Pag Linoko Ka kan Saimong Agom

“Gusto ko nang magadan kan sabihon sako ni agom na babayaan niya na ako dahil igwa na siyang ibang babayi na mas hoben sako. Pagkatapos kan gabos na isinakripisyo ko para saiya, arog pa kaini an ginibo niya.”—Maria, taga Espanya.

“Kan bigla akong bayaan ni agom, garo may parte sa pagkatawo ko na nagadan. An mga pangarap mi, mga linalauman, saka mga plano, gabos nagkararaot. May mga aldaw na pagmati ko ayos na ako, pero bigla ko na sanang mamamati an grabeng kulog.”—Bill, taga Espanya.

SOBRANG kulog an puwedeng mamatian nin saro pag linoko nin agom. Totoo, nakakaya kan iba na patawadon an saindang agom asin maibalik giraray an marahay na pag-ibanan.a Pero, magkabalikan man o dai, an mga nakaeksperyensiya nin pangloloko kan agom talagang nakakamati nin grabeng kulog. Paano ninda iyan makakayanan?

MGA TEKSTO SA BIBLIYA NA MAKAKATABANG

Sa ibong nin grabeng kulog, dakul sa mga biktima nin pangloloko kan agom an naginhawahan kan mga nabasa ninda sa Bibliya. Naaraman ninda na nahihiling nin Diyos an saindang pagluha saka namamati an kulog na namamatian ninda.—Malakias 2:13-16.

“Kan magparadakul an ikinakahadit ko, rinanga asin pinaginhawa mo ako.”—Salmo 94:19.

“Pag binabasa ko an tekstong iyan, pagmati ko luway-luway na hinahali ni Jehova an namamatian kong kulog, arog kan ginigibo kan sarong mapagpadangat na ama,” an sabi ni Bill.

“Sa tawong maimbod mapahiling ka nin kaimbudan.”—Salmo 18:25.

“Linoko ako kan agom ko,” an sabi ni Carmen, na an agom dakul na bulan siyang linoko. “Pero makakapagtiwala ako na si Jehova maimbod sa sako. Dai niya lamang ako babayaan.”

“Dai kamo mahadit sa ano man na bagay, kundi sa gabos na bagay paagi sa pamibi asin pagngayo-ngayo . . . ipaaram nindo sa Diyos an saindong mga kahagadan; asin an katuninungan nin Diyos na nakakalabi sa gabos na pakasabot iyo an magbabantay sa saindong puso.”—Filipos 4:6, 7.

“Pauruutro kong binabasa an tekstong ini,” an sabi ni Sasha. “Mantang mas namimibi ako, tinatawan ako nin Diyos nin katuninungan.”

An gabos na nasambitan sa inutan nakamati minsan na sumuko na. Pero nagtiwala sinda sa Diyos na Jehova asin nakakua nin kusog huli sa pagbasa ninda kan Bibliya. Arog kaini an sinabi ni Bill: “An pagtubod ko an nagtaong saysay sa buhay ko kan haros raot na iyan. Maski kan panahon na naglakaw ako ‘sa kababan nin grabeng kadikluman’ nasa kaibahan ko an Diyos.”—Salmo 23:4.

a Kun baga mapatawad o dai na, makakatabang an serye sa Gumising! na Abril 22, 1999, “Kapag Nagtataksil ang Isang Kabiyak” sa pahina 3, 5, asin 9.

Kun Paano Nakayanan kan Iba

Hurop-hurupon an nakakapakusog na mga teksto.

“Binasa ko an libro nin Job saka Salmo,” an sabi ni Bill, “tapos minamarkahan ko an mga bersikulo na sa hiling ko aplikado sa inaagihan ko. Nahiling ko na maski an mga nagsurat na ini kan Bibliya nakamati man palan nin grabeng kulog saka pagkapurisaw arog kan namati ko.”

Magdangog nin nakakarepreskong musika.

“Pag nasasakitan akong magturog pag banggi, nagdadangog ako nin musika,” an sabi ni Carmen. “Nakakatabang talaga ’yan sako para maggian an pagmati ko.” Sinabi ni Daniel: “Nag-adal akong maggitara. Pag nagtutugtog ako, nakakatabang iyan para marelaks ako saka magkaigwa nin tuninong na isip.”

Ipakipag-ulay sa iba an namamatian mo.

“Dai ako tuod na sabihon sa iba an namamatian ko,” an sabi ni Daniel. “Pero may marahay akong mga amigo, na kinakaulay ko aroaldaw. Ilinuluwas ko sainda an namamatian ko paagi sa surat saka sa pakikipag-ulay sainda. Nakatabang talaga ‘yan sako.” Sinabi ni Sasha: “Talagang nakatabang sako an pamilya ko. Pirming yaon si Mama para sako. Pag may gusto akong sabihon, nagdadangog siya. Ipinamati man sako ni Papa na padangat niya ako saka dai papabayaan. Inalalayan niya ako na makabangon.”

Mamibi pirmi.

“Pirmi akong namimibi,” an sabi ni Carmen. “Pagmati ko, yaon lang sa kataid ko an Diyos, na dinadangog ako saka tinatabangan. Sa masakit na parteng ini kan buhay ko, lalo akong nagin harani sa Diyos.”