Ialok an Daan na mga Publikasyon Ngonyan na Enero
1 Manongod sa satong pagtotokdo, si Jesus nagsabi: “An lambang paratokdo sa publiko, kun natokdoan manongod sa kahadean kan kalangitan, nakaaagid sa sarong tawo . . . na ilinuluwas hale sa saiyang itinatagong kayamanan an mga bagay na bago asin daan.” (Mat. 13:52) Iyo, minsan ngani ikinaoogma niatong ialok sa mga tawo an bagong mga publikasyon, kadakol kan mararahay na ‘kayamanan’ sa daan na mga publikasyon na itinao ni Jehova. Sa Enero asin Pebrero magkakaoportunidad kita na ialok ini sa mga nasa satong teritoryo, asin sinasadol mi an gabos na magkaigwa nin lubos asin entusiastikong pakikikabtang sa kampanya.
MGA PUBLIKASYON NA MAGAGAMIT NIATO
2 An mga publikasyon na ikaaalok niato sa mas hababang kontribusyon ilinista sa An Satong Ministeryo sa Kahadean kan Nobyembre. Sa presente igwa kita nin 57,000 gabos na daan na libro (pareho sa maputing papel asin sa newsprint), asin 60,000 na daan na mga pulyeto. Sa Iloko sana igwa kita nin 25,000 na libro sa newsprint. Alagad mantang igwa nin mga 25,000 na parahayag na Iloko, kun an kada saro makawawaras nin saro sana kan mga librong ini, iyan gabos ikawawaras sa katapusan nin Pebrero! Gigibohon daw nindo an saindong kabtang bilang indibiduwal? Sa Cebuano mayo na kita nin libro sa newsprint pero igwa pa kita nin mga 8,000 na libro sa maputing papel na ikaaalok sa kontribusyon na kabanga sa dati. Sa Tagalog mayo kita nin librong magagamit, pero igwa kita nin 36,000 na pulyeto na ikaaalok sa kontribusyon na 75¢ o ₱2.25 an 3. An mga pulyetong ini gabos igwa nin inimprentang hapot kaya marahayon para sa pagpopoon nin mga pag-adal sa Biblia.
3 Sa Hiligaynon, Pangasinan asin Samar-Leyte, partikularmente kitang interesado sa pagwaras kan librong Good News to Make You Happy kaya boot ming sadolon an mga tugang sa mga lugar na ini na pedidohon an libro asin gamiton iyan sa langtad. Sa Bicol igwa pa kita nin suplay kan mga librong Katotoohan asin Tunay na Katoninongan na magagamit sa kampanya.
4 Kun an saindong kongregasyon dai pa nakapedido sa Sosyedad, may panahon pang gibohon iyan. Sinasadol mi an gabos na payunir asin parahayag na lubos na suportaran an kampanyang ini. Minsan ngani ini daan na mga publikasyon, girumdomon na an mga iyan nakatabang na madara sa katotoohan an ginatos na ribo asin kun siring iyan igwa nin espirituwal na mga kayamanan na makatatao nin buhay sa mga minakuyog dian.