“Nuarin an Sunod Tang Asembleya?”

HURING semana na kan Nobyembre 1932 sa Siyudad nin Mexico. Sarong semana pa sana an nakaagi kan sa kainot-inuting pagkakataon, lagan nin mga traffic light an sibot na siyudad na may labing sarong milyon na populasyon. Pero ngunyan, bako na iyan an pig-uurulayan kan mga tawo. An okasyon na sa semanang ini an pokus kan mga reporter sa siyudad. Nasa istasyon sinda nin tren asin may darang mga kamera. Hinahalat ninda an pag-abot kan sarong espesyal na bisita​—si Joseph F. Rutherford, an presidente kaidto kan Watch Tower Society. Naghahalat man duman an mga Saksi para maugmang akuon si Brother Rutherford, na nagbisita para sa saindang tulong aldaw na nasyonal na kumbensiyon.

“Mayong duda,” an sabi kan The Golden Age, “na an kumbensiyon na ini magigin parte kan kasaysayan bilang sarong okasyon na mahalagang marhay sa pagpalakop kan Katotoohan sa republika nin Mexico.” Mga 150 tawo sana an nag-atender digdi, pero taano ta mahalagang marhay an kumbensiyon na ini?

Bago an kumbensiyon na iyan, maluya an paglakop kan katotoohan sa Mexico. Puon 1919, may ginigibo nang saradit na asembleya, pero imbes na maglangkaw, buminaba an bilang nin mga kongregasyon kan suminunod na mga taon. Kan magkaigwa nin sangang opisina sa Siyudad nin Mexico kan 1929, garo baga magrarahay na an sitwasyon, pero may mga ulang pa man giraray. Kan magtao nin instruksiyon na dai isabay an pagnegosyo sa paghuhulit, may sarong colporteur na naanggot na marhay kaya nagbilog man siya nin sadiri niyang grupo nin pag-adal sa Bibliya. Kan panahon na iyan, nakagibo nin bakong suno sa Kasuratan an paraataman kan sangay kaya kinaipuhan ining salidahan. Kaipuhan nanggad nin pampakusog sa espirituwal kan maimbod na mga Saksi sa Mexico.

Kan magbisita si Brother Rutherford, pinakusog niyang marhay an maimbod na mga Saksing ini paagi sa pagtao nin duwang nakakapukaw sa buot na pahayag sa kumbensiyon asin limang mapuwersang pahayag sa radyo. Ini an inot na pagkakataon na ginamit kan mga tugang an mga istasyon nin radyo sa Mexico tanganing ipalakop an maugmang bareta sa bilog na nasyon. Pagkatapos kan kumbensiyon, inorganisar kan bagong nombradong paraataman kan sangay an gibuhon. Napakusog an mga Saksi huli kaiyan asin sa tabang ni Jehova, nagpadagos sindang maghulit.

Kan sunod na taon, bako sanang saro kundi duwang kumbensiyon an ginibo sa nasyon na iyan, an saro sa siyudad nin Veracruz asin an saro man sa siyudad nin Mexico. Nagkakaigwa na nin marahay na resulta an saindang maigot na paghuhulit. Kan 1931, igwa sanang 82 na parahayag, pero pakalihis nin sampulong taon, duminakul iyan nin sampulong doble! Mga 1,000 katawo an nagduman sa Siyudad nin Mexico tanganing mag-atender sa 1941 Theocratic Assembly.

“NASAKOP AN MGA TINAMPO”

Kan 1943, nagsulot an mga Saksi nin mga plakard tanganing ianunsiyo an “Free Nation’s” Theocratic Assembly na gigibuhon sa 12 siyudad sa Mexico.a Duwang plakard an isinasabit sa abaga—saro sa atubangan asin saro sa likod kaya garo sinda mga sandwich. Sarong pamamaagi ini nin pag-anunsiyo na ginagamit kaidto kan mga Saksi puon pa kan 1936.

Mapadapit sa mapangganang pag-anunsiyo gamit an mga plakard sa Siyudad nin Mexico, an magasin na La Nación nagkomento: “Kan inot na aldaw [nin asembleya], sinabihan [an mga Saksi] na mag-imbitar pa nin mga tawo. Kan sunod na aldaw, dai na sinda igo sa pigtitiripunan.” Dai naugma an Iglesiya Katolika sa marahay na epekto kan mga pag-anunsiyong ini, kaya nag-organisar sinda nin kampanya laban sa mga Saksi. Sa ibong kan pagkontra, padagos na nagduman sa mga tinampo an makusog an buot na mga tugang. Sinabi pa kan La Nación: “Nahiling sinda kan bilog na siyudad.” Sinabi kan artikulo na an mga brother asin sister “nagin nag-aanunsiyong mga ‘sandwich.’” Itinampok man diyan an sarong ritrato nin mga tugang sa mga tinampo sa siyudad nin Mexico. Sa ibaba kan ritrato, mababasa an kapsiyon na: “Nasakop an mga tinampo.”

“MGA HIGDAAN NA MAS MALUMHOK ASIN MAIMBONG KISA SA SEMENTADONG SALOG”

Kan mga taon na iyan, kaipuhan nin dakulang pagsakripisyo kan kadaklan na Saksi tanganing makaatender sa pirang kumbensiyon sa Mexico. Dakul na delegado an hali sa puwera asin hararayong mga baryo, na dai naaabot nin mga tren o mayo pa nganing mga tinampo. Kaya, kaipuhan kan mga delegado na sumakay sa mga mula o maglakaw nin dakul na aldaw tanganing makasakay sa tren pasiring sa siyudad na diyan gigibuhon an kumbensiyon.

Pobre an kadaklan sa mga Saksi duman—haros dai ninda kaya an pamasahe maski an pasiring sana sa kumbensiyon. Pakaabot ninda, dakul sa sainda an nakidagos sa mga tugang duman, na mamumuton na binuksan an saindang harong para sa mga delegado. An iba nakiturog sa mga Kingdom Hall. May pagkakataon na mga 90 delegado an nagdagos sa sangang opisina, na diyan “nagin turugan ninda an mga karton nin libro na pigtaraid-taid, tig-20 an kada saro sa sainda.” Sinabi kan Yearbook na nagpasalamat na marhay an mga bisita huling an “mga higdaan na [ini] mas malumhok asin maimbong kisa sa sementadong salog.”

Para sa mapag-apresyar na mga Saksing idto, sulit nanggad an gabos nindang isinakripisyo para makaatender sa maugmang Kristiyanong mga asembleya. Sa ngunyan, arog pa man giraray kaiyan kamapag-apresyar an mga parahayag sa Mexico, na masarong milyon na.b Ini an sinabi kan report kan sangay sa Mexico kan 1949 dapit sa mga tugang duman: “Dai napapaluya kan mga kasakitan na inaagihan ninda an saindang kaigutan sa pagsamba ki Jehova huling haloy na panahon nindang pinag-iiristoryahan an kada matapos na asembleya niyato, saka pirmi nindang ihinahapot, Nuarin an sunod tang asembleya?” Arog pa man giraray sinda kaiyan dawa ngunyan.​—Hali sa samong archive sa Amerika Sentral.