya.

PINAGSARARO MAN GIRARAY KAMI KAN BIBLIYA

Felisa: Kan mabawtismuhan ako kan 1973, mga 70 an Saksi sa siyudad nin Santander, an kabisera kan probinsiya nin Cantabria, España. Mahiwason an teritoryo mi, kaya nagsasakay kaming bus dangan kotse para mahulitan an bilog na probinsiya. Dinumanan mi an kada baryo sagkod na ginatos na baryo na sa rehiyon an nahulitan mi.

Sa paglihis nin mga taon, nagkapribilehiyo akong makapagkondukta nin dakul na pag-adal sa Bibliya asin 11 sa mga tinutukduan ko an nabawtismuhan na. Katoliko an kadaklan sa sainda. Huling dati man akong deboto, aram ko na kaipuhan kong magin mapasensiya asin mapagsabot. Aram kong kaipuhan ninda nin panahon para makabutas sa makusog na pangangapot sa mga paniniwala ninda. Saka kaipuhan na mapahiro an saindang puso kan Bibliya asin kan banal na espiritu ni Jehova tanganing matabangan sindang maaraman an katotoohan. (Heb. 4:12) An sakong agom na si Bienvenido, na dating pulis, nabawtismuhan kan 1979. Asin nakikipag-adal na man sa Bibliya an sakong ina bago siya magadan.

Araceli: Sa mga inot na pakipag-adal ko nin Bibliya sa mga Saksi, nagin mapagsuspetsa akong marhay sa sainda. Pero sa paglihis nin mga semana, bako nang arog kaiyan an namamatian ko sa sainda. An pinakahinangaan ko sa mga Saksi iyo na ginigibo ninda an mga ihinuhulit ninda. Naribayan nin pagtubod an pagigin mapagduda ko, asin nagin mas maugma ako. An sabi pa ngani kan ibang kataid mi, “Araceli, ipagpadagos mo ‘yang dalan na napili mo!”

Nagigirumduman ko pa kan mamibi ako, “Salamat po, Jehova, sa dai mo pagsuko sa sako asin sa pagtao mo sa sako nin dakul na oportunidad na makua an talagang hinahanap ko—an tunay na kaaraman sa Bibliya.” Naghagad ako nin tawad ki Felisa sa makulog na mga sinabi ko sa saiya. An mga diskutiran mi kaidto naribayan nin maugmang mga pag-uulay sa Bibliya. Nabawtismuhan ako kan 1989 sa edad na 61.

Felisa: Ngunyan sa edad na 91, balo na ako asin mayo nang kusog arog kan dati. Pero nagbabasa ako nin Bibliya aroaldaw, nag-aatender nin mga pagtiripon pag itinutugot kan salud ko, asin maugmang nakikikabtang sa ministeryo sagkod sa makakaya ko.

Araceli: Posibleng huling dati akong madre, gusto kong magpatotoo sa gabos na padi asin madre na nanunumpungan ko sa ministeryo. Dakul akong naipasakamot na publikasyon sa sainda asin nagkaigwa nin nagkapirang interesanteng pakikipag-ulay. Nagigirumduman ko kan an sarong padi, pagkatapos nin nagkapirang pagbisita ko sa saiya, nagsabi: “Araceli, uyon akong marhay sa saimo, pero masain pa man ako sa edad kong ini? Ano an sasabihon kan mga miyembro kan parokya saka kan pamilya ko?” Nagsimbag ako: “Ano man daw an sasabihon nin Diyos?” Mamundo siyang nagtango, pero kan panahon na iyan mayo siyang kusog nin buot tanganing padagos na hanapon an katotoohan.

Nagigirumduman ko an sarong espesyal na pangyayari sa buhay ko—kan inot na sabihon sa sako kan sakong agom na gusto niya akong ibanan sa pag-atender sa pagtiripon. Puon kaidto, dawa labi na siyang 80 anyos, mayo siyang napaltahan na pagtiripon. Nag-adal siya nin Bibliya asin nagin dai pa bawtisadong parahayag. Dakul kaming mauugmang panahon na magkaibanan sa ministeryo. Nagadan siya duwang bulan bago an aldaw kan saiyang bawtismo.

Felisa: An saro sa pinakanakapaugma sa sako iyo an mahiling an tulo kong mas hoben na tugang, na dating mga kontra sa sako, na magin mga sister ko na sa espirituwal. Talagang maugma kami pag magkairibanan asin nag-uurulay dapit sa satong namumutan na Diyos, si Jehova, asin sa saiyang Tataramon! Nagin sararo man giraray sa espirituwal kaming magturugang.a