Puwede Kang Magin Maugma Dawa Ngunyan

MAGIN KONTENTO

An sadol kan Bibliya: “An saindo lugod na pamumuhay dai mahilingan nin pagkamuot sa kuwarta, mantang kontento na kamo sa kun ano an igwa kamo.”—Hebreo 13:5.

Pinapauranan kita kan kinaban ngunyan nin mga serbisyo asin produkto na kaipuhan ta daa. Alagad, an Bibliya nagsasabi na puwede kitang magin “kontento . . . sa kun ano an igwa [kita].” Paano?

Likayan “an pagkamuot sa kuwarta.” Isinasakripisyo kan mga tawo an saindang salud, pamilya, amigo, moralidad, dawa an saindang dignidad—huli sa “pagkamuot sa kuwarta.” (1 Timoteo 6:10) Nakakamundo nanggad iyan! Sa huri, an namumuot sa kayamanan “dai nanggad makokontento.”—Parahulit 5:10, BPV.a

Pahalagahan an mga tawo, bako an materyal na bagay. Totoo, kapaki-pakinabang an materyal na mga bagay. Pero an mga bagay na iyan dai kita kayang pahalagahan o mamutan; an mga tawo sana an makakagibo kaiyan. An pagkaigwa nin tunay na amigo nakakatabang na magin kontento kita sa buhay.—Talinhaga 17:17.

PAGTAGAL SA IBONG NIN PAGHILANG

An sadol kan Bibliya: ‘An magaya-gayang puso sarong marahay na bulong.’—Talinhaga 17:22, BPV.

Arog nin ‘marahay na bulong,’ nakakatabang an kaugmahan tanganing matagalan an paghilang. Pero paano kita magigin maugma kun igwa kita nin hilang?

Magin mapagpasalamat. Kun pirmi tang iniisip an satong problema, ‘an gabos na mga aldaw’ magigin bakong magayon. (Talinhaga 15:15) Imbes, “ipahiling nindo na mapagpasalamat kamo,” an sabi kan Bibliya. (Colosas 3:15) Magin mapag-apresyar sa marahay na mga bagay sa buhay, dawa sa simpleng mga bagay. An magayon na pagsulnop kan saldang, preskong duros, pagngirit nin sarong namumutan—mga bagay ini na nagpapaugma sa sato.

Gumibo nin mga bagay para sa iba. Dawa maluya na an satong salud, “igwang urog na kaugmahan sa pagtao kisa sa pag-ako.” (Gibo 20:35) Pag inaapresyar kan iba an satong paghihinguwa, nakakamati kita nin satispaksiyon, kaya nairarayo kaiyan sa satong isip an mga problema. Magigibo tang magin mas maugma an satong buhay paagi sa pagtabang man sa iba na magin maugma.

PAKUSUGON AN SAINDONG RELASYON BILANG MAG-AGOM

An sadol kan Bibliya: “[Siyertuhon] nindo kun ano an mas importanteng mga bagay.”—Filipos 1:10.

An mag-agom na bihirang nagkakaibanan, namemeligro na maraot an saindang relasyon. Sarong kadunungan para sa mga mag-agom na tawan nin priyoridad an saindang relasyon—an saro sa pinakaimportante sa saindang buhay.

Paggibo na magkaibanan. Imbes na magsolo, taano ta dai magplano na magkaibanan na gibuhon an mga bagay-bagay? Sinasabi kan Bibliya na mas ‘marahay an duwa kisa sa saro.’ (Parahulit 4:9) Puwede kamong magkaibanan na magluto, mag-ehersisyo, magkape-kape, o gibuhon an kinahihiligan nindo.

Ipahiling an saimong pagkamuot. Dinadagka kan Bibliya an mga mag-agom na mamutan asin igalang an lambang saro. (Efeso 5:28, 33) An simpleng pagngirit, mamumuton na kugos, o simpleng regalo dakula an magigibo para mapakusog an relasyon kan mag-agom. Siyempre, an sarong agom dapat na magpahiling nin seksuwal na interes sa saiyang agom sana.—Hebreo 13:4.